Tɔm kɩbandʋ susuyaa

YEHOWA ha-ɖʋ weyi ɛtalɩ pilim yɔ ɛ-kɩɖaʋ se ɖɩtɩŋ-kʋ; ɛnʋ lɛ ɛ-Pɩyalʋ Yesu Krɩstʋ. (1 Pɩy. 2:21) Alɩwaatʋ ndʋ nɔɔyʋ pɩsɩɣ Yesu wayɩ tɩŋɩyʋ yɔ, ɛpɩsɩɣ ɖɔɖɔ Ɛsɔtɔm kɩbandʋ susuyu. Yesu wɩlaa se tʋmɩyɛ nɖɩ, ɖɩkpazɩɣ ɖoŋ fezuu taa; pʋyɔɔ ɛyɔɔdaa se: “Ɩkɔɔ mɔn-cɔlɔ, mɩ mba payɩ ɩlakɩ kʋñɔŋ nɛ sʋʋtʋ nɩ-mɩ yɔ, nɛ mankaɣ hɛzʋʋ mɩ-laŋa. Ɩkpaɣ man-sʋʋtʋ ɖaʋ nɛ ɩhɔɔlɩ nɛ ɩkpɛlɩkɩ mɔn-cɔlɔ, mbʋ pʋyɔɔ yɔ mɛnkɛ laŋɩyɛ hɛɛɛ tʋ nɛ moluzuu man-tɩ, nɛ ɩkaɣ hiɣu laŋɩyɛ hɛzʋʋ.” (Mat. 11:28, 29) Mba petisaa nɛ palakɩ tʋmɩyɛ nɖɩ yɔ panawa se tɔm ndʋ, tɩkɛ toovenim!

² Yesu weyi ɛkɛ Ɛsɔ Tɔm Susuyu Sɔsɔ yɔ, ɛya nabɛyɛ se papɩsɩ ɛ-wayɩ tɩŋɩyaa. (Mat. 9:9; Yoh. 1:43) Ɛfalɩsɩ-wɛ nɛ etiyi-wɛ se powolo pala tɔm susuu tʋmɩyɛ ɛzɩ ɛ-maɣmaɣ yɔ. (Mat. 10:1–11:1; 20:28; Luka 4:43) Pʋwayɩ lɛ, etiyi tɔmkpɛlɩkɩyaa 70 lalaa se powolo nɛ posusi Ɛsɔ Kewiyaɣ tɔm kɩbandʋ. (Luka 10:1, 8-11) Etiyi-wɛ lɛ, eheyi-wɛ se: “Weyi ewelisiɣni-mɩ yɔ, ewelisiɣni-m. Nɛ weyi ekiziɣ-mɩ yɔ ekiziɣ-m ɖɔɖɔ. Pɩtasɩ lɛ, weyi ekiziɣ-m yɔ, ekiziɣ ɖɔɖɔ Weyi etiyi-m yɔ.” (Luka 10:16) Pɩtɩŋnɩ tɔm pee anɛ a-yɔɔ lɛ, Yesu heyi ɛ-wayɩ tɩŋɩyaa mbʋ pʋyɔɔ tʋmɩyɛ nɖɩ ɖɩ-tɔm cɛyaa yɔ. Pakaɣ kɛʋ Yesu nɛ Ɛsɔ Kɩlɩm pa-tʋmlaɖaa. Sɔnɔ ɖɔɖɔ ye nɔɔyʋ etisi Yesu tɔm yɔɔ nɛ ɛkɔɔ nɛ ‘ɛpɩsɩ ɛ-wayɩ tɩŋɩyʋ’ yɔ, ɛlɛ ɖɔɖɔ ɛkɛɣ pa-tʋmlaɖʋ. (Luka 18:22; 2 Kɔr. 2:17) Mba payɩ petisi yatʋ ndʋ yɔ, papɩsɩ Ɛsɔ Kewiyaɣ tɔm kɩbandʋ susuyaa nɛ palakɩ ɖɔɖɔ kpɛlɩkɩyaa.—Mat. 24:14; 28:19, 20.

³ Ðitisi Yesu yatʋ nɛ ɖɩtɩŋ ɛ-wayɩ, mbʋ yebina nɛ pɩsɩnɩ-ɖʋ nɛ ‘ɖɩwɛɛ nɛ ɖɩtɩlɩɣ’ Yehowa Ɛsɔ nɛ Yesu Krɩstʋ. (Yoh. 17:3) Ðɩwɛɛ nɛ ɖɩkpɛlɩkɩɣ se ɖɩtɩlɩ Yehowa nʋmɔŋ. Yehowa sɩɣnɩ-ɖʋ se ɖɩwɛɛnɩ maɣzɩm kɩbam, ɛyʋtʋ kɩfatʋ nɛ ɖe-wezuu caɣʋ la nɔɔ kʋɖʋmaɣ nɛ ɛ-paɣtʋ kila. (Roma 12:1, 2; Efɛz. 4:22-24; Kol. 3:9, 10) Ɛzɩma ɖɩsɔɔlɩ Yehowa nɛ ɖa-laŋɩyɛ pilim yɔ pʋyɔɔ lɛ, ɖiyeki se pamɩyɩsɩ-ɖʋ lɩm nɛ pɩwɩlɩ se ɖɩha-ɩ ɖa-tɩ. Pamɩyɩsɩɣ-ɖʋ lɩm lɛ, pɩwɩlɩɣ se Ɛsɔ lɩzɩ-ɖʋ se ɖɩkɛ tɔm susuyaa.

⁴ Pɩwɛɛ se ɖɩtɔzʋʋ paa ɛzɩmtaa se, pɩmʋnaa se ɖɩlakɩ Ɛsɔ tʋmɩyɛ nɛ laŋɩyɛ kɩbanɖɛ nɛ nesi kele kele. (Keɣa 23:3, 4; Iza. 52:11; 2 Kɔr. 6:14–7:1) Ðɩwɛnɩ tisuu Yesu yɔɔ, mbʋ yebina nɛ ɖɩwɛɛnɩ ɛhʋyɛ kɩbanɖɛ. (Ebr. 10:19-23, 35, 36; Natʋ 7:9, 10, 14) Apostoloo Pɔɔlɩ paɣ Krɩstʋ ñɩma se palakɩ pɩtɩŋa Ɛsɔ samtʋ yɔɔ nɛ pataayele nɛ pituuli nɔɔyʋ. Apostoloo Pɩyɛɛrɩ ñɩɣ niye tɔm ndʋ tɩ-yɔɔ nɛ ɛyɔɔdɩ se wezuu kɩbaŋʋ caɣʋ pɩzɩɣ piyele nɛ mba pɛfɛyɩnɩ tisuu yɔ, pɔkɔɔ toovenim taa. (1 Kɔr. 10:31, 33; 1 Pɩy. 3:1) Ɛzɩma ŋpɩzɩɣ nɛ ŋsɩnɩ nɔɔyʋ nɛ ɛmʋna nɛ ɛpaɣzɩ tɔm kɩbandʋ susuu ɛzɩ ɖa yɔ?

