TƆM KƖKPƐLƖKƖTƲ 15
Anɩ Yesu kɛnaa?
Ɛyaa mba pa-hɩla sɛ ɛjaɖɛ yɔɔ yɔ, pa-taa lɛlʋ lɛ Yesu. Ɛlɛ paa ɛyaa sakɩyɛ ɩsɩm ɛ-hɩɖɛ yɔ, paasɩŋ tɔm sakɩyɛ ɛ-yɔɔ nɛ pɛwɛnɩ lɩmaɣza ndɩ ndɩ pɩlɩɩnɩ weyi ɖeyi ɖeyi ɛkɛnaa yɔ pɩ-yɔɔ. Tɔm ndʋ Bibl yɔɔdɩ Yesu yɔɔ?
1. Anɩ Yesu kɛnaa?
Yesu kɛ fezuu ŋgʋ kɩwɛ ɖoŋ siŋŋ nɛ kɩwɛ ɛsɔdaa yɔ. Ɛnʋ Yehowa calɩ lɩzʋʋ pʋcɔ nɛ ɛlɩzɩɣ wondu lɛɛtʋ. Pʋyɔɔ payaɣ-ɩ se «wondu kɩlɩzɩtʋ tɩŋa taa kajalaɣ pɩɣa.» (Koloosi mba 1:15) E-ɖeke Yehowa lɩzaa nɛ nɔɔyʋ tɩsɩnɩ-ɩ, pʋyɔɔ Bibl yaɣ-ɩ se «ɛ-Pɩyalʋ ɛgbamɩyɛ.» (Yohanɛɛsɩ 3:16) Yesu sɩnɩ ɛ-Caa Yehowa nɛ palɩzɩ wondu lɛɛtʋ. (Kalɩ Aduwa 8:30.) Ewobi pɩ-yɔɔ nɛ ɛñɔɔnɩ Yehowa kpam nɛ taabalɩyɛ kɩbanɖɛ wɛɛ pɛ-hɛkʋ taa. Payaɣ-ɩ se «Tɔm» mbʋ pʋyɔɔ yɔ ɛnʋ kɛnɩ Yehowa tɔm ɖɔkɩyʋ kɩbanʋ nɛ ɛɖɛzɩɣ lalaa Ɛsɔtɔm nɛ Ɛsɔ lɔŋ tasʋʋ.—Yohanɛɛsɩ 1:14.
2. Ɛbɛ yɔɔ Yesu kɔm tɛtʋ yɔɔ?
Pɩlakɩ ɛzɩ pɩnzɩ 2 000 yɔ, Yehowa tɩŋnɩ piti lakasɩ nasɩyɩ yɔɔ nɛ ɛkpaɣ Yesu wezuu nɛ ɛɖʋ pɛlɛ weyi payaɣ se Maarɩɩ yɔ e-lotu taa nɛ ɛlɛ lʋlɩ Yesu. Mbʋ pɩlaba nɛ palʋlɩ Yesu nɛ ɛkɛ ɛyʋ tɛtʋ yɔɔ. (Kalɩ Luka 1:34, 35.) Yesu kɔm tɛtʋ yɔɔ nɛ ɛkɛ Mesiya yaa Krɩstʋ weyi paayɔɔdɩ ɛ-tɔm yɔ, nɛ ɛkɔm ɖɔɖɔ se ɛya ɛyaa ñʋʋ.a Bibl taa natʋ tɔm ndʋ payɩ tɩyɔɔdaɣ Mesiya tɔm yɔ, tɩlabɩ Yesu yɔɔ nɛ pɩsɩnɩ ɛyaa nɛ pana se ɛnʋ kɛnɩnɩ «Krɩstʋ, Ɛsɔ ɛsadʋ Pɩyalʋ.»—Maatiyee 16:16.
3. Le Yesu wɛ lɛɛlɛɛyɔ?
Yesu wezuu sɩ tɩnaɣ tɛtʋ yɔɔ lɛ, pefezi-i nɛ ɛkɛ fezuu nɛ ɛpɩsɩ ɛsɔdaa. Ɛtalɩ peeɖe lɛ, «Ɛsɔ kpazɩ-ɩ lone sɔsɔɖɛ taa.» (Filiipi mba 2:9) Lɛɛlɛɛyɔ Yesu wɛnɩ waɖɛ sɔsɔɖɛ naɖɩyɛ; Yehowa wayɩ lɛ, ɛnʋ tɩŋɩɣna.
