Pɔɔlɩ nɛ Timootee

Timootee kaakɛ pɩɣa evelaɣ Lisɩtrɩ ɛgbɛyɛ taa. Ɛ-caa kaakɛ Grɛɛkɩ tʋ nɛ e-ɖoo ñɛkɛ Yuuda tʋ. E-ɖoo Eniisi nɛ e-neze Loyiisi paawɩlɩ-ɩ Yehowa tɔm kpaɣnɩ ɛ-pɩjatʋ taa.

Pɔɔlɩ ɖɔŋaɣ ɛ-tɔm susuu nʋmɔʋ 2 ñɩŋgʋ lɛ ewobi Lisɩtrɩ, nɛ ɛna se Timootee sɔɔlɩ koobiya siŋŋ nɛ ɛɛsɔɔlɩ faaa se ɛsɩnɩ-wɛ. Pɔɔlɩ yaa Timootee se ɛsɩɩ-ɩ ɛ-nʋmɔʋ ɖɔm taa. Alɩwaatʋ wɛɛ nɛ tɩɖɛɣ lɛ, Pɔɔlɩ falɩsɩ Timootee se ɛkɛ tɔm kɩbandʋ susuyu nɛ tɩ-wɩlɩyʋ kɩbanʋ.

Fezuu kiɖeɖeu ɖiyaɣ Pɔɔlɩ nɛ Timootee lona wena a-taa payɩ powokaɣ yɔ. Ðoo naayɛ taa, Pɔɔlɩ na abalʋ nɔɔyʋ natʋ natʋyʋ taa; abalʋ ɛnʋ eheyi-i se ɛkɔɔ Masedonii nɛ ɛsɩnɩ-wɛ. Pʋyɔɔ Pɔɔlɩ, Timootee, Silaasɩ nɛ Luka powobi peeɖe nɛ posusi tɔm nɛ paɖʋ nesi nɛ agbaa naayɛ ñɔ.

Abalaa nɛ halaa sakɩyɛ pɩsɩ Krɩstʋ mba Masedonii tɛtʋ ndʋ payaɣ se Tesalooniiki yɔ tɩ-taa. Ɛlɛ Yuuda mba nabɛyɛ sʋsaɣ Pɔɔlɩ nɛ ɛ-taabalaa. Yuuda ñɩma mba, peseɣti samaɣ nakɛyɛ nɛ kakʋyɩ koobiya yɔɔ nɛ powoni-wɛ tɛtʋ taa ñʋndɩnaa cɔlɔ nɛ pokou se: “Ɛyaa panɛ, pɛkɛ Roma komina koyindinaa!” Pɔɔlɩ nɛ Timootee pe-weziŋ kaawɛ kaɖɛ taa, pʋyɔɔ pakʋyɩnɩ ɖoo nɛ pɛɖɛɛ Beeree.

Ɛyaa mba paawɛ Beeree yɔ, paasɔɔlɩ siŋŋ se pɛkpɛlɩkɩ nɛ patɩlɩ tɔm kɩbandʋ. Nɛ Grɛɛkɩ mba nɛ Yuuda ñɩma mba paawɛ peeɖe yɔ, pa-taa nabɛyɛ pɩsɩ Krɩstʋ mba. Ɛlɛ Yuuda mba nabɛyɛ lɩnɩ Tesalooniiki nɛ pɔkɔɔ nɛ peseɣti samaɣ nɛ kalakɩ ñam ñam lakasɩ lɛ, Pɔɔlɩ kʋyɩ nɛ ɛɖɛɛ Atɛɛnɩ. Timootee nɛ Silaasɩ paba ñacaɣ Beeree se pakpazɩ koobiya ɖoŋ. Pʋwayɩ lɛ, Pɔɔlɩ tiyi Timootee se ɛpɩsɩ Tesalooniiki nɛ ɛsɩnɩ peeɖe koobiya nɛ pɔɖɔkɩ kpam nazɩm taa. Pʋwayɩ ɖɔɖɔ lɛ, Pɔɔlɩ tiyi Timootee agbaa sakɩyɛ taa se ewolo nɛ ɛkpazɩ koobiya ɖoŋ.

Pɔɔlɩ heyi Timootee se: “Mba pɔsɔɔlaa se pɛsɛɛ Yehowa yɔ, pakaɣ-wɛ nazʋʋ.” Panazɩ Timootee nɛ pɔtɔ-ɩ salaka e-tisuu yɔɔ. Ɛ-taa kaawɛ leleŋ mbʋ pʋyɔɔ yɔ pɩha-ɩ waɖɛ nɛ ɛwɩlɩ se ɛɖɔkɩ e-siɣsiɣ wɛtʋ Yehowa ɛsɩndaa.

Pɔɔlɩ heyi Filiipi mba se: “Mentiyiɣni-mɩ Timootee. Ɛkaɣ-mɩ wɩlʋʋ ɛzɩma pɩwɛɛ se ɩɖɔ toovenim taa yɔ, nɛ ɛkaɣ-mɩ falɩsʋʋ ɖɔɖɔ tɔm susuu tʋmɩyɛ taa.” Pɔɔlɩ kaanawa se ɛpɩzɩɣ nɛ ɛtaa Timootee liu. Pa-naalɛ paakpɛndaa nɛ pala tʋmɩyɛ pɩnzɩ sakɩyɛ ɛzɩ taabalaa kɩbama yɔ.