TƆM SUSUYAA KƖFAMA

⁵ Alɩwaatʋ ndʋ ŋpaɣzɩɣ kpɛlɩkɩnʋʋ nɔɔyʋ Bibl lɛ, pɩwɛɛ se ŋseɣti-i se eheyiɣ lalaa tɔm ndʋ ɛkpɛlɩkɩɣ yɔ. Ɛpɩzɩɣ nɛ ɛtɩŋnɩ alɩwaatʋ fanʋʋ yɔɔ nɛ ɛyɔɔdʋʋnɩ ɛ-hɔʋ taa ñɩma, ɛ-taabalaa, ɛ-tʋmɩyɛ taa mba nɛ ɛyaa lalaa. Pɩkɛ nʋmɔʋ kɩbaŋʋ ŋgʋ kɩ-yɔɔ ŋpɩzɩɣ ŋtɩŋna nɛ ŋkpɛlɩkɩ ɛyaa kɩfama ɛzɩma papɩzɩɣ nɛ papɩsɩ Yesu Krɩstʋ wayɩ tɩŋɩyaa, nɛ pɛkɛ tɔm kɩbandʋ susuyaa yɔ. (Mat. 9:9; Luka 6:40) Alɩwaatʋ ndʋ tɔmkpɛlɩkɩyʋ nɔɔyʋ wɛɣ nɛ ɛpɩɣ fezuu taa nɛ ɛtɩŋɩɣnɩ alɩwaatʋ fanʋʋ yɔɔ nɛ esusuu tɔm yɔ, pɩtʋʋ fɛyɩ se ɛkaɣ sɔɔlʋʋ se paha-ɩ waɖɛ nɛ ɛpɩsɩ tɔm susuyu.

WƐTƲ NDƲ PƖWƐƐ SE ƐYƲ ƐWƐƐNA PƲCƆ NƐ ƐPAƔZƖ TƆM SUSUU?

⁶ Pʋcɔ nɛ Bibl kpɛlɩkɩyʋ nɔɔyʋ paɣzɩ-ɖʋ sɩʋ nɛ esusuu tɔm kpaɣ ɖɩɣa nɛ ŋwolo ɖɩɣa lɛ, pɩwɛɛ se ɛwɛɛnɩ wɛtʋ natʋyʋ. Ɛyaa naɣ ɖa nɛ nɔɔyʋ tɔm susuu taa lɛ, pamaɣzɩɣ se ɛkɛ Yehowa Aseɣɖe Tʋ ɖɔɖɔ. Pʋyɔɔ pɩwɛɛ se ɛla lɛɣzɩtʋ e-wezuu caɣʋ taa nɛ pɩla nɔɔ kʋɖʋmaɣ nɛ Yehowa paɣtʋ kila, pʋcɔ nɛ ɛkɛ tɔm susuyu weyi patɩmɩyɩsɩtɩ-ɩ lɩm yɔ.

⁷ Ɛzɩma ŋkpɛlɩkɩɣnɩ nɔɔyʋ Bibl nɛ ña nɛ ɩ ɩtazɩɣ Bibl paɣtʋ kila taa yɔ, pɩsɩɣnɩ-ŋ nɛ ŋtɩlɩ wɛtʋ ndʋ tɩ-taa ɛwɛɛ yɔ. Pɩtɩla ŋkaɣ naʋ se e-wezuu caɣʋ wɛɛ nɛ kɩlakɩ nɔɔ kʋɖʋmaɣ nɛ tɔm ndʋ ɛwɛɛ nɛ ɛkpɛlɩkɩɣ yɔ. Ɛlɛ pɩpɔzʋʋ se ɛzʋtʋyaa ɩkatɩ ña nɛ ɩ mɩ-naalɛ nɛ patazɩ e-wezuu caɣʋ hɔɔlɩŋ nɩɩyɩ taa.

⁸ Ɛgbɛyɛ taa ɛzʋtʋyaa tʋmɩyɛ kpɛndɩyʋ lakɩ ɖʋtʋ nɛ ɛzʋtʋyaa naalɛ katɩ ña nɛ ñe-Bibl kpɛlɩkɩyʋ nɛ patazɩ tɔm ndʋ tɩ-taa (pɩwɛɛ se ɛzʋtʋyaa mba pa-taa kʋɖʋm ɛkɛ weyi ɛwɛ Ɛsɔ sɛtʋ tʋmɩyɛ kɔɔmiite taa yɔ). Ye ɛzʋtʋyaa ɩtɩɖɔɔ ɛgbɛyɛ naɖɩyɛ taa yɔ, ɛgbɛyɛ taa tʋmlaɖʋ weyi ɛwɛ niye yɔ ɛpɩzɩɣ nɛ ɛsɩnɩ ɛzʋtʋyʋ nɔɔyʋ nɛ pala tʋmɩyɛ nɖɩ. Pɩwɛɛ se koobiya mba paɖʋ tʋmɩyɛ ɖɩnɛ yɔ, palabɩ-ɖɩ kpɛdɛyɛ. Ye peheyi-wɛ tɔm ndʋ kediɣzaɣ nakɛyɛ taa yɔ, papɩzɩɣ pɔyɔɔdɩnɩ ña nɛ ñe-Bibl kpɛlɩkɩyʋ alɩwaatʋ ndʋ kediɣzaɣ tɛŋ yɔ. Pɩwɛɛ se pɩkɛ kɛdaɣ ŋga ka-taa paa weyi ɛpɩzɩɣ nɛ ɛyɔɔdɩ faaa nɛ sɔɔndʋ ɛɛkpaɣ-ɩ yɔ. Pʋcɔ nɛ paha Bibl kpɛlɩkɩyʋ nɔɔyʋ waɖɛ se ɛpɩsɩ tɔm susuyu weyi patɩmɩyɩsɩtɩ-ɩ lɩm yɔ lɛ, pɩwɛɛ se ɛzʋtʋyaa iɖiɣzina se ɛwɛnɩ tisuu se tɔm ndʋ tɩkɔŋ yɔ, tɩkɛ toovenim:

1. (1) Etisiɣ se Bibl lɩnɩ Ɛsɔ cɔlɔ.—2 Tim. 3:16.

2. (2) Ɛsɩm Bibl kajalaɣ wɩlɩtʋ camɩyɛ, ɛwɛnɩ tisuu tɩ-yɔɔ nɛ ye nɔɔyʋ ɛpɔzɩ-ɩ tɔm yɔ, ɛɛlakɩnɩ cɛtɩm Ɛsɔ sɛtʋ wɩlɩtʋ yaa ɛ-maɣmaɣ ɛ-lɩmaɣza tʋmɩyɛ, ɛlɛ Masɩ ɛlakɩnɩ tʋmɩyɛ se ecosi.—Mat. 7:21-23; 2 Tim. 2:15.

3. (3) Ye wɛtʋ ndʋ tɩ-taa ɛwɛɛ yɔ tɩhaɣ-ɩ nʋmɔʋ yɔ, ɛɖɔŋ Bibl paɣtʋ ndʋ tɩtɔŋ se ɛ nɛ Yehowa samaɣ pekpeɣliɣ Kpaaŋ taa nɛ palakɩ kediɣzisi yɔ tɩ-yɔɔ.—Keɣa 121:1; Ebr. 10:24, 25.

4. (4) Ɛsɩm tɔm ndʋ Bibl wɩlɩɣ acɛyɛ, halaa sakɩyɛ kpaɣʋ, abalaa nɛ abalaa yaa halaa nɛ halaa ɖama sʋnʋʋ nɛ kʋzʋʋ kɩdɛkɛdʋʋ lakasɩ lɛɛsɩ yɔɔ yɔ, nɛ e-wezuu caɣʋ labɩ nɔɔ kʋɖʋmaɣ nɛ tɔm ndʋ Bibl wɩlɩɣ yɔ. Ye ɛ nɛ nɔɔyʋ pɛwɛ ɖama cɔlɔ ɛzɩ abalʋ nɛ ɛ-halʋ yɔ, pɩwɛɛ se pɔɖɔkɩ nesi ɛzɩ paɣtʋ pɔzʋʋ yɔ.—Mat. 19:9; 1 Kɔr. 6:9, 10; 1 Tim. 3:2, 12; Ebr. 13:4.

5. (5) Ɛɖɔŋ Bibl paɣtʋ ndʋ tikiziɣni-ɖʋ se ɖɩtaakpaŋ sʋlʋm nɛ ɖɩtaalakɩnɩ tʋmɩyɛ tabakʋʋyaɣ, yaa kɔɔ wena apɩzɩɣ ayele nɛ pisidi ɛyʋ lɩmaɣza taa, ye pɩtɩkɛ ɖɔkɔtɔ nɔɔyʋ manɩ-ɩ yɛ yɔ.—2 Kɔr. 7:1; Efɛz. 5:18; 1 Pɩy. 4:3, 4.

