You laɖʋ sɔsɔ nɛ halɩbɩɣa cikpelaɣ nakɛyɛ

Izrayɛɛlɩ halɩbɩɣa cikpelaɣ nakɛyɛ kaawɛ ɖooo Siirii ɛjaɖɛ taa, nɛ piiposini kɛ-tɛ siŋŋ. Siirii sɔɔjanaa kpanɩ-kɛ yomiye nɛ powoni-kɛ nɛ kalakɩ tʋmɩyɛ sɔɔjanaa ñʋʋdʋ Namaanɩ ɖɩɣa taa. Kɛsɛɣaɣ Yehowa; ɛlɛ mba pɛ-hɛkʋ taa kaawɛɛ yɔ, paba ñataasɛɣ Yehowa.

Namaanɩ kaawɛnɩ kʋdɔŋ sɔsɔʋ nakʋyʋ, nɛ kɩwɛɛkɩɣ e-tomnaɣ nɛ kɩɖʋʋ-ɩ wɩzasɩ paa ɛzɩmtaa. Halɩbɩɣa cikpelaɣ ŋga kaasɔɔlaa kpem se kala nabʋyʋ nɛ kasɩnɩ-ɩ. Pʋyɔɔ kowoba nɛ keheyi Namaanɩ halʋ se: “Mansɩm weyi ɛpɩzɩɣ ɛla nɛ ña-walʋ yɔɔ cɛ yɔ. Yehowa tɛ nayʋ nɔɔyʋ wɛ Izrayɛɛlɩ nɛ payaɣ-ɩ se Eliizee, ɛpɩzɩɣ nɛ ɛwaa ña-walʋ kʋdɔŋ.”

Namaanɩ halʋ kpaɣ tɔm ndʋ halɩbɩɣa ŋga kɔyɔɔdaa yɔ nɛ eheyi ɛ-walʋ. Namaanɩ kaasɔɔlaa kpem se ɛ-yɔɔ ɛcɛ, pʋyɔɔ ewobi Eliizee cɔlɔ Izrayɛɛlɩ ɛjaɖɛ taa. Namaanɩ maɣzaɣ se Eliizee kaɣ-ɩ mʋʋ ɛzɩ pamʋʋ ɛyʋ sɔsɔ yɔ. Ɛlɛ Eliizee titiiwobu ɛ-maɣmaɣ se ɛyɔɔdɩnɩ-ɩ. Etiyi ɛ-lɩmɖʋyʋ na se ewolo nɛ eheyi-i se: “Wolo Yɔɔrdaŋ Pɔɔ taa nɛ ŋsɔ lɩm tam 7, nɛ ñɔ-yɔɔ cɛ.”

Namaanɩ taa tɩla leleŋ paa ññɩɩ. Ɛyɔɔdaa se: “Mamaɣzaɣ se nayʋ ɛnʋ ɛkɔŋ ɛ-maɣmaɣ nɛ ɛkpazɩ e-nesi nɛ ɛtɩnɩ mɔ-yɔɔ nɛ ɛtɩmnɩ ɛ-Ɛsɔ nɛ mɔ-yɔɔ cɛ. Ɛlɛ ɛtɩla mbʋ nɛ eheyiɣ-m se mowolo Izrayɛɛlɩ pɔɔ kanɛ ka-taa nɛ mɔnsɔ lɩm. Siirii pɔsɩ wɛ ɖeu nɛ pɩkpaɖɩ. Ɛbɛ yɔɔ maawoki sɩ-taa nakɛyɛ taa se mɔnsɔ lɩm?” Namaanɩ kɔ pana nɛ ɛlɩɩ Eliizee tɛ nɛ ɛɖɛɛ.

Pɛɖɛɣaɣ lɛ, ɛ-lɩmɖʋyaa tendi-i se ɛtaala mbʋ. Ɛ-lɩmɖʋyaa mba pɔpɔzɩ-ɩ se: “Paa ɛbɛ pɔtɔm se ŋla, ŋŋlakɩ nɛ ñɔ-yɔɔ cɛ yaa we? Mbʋ nayʋ ɛnɛ eheyi-ŋ se ŋla yɔ, pɩfɛyɩ kaɖɛ paa ññɩɩ. Pɩɩwɛɣ ɖeu se ŋla mbʋ yaa we?” Namaanɩ welisini ɛ-lɩmɖʋyaa mba nɛ etii Yɔɔrdaŋ Pɔɔ taa nɛ ɛsɔ lɩm tam 7. Namaanɩ tibi lɩm tɛɛ tam 7 ɖeɖe nɛ ɛlɩɩ lɛ, ɛna se ɛ-yɔɔ cɛbɩ cɩɖɩ cɩɖɩ. Pɩlabɩ-ɩ leleŋ siŋŋ nɛ ɛpɩsɩ Eliizee cɔlɔ nɛ eheyi-i se: “Lɛɛlɛɛyɔ manawa se Yehowa kɛnɩ Ɛsɔ toovenim tʋ.” Ña-naʋ taa yɔ, Izrayɛɛlɩ halɩbɩɣa cikpelaɣ ŋga, ka-taa tɩla leleŋ siŋŋ alɩwaatʋ ndʋ Namaanɩ yɔɔ cɛba nɛ ɛpɩsɩ ɛ-tɛ yɔ?