Yesu susuu Kewiyaɣ tɔm

Pamɩyɩsɩ Yesu lɩm nɛ pɩla pazɩ lɛ, ɛpaɣzɩ susuu se: “Ɛsɔ Kewiyaɣ ñɔtaa.” Ɛ-tɔmkpɛlɩkɩyaa tɩŋaɣ ɛ-wayɩ alɩwaatʋ ndʋ ɛcɔwaɣ Galilee nɛ Yuudee nɛ esusuu tɔm yɔ. Yesu pɩsɩ ɛ-tɛtʋ taa Nazarɛɛtɩ lɛ, ewolo Sinaagɔɔgɩ taa, ɛkpaɣ Izaayii takayaɣ, ekuli-kɛ nɛ ɛkalɩnɩ nɔɔ kɩkʋyaɣ se: “Yehowa ha-m fezuu kiɖeɖeu se manpɩzɩ nɛ monsusi tɔm kɩbandʋ.” Tɔm ndʋ tɩ-tɔbʋʋ lɛ suwe? Tɩ-tɔbʋʋ lɛ se paa ɛyaa ɩñɩnɩɣ se Yesu ɛla piti lakasɩ yɔ, lɩmaɣzɩyɛ sɔsɔɖɛ nɖɩ ɖɩ-yɔɔ paha-ɩ fezuu kiɖeɖeu yɔ lɛ se esusi tɔm kɩbandʋ. Nɛ Yesu heyi mba paawɛɛ nɛ pewelisiɣni-i yɔ se: “Natʋ tɔm tʋnɛ, sɔnɔ tɩlaba.”

Pʋwayɩ lɛ, Yesu wolo Galilee Teŋgu cɔlɔ nɛ ɛkatɩ ɛ-tɔmkpɛlɩkɩyaa 4, paakɛ kpakpasɩ kpayaa. Nɛ eheyi-wɛ se: “Ɩtɩŋ ma-wayɩ nɛ mankaɣ-mɩ pɩsʋʋ ɛyaa kpayaa.” Tɔmkpɛlɩkɩyaa mba lɛ Pɩyɛɛrɩ, Andree, Yakubu nɛ Yohanɛɛsɩ. Kpaagbaa mbʋ lɛ, peyele piyiŋ lɔʋ tʋmɩyɛ nɛ patɩŋ Yesu wayɩ. Pɔcɔɔ Galilee egeetiye kpeekpe taa nɛ posusi Yehowa Kewiyaɣ tɔm. Posusi tɔm Sinaagɔɔgɩwaa taa, kɩyakɩŋ taa nɛ habɛɛ nɔsɩ. Hɔɔlɩŋ weyi ɩ-taa powokaɣ yɔ, ɛyaa sakɩyɛ tɩŋaɣ pa-wayɩ. Ɛyaa nɩ Yesu tɔm paa le, halɩ pɩkpɛndɩnɩ Siirii.

Yesu kɔm nɛ ɛha ɛ-wayɩ tɩŋɩyaa nabɛyɛ ɖoŋ se pawaa kʋdɔmɩŋ nɛ pɔɖɔɔnɩ aleewaa. Alɩwaatʋ ndʋ esusaɣ tɔm tɛtʋ sɔsɔtʋ ndɩ ndɩ nɛ tɛtʋ cikpetu ndɩ ndɩ taa yɔ, lalaa tɩŋaɣ ɛ-wayɩ. Halaa siɣsiɣ tɩnaa nabɛyɛ kaacɔnɩ Yesu nɛ ɛ-wayɩ tɩŋɩyaa kɩcɛyɩm ɖeɖe; halaa mba pa-taa nabɛyɛ lɛ, Maarɩɩ Magdalaa tʋ, Yoana nɛ Suzaana.

Yesu falɩsɩ ɛ-tɔmkpɛlɩkɩyaa nɛ pɩtɛ lɛ, etiyi-wɛ se posusi tɔm. Tʋmɩyɛ nɖɩ palabɩ Galilee egeetiye taa yɔ, ɖɩsɩnɩ ɛyaa sakɩyɛ nɛ papɩsɩ tɔmkpɛlɩkɩyaa nɛ pamɩyɩsɩ-wɛ lɩm. Ɛyaa sakɩyɛ kaasɔɔlaa se papɩsɩ Yesu tɔmkpɛlɩkɩyaa, pʋyɔɔ ɛkpaɣ-wɛ nɛ ɛmaɣzɩnɩ hayɩm mbʋ pɩ-taa tɔɔnaɣ talɩ kʋm yɔ. Ɛyɔɔdaa se: “Ɩtɩmnɩ Yehowa nɛ etiyini tʋmlaɖaa sakɩyɛ hayɩm taa.” Pʋwayɩ lɛ, ɛlɩzɩ ɛ-tɔmkpɛlɩkɩyaa 70 nɛ etiyi-wɛ naalɛ naalɛ se posusi tɔm Yuudee egeetiye kpeekpe taa. Pawɩlɩ ɛyaa ndɩ ndɩ Kewiyaɣ tɔm. Yesu tɔmkpɛlɩkɩyaa pɩsaa lɛ, pa-taa kaawɛ leleŋ se peheyi-i ɛzɩma tɔm susuu ɖɔma yɔ. Eleeu taapɩzɩɣ se ɛla nabʋyʋ nɛ ɛsɩnzɩ tɔm susuu tʋmɩyɛ.

Yesu labɩ mbʋ payɩ pɩpɔzʋʋ yɔ se pɩsa nɛ ɛpɩsɩɣ ɛsɔdaa lɛ, ɛ-tɔmkpɛlɩkɩyaa wolo pɩ-yɔɔ nɛ posusi Kewiyaɣ tɔm. Eheyi-wɛ se: “Isusi tɔm kɩbandʋ tɛtʋ kpeekpe yɔɔ. Ɩwɩlɩ ɛyaa Ɛsɔtɔm nɛ ɩmɩyɩsɩ-wɛ lɩm.”