6. (6) Ɛnawa se taabalɩyɛ kɩdɛkɛdɩyɛ ɖʋʋ fɛyɩ ɖeu.—1 Kɔr. 15:33.

7. (7) Ye ɛɛwɛ cɛtɩm Ɛsɔ sɛtʋ ɛgbɛyɛ naɖɩyɛ taa yɔ, ɛlɩzɩ ɛ-tɩ ɖɩ-taa nɛ ɛ nɛ ɖɩ-taa ñɩma paatasɩɣ nabʋyʋ labʋ. Ɛɛtasɩɣ wobu pa-kpaamɩŋ taa nɛ ɛɖʋʋ-wɛ nesi pa-tʋma taa.—2 Kɔr. 6:14-18; Natʋ 18:4.

8. (8) Ɛɛɖʋʋ ɛ-nɔɔ ɛjaɖɛ yɔɔ politiki tɔm taa.—Yoh. 6:15; 15:19; Yak. 1:27.

9. (9) Etisiɣ tɔm ndʋ Izaayii 2:4 yɔɔdɩ ɛjaɖɛ yɔɔ kominawaa yɔɔ yɔ tɩ-yɔɔ, nɛ e-wezuu caɣʋ lakɩ nɔɔ kʋɖʋmaɣ nɛ tɔm ndʋ.

10. (10) Ɛsɔɔlɩ kpem se ɛkɛ Yehowa Aseɣɖe Tʋ.—Keɣa 109:3.

⁹ Ye ɛzʋtʋyaa taa ɛtɩtɛ nɛ pamaɣzɩɣ se Bibl kpɛlɩkɩyʋ ɛnʋ ɛtɩnɩɩ tɔm ndʋ tɩ-taa natʋyʋ taa camɩyɛ yɔ, papɩzɩɣ nɛ pa nɛ ɩ patazɩ masɩ nzɩ pahawa yɔ sɩ-taa nasɩyɩ taa. Pɩcɛyaa se ɛnɩɩ pɩ-taa se mba pa nɛ Yehowa Aseɣɖe Tɩnaa posusuu tɔm yɔ, pɩwɛɛ se pe-wezuu caɣʋ ɛla nɔɔ kʋɖʋmaɣ nɛ Bibl masɩ sɩnɛ. Paa weyi ɛ-wɛtʋ wɛ ndɩ, ɛlɛ ɛzɩma ecosuu tɔm yɔɔ yɔ, pɩsɩɣnɩ ɛzʋtʋyaa nɛ pana se ɛsɩm mbʋ pɩpɔzʋʋ yɔ, nɛ ɛmʋnaa se ɛpaɣzɩ tɔm susuu.

¹⁰ Ye Bibl kpɛlɩkɩyʋ ɛmʋnaa yaa ɛtɩmʋnaa yɔ, pɩwɛɛ se ɛzʋtʋyaa iheyi-i kpaagbaa. Alɩwaatʋ sakɩyɛ taa lɛ, pɛtɛŋ tɔm taa tazʋʋ kpaagbaa lɛ peheyiɣ-i tʋ. Ye ɛmʋnaa yɔ, ɛzʋtʋyaa saŋɩ-ɩ nɛ palabɩ-ɩ talɩ ɖeu mbʋ pʋyɔɔ ɛpɩsɩ tɔm susuyu. (Roma 15:7) Pɩwɛɛ se peseɣti-i nɛ ɛpaɣzɩ tɔm susuu lɔŋ nɛ fenaɣ sɩkɩ lɛ, ɛcɛlɩ tɔm susuu akɔnta. Ɛzʋtʋyaa pɩzɩɣ nɛ palɩzɩ-ɩ pɩ-taa se Bibl kpɛlɩkɩyʋ nɔɔyʋ wɛtʋ ɛmʋnaa se ɛkɛ tɔm susuyu yɔ, ɛcɛlɩɣ tɔm susuu akɔnta kajalaɣ ɖeɖe lɛ, pamaɣ ɛ-hɩɖɛ Tɔm susuyu tʋmɩyɛ takayaɣ nakɛyɛ yɔɔ. Ɛgbɛyɛ taa ɛzʋtʋyaa pɔzʋʋ akɔntanaa mba se pɩsa nɛ ɛgbɛyɛ tɩlɩ ɛzɩma Yehowa Aseɣɖe Tɩnaa Ɛsɔ sɛtʋ tʋma wɛɛ nɛ aɖɔŋ ɛjaɖɛ kpeekpe yɔɔ yɔ. Piyeki ɖɔɖɔ nɛ ɛzʋtʋyaa pɩzɩ nɛ pasɩnɩ tɔm susuyu fezuu taa, alɩwaatʋ ndʋ ɛɖʋʋ nesi tʋma ana yɔ. Pɩtasɩ lɛ, ɛzʋtʋyaa pɩzɩɣ nɛ pɔtɔzɩ tɔm susuyaa kɩfama se pɔ-yɔɔ tɔm ndʋ peheyiɣ ɛzʋtʋyaa yɔ, paalakɩnɩ-tʋ tʋmɩyɛ lɛ, pɔɖɔŋ ɛjaɖɛ kpeekpe yɔɔ Yehowa Aseɣɖe Tɩnaa tɛ ɛyʋ yɔɔ tɔm tʋmɩyɛ labɩnʋʋ paɣtʋ ndʋ tɩwɛ jw.org yɔɔ yɔ.

¹¹ Ye ɖɩñaɣ pana nɛ ɖɩtɩlɩ tɔm susuyu kɩfalʋ camɩyɛ nɛ ɖɩsɩɣnɩ-ɩ tɔm susuu taa ɖɔɖɔ yɔ, pɩkpazɩɣ-ɩ ɖoŋ siŋŋ. Pɩpɩzɩɣ piseɣti-i nɛ paa fenaɣ ŋga lɛ, ɛlakɩ e-ɖoŋ ɖeɖe nɛ ɛcɛlɩɣ tɔm susuu akɔnta nɛ ɛñakɩ pana ɖɔɖɔ se ɛla e-ɖoŋ ɖeɖe Yehowa tʋmɩyɛ taa.—Fil. 2:4; Ebr. 13:2.

¹² Ye ɛzʋtʋyaa ɩnawa se Bibl kpɛlɩkɩyʋ nɔɔyʋ mʋnaa se ɛpɩsɩ tɔm susuyu yɔ, pɩpɔzʋʋ se pɛcɛlɩ-ɩ Pɔñɔɔzɩ pa-tɩ se pala Yehowa sɔɔlɩm takayaɣ. Tɔm susuyu kɩfalʋ cɛlɩɣ ɛ-kajalaɣ tɔm susuu akɔnta lɛ, posusi ɛgbɛyɛ ɛsɩndaa se ɛpɩsɩ tɔm susuyu weyi patɩmɩyɩsɩtɩ-ɩ lɩm yɔ.