TAZƖ NƐ PILIMI
Tazɩ nɛ ŋtɩlɩ weyi Yesu kɛnaa ɖeyi ɖeyi yɔ nɛ pɩkɩlɩ; tazɩ ɖɔɖɔ nɛ ŋna mbʋ pʋyɔɔ pɩcɛyaa se ɖɩtɩlɩ-ɩ yɔ.
4. Yesu tɩkɛ Ɛsɔ Ðoŋ Tɩŋa Tʋ
Bibl wɩlɩɣ se Yesu kɛ fezuu ŋgʋ kɩwɛ ɖoŋ siŋŋ yɔ ɛsɔdaa nɛ kɩwɩlɩɣ ɖɔɖɔ se eluzuu ɛ-tɩ Yehowa weyi ɛkɛ ɛ-Ɛsɔ nɛ ɛ-Caa yɔ ɛ-tɛɛ. Ɛbɛ yɔɔ ɖɩyɔɔdʋʋ mbʋ? Ɩcɔnɩ VIDEO nɛ ɩna tɔm ndʋ Bibl wɩlɩɣ pɩlɩɩnɩ Yesu lone nɛ Ɛsɔ Ðoŋ Tɩŋa Tʋ lone yɔɔ yɔ.
Masɩ nzɩ sɩkɔŋ yɔ, sɩsɩɣnɩ-ɖʋ se ɖɩtɩlɩ ɛzɩma Yesu nɛ Yehowa pɛ-hɛkʋ taa wɛɛ yɔ. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm pɔzʋʋ mbʋ pɩwɛ kɛ-tɛɛ yɔ pɩ-taa.
Ɩkalɩ Luka 1:30-32.
Ɛsɔ tiyiyu yɔɔdaa se taabalɩyɛ nɖɩ wɛ Yesu nɛ Yehowa, Ɛsɔ «Kɩlɩm,» pɛ-hɛkʋ taa?
Ɩkalɩ Maatiyee 3:16, 17.
Pamɩyɩsɩ Yesu lɩm lɛ, tɔm ndʋ nɔɔ ŋga kalɩnɩ ɛsɔdaa yɔ, kɔyɔɔdaa?
Ŋmaɣzɩɣ se a-nɔɔ pɩɩkɛnaa?
Ɩkalɩ Yohanɛɛsɩ 14:28.
Caja nɛ ɛ-pɩyalʋ pɛ-hɛkʋ taa lɛ, akɩlaa nɛ awɛnɩ ɖoŋ nɛ pɩkpaɖɩ?
Yesu ya Yehowa se ɛ-Caa, ɛbɛ tɔm ndʋ tɩkpɛlɩkɩɣ-ɖʋ?
Ɩkalɩ Yohanɛɛsɩ 12:49.
Ɛzɩ Yesu maɣzaɣ se ɛ nɛ ɛ-Caa pɛwɛ kɩmaŋ na? Suwe ŋmaɣzɩɣ?
5. Mbʋ mbʋ pɩwɩlɩɣ se Yesu kɛnɩ Mesiya yɔ
Natʋ tɔm sakɩyɛ wɛ Bibl taa nɛ tɩsɩɣnɩ-ɖʋ se ɖɩtɩlɩ Mesiya pʋ-tɔbʋʋ se weyi Ɛsɔ lɩzaa se ɛya ɛyaa ñʋʋ yɔ. Cɔnɩ VIDEO nɛ ŋtɩlɩ natʋ tɔm ndʋ Yesu yeba nɛ tɩla alɩwaatʋ ndʋ ɛkɔm tɛtʋ yɔɔ yɔ, tɩ-taa natʋyʋ tɔm pazɩ.
Ɩkalɩ Bibl taa natʋ tɔm tʋnɛ nɛ pʋwayɩ lɛ, ɩtazɩ tɔm ndʋ tɩkɔŋ yɔ tɩ-taa:
Ɩkalɩ Mikee 5:2 nɛ ɩna ɖenɖe pɩɩwɛɛ se palʋlɩ Mesiya yɔ.b
Natʋ tɔm ndʋ tɩlabɩ alɩwaatʋ ndʋ palʋlɩ Yesu yɔ?—Maatiyee 2:1.
Ɩkalɩ Keɣa 34:20 nɛ Zakarii 12:10 nɛ ɩna tɔm ndʋ Bibl yɔɔdaa se tɩlakɩ alɩwaatʋ ndʋ Mesiya sɩkɩ yɔ.
