Yesu kɛdɛzaɣ tɔɔnaɣ tɔɔʋ

Yuuda mba tɔkaɣ Paska kazandʋ Nisaŋ fenaɣ kɩyakʋ 14 ñɩŋgʋ wiye paa pɩnaɣ ŋga. Kazandʋ ndʋ tɩtɔzaɣ-wɛ ɛzɩma Yehowa lɩzɩ-wɛ yomiye taa Ejipiti nɛ ewoni-wɛ Kanaŋ ɛjaɖɛ taa yɔ. Pɩtalɩ pɩnaɣ 33 lɛ, Yesu nɛ ɛ-apostoloowaa pɔtɔɔ Paska Yeruzalɛm ɛsɔdaa kuduyuu nakʋyʋ tɛɛ. Pɛtɛm tɔɔʋ lɛ, Yesu heyi-wɛ se: “Mɩ-taa kʋɖʋm kaɣ ma-wayɩ lɩʋ.” Pɩɖɩɣzɩ apostoloowaa siŋŋ nɛ pɔpɔzɩ-ɩ se: “Ða-taa anɩ?” Yesu cosi-wɛ se: “Ɛnʋ lɛ weyi mɛncɛlɩɣ-ɩ kpɔnɔ kʋnɛ yɔ.” Nɛ ɛkɛzɩ kpɔnɔ nɛ ɛcɛlɩ Yudaasɩ Isɩkarɩyɔɔtɩ. Kpaagbaa mbʋ lɛ, Yudaasɩ Isɩkarɩyɔɔtɩ kʋyɩ nɛ ɛlɩɩ.

Pʋwayɩ lɛ Yesu tɩmɩ, ɛpɛlɩ kpɔnɔ nɛ ɛtayɩ apostoloowaa mba pɩkazaa yɔ. Eheyi-wɛ se: “Ɩtɔɔ kpɔnɔ kʋnɛ. Kɩsɩŋnɩ mon-tomnaɣ ŋga mankaɣ laʋ mɩ-yɔɔ yɔ.” Pʋwayɩ lɛ, ɛtɩmɩ vɛɛ yɔɔ nɛ ɛcɛlɩ-wɛ nɛ eheyi-wɛ se: “Ɩñɔɔ vɛɛ kʋnɛ. Kɩsɩŋnɩ man-calɩm mbʋ mankaɣ kpɛdʋʋ se pɩsa nɛ pekpeɣ ɛyaa pa-kɩwɛɛkɩm yɔ. Meheyiɣ-mɩ se ma nɛ mɩ ɖɩkaɣ kɛʋ awiya ɛsɔdaa. Ɩlakɩ sɔnzɩ sɩnɛ paa pɩnaɣ ŋga nɛ ɩtɔzʋʋnɩ mɔ-yɔɔ.” Kpaɣnɩ mbʋ lɛ, Yesu tɔmkpɛlɩkɩyaa kpeɣliɣ paa pɩnaɣ ŋga Nisaŋ fenaɣ kɩyakʋ 14 ñɩŋgʋ wiye nɛ palakɩ sɔnzɩ nzɩ. Payaɣ sɔnzɩ nzɩ se Kɩbaɣlʋ ɖanaɣ tɔɔnaɣ sɔnzɩ.

Pɛtɛm tɔɔʋ lɛ, apostoloowaa paɣzɩ tɔm hɔm se pana se pa-taa lɛ, akɛ sɔsɔ. Ɛlɛ Yesu heyi-wɛ se: “Mɩ-taa weyi ɛpɩsɩɣ ɛ-tɩ pɩɣa ɛjam yaa ɛkpakɩɣ ɛ-tɩ se ɛtɩlɩɩ pʋyʋ yɔ, ɛnʋ kɛnɩ mɩ-taa sɔsɔ.”

“Ɩkɛ man-taabalaa. Meheyiɣ-mɩ ndʋ payɩ ma-Caa sɔɔlaa se meheyi-mɩ yɔ. Piileɖiɣ lɛ, mankpaɣ man-Caa cɔlɔ ɛsɔdaa. Ɛlɛ mɩ lɛ ɩcakɩ cɩnɛ. Nɛ sɔɔlɩm mbʋ ɩwɛɣnɩ ɖama yɔɔ yɔ, mbʋ ɛyaa kaɣ-mɩ tɩlɩnʋʋ se ɩkɛ mɔn-tɔmkpɛlɩkɩyaa. Ɩsɔɔlɩ ɖama ɛzɩ mɔnsɔɔlʋʋ-mɩ yɔ.”

Pɩtɛma lɛ, Yesu tɩmnɩ Yehowa se ɛkandɩyɩ ɛ-tɔmkpɛlɩkɩyaa yɔɔ. Ɛpɔzɩ Yehowa se ɛsɩnɩ-wɛ nɛ pala tʋma nɔɔ kʋyʋmaɣ nɛ laŋhɛzɩyɛ taa. Ɛtɩmaa ɖɔɖɔ se Yehowa hɩɖɛ yɔɔ ɛñalɩ. Pʋwayɩ lɛ, Yesu nɛ ɛ-apostoloowaa petee hendu nɛ pasa Yehowa nɛ palɩɩ nɛ pɛɖɛɛ. Alɩwaatʋ kaañɔtaa se pakpa Yesu.