ÐƖSƖNƖ PIYA EVELISI

¹³ Piya evelisi ɖɔɖɔ pɩzɩɣ nɛ sɩla mbʋ pɩpɔzʋʋ yɔ nɛ sɩpɩsɩ tɔm kɩbandʋ susuyaa. Yesu kaamʋ piya camɩyɛ nɛ ɛwazɩ-sɩ. (Mat. 19:13-15; 21:15, 16) Pɩkɛ toovenim se lʋlɩyaa pɩwɛɛ se pacalɩ sɩnʋʋ pe-piya, ɛlɛ ɛgbɛyɛ taa koobiya lalaa ɖɔɖɔ pɩzɩɣ nɛ paɖʋ nesi piya evelisi nzɩ sɩsɔɔlaa se sɩla Kewiyaɣ tɔm susuu tʋmɩyɛ yɔ. Ye ŋkɛ lʋlɩyʋ yɔ, kpekpeka ŋga ŋwɛnɩ tɔm susuu taa yɔ, kapɩzɩɣ keseɣti ñe-piya nɛ sɩla ɖɔɖɔ Ɛsɔ tʋmɩyɛ nɛ kpekpeka. Ɛbɛ papɩzɩɣ pala nɛ pasɩnɩ pɩɣa ŋga kacakɩ wezuu kɩbaŋʋ nɛ kañɩnɩɣ se kosusi ke-tisuu tɔm lalaa yɔ?

¹⁴ Pɩwɛɣ ɖeu se pɩɣa ŋga, ka-lʋlɩyʋ nɔɔyʋ ɛyɔɔdɩnɩ ɛzʋtʋyaa mba pɛwɛ ɛgbɛyɛ taa Ɛsɔ sɛtʋ Kɔɔmiite taa yɔ, pa-taa nɔɔyʋ nɛ patazɩ nɛ pana se kamʋnaa se kapɩsɩ tɔm susuyu yaa we. Ɛzʋtʋyaa tʋmɩyɛ kpɛndɩyʋ lakɩ ɖʋtʋ nɛ ɛzʋtʋyaa naalɛ katɩ pɩɣa ŋga nɛ ka-lʋlɩyʋ yaa ka-lʋlɩyaa mba pɛkɛ Aseɣɖe Tɩnaa yɔ, yaa weyi ɛcɔŋnɩ kɔ-yɔɔ yɔ (pɩwɛɛ se ɛzʋtʋyaa mba pa-taa kʋɖʋm ɛkɛ weyi ɛwɛ Ɛsɔ sɛtʋ tʋmɩyɛ kɔɔmiite taa yɔ). Ye pɩɣa ŋga kasɩm Bibl kajalaɣ wɩlɩtʋ camɩyɛ nɛ pɩnaɣ kaɣlaa se kɔsɔɔlaa se kosusi tɔm yɔ, pɩwɩlɩɣ se kowobini ɛsɩndaa fezuu taa. Ye ɛzʋtʋyaa naalɛ waa mba patazɩ tɔm tʋnɛ nɛ tɔm lɛɛtʋ ndʋ tɩ-taa pa nɛ ɛyaa sɔsaa patazɩɣ yɔ tɩ-taa yɔ, papɩzɩɣ nɛ pana se pɩɣa ŋga kamʋnaa yaa katɩmʋna se kapɩsɩ tɔm susuyu weyi patɩmɩyɩsɩtɩ-ɩ lɩm yɔ. (Luka 6:45; Roma 10:10) Pɩtɩcɛyɩ se patazɩ tɔm ndʋ pa nɛ ɛyaa sɔsaa patazɩɣ tɩ-taa nɛ tiitukuuni piya yɔ tɩ-taa.

¹⁵ Pɩpɔzʋʋ se ɛzʋtʋyaa ɩsa pɩɣa ŋga mbʋ pʋyɔɔ yɔ, kañaɣ pana nɛ kowobini ɛsɩndaa fezuu taa, nɛ peseɣti-kɛ se kaɖʋ ka-tɩ lɩm mɩyɩsʋʋ kaɖʋwa. Lʋlɩyaa ɖɔɖɔ mʋnɩ samtʋ mbʋ pʋyɔɔ yɔ, pañaɣ pana siŋŋ nɛ pasɩnɩ pa-pɩɣa nɛ kɔsɔɔlɩ toovenim tɔm. Pɩsa nɛ ɛzʋtʋyaa ɖʋ nesi lʋlɩyaa nɛ powolo pɩ-yɔɔ nɛ pasɩɣnɩ pa-pɩɣa lɛ, papɩzɩɣ pɔhɔ pa-lɩmaɣza nɛ powoni tɔm ñʋʋ kʋnɛ kɩ-yɔɔ: “Lɔŋ tasʋʋ lʋlɩyaa Krɩstʋ ñɩma.” Kɩwɛ takayaɣ kanɛ kɔ-hɔɔlɩŋ 179-181 yɔɔ.

TƖ HAƲ NƐ LƖM MƖYƖSƲƲ

¹⁶ Ye ŋkpɛlɩkaa nɛ ŋtɩlɩ Yehowa, ŋcakɩ wezuu kɩbaŋʋ nɛ ŋsusuu tɔm yɔ, pɩwɩlɩɣ-ɩ se ŋsɔɔlɩ-ɩ, ɛlɛ pɩcɛyaa se ŋcɛyɩsɩ taabalɩyɛ nɖɩ ɖɩwɛ ña nɛ ɩ mɩ-hɛkʋ taa yɔ camɩyɛ. Ɛbɛ pɩzɩɣ pɩsɩnɩ-ŋ nɛ ŋla mbʋ? Pɩwɛɛ se ŋkpaɣ ña-tɩ nɛ ŋha-ɩ nɛ ŋyele nɛ pamɩyɩsɩ-ŋ lɩm, nɛ pɩwɩlɩ kaɣlaa se ŋha-ɩ ña-tɩ.—Mat. 28:19, 20.

¹⁷ Tɩ haʋ tɔbʋʋ lɛ se, ɛyʋ kpaɣ ɛ-tɩ nɛ ɛha se ɛla tʋmɩyɛ nɖɩ ɖɩwɛ kele kele yɔ. Pɩsa nɛ ŋha ña-tɩ Ɛsɔ lɛ, pɩpɔzʋʋ se ŋyɔɔdɩnɩ-ɩ adɩma taa nɛ ŋla tamaɣ se ŋkaɣ kpaɣʋ ñe-wezuu kpeekpe se ŋlabɩnɩ ɛ-tʋmɩyɛ nɛ ŋɖɔ ɖɔɖɔ ɛ-nʋmɔŋ taa. Pʋ-tɔbʋʋ lɛ se ɛ-sɔɔlɩm ɖeke ŋkaɣ labʋ ñe-wezuu caɣʋ taa. (Wp. 5:9) Pɩkɛ ɛyʋ nɛ Ɛsɔ pɛ-hɛkʋ taa tɔm. Nɔɔyʋ ɛɛpɩzɩɣ ɛla mbʋ ño-lone taa.

¹⁸ Ɛlɛ, ye ŋheyi Yehowa adɩma taa se ŋkpaɣ ña-tɩ nɛ ŋha-ɩ yɔ, pɩtɩmaɣ. Pɩpɔzʋʋ se ŋwɩlɩ lalaa se ŋha ña-tɩ Ɛsɔ. Ɛzɩ Yesu yɔ, ŋtɩŋɩɣnɩ lɩm mɩyɩsʋʋ yɔɔ nɛ ŋyele nɛ lalaa tɩlɩ se ŋha ña-tɩ Ɛsɔ. (1 Pɩy. 2:21; 3:21) Ye ŋɖʋ ña-taa se ŋlakɩ Yehowa sɔɔlɩm nɛ ŋñɩnɩɣ ɖɔɖɔ se pamɩyɩsɩ-ŋ lɩm yɔ, ɛbɛ pɩwɛɛ se ŋla? Pɩpɔzʋʋ se ŋyɔɔdɩnɩ ɛgbɛyɛ taa ɛzʋtʋyaa tʋmɩyɛ kpɛndɩyʋ. Ɛlakɩ ɖʋtʋ nɛ ɛzʋtʋyaa ndɩ ndɩ katɩ-ŋ nɛ patazɩ nɛ pana se ŋmʋnaa se pamɩyɩsɩ-ŋ lɩm yaa ŋtɩmʋna. Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ tɔm ñʋʋ ŋgʋ kɩwɛ takayaɣ kanɛ kɔ-hɔɔlɩŋ 182-184 yɔɔ yɔ. Kɩtɔŋ se “Lɔŋ tasʋʋ tɔm susuyu patɩmɩyɩsɩtɩ-m lɩm.” Kalɩ ɖɔɖɔ tɔm ñʋʋ “Tɔm ndʋ pɔpɔzʋʋ mba pañɩnɩɣ se pamɩyɩsɩ-wɛ lɩm yɔ;” kʋkʋ ñɛwɛ takayaɣ kanɛ kɔ-hɔɔlɩŋ 185-207 yɔɔ.

