Ɛzʋtʋyaa nɛ Ɛgbɛyɛ taa tʋmlaɖaa ɩmaɣzɩnɩ Timootee kɩɖaʋ
PINDE pɩnaɣ taa, ɛjaɖɛ kpeekpe yɔɔ koobiya kudokiŋ sakɩyɛ pɩsɩ ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa. Ye ŋwɛ koobiya panɛ pa-taa yɔ, pɩtʋʋ fɛyɩ se ña-taa wɛ leleŋ nɛ waɖɛ kɩfaɖɛ nɖɩ.
Ɛlɛ waɖɛ kɩfaɖɛ nɖɩ ɖɩpɩzɩɣ nɛ ɖɩha-ŋ nɩɣzɛ pazɩ. Jason weyi ɛpɩsɩ ɛzʋtʋyʋ pitileɖita yɔ, ɛyɔɔdaa se: “Paha-m waɖɛ nɖɩ lɛ, sɔɔndʋ kpam nɛ tʋma kɩfana wena pɩwɛɛ se mala yɔ.” Moyizi nɛ Yereemii pamaɣzaɣ se patɩmʋna se pala tʋma wena Yehowa ɖʋ-wɛ yɔ. (Ejl. 4:10; Yer. 1:6) Ye lɩmaɣza ana ɖɔɖɔ ŋwɛna, ɛzɩma ŋpɩzɩɣ nɛ ŋwabɩ-yɛ nɛ ŋwolo pɩ-yɔɔ nɛ ŋɖɛɣnɩ ɛsɩndaa tam? Kajalaɣ pɩnzɩ mɩnʋʋ taa Krɩstʋ tʋ weyi payaɣ se Timootee yɔ, ɛ-kɩɖaʋ pɩzɩɣ nɛ kɩsɩnɩ-ŋ.—Tʋma 16:1-3.
MAƔZƖNƖ TIMOOTEE KƖÐAƲ
Pɩtɩla Timootee kaawɛnɩ ɛzɩ pɩnzɩ 20 lɛ, Pɔɔlɩ lɩzɩ-ɩ se ɛ nɛ ɩ pɔɖɔŋ nʋmɔŋ. Kajalaɣ lɛ, ɛzɩma Timootee kaakɛ pɩɣa evelaɣ yɔ, pɩtɩla yɔ sɔɔndʋ kpaɣaɣ-ɩ nɛ ɛpɩtaɣ ɖɔɖɔ se ɛɛpɩzɩɣ nɛ ɛla tʋma kɩfana wena pakaɣ-ɩ ɖʋʋ yɔ. (1 Tim. 4:11, 12; 2 Tim. 1:1, 2, 7) Pɩnzɩ hiu wayɩ lɛ, Pɔɔlɩ ma Filiipi ɛgbɛyɛ taa ñɩma takayaɣ nɛ ɛyɔɔdɩ se: “Mantaɣ liu Kɩbaɣlʋ Yesu Krɩstʋ taa, se mentiyiɣni-mɩ lɛɛlɛɛyɔ Timootee . . . Mɛnfɛyɩnɩ nɔɔyʋ ɛzɩ ɛnʋ yɔ.”—Fil. 2:19, 20.
Ɛbɛ sɩnɩ Timootee nɛ ɛpɩsɩ ɛzʋtʋyʋ kɩbanʋ? Yele nɛ ɖɩyɔɔdɩ lɔŋ weyi ɛ-kɩɖaʋ kpɛlɩkɩɣ-ɖʋ yɔ ɩ-taa loɖo tɔm.
1. Ekemsaɣni ɛyaa camɩyɛ. Pɔɔlɩ heyi Filiipi ɛgbɛyɛ taa koobiya se Timootee ‘kaɣ kemsuu camɩyɛ pɔ-tɔm cɔlɔ nɛ ɛ-laŋɩyɛ pilim.’ (Fil. 2:20) Toovenim, Timootee kemsini ɖɔɖɔ ɛyaa camɩyɛ. Pe-fezuu taa camɩyɛ wɛtʋ tɔm kaacɛyɩnɩ ɛ-ɛsɩndaa siŋŋ nɛ ɛlakɩ ɖɔɖɔ mbʋ payɩ pɩpɔzaa se ɛla nɛ ɛpɩzɩ nɛ ɛsɩnɩ-wɛ yɔ faaa.
