KPƐLƖKƲƲ 8
Yoziyaasɩ kaawɛnɩ taabalaa kɩbama
Ŋmaɣzɩɣ se kɩbam labʋ wɛ kaɖɛ na?— Ɛyaa sakɩyɛ cosuu se ɛɛɛ. Bibl heyiɣ-ɖʋ se pɩɩwɛ kaɖɛ abalɩbɩɣa ŋga payaɣ se Yoziyaasɩ yɔ se kala mbʋ pɩkɛ kɩbam yɔ. Ɛlɛ kaawɛnɩ taabalaa kɩbama mba yɔ, pasɩnɩ-kɛ pɩdɩɩfɛyɩ. Yele nɛ ɖɩyɔɔdɩ Yoziyaasɩ nɛ ɛ-taabalaa mba pɔ-yɔɔ tɔm pazɩ.
Yoziyaasɩ caa payaɣ se Amooni, weyi ɛɛkɛ Yuda mba wiyaʋ yɔ. Amooni lakaɣ mbʋ pɩtɩtʋʋzɩ yɔ, nɛ ɛsɛɣ ɖɔɖɔ sɩɩnaa. Ɛkɔma nɛ ɛsɩ lɛ , ɛ-pɩyalʋ Yoziyaasɩ pɩsɩ wiyaʋ Yuda ɛjaɖɛ taa. Ɛlɛ, pɩnzɩ lutozo yem ɛɛwɛna! Ŋmaɣzɩɣ se ɛlakaɣ ɛzɩ ɛ-caa yɔ?— Aayɩ, ɛtaalakɩ mbʋ.
Sofoniya heyi samaɣ se kataalaa sɩɩnaa
Paa Yoziyaasɩ ɛɛkɛ pɩɣa evelaɣ yem yɔ, ɛɛsɔɔlaa siŋŋ se ɛña Yehowa paɣtʋ. Pʋyɔɔ ɛɖʋwaɣ taabalɩyɛ nɛ mba pɔsɔɔlɩ Yehowa yɔ, pe-ɖeke. Nɛ paba sɩnɩ-ɩ ɖɔɖɔ nɛ ɛpɩzɩ nɛ ɛla kɩbam. Mba kaakɛ Yoziyaasɩ taabalaa?
Pa-taa nɔɔyʋ payaɣ se Sofoniya. Sofoniya kaakɛ nayʋ nɛ eeheyi Yuda mba se ye patiyele sɩɩnaa laʋ yɔ, Yehowa kaɣ pa-nɩŋgbaaŋ hɔm. Yoziyaasɩ welisini Sofoniya nɛ ɛsɛɛ Yehowa yeke na, ɛtɩlaa sɩɩnaa.
Yoziyaasɩ taabalʋ lɛlʋ payaɣ se Yeremii. Paawɛnɩ pɩnzɩ kʋyʋmsɩ. Papaɣlɩ pa-tɩŋa Yuda tɛtʋ taa nɛ pa-ɖɩsɩ kaawɛ ɖama cɔlɔ. Paakɛ taabalaa kɩbama kpem, mbʋ labɩna nɛ Yoziyaasɩ sɩba lɛ, Yeremii ma ŋgee hendu natʋyʋ ndʋ tɩ-taa ɛyɔɔdɩ wɩzasɩ nzɩ ɛwɛɛ nɛ ɛnɩɣ Yoziyaasɩ sɩm yɔɔ yɔ, sɩ-tɔm. Yeremii nɛ Yoziyaasɩ pasɩnɩ ɖama nɛ papɩzɩ nɛ pala mbʋ pɩtʋʋzaa yɔ nɛ paña ɖɔɖɔ Yehowa.
Yoziyaasɩ nɛ Yeremii pasɩnɩ ɖama nɛ papɩzɩ nɛ pala mbʋ pɩtʋʋzaa yɔ
Ɛbɛ Yoziyaasɩ kɩɖaʋ kpɛlɩkɩɣ-ŋ?— Paa Yoziyaasɩ ɛɛkɛ pɩɣa evelaɣ yem yɔ, ɛɛsɔɔlɩ siŋŋ se ɛla mbʋ pɩtʋʋzaa yɔ. Ɛɛnawa se pɩwɛɛ se ɛ-taabalaa ɩkɛ mba pɔsɔɔlɩ Yehowa yɔ. Ña ɖɔɖɔ ñaɣ pana nɛ ŋwɛɛnɩ taabalaa mba pɔsɔɔlɩ Yehowa nɛ papɩzɩɣ se pasɩnɩ-ŋ nɛ ŋla mbʋ pɩtʋʋzaa yɔ.