AKƆNTANAA MBA PASƖƔNA SE ÐƖTƖLƖ ƐZƖMA TƆM SUSUU ÐƐƔNƖ ƐSƖNDAA YƆ

¹⁹ Pɩlakɩ pɩnzɩ sakɩyɛ yɔ, ɛjaɖɛ kpeekpe yɔɔ tɔm susuu tʋmɩyɛ akɔnta labʋ wɛɛ nɛ pɩkpazɩɣ Yehowa samaɣ ɖoŋ pɩdɩɩfɛyɩ. Kpaɣnɩ alɩwaatʋ ndʋ Yesu Krɩstʋ heyi ɛ-tɔmkpɛlɩkɩyaa kajalaɣ ɖeɖe se pakaɣ susuu tɔm kɩbandʋ ɛjaɖɛ kpeekpe yɔɔ yɔ, toovenim Krɩstʋ ñɩma wɩlaa se pɔsɔɔlaa se patɩlɩ ɛzɩma tʋmɩyɛ nɖɩ ɖɩɖɔŋ yɔ.—Mat. 28:19, 20; Mark. 13:10; Tʋma 1:8.

²⁰ Yesu tɔmkpɛlɩkɩyaa kajalaɣ ñɩma kaanɩwa se tɔm susuu ɖɔm camɩyɛ lɛ, pɩlabɩ-wɛ leleŋ siŋŋ. (Mark. 6:30) Bibl taa takayaɣ ŋga payaɣ se Tʋma Labʋ yɔ, kɔyɔɔdaa se tɔmkpɛlɩkɩyaa mba pɔ-yɔɔ fezuu kiɖeɖeu kaatibi pɩnaɣ 33 tɛ Pantekooti wiye yɔ, paakpɛndɩ 120. Pitileɖi lɛ, tɔmkpɛlɩkɩyaa talɩ ɛzɩ 3000 mbʋ yɔ, nɛ pʋwayɩ lɛ patalɩ ɛzɩ 5000 mbʋ yɔ. Akɔntanaa mba pawɩlɩ kpayɩ kpayɩ se “Yehowa wɛɛ nɛ ɛsɔzʋʋ pɔ-yɔɔ mba payabɩ pa-ñʋʋ yɔ paa kɩyakʋ ŋgʋ.” Pawɩlaa ɖɔɖɔ se “cɔjɔnaa sakɩyɛ paɣzɩ wɛnʋʋ tisuu.” (Tʋma 1:15; 2:5-11, 41, 47; 4:4; 6:7) Tɔmkpɛlɩkɩyaa nɩ ɛzɩma tʋmɩyɛ wɛɛ nɛ ɖiwokini ɛsɩndaa mbʋ yɔ lɛ, pɩkpazɩ-wɛ ɖoŋ siŋŋ! Nɛ paa Yuuda Ɛsɔ sɛtʋ ñʋndɩnaa kaanazaɣ-wɛ siŋŋ yɔ, akɔntanaa kɩbama mba pakpazɩ-wɛ ɖoŋ se powolo pɩ-yɔɔ nɛ pala tʋmɩyɛ nɖɩ Ɛsɔ ɖʋ-wɛ yɔ.

²¹ Pɩtalɩ pɩnzɩ 60-61 taa mbʋ yɔ lɛ, Pɔɔlɩ yɔɔdɩ takayaɣ ŋga ɛmawa nɛ etiyini Koloosi mba yɔ, ka-taa se “tɔm kɩbandʋ [wɛɛ] nɛ tɩlʋlʋʋ pee nɛ tihukuu ɛjaɖɛ kpeekpe yɔɔ” nɛ “posusi-tʋ wondu kɩlɩzɩtʋ tɩŋa ɛjaɖɛ kpeekpe yɔɔ.” (Kol. 1:5, 6, 23) Kajalaɣ Krɩstʋ ñɩma kaawelisi tɔm ndʋ peheyi-wɛ yɔ nɛ fezuu kiɖeɖeu kpazɩ-wɛ ɖoŋ, nɛ posusi tɔm nɛ pɩtalɩ lona sakɩyɛ taa pʋcɔ nɛ paɖɩzɩ Yuuda ñɩma tɛtʋ pɩnaɣ 70 taa. Pɩtʋʋ fɛyɩ se Krɩstʋ ñɩma mba pɛwɛ siɣsiɣ yɔ, panɩ ɛzɩma tɔm susuu wɛɛ nɛ pɩɖɔŋ camɩyɛ yɔ pɩ-tɛ akɔnta lɛ, pɩkpazɩ-wɛ ɖoŋ pɩdɩɩfɛyɩ!

²² Mbʋ ɖɔɖɔ sɔnɔ, Yehowa ɛgbɛyɛ lakɩ tʋmɩyɛ nɖɩ peɖiɣni labʋ se pɩsa nɛ Maatiyee 24:14 taa tɔm la yɔ, ɖɩ-tɛ akɔnta. Mayaɣ ŋga kɔyɔɔdaa se: “Kewiyaɣ tɔm kɩbandʋ tʋnɛ, pakaɣ-tʋ susuu tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe, nɛ ɖɩnɛ ɛlɛ ɛjaɖɛ tɛm kaɣ kɔm.” Ða mba ɖɩha ɖa-tɩ Yehowa se ɖɩla ɛ-sɔɔlɩm yɔ, pɩwɛɛ se ɖɩla tʋmɩyɛ ɖɩnɛ kpɛdɛyɛ. Pɩwɛɛ se ɖa-taa paa weyi ɛla e-ɖoŋ ɖeɖe tɔm susuu tʋmɩyɛ taa pʋcɔ nɛ ɛjaɖɛ tɛm talɩ. Yehowa kaɣ yebu nɛ pala tʋmɩyɛ nɖɩ camɩyɛ ɛzɩ pɩpɔzʋʋ yɔ; nɛ ye ɖɩɖʋ-ɖɩ nesi yɔ, ɖɔ-tɔm kaɣ-ɩ kɛdɩnʋʋ.—Ezek. 3:18-21.

ÑƆ-TƆM SUSUU AKƆNTA

²³ Ɛbɛ nɛ ɛbɛ tɛ akɔnta pɩwɛɛ se ɖɩla? Tɔm susuu akɔnta takayaɣ ŋga ɛgbɛyɛ lɩzaa yɔ, kawɩlɩɣ-ɖʋ mbʋ pɩwɛɛ se ɖɩma kɔ-yɔɔ yɔ. Ɛlɛ tɔm ndʋ tɩkɔŋ yɔ, tɩpɩzɩɣ nɛ tɩsɩnɩ-ŋ.

²⁴ Mbʋ mbʋ ŋha mba patɩmɩyɩsɩ-wɛ lɩm yɔ, paa pɩtɩɩkɛ takayɩsɩ maɣmaɣ yaa tɔm ndʋ papɩzɩɣ nɛ pakalɩ-tʋ taabɩlɛɛtɩ yaa pɔrtaabɩlɩ yɔɔ yɔ, ma-pʋ hɔɔlʋʋ “Takayɩsɩ (takayɩsɩ maɣmaɣ yaa taabɩlɛɛtɩ yaa pɔrtaabɩlɩ yɔɔ ñɩnzɩ)” taa. Hɔɔlʋʋ “Videowaa mba ŋwɩlaa yɔ” taa lɛ, ma tam ɛzɩma ŋwɩlɩ ɛgbɛyɛ videowaa yɔ.