Taakɛ lɔɔɖɩyɛ sayʋ weyi ɛɛsɩŋɩɣ se ɛkpaɣ nʋmɔʋ woɖaa mbʋ pʋyɔɔ yɔ ɛñɩnɩɣ paa ɛzɩmtaa se ɛtalɩ lɔŋ lɔɔɖa ɖɩzɩŋɩyɛ taa yɔ. William kɛʋ ɛzʋtʋyʋ yɔ pɩcɛzɩ pɩnzɩ nɛɛlɛ yɔ, nɛ koobiya ñaŋɩ-ɩ siŋŋ. Ɛtasɩɣ lɔŋ koobiya mba papɩsɩɣ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa yɔ se: “Ɩsɔɔlɩ koobiya. Pa-kɩcɛyɩm ɖeɖe cɔnʋʋ ɛcɛyɩ mɩ-ɛsɩndaa nɛ pɩkpaɖɩ pɩtɩŋa.”
2. Fezuu taa kɩcɛyɩm ɛsɩɣaɣ kajalaɣ lone taa. Pɔɔlɩ yɔɔdaɣ ɛzɩma Timootee wɛ ndɩ nɛ lalaa yɔ lɛ, ɛtɔm se: “Pe-kpeekpe pañɩnɩɣ pɛ-kɛzɛɣa, pɩtɩkɛ Yesu Krɩstʋ ŋga.” (Fil. 2:21) Roma Pɔɔlɩ kaawɛɛ nɛ ɛma Filiipi mba takayaɣ. Ɛyʋsaa se peeɖe koobiya ɛsɩyɛ kaasɛnɩ pa-maɣmaɣ pɛ-kɛzɛsɩ. Pataakeŋni fezuu taa tʋma labʋ. Ɛlɛ Timootee ñaawɛ ndɩ! Ye pɩwɛɛ se pala tʋmɩyɛ naɖɩyɛ nɛ Kewiyaɣ tʋma ɖɛɛnɩ ɛsɩndaa yɔ, Timootee wɛtʋ kaawɛ ɛzɩ Izaayii weyi ɛyɔɔdaa se: “Ma yɔ, tiyi-m” yɔ ɛ-ñɩndʋ.—Iza. 6:8.
Ɛzɩma ŋpɩzɩɣ ŋla nɛ tomnaɣ yɔɔ tʋma ɩtaamʋ fezuu taa ñɩna lone? Kajalaɣ lɛ, tɩlɩ mbʋ pɩ-tɔm kɩlɩ cɛyʋʋ yɔ. Pɔɔlɩ tasɩ lɔŋ Krɩstʋ ñɩma se pɩcɛyaa se ‘patɩlɩ mbʋ pɩkɛ kɩbam siŋŋ’ yɔ yaa mbʋ pɩ-tɔm kɩlɩ cɛyʋʋ yɔ. (Fil. 1:10) Yele nɛ mbʋ pɩ-tɔm kɩlɩ cɛyʋʋ Ɛsɔ ɛsɩndaa yɔ pɩkɛnɩ mbʋ pɩ-tɔm kɩlɩ cɛyʋʋ ɖɔɖɔ ñɛ-ɛsɩndaa yɔ. Nabʋlɛ lɛ, caɣ wezuu kɛlɛʋ. Taayele nɛ nabʋyʋ mʋ ño-ɖoŋ nɛ ña-alɩwaatʋ tɩŋa. Pɔɔlɩ seɣti Timootee se: “Se evebitu helu helu lakasɩ. Ñɩnɩ lakasɩ kiɖeɖesi, tisuu, sɔɔlɩm, laŋhɛzɩyɛ.”—2 Tim. 2:22.
3. Ɛlakaɣ Ɛsɔ tʋmɩyɛ nɛ kpekpeka. Pɔɔlɩ tɔzɩ Filiipu koobiya se: “Ɛlɛ [Timootee] yɔ, ɩsɩm ɛ-yɔɔ: Ɛwɛ ɛzɩ pɩɣa ka-caa cɔlɔ yɔ, ma nɛ ɩ ɖɩlabɩ tʋmɩyɛ tɔm kɩbandʋ ɖɩwɩlɩyɛ yɔɔ.” (Fil. 2:22) Timootee taawɛɛ feendu. Ɛsɩnɩ Pɔɔlɩ tʋmɩyɛ labʋ nɛ kpekpeka nɛ pʋyɔɔ lɛ, pa-taabalɩyɛ kɔm nɛ ɖɩcɛyɩsɩ camɩyɛ.
