Rahaabɩ mɛsɩ cɔŋɩyaa

Izrayɛɛlɩ cɔŋɩyaa talɩ Yeriikoo tɛtʋ taa lɛ, powolo halʋ weyi payaɣ se Rahaabɩ yɔ ɛ-tɛ. Yeriikoo wiyaʋ nɩwa se pɛwɛ peeɖe lɛ, etiyi sɔɔjanaa se powolo nɛ pana. Rahaabɩ mɛsɩ cɔŋɩyaa e-kuduyuu ñʋʋ taa nɛ ɛwɩlɩ sɔɔjanaa nʋmɔʋ lɛɛkʋ. Eheyi cɔŋɩyaa se: “Mansɩnɩ-mɩ, mbʋ pʋyɔɔ yɔ manawa se Yehowa wɛ mɩ-cɔlɔ nɛ ɩkaɣ mʋʋ Yeriikoo tɛtʋ. Mentendi-mɩ, iɖuu se ɩkaɣ yabʋ ma nɛ mɔ-hɔʋ ɖa-ñʋʋ.”

Nɛ cɔŋɩyaa cosi Rahaabɩ se: “Ðiɖuwaa se nabʋyʋ ɛɛkaɣ labʋ mba payɩ pɛwɛɣ ña-ɖɩɣa taa yɔ.” Peheyi-i se: “Kpaɣ nimaɣ kɩsɛɛmaɣ nakɛyɛ nɛ ŋta ño-mondoɖebɔʋ yɔɔ nɛ ña nɛ ñɔ-hɔʋ ihiɣ ñʋʋ yabʋ.”

Rahaabɩ ta nimiye naɖɩyɛ e-mondoɖebɔʋ yɔɔ nɛ cɔŋɩyaa tɩŋnɩ ɖɩ-yɔɔ nɛ petii. Powolo pɛmɛlɩ pʋʋ taa kɩyakɩŋ naadozo pʋcɔ nɛ papɩsɩ Yozuwee cɔlɔ. Pʋwayɩ lɛ, Izrayɛɛlɩ mba tɛzɩ Yɔɔrdaŋ Pɔɔ nɛ pɔñɔɔzɩ pa-tɩ se pamʋ tɛtʋ. Yeriikoo kɛnɩ tɛtʋ ndʋ pacalɩ wabʋ yɔ. Yehowa heyi-wɛ se paa evemiye nɖɩ lɛ, pɔɖɔ nɛ pɔcɔɔ tɛtʋ nɛ pata tam kʋyʋmʋm nɛ pala mbʋ kɩyakɩŋ 6. Kɩyakʋ 7 ñɩŋgʋ wiye lɛ, pɔɖɔ nɛ pɔcɔɔ tɛtʋ tam 7. Pʋwayɩ lɛ, cɔjɔnaa hʋlɩ nɔndɔŋ nɛ sɔɔjanaa ñama you kubuka nɛ po-ɖoŋ tɩŋa. Pala mbʋ nɛ tɛtʋ kolonzi kpɛzɩ nɛ sɩɖa. Rahaabɩ ɖɩɣa kaamalɩnɩ koloŋa kpam, ɛlɛ kasɩŋ ke-ɖeɖe. Rahaabɩ nɛ ɛ-hɔʋ pehiɣ ñʋʋ yabʋ, mbʋ pʋyɔɔ yɔ ɛta Yehowa liu.