Ðiyiyu kɩfalʋ nɛ halaa 2 mba pɛwɛ abalɩtʋ yɔ

Yozuwee ɖiyi Yehowa samaɣ pɩnzɩ sakɩyɛ, nɛ ɛtalɩ pɩnzɩ 110 lɛ, ɛsɩ. Izrayɛɛlɩ mba sɛɣaɣ Yehowa alɩwaatʋ ndʋ Yozuwee ɖiyaɣ-wɛ yɔ. Ɛlɛ Yozuwee sɩm wayɩ lɛ, papaɣzɩ sɛʋ sɩʋ kpelisi ɛzɩ Kanaŋ mba yɔ. Ɛzɩma patɩɖɔkɩ Yehowa paɣtʋ kpam yɔ, pʋyɔɔ lɛ, Yehowa yeba nɛ Kanaŋ wiyaʋ weyi payaɣ se Yabiini yɔ, ɛnazɩ-wɛ. Peeɖe petendi Yehowa se ɛsɩnɩ-wɛ. Nɛ Yehowa ha-wɛ ɖiyiyu kɩfalʋ, ɛnʋ lɛ Baaraakɩ. Ɛkaɣ sɩnʋʋ samaɣ nɛ kɛsɛɛ Yehowa camɩyɛ.

Yehowa tiyi nayʋ halɩñɩnʋ weyi payaɣ se Debora yɔ Baaraakɩ cɔlɔ se eheyi-i se: “Kpaɣ abalaa 10000 nɛ iwolo ɩkatɩ Yabiini sɔɔjanaa Kisoŋ pɔɔ cɔlɔ. Peeɖe ŋkaɣ kʋʋ Sisera weyi ɛkɛ Yabiini sɔɔjanaa ñʋʋdʋ yɔ.” Baaraakɩ cosi Debora se: “Ye ŋtisaa se ŋtɩŋɩɣ ma-wayɩ yɔ, ɖɩnɛ ɛlɛ mowoki.” Nɛ Debora pɩsɩnɩ-ɩ se: “Mantɩŋɩɣ ña-wayɩ. Ɛlɛ tɩlɩ se pɩtɩkɛ ñakaɣnɩ kʋʋ Sisera. Yehowa yɔɔdaa se halʋ nɔɔyʋ kaɣnɩ-ɩ kʋʋ.”

Debora tɩŋ Baaraakɩ nɛ ɛ-sɔɔjanaa wayɩ nɛ pakpa Taabɔɔrɩ Pʋʋ yɔɔ se pɔñɔɔzɩ pa-tɩ nɛ pala you. Sisera tɩɩnɩ tɔm ndʋ lɛ, ekpeɣli e-you lɔɔɖa nɛ ɛ-sɔɔjanaa fɛɛʋ ŋgʋ kɩwɛ pʋʋ ŋgʋ kɩ-tɛɛ yɔ kɩ-taa. Debora heyi Baaraakɩ se: “Sɔnɔ Yehowa kaɣ-ŋ sɩnʋʋ nɛ ŋwa you.” Baaraakɩ nɛ ɛ-ɛyaa 10000 petii pʋʋ se pakatɩ Sisera sɔɔjanaa mba paawɛ ɖoŋ pɩdɩɩfɛyɩ yɔ.

Peeɖe Yehowa laba nɛ Kisoŋ pɔɔ taa lɩm wadɩ; nɛ ahɔya li Sisera you kɛɛkɛɛnaa. Sisera na mbʋ lɛ, ɛlɩɩ e-you kɛɛkɛɛ taa nɛ ɛpaɣzɩ seu. Sisera pɩzaa nɛ ese, ɛlɛ pɩkazɩ ɛ-sɔɔjanaa, nɛ Baaraakɩ nɛ ɛ-sɔɔjanaa pakʋ-wɛ. Sisera sewa nɛ ewolo halʋ weyi payaɣ se Yayɛɛlɩ yɔ, e-kizinziku tɛɛ. Halʋ ɛnʋ ɛha-ɩ naalɩm nɛ ɛñɔɔ nɛ ehuuzi ɛ-yɔɔ pɩsaʋ. Pʋwayɩ lɛ, ɛpaɣzɩ ɖou mbʋ pʋyɔɔ yɔ, pɩɩnɩ-ɩ. Nɛ Yayɛɛlɩ kpɛzɩ kizinziku ɖaʋ nakʋyʋ nɛ ɛka ɛ-ñʋʋ taa nɛ ɛkʋ-ɩ.

Pɩkɛdaa lɛ, Baaraakɩ weyi ɛñɩnaɣ Sisera yɔ, ɛtalaa. Yayɛɛlɩ sɩŋ e-kizinziku nɔnɔɔ taa nɛ eheyi-i se: “Sʋʋ nɛ mawɩlɩ-ŋ abalʋ weyi ŋñɩnɩɣ yɔ.” Baaraakɩ sʋwa lɛ, ɛmaɣnɩ Sisera, ɛsɩba. Peeɖe Baaraakɩ nɛ Debora pete hendu nɛ pasa Yehowa ɛzɩma ɛsɩnɩ Izrayɛɛlɩ mba nɛ pawa po-koyindinaa yɔ pɩ-yɔɔ. Pɩnzɩ 40 nzɩ sɩtɩŋ pʋwayɩ yɔ sɩ-taa, Izrayɛɛlɩ mba kaawɛ pɛɛyɛ taa.