Yesu ñalɩ templo

Yesu kaawobi Yeruzalɛm pɩnaɣ 30 taa Paska alɩwaatʋ taa. Ɛyaa sakɩyɛ kaakɔm tɛtʋ taa se pɔtɔɔ Paska kazandʋ. Ɛzɩ kazandʋ ndʋ tɩpɔzʋʋ yɔ, pala kpɩna kɩlaŋ sakɩyɛ templo taa. Nabɛyɛ kpɛndɩnɩ kpɩna nɛ pɔkɔɔ, lalaa ñayabɩ-yɛ Yeruzalɛm tɛtʋ taa peeɖe.

Yesu wobi templo taa lɛ, ɛna ɛyaa peɖiɣni kpɩna pɛdʋʋ. Paawɛɛ nɛ palakɩ tadɩyɛ Yehowa maɣmaɣ ɖɩɣa taa! Ɛbɛ Yesu laba? Ɛkpaɣ nimiye nɛ ɛlʋʋ ɛgbazɩyɛ nɛ ɛɖɔɔnɩnɩ pʋŋ nɛ naŋ templo taa. Etuzi tadɩyɛ laɖaa mba pa-taabɩlɩnaa nɛ liidiye nɛ ɛpɛɖɩ tataa. Yesu heyi ahoo pɛdɩyaa se: “Ikuu mi-wondu nɛ ɩɖɛɛ cɩnɛ! Ɩtaapɩsɩ man-Caa ɖɩɣa tadɩyɛ ɖɩlaɖɛ.”

Ɛyaa mba paawɛ templo taa nɛ pana Yesu lakasɩ nzɩ yɔ, pɩɩɖɩɣzɩ-wɛ pɩdɩɩfɛyɩ. Peeɖe ɛ-tɔmkpɛlɩkɩyaa tɔzɩ natʋ tɔm ndʋ paayɔɔdɩ Mesiya yɔɔ yɔ tɩ-yɔɔ: “Mankaɣ wɛnʋʋ kpekpeka Yehowa ɖɩɣa yɔɔ pɩdɩɩfɛyɩ.”

Pʋwayɩ, pɩnaɣ 33 taa lɛ, Yesu tasɩ ñalʋʋ templo nabʋlɛ ɖeɖe. Ɛtaañɩnɩɣ se eyele nɛ nɔɔyʋ tasɩ ɛ-Caa ɖɩɣa pisuu.