Yoziyaasɩ kaasɔɔlɩ Ɛsɔ paɣtʋ

Yoziyaasɩ kaawɛnɩ pɩnzɩ 8 lɛ ɛpɩsɩ Yuuda wiyaʋ. Alɩwaatʋ ndʋ tɩ-taa lɛ, samaɣ sɛɣaɣ sɩʋ kpelisi nɛ kalakɩ ɖɔɖɔ maajiki lakasɩ. Yoziyaasɩ kɔm nɛ ɛwɛɛnɩ pɩnzɩ 16 lɛ, ɛñaɣ pana nɛ ɛkpɛlɩkɩ ɛzɩma pɩwɛɛ se pɛsɛɛ Yehowa camɩyɛ yɔ. Ɛkɔm nɛ ɛwɛɛnɩ pɩnzɩ 20 lɛ, ɛpaɣzɩ yɔkʋʋ sɩʋ kpelisi nɛ altaarunaa ɛjaɖɛ kpeekpe taa. Ɛtalɩ pɩnzɩ 26 lɛ, ɛkpaɣ lɩmaɣzɩyɛ se pɔñɔɔzɩ Yehowa templo.

Cɔjɔ kɩlɩm Hilikiya kɔɔ nɛ ɛlɩɩ Yehowa Paɣtʋ takayaɣ yɔɔ templo taa. Pɩtɩla takayaɣ kikpiyaɣ ŋga Moyizi maɣmaɣ kaamawa yɔ, ŋga ɛnawa. Wiyaʋ tɛ takayaɣ taa mayʋ Safaanɩ kpaɣ takayaɣ ŋga nɛ ewoni-kɛ Yoziyaasɩ nɛ ɛpaɣzɩ-kɛ kalʋʋ nɛ nɔɔ kɩkʋyaɣ. Yoziyaasɩ welisi tɔm ndʋ pakalaa yɔ lɛ, ɛnɩɩ pɩ-taa se samaɣ wɛʋ nɛ kalakɩ mbʋ pɩtɩtʋʋzɩ Yehowa ɛsɩndaa yɔ, pɩlakɩ pɩnzɩ sakɩyɛ yɔ. Wiyaʋ Yoziyaasɩ heyi Hilikiya se: “Yehowa kɔ-ɖʋ nɛ pana. Wolo nɛ ŋyɔɔdɩnɩ Yehowa. Yehowa kaɣ-ɖʋ heyuu mbʋ pɩpɔzʋʋ se ɖɩla yɔ.” Yehowa tɩŋnɩ nayʋ halɩñɩnʋ Hulɩda yɔɔ nɛ ecosi-wɛ se: “Yuuda samaɣ kizi-m. Mankaɣ ka-nɩŋgbaŋʋʋ hɔm, ɛlɛ pɩtɩkɛ wiyaʋ Yoziyaasɩ alɩwaatʋ taa, mbʋ pʋyɔɔ yɔ eluzi ɛ-tɩ.”

Wiyaʋ Yoziyaasɩ nɩ tɔm ndʋ lɛ, ewolo templo taa nɛ ekpeɣli samaɣ kpeekpe. Peeɖe ɛkalɩ Yehowa Paɣtʋ nɛ nɔɔ kɩkʋyaɣ se samaɣ kpeekpe ɛnɩɩ. Nɛ Yoziyaasɩ nɛ samaɣ kpeekpe poɖuu nɛ pɔyɔɔdɩ se pañaŋ Yehowa nɛ pa-laŋɩyɛ pilim.

Yuuda samaɣ tɩtasɩ Paska kazandʋ tɔɔʋ pɩlakɩ pɩnzɩ sakɩyɛ yɔ. Ɛlɛ Yoziyaasɩ kalɩ Paɣtʋ takayaɣ taa se pɩwɛɛ se pɔtɔkɩ Paska paa pɩnaɣ ŋga lɛ, eheyi samaɣ se: “Pɩwɛɛ se ɖɩla Paska kazandʋ Yehowa.” Nɛ Yoziyaasɩ yele nɛ pɔkɔnɩ kpɩna sakɩyɛ se palaanɩ kɩlaŋ. Ɛñɩnɩ ɖɔɖɔ hendu teyaa se peteɣ hendu templo taa. Samaɣ kpeekpe tɔɔ Paska, nɛ pʋwayɩ lɛ pakpaɣ kɩyakɩŋ 7 nɛ pɔtɔɔ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ. Kpaɣnɩ Samɩyɛɛlɩ alɩwaatʋ taa, wiɖiyi samaɣ tɩtasɩ Paska kazandʋ tɔɔʋ ɛzɩ tʋnɛ yɔ. Ŋsɔɔlɩ kpɛlɩkʋʋ Yehowa yɔɔ tɔm na?