Daviid nɛ Gooliyaatɩ

Yehowa heyi Samɩyɛɛlɩ se: “Wolo Yesee ɖɩɣa taa. Ɛ-pɩyalʋ nɔɔyʋ kaɣnɩ kɛʋ Izrayɛɛlɩ wiyaʋ kɩfalʋ.” Nɛ Samɩyɛɛlɩ kʋyɩ nɛ ɛɖɛɛ Yesee ɖɩɣa taa. Ɛtalaa nɛ ɛna Yesee pɩyalʋ kajalaɣ ñɩnʋ lɛ, ɛmaɣzɩ se: “Pɩtʋʋ fɛyɩ se ɛnɛ Yehowa lɩzaa.” Ɛlɛ Yehowa heyi Samɩyɛɛlɩ se pɩtɩkɛ ɛnʋ. Yehowa yɔɔdaa se: “Mɔncɔŋnɩ ɛyʋ laŋɩyɛ taa na, maacɔŋnɩ mbʋ pɩnaɣ ɛsa yɔɔ yem yɔ pi-ɖeke.”

Yesee kɔnɩ ɛ-pɩyalaa lalaa 6 Samɩyɛɛlɩ ɛsɩndaa. Ɛlɛ Samɩyɛɛlɩ heyi-i se: “Yehowa tɩlɩzɩ pa-taa nɔɔyʋ. Ña-pɩyalaa kpeekpe lɛ?” Nɛ Yesee cosi-i se: “Pɩkazɩ kʋɖʋm, man-tɩnʋʋ, payaɣ-ɩ se Daviid, eɖiɣni me-heŋ ɖiyuu awayɩ.” Pɔkɔnɩ Daviid lɛ, Yehowa heyi Samɩyɛɛlɩ se: “Ɛnʋ lɛ!” Samɩyɛɛlɩ pɩyɩ Daviid ñʋʋ taa num nɛ pɩwɩlɩ se ɛnʋ kaɣnɩ kɛʋ Izrayɛɛlɩ wiyaʋ kɩfalʋ.

Alɩwaatʋ natʋyʋ wayɩ lɛ, Izrayɛɛlɩ mba wolo se poyooni Filistii mba. Ðogo nɔɔyʋ kaawɛ Filistii ñɩma mba pa-taa nɛ payaɣ-ɩ se Gooliyaatɩ. Paa evemiye nɖɩ lɛ, Gooliyaatɩ wɛɛ nɛ ehoŋuu Izrayɛɛlɩ mba. Ɛmakaɣ kubusi nɛ eheyiɣ Izrayɛɛlɩ mba se: “Etiyi abalʋ nɔɔyʋ nɛ ma nɛ ɩ ɖiyoo. Ye ɛpɩzaa nɛ ɛwabɩ-m yɔ, ɖɩpɩsɩɣ mi-yomaa, ɛlɛ ye mawabɩnɩ-ɩ yɔ, ɩpɩsɩɣ ɖo-yomaa.”

Daviid kɔɔ Izrayɛɛlɩ sɔɔjanaa ɖigbeɣliye taa, mbʋ pʋyɔɔ yɔ, petiyi-i se ewoni ɛ-ɖalaa mba pɛkɛ sɔɔjanaa yɔ tɔɔnaɣ. Ɛnɩ tɔm ndʋ Gooliyaatɩ wɛɛ nɛ ɛyɔɔdʋʋ yɔ lɛ, ɛtɔ se: “Manpɩzɩɣ nɛ moyooni-i.” Nɛ Wiyaʋ Sɔɔlɩ heyi-i se: “Pɩɣa evelaɣ yem ŋkɛnaa!” Ɛlɛ Daviid pɩsɩnɩ-ɩ se: “Yehowa kaɣ-m sɩnʋʋ.”

Sɔɔlɩ ñɩnaɣ se ɛcɛlɩ ɛ-sɔɔjatʋ wondu Daviid, ɛlɛ Daviid heyi-i se: “Wondu tʋnɛ tɩɩkaɣ-m wazʋʋ you taa.” Peeɖe Daviid kpaɣ ɛ-pʋtɔɖɛ nɛ ɛɖɛɛ etii pɔɔ taa. Ɛkpaɣ pɔɔ taa peeɖe pɛɛ 5 nɛ ɛɖʋ e-huyuu taa. Pʋwayɩ lɛ, ese se ɛkatɩ Gooliyaatɩ. Ðogo ɛnʋ ɛna-ɩ lɛ, eholi nɛ ɛyɔɔdʋʋ se: “Pɩɣa ña, kɔɔ cɩnɛ. Mankaɣ-ŋ kʋʋ nɛ mɛncɛlɩ ña-nandʋ ɛsɔdaa sumasɩ nɛ tɛtɛgbɩna.” Ɛlɛ sɔɔndʋ tɩkpa Daviid. Daviid holi ɖɔɖɔ nɛ ecosi-i se: “Ŋkɔŋ ma-wayɩ nɛ laɣɖɛ nɛ kɩgbɛzɛŋ. Ma yɔ, mɔnkɔŋ ña-wayɩ Yehowa hɩɖɛ taa. Pɩtɩkɛ ɖa ŋyouna, ɛlɛ Ɛsɔ ŋyouna. Paa anɩ ɛkaɣ naʋ se ɖɛ-Ɛsɔ Yehowa wɛ ɖoŋ nɛ pɩkɩlɩ laɣɖɛ yaa kɩgbɛzɛŋ. Ɛkaɣ mɩ-tɩŋa payɩ ɖʋzʋʋ ɖe-nesi tɛɛ.”

Daviid ɖʋ pɩyɛ pʋtɔɖɛ taa nɛ efiɣdi-ɖɩ ɖoŋ, nɛ eyele-ɖɩ nɛ ɖɩɖɛɛ. Yehowa ɖoŋ taa lɛ, pɩyɛ nɖɩ ɖiwolo ɖɩmʋ Gooliyaatɩ ñʋʋ nɛ ɖɩsʋʋ e-kiɖe taa. Nɛ ɖogo ɛnʋ etii ɛɖa tataa. Peeɖe Filistii mba paɣzɩ seu se paya pa-ñʋʋ. Ŋtaɣ Yehowa liu ɛzɩ Daviid yɔ?