Sɔnɔ tʋma sakɩyɛ wɛ Yehowa ɛgbɛyɛ taa. Tʋma ana a-labʋ haɣ taa leleŋ pɩdɩɩfɛyɩ nɛ ayeki nɛ ŋñɔtɩnɩ koobiya nɛ pɩkɩlɩ. Ye mbʋ yɔ ñaɣ pana nɛ ‘ŋwokini ɛsɩndaa tam Kɩbaɣlʋ tʋmɩyɛ taa’ nɛ ŋlakɩ tʋma sakɩyɛ ɛgbɛyɛ taa.—1 Kɔr. 15:58.
4. Ɛlakaɣnɩ tʋmɩyɛ lɔŋ weyi ɛkpɛlɩkaa yɔ. Pɔɔlɩ ma Timootee takayaɣ nɛ eheyi-i se: “Ŋtɩŋ ma-wayɩ tɔm ɖɩwɩlɩyɛ, mɔn-ɖɔnɛ taa, ma-lɩmaɣza taa, men-tisuu taa, man-tɩ ɖɔkʋʋ taa, mɔn-sɔɔlɩm taa, ma-laŋɩyɛ kpɩzɩŋ taa.” (2 Tim. 3:10) Paha Timootee waɖɛ sɔsɔɖɛ mbʋ pʋyɔɔ yɔ, ɛlakaɣnɩ tʋmɩyɛ lɔŋ weyi ɛkpɛlɩkaɣ yɔ.—1 Kɔr. 4:17.
Ŋwɛnɩ taabalʋ weyi ɛpɩ fezuu taa se ɛpɩzɩɣ ɛsɩnɩ-ŋ nɛ ŋmaɣzɩnɩ-ɩ yɔ? Ye ŋfɛyɩnɩ nɔɔyʋ yɔ, pɩwɛɣ ɖeu se ŋñaɣ pana nɛ ŋhiɣ nɔɔyʋ. Tom weyi ɛpɩsɩ ɛgbɛyɛ taa ɛzʋtʋyʋ pɩlakɩ pɩnzɩ sakɩyɛ yɔ, ɛtɔzʋʋ se: “Ɛzʋtʋyʋ weyi ɛɛpɩ fezuu taa camɩyɛ nɛ pɩkpaɖɩ-m yɔ, ɛfalɩsɩ-m camɩyɛ siŋŋ. Mɔnpɔzaɣ-ɩ lɔŋ tasʋʋ ɖoŋ ɖoŋ. Piyeba nɛ sɔɔndʋ ɛɛtasɩɣ-m kpaʋ.”
5. Ɛfalɩsaɣ ɛ-tɩ ɖoŋ ɖoŋ. Pɔɔlɩ seɣti Timootee se: “Falɩsɩ ña-tɩ nɛ kaɖʋwa se ŋñɔʋnɩ Ɛsɔ.” (1 Tim. 4:7, nwt) Paa seyu nɔɔyʋ ɛwɛnɩ weyi ɛfalɩsɩɣ-ɩ yɔ, ɛ-maɣmaɣ ɛfalɩsɩɣ ɛ-tɩ ɖɔɖɔ. Pɔɔlɩ heyi Timootee se: “Tɩɩkalɩɣ takayaɣ kiɖeɖeɣa nɛ ŋwɩlɩɣ ɛyaa tɔm . . . Kpaɣ [kʋjɔʋ ŋgʋ] nɛ ña-laŋɩyɛ pilim. Wɛɛ tɩ-taa kiya nɛ pe-kpeekpe pana se ŋwokini ɛsɩndaa.”—1 Tim. 4:13-15.
