Sɔɔndʋ tɩkpa Daviid

Sɔɔndʋ kpaɣ-ŋ lɛ, ɛbɛ ŋlakɩ?— Pɩtɩla ŋseɣ nɛ ŋwolo ño-ɖoo nɛ ña-caa pɔ-cɔlɔ se pohuuzi ñɔ-yɔɔ yaa pasɩnɩ-ŋ. Ɛlɛ nɔɔyʋ pɩzɩɣ nɛ ɛsɩnɩ-ŋ ɖɔɖɔ. Pʋdʋ ɛnʋ nɔɔyʋ fɛyɩ ɖoŋ nɛ pɩtalɩ-ɩ. Ŋsɩm pʋdʋ na?— Ɛnʋ lɛ Yehowa Ɛsɔ. Yele nɛ ɖɩyɔɔdɩ pɩɣa evelaɣ ŋga Bibl yaɣ se Daviid yɔ, kɔ-tɔm. Etaaseɣ sɔɔndʋ, mbʋ pʋyɔɔ yɔ, ɛɛnawa se paa pɩɩla ɛzɩma yɔ Yehowa kaɣ-ɩ sɩnʋʋ.

Ðooo Daviid kaakɛ pɩɣa lɛ ɛ-lʋlɩyaa paɣzɩ-ɩ wɩlʋʋ ɛzɩma ɛpɩzɩɣ nɛ ɛsɔɔlɩ Yehowa yɔ. Mbʋ sɩnɩnɩ-ɩ nɛ etaaseɣ sɔɔndʋ, halɩ pɩkpɛndɩnɩ kaɖɛ alɩwaatʋ taa. Ɛnawa se Yehowa kɛ ɛ-taabalʋ nɛ Yehowa kaɣ-ɩ sɩnʋʋ. Kɩyakʋ nakʋyʋ Daviid wɛɛ nɛ ɛcɔŋnɩ heŋ yɔɔ lɛ, tɔɔyʋʋ sɔsɔʋ nakʋyʋ kɔɔ nɛ kɩkpa heu nɔɔyʋ se kɩtɔɔ. Ŋsɩm mbʋ Daviid laba yɔ? Ɛɖɔɔnɩ tɔɔyʋʋ nɛ ɛkʋ-kʋ nɛ nesi kpɛɖɛ; ɛtɩɖɔkɩ nabʋyʋ. Pʋwayɩ mʋʋzʋʋ nakʋyʋ kɔm se kɩkpa heŋ lɛ, Daviid kʋ-kʋ ɖɔɖɔ. Ŋmaɣzɩɣ se aawɛɛ nɛ ɛsɩɣnɩ Daviid mbʋ?— Yehowa, yaa we?

Alɩwaatʋ lɛɛtʋ taa ɖɔɖɔ lɛ, Daviid wɩlaa se ɛwɛ abalɩtʋ. Izrayɛɛlɩ piya kaawɛɛ nɛ palakɩ you nɛ Filisti mba. Filisti sɔɔjanaa taa lɛlʋ kaakɛ ɖogo weyi ɛɖaɣlaa pɩdɩɩfɛyɩ yɔ. Ɛ-hɩɖɛ lɛ Gooliyaatɩ. Ðogo ɛnʋ ɛɛwɛɛ nɛ ehoŋuu Izrayɛɛlɩ piya nɛ Yehowa. Ekou nɛ ɛyaɣ Izrayɛɛlɩ sɔɔjanaa se pɔkɔɔ nɛ ɛ nɛ wɛ poyoo. Ɛlɛ sɔɔndʋ kaawɛɛ nɛ pɩkpaɣ Izrayɛɛlɩ piya tɩŋa. Daviid ñanɩ tɔm ndʋ lɛ, eheyi Gooliyaatɩ se: ‘Mɔnkɔŋ nɛ ma nɛ ŋ ɖiyoo! Yehowa kaɣ-m sɩnʋʋ nɛ mawabɩ-ŋ!’ Ŋmaɣzɩɣ se Daviid kaawɛ abalɩtʋ na?— Ɛɛɛ, ɛɛwɛ abalɩtʋ pɩdɩɩfɛyɩ. Ŋsɔɔlaa se ŋtɩlɩ mbʋ pɩlabɩ pʋwayɩ yɔ?

Daviid kpaɣ ɛ-pʋtɔɖɛ nɛ pɛɛ kagbanzɩ wena awɛ solo solo yɔ nɛ ewolo se eyooni ɖogo ɛnʋ. Gooliyaatɩ na pɩɣa evelaɣ Daviid lɛ, pɩlabɩ-ɩ hoŋa! Ɛlɛ Daviid heyi-i se: ‘Ŋkɔŋnɩ mɔ-yɔɔ nɛ laɣɖɛ nɛ kɩgbɛzʋʋ, ɛlɛ ma mɔnkɔŋnɩ ñɔ-yɔɔ nɛ Yehowa hɩɖɛ.’ Pʋwayɩ lɛ, Daviid ɖʋ pɩyɛ ɛ-pʋtɔɖɛ taa, ese nɛ ewobini Gooliyaatɩ yɔɔ nɛ efiɣdi nɛ ɛlɔ-ɖɩ nɛ e-ɖoŋ tɩŋa. Pɩyɛ wolo nɛ ɖɩyaɣ Gooliyaatɩ kiɖe taa nɛ ɛtɔlɩ nɛ ɛsɩ. Filisti mba na mbʋ lɛ, sɔɔndʋ kpa-wɛ pɩŋŋ nɛ pakpaɣ seya. Ɛbɛ sɩnɩ pɩɣa evelaɣ Daviid nɛ kapɩzɩ nɛ kawa ɖogo ɛnʋ?— Yehowa sɩnɩnɩ-kɛ. Yehowa wɛ ɖoŋ siŋŋ nɛ pɩkpaɖɩ ɖogo ɛnʋ.

Ɛbɛ Daviid tɔm tʋnɛ tɩkpɛlɩkɩɣ-ŋ?— Yehowa wɛ ɖoŋ nɛ pɩkɩlɩ paa anɩ. Nɛ pɩtasɩ lɛ, ɛkɛ ña-taabalʋ. Ye mbʋ, ye wiɖiyi sɔɔndʋ ɛkpaɣ-ŋ yɔ, tɔzɩ se Yehowa pɩzɩɣ nɛ ɛkpazɩ-ŋ ɖoŋ nɛ ŋwɛɛ abalɩtʋ.