Patɩɖɔ po-ɖuutu yɔɔ

Yehowa heyi Moyizi se: “Kɔɔ ŋkatɩ-m pʋʋ yɔɔ. Mankaɣ maʋ man-paɣtʋ pɩtaahalanzɩ yɔɔ nɛ mɛncɛlɩ-ŋ.” Moyizi kpa pʋʋ yɔɔ nɛ ɛcaɣ peeɖe kɩyakɩŋ 40 nɛ ɖoo 40. Alɩwaatʋ ndʋ Moyizi kaawɛ peeɖe yɔ, Yehowa ma paɣtʋ 10 pɩtaahalanzɩ 2 yɔɔ nɛ ɛcɛlɩ-ɩ.

Moyizi ɖɛwa nɛ pɩla alɩwaatʋ pazɩ lɛ, Izrayɛɛlɩ mba paɣzɩ maɣzʋʋ se ɛsɔ pɔ-yɔɔ. Nɛ peheyi Aarɔɔnɩ se: “Pɩpɔzʋʋ se ɖɩwɛɛnɩ ɖiyiyu nɔɔyʋ. Labɩ-ɖʋ ɛsɔ nɔɔyʋ!” Aarɔɔnɩ tɔ se: “Ɩkɔnɩ-m sika.” Eyolisi sika nɛ ɛlabɩnɩ neɣye sɩʋ kpelaɣ. Nɛ samaɣ tɔ se: “Neɣye ɖɩnɛ, nɖɩ kɛnɩnɩ ɖɛ-Ɛsɔ weyi ɛlɩzɩ-ɖʋ Ejipiti yɔ.” Papaɣzɩ sɛʋ sika sɩʋ kpelaɣ neɣye nɖɩ nɛ pala ɖɔɖɔ kazandʋ. Pɩɩkɛ kɩdɛkɛdɩm yaa we? Ɛɛɛ, mbʋ pʋyɔɔ yɔ samaɣ kaaɖuwaa se Yehowa ɖeke kakaɣ sɛʋ. Ɛlɛ lɛɛlɛɛyɔ lɛ, katɩɖɔ ko-ɖuutu yɔɔ.

Yehowa na mbʋ pɩɩwɛɛ nɛ pɩlakɩ yɔ lɛ, eheyi Moyizi se: “Tii samaɣ cɔlɔ. Kamanɩ man-paɣtʋ yɔɔ nɛ kɛsɛɣ cɛtɩm ɛsɔ nɔɔyʋ.” Moyizi kpaɣ pɩtaahalanzɩ 2 nzɩ sɩ-yɔɔ pama paɣtʋ yɔ nɛ etiki pʋʋ.

Moyizi ñɔtɩnɩ ɖigbeɣliye lɛ, ɛnɩɣ samaɣ hendu teu. Pʋwayɩ lɛ, ɛna Izrayɛɛlɩ mba peɖiɣni paʋ nɛ poluŋuu neɣye tɛɛ nɛ pɛsɛɣ-ɖɩ. Moyizi na mbʋ lɛ, ɛkɔ pana siŋŋ nɛ ɛpɛɖɩ pɩtaahalanzɩ nzɩ tataa nɛ sɩyɔkɩ hɔɔlasɩ hɔɔlasɩ. Nɛ ɛyɔkɩ neɣye nɖɩ kpaagbaa. Pʋwayɩ lɛ, ɛpɔzɩ Aarɔɔnɩ se: “Pɩlabɩ ɛzɩma nɛ samaɣ tuyi-ŋ nɛ ŋla kɩdɛkɛdɩm sɔsɔm mbʋ?” Aarɔɔnɩ cosi-i se: “Pɩtaawɩzɩ-ŋ. Ña-maɣmaɣ ŋsɩm samaɣ kanɛ. Kañɩnaɣ se kɛwɛɛnɩ ɛsɔ, pʋyɔɔ mankpaɣ sika nɛ moyolisi miŋ taa nɛ mala neɣye ɖɩnɛ.” Pɩtaapɔzɩ se Aarɔɔnɩ ɛla mbʋ. Moyizi pɩsɩ pʋʋ taa nɛ etendi Yehowa se ɛkpaɣ nɛ ekpeɣ samaɣ.

Yehowa kpaɣ nɛ ekpeɣ mba payɩ petisaa se pewelisiɣni-i yɔ. Ŋnaɣ mbʋ pʋyɔɔ pɩɩcɛyaa se Izrayɛɛlɩ mba itisi nɛ Moyizi ɖiyi-wɛ yɔ?