²⁵ Hɔɔlʋʋ “Pɩsɩ nɛ ŋna-ɩ waa” taa lɛ, ma tam ɛzɩma ŋpɩsaa se ŋkpazɩ ɖoŋ mba patɩkɛ Aseɣɖe Tɩnaa, ɛlɛ pawɩlaa se toovenim tɔm kɛdɩnɩ-wɛ yɔ. Ŋpɩzɩɣ nɛ ŋkalɩ nɔɔyʋ se ɛkɛ pɩsɩ nɛ ŋna-ɩ, ye ŋpɩsɩ ɛ-cɔlɔ ɛ-tɛ, ŋma-ɩ takayaɣ, ŋya-ɩ kaŋgalaafu yɔɔ, ŋtɩŋnɩ pɔrtaabɩlɩ yaa intɛrnɛɛtɩ yɔɔ nɛ ŋtiyini-i message yaa ŋha-ɩ takayɩsɩ nasɩyɩ yɔ. Alɩwaatʋ ndʋ ña nɛ Bibl kpɛlɩkɩyʋ nɔɔyʋ ɛkpɛlɩkɩɣ yɔ, pɩwɛɛ se ŋkalɩ se ɛkɛ pɩsɩ nɛ ŋna-ɩ. Paa kpɩtaʋ ŋgʋ, ye lʋlɩyʋ nɔɔyʋ ɛɖɛ nɔɔ nɛ ɛla hɔʋ taa Ɛsɔ sɛtʋ nɛ ɛ-hɔʋ, pɩkpɛndɩnɩ ɛ-pɩɣa ŋga patɩmɩyɩsɩtɩ-kɛ lɩm yɔ, ɛpɩzɩɣ nɛ ɛkalɩ pɩɣa ŋga se kɛkɛ pɩnɩ nɛ ŋna-ɩ.

²⁶ Paa ŋkpɛlɩkɩɣnɩ nɔɔyʋ paa kpɩtaʋ ŋgʋ yɔ, tam kʋɖʋm pɩwɛɛ se ŋkalɩ-ɩ se ɛkɛ Bibl kpɛlɩkɩyʋ fenaɣ taa. Paa fenaɣ ŋga lɛ, pɩpɔzʋʋ se tɔm susuyaa ɩkalɩ pe-Bibl kpɛlɩkɩyaa ndɩ ndɩ ñʋŋ. Ɛyaa mba payɩ ɖɩkpɛlɩkɩɣnɩ Bibl nɛ patɩkɛ Yehowa Aseɣɖe Tɩnaa yɔ, ɖɩkalɩɣ-wɛ se pɛkɛ ɖe-Bibl kpɛlɩkɩyaa. Ye ɛgbɛyɛ taa Ɛsɔ sɛtʋ tʋmɩyɛ kɔɔmiite taa tʋ nɔɔyʋ ɛpɔzɩ-ɖʋ se ɖɩkpɛlɩkɩnɩ Bibl koobu nɔɔyʋ weyi ɛhɛ fezuu taa yɔ, yaa koobu weyi pamɩyɩsɩ-ɩ lɩm pitileɖi nɛ ɛtɩtɩɩtɛmtɩ Tɔm ndʋ Bibl wɩlɩɣ? nɛ “Ɛbɛ ɖɩla nɛ ɖɩwɛɛ Ɛsɔ sɔɔlɩm taa?” takayɩsɩ yɔ, ɖɩpɩzɩɣ nɛ ɖɩkalɩ-ɩ ɖɔɖɔ se ɛkɛ Bibl kpɛlɩkɩyʋ.

²⁷ Pɩcɛyaa se ɖɩcɛlɩ “Ñɩɣtʋ” ndʋ ɖeyi ɖeyi ɖisusuni tɔm yɔ, tɩ-tɛ akɔnta. Pʋ-tɔbʋʋ se alɩwaatʋ ndʋ ɖɩkpaɣ nɛ ɖisusuni tɔm ɛyaa mba patɩkɛ Yehowa Aseɣɖe Tɩnaa, ɖɩlabɩnɩ kpaɣ ɖɩɣa nɛ ŋwolo ɖɩɣa, ɖɩlabɩnɩ pɩsɩ nɛ ŋna-ɩ waa, ɖɩkpɛlɩkɩnɩ ɛyaa Bibl yaa ɖɩlɩzɩnɩ alɩwaatʋ fanʋʋ aseɣɖe yɔ. Ye koobiya naalɛ ɩlɩ tɔm susuu yɔ, pa-naalɛ pakalɩɣ ñɩɣtʋ ndʋ palaba yɔ, ɛlɛ paa weyi ɛkalɩɣ ɛ-tɛ pɩsɩ nɛ ŋna-ɩ waa yaa e-Bibl kpɛlɩkɩyaa. Ye caja nɛ ɖoyo pɛkpɛlɩkɩɣnɩ pe-piya Bibl, alɩwaatʋ ndʋ palakɩ Hɔʋ taa Ɛsɔ sɛtʋ yɔ, ñɩɣyʋʋ kʋɖʋmʋʋ ɖeke pa-naalɛ papɩzɩɣ nɛ pakalɩ kpɩtaʋ taa. Koobiya mba pɔyɔdʋʋ tɔm samaɣ taa yɔ, papɩzɩɣ nɛ pala alɩwaatʋ ndʋ pɔyɔɔdɩnɩ tɔm ndʋ yɔ, tɩ-tɛ akɔnta. Ye nɔɔyʋ ɛɖɛzɩɣ samaɣ taa tɔm yɔɔdʋʋ kʋnʋŋ lɛɛkʋ taa yɔ, ɛpɩzɩɣ ɖɔɖɔ nɛ ɛla alɩwaatʋ ndʋ tɩ-tɛ akɔnta. Ðɛ-Ɛsɔ sɛtʋ tʋma sɔsɔna lɛɛna sakɩyɛ wɛɛ, ɖɩɩlakɩ a-tɛ alɩwaatʋ akɔnta. Ðɩɩlakɩ akɔnta alɩwaatʋ ndʋ ɖɩkpakɩɣ nɛ ɖɩñɔɔzʋʋnɩ ɖa-tɩ se ɖiwolo tɔm susuu, tɔm susuu kediɣzisi nɛ tʋma lɛɛna wena aatukuuni tɔm susuu yɔ.

²⁸ Alɩwaatʋ ndʋ tɔm susuyu nɔɔyʋ lakɩ ñɩɣtʋ ndʋ ɖeyi ɖeyi esusuni tɔm yɔ tɩ-tɛ akɔnta yɔ, pɩwɛɛ se ewelisini ɛ-ɛhʋyɛ nɖɩ ɛfalɩsɩnɩ Bibl yɔ. Koobiya nabɛyɛ susuu tɔm lona wena a-taa ɛyaa ɖɔ sakɩyɛ yɔ, ɛlɛ lalaa ñosusuu tɔm lona wena a-taa pɩpɔzʋʋ se pɔɖɔ sakɩyɛ pʋcɔ nɛ pakatɩ ɛyaa yɔ. Tɔm susuu kookasɩ wɛ ndɩ ndɩ nɛ paa tɔm susuyu weyi lɛ, ɛwɛnɩ ɛ-lɩmaɣza ɛ-tɔm susuu tʋmɩyɛ yɔɔ. Nɔɔɖɛyaa Ɛgbɛyɛ ɛɛñɩkɩɣ nɔɔyʋ yɔɔ ɛzɩma ɖeyi ɖeyi pɩwɛɛ se ɛla akɔnta alɩwaatʋ ndʋ esusuni tɔm yɔ, nɛ patɩɖʋ nɔɔyʋ tʋmɩyɛ se ɛhʋʋnɩ lalaa tɔm hɔɔlʋʋ ŋgʋ kɩ-taa.—Mat. 6:1; 7:1; 1 Tim. 1:5.