Natʋ tɔm ndʋ tɩlaba?—Yohanɛɛsɩ 19:33-37.
Ŋmaɣzɩɣ se Yesu pɩzaɣ se ɛla nabʋyʋ se pɩsa nɛ natʋ tɔm ndʋ tɩla na?
Ɛbɛ pɩwɩlɩ-ŋ Yesu yɔɔ?
6. Ye ɖɩkpɛlɩkaa nɛ ɖɩtɩlɩ Yesu yɔ, ɖihikiɣ wazasɩ
Bibl wɩlɩɣ se pɩcɛyaa se ɖɩkpɛlɩkɩ nɛ ɖɩtɩlɩ Yesu nɛ lone nɖɩ ɛwɛna yɔ. Ɩkalɩ Yohanɛɛsɩ 14:6 nɛ 17:3, nɛ pʋwayɩ lɛ ɩtazɩ tɔm tʋnɛ tɩ-taa:
Ɛbɛ yɔɔ pɩcɛyɩ kpem se ɖɩkpɛlɩkɩ nɛ ɖɩtɩlɩ Yesu?
Yesu tʋlɩ nʋmɔʋ ŋgʋ kɩsɩɣnɩ-ɖʋ se ɖɩkɛ Ɛsɔ taabalaa yɔ. Ɛwɩlɩ-ɖʋ toovenim Yehowa yɔɔ; nɛ pɩtɩŋnɩ ɛ-yɔɔ lɛ, ɖɩpɩzɩɣ nɛ ɖihiɣ wezuu maatɛŋ.
NABƐYƐ YƆƆDƲƲ SE: «Yehowa Aseɣɖe Tɩnaa iitisiɣ Yesu yɔɔ.»
Suwe ŋpɩzɩɣ nɛ ŋcosi-wɛ?
TOBI LƐ
Yesu kɛ fezuu ŋgʋ kɩwɛ ɖoŋ siŋŋ yɔ. Ɛkɛ Ɛsɔ Pɩyalʋ nɛ Mesiya.
Tɔm taa tazʋʋ
Ɛbɛ yɔɔ payaɣ Yesu se «wondu kɩlɩzɩtʋ tɩŋa taa kajalaɣ pɩɣa»?
Ɛbɛ Yesu kaalaba pʋcɔ nɛ ɛkɔŋ tɛtʋ yɔɔ?
Ɛzɩma ɖɩlaba nɛ ɖɩna se Yesu kɛnɩ Mesiya?
WONDU LƐƐTƲ
Kalɩ nɛ ŋna tɔm lɛɛtʋ ndʋ tɩwɩlɩɣ se Yesu kɛnɩ Mesiya yɔ.
«Les prophéties messianiques prouvent-elles que Jésus était le Messie?» (Intɛrnɛɛtɩ yɔɔ tɔm ñʋʋ)
Kalɩ nɛ ŋna mbʋ pɩwɩlɩɣ Bibl taa se Ɛsɔ tɩpɩsɩ Yesu caa ɛzɩ ɛyaa lʋlʋʋ piya nɛ papɩsɩɣ cajanaa yɔ.
«Pourquoi Jésus est-il appelé le Fils de Dieu?» (Intɛrnɛɛtɩ yɔɔ tɔm ñʋʋ)
Kalɩ nɛ ŋna mbʋ pɩwɩlɩɣ se Trinita tɩkɛ Bibl wɩlɩtʋ yɔ.
Halʋ nɔɔyʋ wezuu lɛɣzaa alɩwaatʋ ndʋ ɛkpɛlɩkaa nɛ ɛtɩlɩ tɔm ndʋ Bibl wɩlɩɣ Yesu yɔɔ yɔ.
«Une femme juive explique pourquoi elle a remis sa foi en question» (Réveillez-vous!, mai 2013)
a Tɔm kɩkpɛlɩkɩtʋ 26 nɛ 27 taa ɖɩkaɣ naʋ mbʋ pʋyɔɔ pɩwɛɛ se paya ɛyaa ñʋʋ nɛ ɛzɩma Yesu yabɩ ɖa-ñʋʋ yɔ.
b Kalɩ Tɩnaɣ yɔɔ tɔm 2 nɛ ŋna natʋ tɔm ndʋ tɩyɔɔdɩ alɩwaatʋ ndʋ ɖeyi ɖeyi Mesiya kɔŋ tɛtʋ yɔɔ yɔ pɩ-tɔm.