Yesu ɖɔm lɩm yɔɔ

Pɩtasɩna se Yesu kaawɛnɩ ɖoŋ se ɛwaa kʋdɔndɩnaa nɛ efezi sɩɖaa lɛ, ɛwɛnɩ ɖɔɖɔ ɖoŋ se ɛsɩnzɩ helim nɛ tɛʋ. Yesu kpa pʋʋ nakʋyʋ yɔɔ nɛ ɛtɩmɩ pɩtɛ lɛ, ɛcɔnɩ Galilee Teŋgu hɔɔlʋʋ taa nɛ ɛna se kancʋʋlaɣ sɔsɔɔ nakɛyɛ ɖiɣni mabʋ. Ɛ-apostoloowaa kaawɛ pa-kpɩyʋʋ taa nɛ palʋkɩnɩ helim sɔsɔm mbʋ. Yesu tii nɛ ɛpaɣzɩ ɖɔm lɩm yɔɔ nɛ ɛñɔtʋʋnɩ pa-kpɩyʋʋ. Apostoloowaa na nɔɔyʋ ɖiɣni ɖɔm lɩm yɔɔ lɛ, sɔɔndʋ kpa-wɛ. Ɛlɛ Yesu heyi-wɛ se: “Sɔɔndʋ ɛtaakpa-mɩ, ma na.”

Peeɖe Pɩyɛɛrɩ heyi-i se: “Kɩbaɣlʋ, ye pɩkɛ ña toovenim yɔ, yele nɛ mɔnɖɔ nɛ mɔnkɔɔ ñɔ-cɔlɔ.” Yesu cosi Pɩyɛɛrɩ se: “Ðɔ nɛ ŋkɔɔ mɔn-cɔlɔ.” Nɛ Pɩyɛɛrɩ lɩɩ kpɩyʋʋ taa, ɛpaɣzɩ ɖɔm lɩm yɔɔ helim sɔsɔm mbʋ pɩ-taa nɛ ɛñɔtʋʋnɩ Yesu. Ɛlɛ Pɩyɛɛrɩ kɔm nɛ ɛñɔtɩnɩ Yesu kpam lɛ, ɛkʋsɩ ɛ-ɛsa nɛ ɛcɔŋnɩ ɛzɩma helim wɛɛ nɛ pɩmakɩ yɔ. Peeɖe sɔɔndʋ kpa-ɩ nɛ ɛpaɣzɩ lɩm tɛɛ tibu. Pɩyɛɛrɩ ma kubuka se: «Kɩbaɣlʋ, ya ma-ñʋʋ!» Yesu ɖɔkɩ e-nesi nɛ eheyi-i se: “Ɛbɛ yɔɔ ŋpaɣzɩ pɩtʋʋ? Ñe-tisuu wɛ le?”

Yesu nɛ Pɩyɛɛrɩ pakpa kpɩyʋʋ taa lɛ helim sɔsɔm mbʋ pɩsɩŋ kpaagbaa. Maɣzɩ nɛ ŋna ɛzɩma pɩɩlabɩ apostoloowaa yɔ! Pɔtɔm se: «Toovenim taa lɛ, ŋkɛ Ɛsɔ Pɩyalʋ.»

Pɩtaakɛ alɩwaatʋ ndʋ ti-ɖeke tɩ-taa Yesu sɩnzɩ helim. Alɩwaatʋ lɛɛtʋ taa, Yesu nɛ ɛ-apostoloowaa pasʋ kpɩyʋʋ nɛ powoki teŋgu kidiiliŋ lɛɛkʋ yɔɔ lɛ, Yesu hɩnɩ kpɩyʋʋ taa nɛ eɖou. Eɖowaɣ lɛ, kancʋʋlaɣ sɔsɔɔ nakɛyɛ paɣzɩ mabʋ. Peeɖe lɩm hola kʋyaa nɛ ahuuzuu kpɩyʋʋ yɔɔ nɛ lɩm sʋʋ kpɩyʋʋ taa. Apostoloowaa fezi Yesu nɛ kubuka se: “Wɩlɩyʋ, ɖɩcaɣ sɩbʋ! Ya ɖa-ñʋʋ!” Yesu kʋyɩ nɛ eheyi teŋgu se: “Caɣ ɖiɣ ɖiɣ.” Kpaagbaa mbʋ lɛ, helim sɩŋ nɛ teŋgu yɔɔ hɛɛ. Yesu pɔzɩ apostoloowaa se: «Mi-tisuu wɛ le?» Nɛ peheyi ɖama se: «Halɩ helim nɛ teŋgu pañaŋɩ-ɩ.». Apostoloowaa kpɛlɩkaa se ye pataɣ Yesu liu nɛ pa-laŋɩyɛ pilim yɔ, nabʋyʋ ɛɛkaɣ-wɛ kpaʋ sɔɔndʋ.