²⁹ Pɩpɔzʋʋ se tɔm susuu alɩwaatʋ ndʋ ɖɩcɛlɩɣ yɔ, tɩkɛ ñɩɣtʋ pilim. Koobiya mba papɩzɩɣ nɛ paha waɖɛ se pɔ-tɔm susuu alɩwaatʋ ɛtaatalɩ ñɩɣyʋʋ yɔ, mba lɛ mba pasʋtʋyɩ siŋŋ, pɛkɛ ajamaa, yaa nabʋyʋ yɔɔ lɛ, pɩwɛ-wɛ kaɖɛ se palɩɩ yɔ. Koobiya mba, papɩzɩɣ nɛ posusi tɔm kpaɣnɩ cɛcɛsɩ 15 nɛ pɛcɛlɩ pɩ-akɔnta. Paa cɛcɛsɩ 15 ɖeke pakpaɣaa nɛ posusuni tɔm fenaɣ taa yɔ, pɩpɔzʋʋ se pɛcɛlɩ pɩ-akɔnta. Nɛ pɩwɛɛ se pakalɩ-wɛ Kewiyaɣ tɔm susuyaa mba pɛcɛlɩɣ akɔnta paa fenaɣ ŋga yɔ pa-taa. Ðʋtʋ tʋnɛ titukuuni ɖɔɖɔ koobiya mba pɩwɛ-wɛ kaɖɛ se palɩɩ tɔm susuu alɩwaatʋ natʋyʋ taa mbʋ pʋyɔɔ yɔ pɔtɔlɩ kʋdɔŋ sɔsɔʋ nakʋyʋ yaa kɛgbɛdɩsaɣ nakɛyɛ talɩ-wɛ nɛ paapɩzɩɣ se palɩɩ tɔm susuu ɖeyi ɖeyi fenaɣ pilim yaa pɩcɛzɩ mbʋ. Mba pɩwɛ-wɛ kaɖɛ siŋŋ se pala tʋmɩyɛ yɔ, pe-yeke papɩzɩɣ nɛ paha waɖɛ nɖɩ. Ɛsɔ sɛtʋ tʋmɩyɛ kɔɔmiite pɩwɛɛ se kɩtazɩ nɛ kɩna se tɔm susuyu weyi papɩzɩɣ nɛ paha waɖɛ nɖɩ.

TƆM SUSUYU TƲMƖYƐ AKƆNTA TAKAYAƔ

³⁰ Paa fenaɣ ŋga, ŋcɛlɩɣ tɔm susuu akɔnta lɛ, pamaɣ-kʋ Tɔm susuyu tʋmɩyɛ takayaɣ yɔɔ. Takayaɣ ŋga kɛkɛ ñɛ-ɛgbɛyɛ takayaɣ. Ye ŋcaɣ se ŋlɛɣzɩ ɛgbɛyɛ yɔ, pɩcɛyaa se ŋheyi ɛzʋtʋyaa. Takayaɣ taa mayʋ yeki nɛ ñɔ-tɔm susuu tʋmɩyɛ akɔnta takayaɣ talɩ ñɛ-ɛgbɛyɛ kɩfaɖɛ taa. Piyeki nɛ ñɛ-ɛgbɛyɛ kɩfaɖɛ taa ɛzʋtʋyaa labɩ-ŋ talɩ ɖeu nɛ papɩzɩ nɛ pasɩnɩ-ŋ fezuu taa. Ye ŋposuuni ñɛ-ɛgbɛyɛ fenasɩ naadozo yaa pɩɩtalɩɣ mbʋ yɔ, wolo pɩ-yɔɔ nɛ ŋtiyiɣni-ɖɩ ñɔ-tɔm susuu akɔnta.

ƐBƐ YƆƆ ÐƖCƐLƖƔ TƆM SUSUU AKƆNTA?

³¹ Nabʋyʋ taa, ŋsɔʋ se ŋcɛlɩ ñɔ-tɔm susuu akɔnta? Pɩtʋʋ fɛyɩ se pɩpɔzʋʋ se pɔtɔzʋʋ ɖa-tɩŋa payɩ pɩ-yɔɔ wiɖii wiɖii. Ɛlɛ ye ɖɩwɛnɩ lɩmaɣza kɩbana akɔnta ŋgʋ kɩ-yɔɔ nɛ ye ɖɩnɩ mbʋ pʋyɔɔ pɩcɛyaa se ɖɩcɛlɩɣ-kʋ yɔ pɩ-taa yɔ, pɩwɛɣ-ɖʋ kɛlɛʋ se ɖɩtɔzʋʋ nɛ ɖɩcɛlɩɣ-kʋ lɔŋ.

³² Nabɛyɛ pɔzaa se: “Yehowa sɩm tʋmɩyɛ nɖɩ malakɩ-ɩ yɔ, ye mbʋ ɛbɛ yɔɔ pɩcɛyaa kpem se mantasɩ cɛlʋʋ akɔnta ɛgbɛyɛ?” Toovenim Yehowa sɩm tʋmɩyɛ nɖɩ ɖɩlakɩ yɔ, nɛ ye ɖɩlakɩ-ɖɩ nɛ laŋɩyɛ pilim yaa ɖɩlakɩ-ɖɩ yem se pɔtɔma pala yɔ, ɛnaɣ ɖɔɖɔ. Ɛlɛ tɔzɩ se Yehowa yeba nɛ pama kɩyakɩŋ weyi Noowa saɣnɩ aɖakaɣ yɔ, nɛ pɩnzɩ ɛzɩma Izrayɛɛlɩ piya labɩ kañɩmbusuu taa yɔ. Eyeba nɛ pakalɩ ɛyaa mba paawɛɛ siɣsiɣ nɛ mba paakɛ kaañamtʋ tɩnaa yɔ. Eyeba ɖɔɖɔ nɛ pama ɛzɩma pamʋ Kanaŋ tɛtʋ pazɩ pazɩ yɔ, nɛ tʋma ndɩ ndɩ wena Izrayɛɛlɩ tɔm hʋyaa kaalaba yɔ. Toovenim, eyeba nɛ pama tʋma sakɩyɛ wena ɛ-sɛyaa kaalaba yɔ, a-tɔm. Ɛtɩŋnɩ e-fezuu kiɖeɖeu yɔɔ nɛ pama tɔm ndʋ, nɛ pɩwɩlɩɣ-ɖʋ se ɛsɔɔlaa se ɖɩlakɩ akɔnta ŋgʋ kɩtʋʋzɩ ɖeyi ɖeyi yɔ.

³³ Caanaʋ taa tɔm ndʋ pama Bibl taa yɔ, tɩwɩlɩɣ se Yehowa samaɣ lakaɣ akɔntanaa mba patʋʋzɩ ɖeyi ɖeyi yɔ. Hɔɔlɩŋ sakɩyɛ taa lɛ, ye pataakalɩ wondu yaa ɛyaa ɖeyi ɖeyi yɔ, pɩɩwɛ-ɖʋ kaɖɛ se ɖɩnɩɩ Bibl kɛdɛsɩ nasɩyɩ taa. Maɣzɩ kɩɖaŋ weyi ɩkɔŋ yɔ ɩ-yɔɔ nɛ ŋna: Kiɖe Tɛɛ Tɔm 46:27; Ejipiti Lɩʋ 12:37; Tɔm Hʋyaa 7:7; 2 Awiya 19:35; 4 Awiya 14:8-12; Yohanɛɛsɩ 6:10; 21:11; Tʋma Labʋ 2:41; 19:19.

