Yesu fezi Lazaarɩ

Yesu kaawɛnɩ taabalaa nabɛyɛ 3 Betaanii tɛtʋ taa. Ɛɛsɔɔlɩ pɔ-tɔm pɩdɩɩfɛyɩ. Mba lɛ Maarta nɛ e-newaa Lazaarɩ nɛ Maarɩɩ. Kɩyakʋ nakʋyʋ Yesu kaawɛ Yɔɔrdaŋ pɔɔ wayɩ lɛ, Maarɩɩ nɛ Maarta petiyi se peheyi-i tɔm kɩcɛyɩtʋ tʋnɛ: “Pɩwɩɣ Lazaarɩ siŋŋ. Ðitendi-ŋ, kɔɔ lɔŋ!” Ɛlɛ Yesu tiwolo kpaagbaa. Kɩyakɩŋ 2 wayɩ lɛ, eheyi ɛ-apostoloowaa se: “Ðiwolo Betaanii. Lazaarɩ ɖiɣni ɖou. Mowoki menfezi-i.” Apostoloowaa cosi-i se: “Ye Lazaarɩ eɖou yɔ pɩwɛ ɖeu, mbʋ pʋyɔɔ yɔ, piyeki nɛ ɛ-yɔɔ cɛ lɔŋ.” Peeɖe Yesu lɩzɩ-wɛ pɩ-taa se: «Lazaarɩ sɩba.»

Alɩwaatʋ ndʋ Yesu kɔm nɛ ɛtalɩ Betaanii yɔ, pɛtɛm Lazaarɩ pim nɛ pɩla kɩyakɩŋ 4. Samaɣ kaakɔm se kɛhɛzɩ Maarta nɛ Maarɩɩ pa-laŋa. Maarta nɩwa se Yesu talaa lɛ, ese nɛ ɛkatɩ-ɩ. Nɛ eheyi-i se: «Kɩbaɣlʋ, ye ŋŋwɛ cɩnɛ yɔ, me-neu taasɩ.» Yesu heyi-i se: “Ñe-neu kaɣ fem. Maarta, ŋtisi tɩ-yɔɔ?” Maarta cosi se: “Mentisaa se ɛkaɣ fem sɩɖa femtu kɩyakʋ wiye.” Yesu heyi-i se: «Mɛkɛnɩ femtu nɛ wezuu.»

Nɛ Maarta wolo nɛ eheyi Maarɩɩ se: “Yesu talaa.” Maarɩɩ paɣzɩ seu se ɛkatɩ Yesu, nɛ samaɣ ŋga kaawɛ ɛ-cɔlɔ yɔ kakʋyɩ nɛ katɩŋɩ-ɩ. Ɛtalɩ Yesu cɔlɔ lɛ, eluŋ ɛ-nɩŋgbanzɩ tɛɛ nɛ ɛwɛɛ wiu yɔɔ. Eheyi Yesu se: «Kɩbaɣlʋ, ye ŋŋwɛ cɩnɛ yɔ, me-neu taasɩ.» Yesu na ɛzɩma ɛwɛɛ nɛ ɛnɩɣ siziŋ siŋŋ lɛ, ɛnʋ ɖɔɖɔ ɛpaɣzɩ wiu. Samaɣ na mbʋ lɛ, kɔyɔɔdɩ se: “Ɩna ɛzɩma ɛɛsɔɔlɩ Lazaarɩ tɔm kpem yɔ!” Ɛlɛ nabɛyɛ wɛɛ nɛ pɔpɔzʋʋ se: “Ɛbɛ yɔɔ ɛtɩya ɛ-taabalʋ ñʋʋ.” Ɛzɩ ɛbɛ Yesu kaɣ labʋ?

Yesu wolo pɩlaʋ ŋgʋ kɩ-taa paapim Lazaarɩ yɔ kɩ-nɔɔ. Kaaʋ sɔsɔʋ nakʋyʋ paasuluni kɩ-nɔɔ. Eheyi-wɛ se: “Ikuli kaaʋ.” Maarta tɔ se: “Lazaarɩ sɩbʋ yɔ, pɩlakɩ kɩyakɩŋ 4 yɔ! Ɛpaɣzɩ sɔŋ lɩʋ.” Ɛlɛ pokuli kaaʋ ɛzɩ Yesu pɔzʋʋ yɔ. Nɛ Yesu tɩmnɩ Ɛsɔ se: “Caa mɛnsɛɣ-ŋ se ŋwelisiɣni-m. Manawa se ŋwelisiɣni-m, ɛlɛ samaɣ ŋga kɛwɛ mɔn-cɔlɔ cɩnɛ yɔ kɔ-yɔɔ mɔyɔɔdʋʋ mbʋ se katɩlɩ se ñetiyini-m.” Nɛ ɛyaa Lazaarɩ nɛ nɔɔ kɩkʋyaɣ nɛ ɛtɔ se: «Lazaarɩ, lɩɩ awayɩ!» Peeɖe piti tɔm natʋyʋ laba. Lazaarɩ lɩɩnɩ pɩlaʋ taa, pɔhɔkɩ-ɩ pɩsaŋ hɔɔlasɩ. Yesu yɔɔdɩ se: «Ɩhɛɖɩ-ɩ nɛ iyebi-i nɛ ɛɖɛɛ.»

Piti lakasɩ sɩnɛ, siyeba nɛ ɛyaa sakɩyɛ wɛɛnɩ tisuu Yesu yɔɔ. Ɛlɛ nabɛyɛ wolo nɛ peheyi-tʋ Farɩsɩ mba. Farɩsɩ mba nɩ tɔm ndʋ lɛ, pala lɩmaɣza se pakʋʋ Yesu nɛ pɩkpɛndɩnɩ Lazaarɩ. Apostoloowaa 12 taa kʋɖʋm, weyi payaɣ se Yudaasɩ Isɩkarɩyɔɔtɩ yɔ, ewolo mɛsaɣ tɛɛ nɛ eheyi Farɩsɩ mba se: “Ye mansɩnɩ-mɩ nɛ ɩkpa Yesu, ɛzɩma ɩhɛyɩɣ-m?” Panɩɩnɩ ɖama se pɛhɛyɩɣ-ɩ liidiye pɔɔyɩsɩ 30; nɛ Yudaasɩ Isɩkarɩyɔɔtɩ paɣzɩ ñɩnʋʋ nʋmɔʋ ŋgʋ kɩ-yɔɔ ɛpɩzɩɣ ɛtɩŋna nɛ ɛpɛdɩ Yesu yɔ.