Timootee kaasɔɔlɩ lalaa sɩnʋʋ

Timootee kaakɛ pɩɣa evelaɣ ŋga kɔsɔɔlɩ lalaa sɩnʋʋ nɛ taa leleŋ yɔ. Ɛɖɔŋaɣ nʋmɔŋ nɛ ewoki lona sakɩyɛ taa se ɛsɩnɩ lalaa. Mbʋ sɩnɩnɩ-ɩ nɛ ɛnɩɩ leleŋ siŋŋ e-wezuu caɣʋ taa. Ŋsɔɔlaa se ŋkpɛlɩkɩ ɛ-yɔɔ tɔm pazɩ yaa we?—

Tɛtʋ ndʋ payaɣ se Listrɩ yɔ, tɩ-taa Timootee kaacaɣaa nɛ ɛpaɣlɩ. Ɛɛkɛ pɩɣa cɩɩɩ lɛ, e-ɖoo Eniisi nɛ e-neze Loyisi paapaɣzɩ-ɩ wɩlʋʋ Yehowa tɔm. Timootee kɔm nɛ ɛpaɣlɩɣ lɛ, ɛsɔɔlɩ se ɛsɩnɩ lalaa nɛ patɩlɩ Yehowa.

Timootee kaakɛ pɩɣa evelaɣ yem lɛ, Pɔɔlɩ heyi-i se ɛ nɛ ɩ pɔɖɔŋ nʋmɔŋ nɛ posusuu tɔm lona ndɩ ndɩ taa. Nɛ Timootee tisi. Toovenim, Timootee kaamʋnaa se ɛ nɛ Pɔɔlɩ pala tʋmɩyɛ nɖɩ nɛ pasɩnɩ lalaa.

Timootee nɛ Pɔɔlɩ pɔɖɔm nʋmɔʋ nɛ powolo tɛtʋ ndʋ payaɣ se Tesalooniki yɔ, tɩ-taa. Tesalooniki tɛtʋ ndʋ, tɩɩwɛ Masedonii egeetiye taa. Pɔɖɔm nɩŋgbanzɩ kilomɛtawaa sakɩyɛ pʋcɔ nɛ patalɩ ɖenɖe pɩɩwɛɛ se pasʋʋ mɛlɛ nɛ powolo Tesalooniki tɛtʋ taa peeɖe yɔ. Pɔkɔma nɛ patalɩ peeɖe lɛ, pasɩnɩ ɛyaa sakɩyɛ nɛ patɩlɩ Yehowa. Ɛlɛ ɛyaa nabɛyɛ taasɔɔlɩ Pɔɔlɩ nɛ Timootee nɛ pañɩnɩɣ se palabɩ-wɛ kɩdɛkɛdɩm. Pʋyɔɔ Pɔɔlɩ nɛ Timootee pakʋyɩ peeɖe nɛ pɛɖɛɛ lona lɛɛna taa se posusi tɔm.

Fenasɩ cabɩ wayɩ lɛ, Pɔɔlɩ pɔzɩ Timootee se ɛpɩsɩ Tesalooniki nɛ ɛna wɛtʋ ndʋ tɩ-taa koobiya wɛɛ yɔ. Paa Tesalooniki ɛkɛ kañatʋ tɩnaa tɛtʋ yɔ, Timootee labɩ abalɩtʋ nɛ ɛpɩsɩ tɩ-taa, mbʋ pʋyɔɔ yɔ, ɛmaɣzaɣ koobiya mba pɛwɛ peeɖe yɔ, pɔ-yɔɔ siŋŋ. Nɛ tɔm ndʋ ɛpɩsaa ɛkɔɔ nɛ eheyi Pɔɔlɩ yɔ, tɩkɛ tɔm kɩbandʋ siŋŋ. Eheyi-i se Tesalooniki koobiya wɛɛ nɛ pañakɩ pana pɩdɩɩfɛyɩ nɛ palakɩ tʋmɩyɛ camɩyɛ.

Timootee nɛ Pɔɔlɩ palabɩ tʋmɩyɛ pɩnzɩ sakɩyɛ. Pʋwayɩ Pɔɔlɩ kɔm nɛ ɛma se Timootee kɛnɩnɩ ɛyʋ kɩbanʋ siŋŋ weyi ɛnʋ pɩzɩɣ nɛ etiyi nɛ ɛsɩnɩ agbaa yɔ, mbʋ pʋyɔɔ yɔ, ɛsɔɔlɩ Yehowa nɛ ɛsɔɔlɩ ɖɔɖɔ ɛyaa.

Ŋsɔɔlɩ ɛyaa nɛ ŋñɩnɩɣ se ŋsɩnɩ-wɛ nɛ patɩlɩ Yehowa yaa we?— Ye ŋlakɩ mbʋ yɔ, ŋkaɣ nɩʋ leleŋ siŋŋ ñe-wezuu caɣʋ taa ɛzɩ Timootee yɔ.