³⁴ Pɩkɛ toovenim se pɩtɩkɛ tʋma wena payɩ ɖɩlakɩ Yehowa sɛtʋ taa yɔ, a-tɛ akɔnta ɖɩlakɩ; paa mbʋ yɔ, akɔnta labʋ sɩɣnɩ Yehowa ɛgbɛyɛ siŋŋ. Kajalaɣ pɩnzɩ mɩnʋʋ taa apostoloowaa wobi tɔm susuu nɛ papɩsɩ lɛ, pɛkɛdɩ Yesu “mbʋ payɩ palaba nɛ tɔm ndʋ payɩ pawɩlaa yɔ.” (Mark. 6:30) Nabʋyʋ taa, akɔntanaa wɩlɩɣ se pɩpɔzʋʋ se ɖɩñɔɔzɩ tɔm susuu hɔɔlʋʋ nakʋyʋ. Papɩzɩɣ nɛ pawɩlɩ se paa ɖiwobini ɛsɩndaa hɔɔlɩŋ nɩɩyɩ taa yɔ, hɔɔlɩŋ lɛɛŋ taa lɛ, pɩpɔzʋʋ-ɖʋ pana ñaɣʋ. Pɩtɩla tɔm susuyaa iihukuu ɛzɩ pɩpɔzʋʋ yɔ, nɛ pɩwɛɛ se pɔcɔnɩ hɔɔlʋʋ ŋgʋ ki-ɖeɖe. Akɔntanaa pɩzɩɣ nɛ pawɩlɩ ɖɔɖɔ se pɩpɔzʋʋ se pakpazɩ koobiya ɖoŋ yaa pɔcɔnɩ tɔm natʋyʋ ɖeɖe. Ɛzʋtʋyaa pɩzɩɣ nɛ patɩŋnɩ akɔntanaa mba pɔ-yɔɔ, nɛ patɩlɩ mbʋ pala nɛ pasɩnɩ koobiya nabɛyɛ nɛ pɛɖɛɛnɩ ɛsɩndaa yaa pasɩnɩ ɛgbɛyɛ kpeekpe yɔ.

³⁵ Akɔntanaa sɩɣnɩ ɖɔɖɔ ɛgbɛyɛ se ɖɩtɩlɩ lona wena a-taa pɩpɔzʋʋ tɔm susuyaa sakɩyɛ yɔ. Le tʋmɩyɛ ɖɔŋ camɩyɛ? Le ɖɩɩɖɔŋ camɩyɛ ɖeyi ɖeyi? Tɔm susuu wondu ndʋ pɩwɛɛ se palabɩnɩ tʋmɩyɛ nɛ pasɩnɩ ɛyaa nɛ patɩlɩ toovenim? Akɔntanaa sɩɣnɩ ɛgbɛyɛ se ɖɩtɩlɩ tɔm susuu wondu ndʋ pɩpɔzʋʋ se palabɩnɩ tʋmɩyɛ ɛjaɖɛ hɔɔlɩŋ ndɩ ndɩ taa yɔ, nɛ ɖɩla ɖʋtʋ lɔŋ nɛ ɖɩcɔnɩ kɩcɛyɩm mbʋ pi-ɖeɖe.

³⁶ Tɔm susuu akɔntanaa kpazɩɣ ɖa-taa sakɩyɛ ɖoŋ. Alɩwaatʋ ndʋ ɖɩnɩɣ tʋmɩyɛ nɖɩ ɖo-koobiya wɛɛ nɛ palakɩ tɔm susuu taa ɛjaɖɛ kpeekpe yɔɔ yɔ ɖɩ-tɔm yɔ, ɖa-taa ɛɛlakɩ leleŋ siŋŋ na? Ðɩnɩɣ ɛzɩma tɔm susuyaa wɛɛ nɛ pɔɖɔʋ yɔ lɛ, pɩsɩɣnɩ-ɖʋ nɛ ɖɩnaɣ ɛzɩma Yehowa ɛgbɛyɛ wɛɛ nɛ ɖɩpaɣlɩɣ yɔ. Ðɩnɩɣ tɔm susuyaa lalaa yɔɔ tɔm lɛ, pɩlakɩ-ɖʋ leleŋ, pɩkpazɩɣ-ɖʋ ɖoŋ nɛ piseɣtiɣ-ɖʋ se ɖɩla ɖo-ɖoŋ ɖeɖe tɔm susuu tʋmɩyɛ taa. (Tʋma 15:3) Ye ɖɩɖʋʋ nesi ɛgbɛyɛ pɩtɩŋnɩ ɛzɩma ɖɩcɛlɩɣ ɖɔ-tɔm susuu akɔnta lɔŋ yɔ pɩ-yɔɔ yɔ, pɩwɩlɩɣ se ɖɩmaɣzɩɣ ɖo-koobiya mba pɛwɛ ɛjaɖɛ kpeekpe yɔɔ yɔ pɔ-yɔɔ. Pɩkɛ mbʋ pɩwɛ kɛlɛʋ yɔ, ɛlɛ ye ɖɩlakɩ mbʋ yɔ, ɖɩtɩŋɩɣnɩ pɩ-yɔɔ nɛ ɖɩwɩlɩɣ se ɖiluzuu ɖa-tɩ nɛ ɖɩñaŋ ɖʋtʋ ndʋ Yehowa ɛgbɛyɛ ɖʋwa yɔ.—Luka 16:10; Ebr. 13:17.

WƐƐNƖ ÑA-MAƔMAƔ ÑA-KAÐƲSƖ

³⁷ Pɩtɩpɔzɩ se ɖɩkpaɣ ɖɔ-tɔm susuu tʋmɩyɛ nɛ ɖɩmaɣzɩnɩ nɔɔyʋ ñɩnɖɛ. (Gal. 5:26; 6:4) Paa weyi ɛ-wɛtʋ wɛ ndɩ. Ɛlɛ pɩwɛɣ ɖeu se ɖɩwɛɛnɩ ɖa-maɣmaɣ ɖa-kaɖʋsɩ nzɩ sɩ-talʋʋ fɛyɩ kaɖɛ nɛ sɩsɩɣnɩ-ɖʋ se ɖɩna ɛzɩma ɖɩwɛɛ ɖiwokini ɛsɩndaa fezuu taa yɔ. Ye ɖɩwɛnɩ kaɖʋsɩ nzɩ nɛ ɖɩñakɩ pana nɛ ɖɩtakɩ-sɩ yɔ, pɩhaɣ-ɖʋ taa leleŋ.

³⁸ Pɩnaɣ kaɣlaa se Yehowa wɛɛ nɛ eyeki se tʋmɩyɛ nɖɩ ɛɖʋwa se pekpeɣli mba ɛkaɣ yabʋ pa-ñʋʋ “kʋñɔŋ sɔsɔʋ” alɩwaatʋ taa yɔ, ɖɩwɛɛ nɛ ɖɩɖɔŋ camɩyɛ. Ðɩwɛ alɩwaatʋ ndʋ tɩ-taa Izaayii natʋ tɔm tʋnɛ tɩwɛɛ nɛ tɩlakɩ yɔ: “Weyi ɛkɛ tɔyaɣ yɔ, ɛkaɣ pɩsʋʋ ɛgbɔʋ, nɛ weyi ɛkɛ ɛjam yɔ, ɛkaɣ pɩsʋʋ ɛjaɖɛ ɖoŋ ñɩnɖɛ. Ma [Yehowa], mankaɣ labʋ mbʋ tuda, pɩ-tɛ alɩwaatʋ talɩɣ lɛ.” (Natʋ 7:9, 14; Iza. 60:22) Pɩkɛnɩ-ɖʋ waɖɛ sɔsɔɖɛ kpem se ɖɩkɛ tɔm kɩbandʋ susuyaa kɛdɛzaɣ kɩyakɩŋ ɛnɛ ɩ-taa!—Mat. 24:14.