Yesu calɩ ɛyaa kudokiŋ sakɩyɛ

Pɩɩkazɩ pazɩ se pɔtɔɔ pɩnaɣ 32 tɛ Paska kazandʋ. Apostoloowaa lɩnɩ tɔm susuu nɛ patalɩ. Pɩɩnɩ-wɛ, nɛ pʋyɔɔ lɛ Yesu yele nɛ pasʋʋ kpɩyʋʋ taa nɛ powolo Bɛtɩsayidaa se pɛhɛzɩ peeɖe. Ɛlɛ kpɩyʋʋ ñɔtɩnɩ teŋgu kidiiliŋ lɛ, Yesu na ɛyaa kudokiŋ sakɩyɛ, pɛtɛm talʋʋ peeɖe nɛ paɖaŋ-wɛ. Paa Yesu kaasɔɔlaa se ɛ nɛ ɛ-apostoloowaa pe-ɖeke pɛwɛɛ yɔ, ɛmʋ ɛyaa mba camɩyɛ. Ɛwa pa-kʋdɔndɩnaa nɛ pʋwayɩ lɛ, ɛpaɣzɩ-wɛ tɔm wɩlʋʋ. Kɩyakʋ ŋgʋ ki-wiye, Yesu wɩlɩ-wɛ Ɛsɔ Kewiyaɣ tɔm. Ðanaɣ ɖanaa lɛ, apostoloowaa heyi-i se: “Ñɔɔsɩ wɩɣ samaɣ. Yele-kɛ nɛ kowolo kañɩnɩ tɔɔnaɣ nɛ kɔtɔɔ.”

Yesu yɔɔdɩ se: “Pɩtɩcɛyɩ se kɛɖɛɛ. Ɩha-kɛ nabʋyʋ nɛ kɔtɔɔ.” Apostoloowaa pɔzɩ-ɩ se: “Ŋsɔɔlaa se ɖiwolo nɛ ɖɩya kpɔnɔnaa nɛ ɖɩkɔnɩ-wɛ?” Apostoloo weyi payaɣ se Filiipu yɔ ɛtɔ se: “Paa ɖɩɩwɛnɩ liidiye sakɩyɛ yɔ, ɖɩɩpɩzɩɣ nɛ ɖɩya kpɔnɔnaa nɛ pɩtalɩ samaɣ sɔsɔɔ kanɛ yɔ.”

Yesu pɔzɩ-wɛ se: “Nabʋyʋ wɛɛ se ɖɩtɔkɩ?” Andree cosi se: “Ðɩwɛnɩ kpɔnɔnaa 5 nɛ kpakpasɩ cikpesi 2. Pɩɩpɩzɩɣ nɛ pɩtalɩ samaɣ kanɛ.” Yesu yɔɔdɩ se: “Ɩkɔnɩ-m kpɔnɔnaa mba nɛ kpakpasɩ nzɩ.” Eheyi samaɣ se kekpeɣli huwa huwa nɛ kacaɣ ñɩtʋ yɔɔ, huwa naayɛ taa ɛyaa 50 nɛ lɛɛna taa ɛyaa 100. Yesu ɖɔkɩ kpɔnɔnaa nɛ kpakpasɩ e-nesi taa nɛ ɛkpazɩ ɛ-ɛsa nɛ ɛsɔdaa nɛ ɛtɩmnɩ Ɛsɔ. Pʋwayɩ lɛ, ɛcɛlɩ tɔɔnaɣ ŋga ɛ-apostoloowaa nɛ eheyi-wɛ se patayɩ samaɣ kpeekpe. Abalaa 5000 nɛ halaa nɛ piya pɔtɔɔ nɛ pahaɣ. Pʋwayɩ lɛ, apostoloowaa kpeɣli tɔɔnaɣ ŋga kakazaa yɔ se nabʋyʋ etaale. Nɛ tɔɔnaɣ ŋga kosu ɖɔkɩŋ 12! Pɩtɩkɛ piti lakasɩ siŋŋ lɛ mbʋ yɔ?

Pɩɩkɛdɩnɩ samaɣ siŋŋ nɛ kañɩnɩɣ se Yesu ɛpɩsɩ ke-wiyaʋ. Ɛlɛ Yesu kaanawa se alɩwaatʋ taatalɩta se Yehowa ɛsɩɩ-ɩ wiyaʋ. Pʋyɔɔ ɛmɩzɩ samaɣ nɛ eheyi ɛ-apostoloowaa se powolo Galilee teŋgu kidiiliŋ lɛɛkʋ yɔɔ. Apostoloowaa kpa kpɩyʋʋ taa nɛ pɛɖɛɛ lɛ, Yesu kpa pʋʋ taa e-ɖeke. Ɛbɛ yɔɔ? Mbʋ pʋyɔɔ yɔ ɛɛsɔɔlaa se ɛwɛɛ e-ɖeke nɛ ɛtɩmnɩ ɛ-Caa. Paa pɩɩɖɔkɩnɩ Yesu ɛzɩma yɔ, ɛñɩnaɣ alɩwaatʋ nɛ ɛtɩmɩɣnɩ ɛ-Caa.