Ña-ɖɔɖɔ pɩwɛɛ se ŋlakɩnɩ ñɛ-lɛɣtʋ tʋmɩyɛ camɩyɛ. Taawɛɛ ɖoli kʋyʋm fezuu taa nɛ taayele kaaʋ nɛ ɖʋtʋ kɩfatʋ ndʋ palakɩ se pɩsa nɛ pɔcɔnɩ ɛgbɛyɛ yɔɔ camɩyɛ yɔ, tɩ-taa natʋyʋ ɖɛɛ ñɔ-yɔɔ. Pɩtasɩ lɛ, taakɩlɩ ña-tɩ taʋ liu nɛ ŋmaɣzɩɣ se ɛzɩma ŋleɖi waɖɛ nɖɩ ɖɩ-tʋma taa yɔ, pɩtɩcɛyɩ se ŋñɩnɩ ɛgbɛyɛ takayɩsɩ taa pʋcɔ nɛ ŋcɔnɩ tɔm natʋyʋ ɖeɖe. Pʋyɔɔ lɛ, ɛzɩ paatasʋʋ lɔŋ Timootee yɔ, ña ɖɔɖɔ “cɔnɩ ña-tɩ yɔɔ nɛ ñɔ-tɔm wɩlʋʋ yɔɔ.”—1 Tim. 4:16.
6. Ɛtaɣaɣ Yehowa fezuu kiɖeɖeu liu. Pɔɔlɩ yɔɔdaɣ fezuu taa tʋmɩyɛ nɖɩ Timootee lakaɣ yɔ ɖɩ-tɔm lɛ, ɛtɔzɩ-ɩ tɔm tʋnɛ: “Fezuu [kiɖeɖeu] ŋgʋ kɩwɛ ɖa-taa yɔ, kɩsɩnɩ-ŋ nɛ ŋɖɔkɩ tɔm ndʋ peyeki-ŋ yɔ.” (2 Tim. 1:14) Pɩsa nɛ Timootee ka ñʋʋ nɛ fezuu taa tʋma lɛ, pɩɩwɛɛ se ɛtaa Ɛsɔ fezuu kiɖeɖeu liu se kɩkaɣ-ɩ sɩnʋʋ.
Donald kɛʋ ɛgbɛyɛ taa ɛzʋtʋyʋ yɔ pɩlakɩ pɩnzɩ hiŋ sakɩyɛ yɔ. Ɛyɔɔdaa se: “Ɛyaa mba pɛkɛ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa yɔ, pɩwɛɛ se taabalɩyɛ nɖɩ ɖɩwɛ pa nɛ Ɛsɔ pɛ-hɛkʋ taa yɔ, ɖɩ-tɔm ɛcɛyɩ pɛ-ɛsɩndaa siŋŋ. Mba palakɩ mbʋ yɔ, ‘po-ɖoŋ kpaɣ ɖoŋ kɩkpaʋ.’ Ye patɩmɩɣ se Ɛsɔ ɛha-wɛ fezuu kiɖeɖeu nɛ pañakɩ pana se pɛwɛɛnɩ kɩ-wɛtʋ yɔ, pɛkɛɣnɩ wazaɣ sɔsɔɔ po-koobiya.”—Keɣa 83:8; 1 Pɩy. 4:11.
SƆƆLƖ WAÐƐ NÐƖ PAHA-Ŋ ƐGBƐYƐ TAA YƆ
Ða-taa wɛ leleŋ siŋŋ se ŋwɛ koobiya mba pañakɩ pana nɛ papɩɣ fezuu taa nɛ pahaɣ-wɛ waɖɛ se pɛkɛ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa yɔ, pa-taa. Jason weyi ɛ-tɔm ɖɩyɔɔdɩ kiɖe tɛɛ yɔ ɛyɔɔdaa se: “Kpaɣnɩ alɩwaatʋ ndʋ manpɩsɩ ɛgbɛyɛ taa ɛzʋtʋyʋ yɔ, mɛnkpɛlɩkɩ lɔŋ sakɩyɛ nɛ piyeba nɛ sɔɔndʋ ɛɛtasɩɣ-m kpaʋ nɛ tʋmɩyɛ nɖɩ paɖʋ-m yɔ. Lɛɛlɛɛyɔ mɔnsɔɔlɩ tʋmɩyɛ nɖɩ pɩdɩɩfɛyɩ nɛ pɩkɛnɩ-m waɖɛ sɔsɔɖɛ se malabɩ-ɖɩ!”
Ŋkaɣ wobu pɩ-yɔɔ nɛ ŋɖɛɣnɩ ɛsɩndaa fezuu taa tam? Ðʋ ña-taa se ŋmaɣzɩnɩ Timootee kɩɖaʋ. Ye ŋlabɩ mbʋ yɔ, ña-ɖɔɖɔ ŋkɛɣnɩ wazaɣ sɔsɔɔ Ɛsɔ samaɣ kpeekpe.