Ɛyʋ weyi Yesu kɛnaa?

Alɩwaatʋ ndʋ ɖɩtɩlɩɣ mbʋ Yesu kaalaba nɛ tɔm ndʋ ɛɛyɔɔdɩ tɛtʋ yɔɔ yɔ, pɩsɩɣnɩ-ɖʋ se ɖɩna wɛtʋ kɩbandʋ ndʋ ɛɛwɛna yɔ. Nɛ ɛ-wɛtʋ ndʋ tituyuu-ɖʋ se ɖɩñɔtɩnɩ ɛ nɛ ɛ-Caa Yehowa. Wɛtʋ kɩbandʋ ndʋ tɩ-taa natʋyʋ lɛ ndʋ? Nɛ ɛzɩma ɖɩpɩzɩɣ nɛ ɖɩmaɣzɩnɩ Yesu ɖe-wezuu caɣʋ taa?

1. Ɛbɛ yɔɔ pɔtɔŋ se Yesu wɛ ɛzɩ ɛ-Caa yɔ?

Alɩwaatʋ ndʋ Yesu kaawɛ ɛsɔdaa yɔ, ɛkpaɣ pɩnzɩ miiliyaarɩwaa sakɩyɛ nɛ ɛcɔnɩ ɛ-Caa nɛ ɛkpɛlɩkɩ lɔŋ ɛ-cɔlɔ. Piyeba nɛ ɛwɛɛnɩ ɛ-Caa maɣzɩm nɛ ɛ-lakasɩ. (Kalɩ Yohanɛɛsɩ 5:19.) Toovenim taa lɛ Yesu nɩɣzɩnɩ ɛ-Caa wɛtʋ ɖeyi ɖeyi, pʋyɔɔ ɛpɩzaa nɛ ɛyɔɔdɩ se: «Weyi ɛna-m yɔ, ɛna ɖɔɖɔ Caa.» (Yohanɛɛsɩ 14:9) Ye ŋkpɛlɩkaa nɛ ŋtɩlɩ Yesu yɔ, pɩsɩɣnɩ-ŋ nɛ ŋtɩlɩ Yehowa camɩyɛ. Kɩɖaʋ nakʋyʋ yɔ: Ɛzɩma Yesu naɣaɣ ɛyaa pʋtɔdɩyɛ yɔ, pɩwɩlɩɣ lɩmaɣza wena Yehowa wɛnɩ ñɔ-yɔɔ yɔ.

2. Ɛzɩma Yesu wɩlaa se ɛsɔɔlɩ Yehowa?

Yesu yɔɔdaa se: «Pɩsa nɛ ɛjaɖɛ tɩlɩ se mɔnsɔɔlɩ Caa lɛ, malakɩ mbʋ ɖeyi ɖeyi Caa ɖʋ-m paɣtʋ se mala yɔ.» (Yohanɛɛsɩ 14:31) Yesu kaawɛ tɛtʋ yɔɔ lɛ, ɛñaŋaɣ ɛ-Caa paa ɛzɩmtaa; ɛtɩŋnɩ pɩ-yɔɔ nɛ ɛwɩlɩ se ɛsɔɔlɩ ɛ-Caa siŋŋ. Yesu ñaŋaɣ ɛ-Caa halɩ pɩkpɛndɩnɩ kaɖɛ alɩwaatʋ taa. Pɩtasɩ lɛ, ɛsɔɔlɩ ɛ-Caa siŋŋ nɛ pʋyɔɔ ɛsɔɔlɩ yɔɔdʋʋ ɛ-Caa tɔm lalaa cɔlɔ se pɩsɩnɩ paba nɛ papɩsɩ ɛ-Caa taabalaa.—Yohanɛɛsɩ 14:23.

3. Ɛzɩma Yesu wɩlaa se ɛsɔɔlɩ ɛyaa?

Bibl yɔɔdaa se kɔzɩ kɔzɩ lɛ, Yesu taa «kaahʋlʋmɩnɩ ɛyaa siŋŋ.» (Aduwa 8:31) Ɛtɩŋnɩ ɛzɩma ɛkpazaɣ ɛyaa ɖoŋ nɛ ɛsɩɣnɩ-wɛ ɖɔɖɔ yɔ pɩ-yɔɔ nɛ ɛlɩzɩ sɔɔlɩm mbʋ nɛ ɛwɩlɩ. Piti lakasɩ nzɩ ɛɛlaba yɔ sɩwɩlaa se ɛwɛnɩ ɖoŋ, ɛlɛ sɩwɩlaa ɖɔɖɔ se ɛnaɣ ɛyaa pʋtɔdɩyɛ. (Maarɩkɩ 1:40-42) Ɛlakaɣ ɛyaa kɩbandʋ nɛ ɛtaawɛɛnɩ tɛ-yɔɔ tɛ-yɔɔ lakasɩ. Ɛkpazaɣ ɖoŋ laŋa kɩbana tɩnaa mba pewelisaɣni-i yɔ nɛ ɛhaɣ-wɛ lidaʋ. Yesu sɔɔlɩ ɛyaa kpeekpe, pʋyɔɔ etisi faaa nɛ ɛla kʋñɔŋ nɛ ɛsɩ. Ɛlɛ kɔzɩ kɔzɩ lɛ, ɛsɔɔlɩ mba pɔɖɔŋ tɔm ndʋ ɛwɩlɩɣ yɔ tɩ-yɔɔ yɔ.—Kalɩ Yohanɛɛsɩ 15:13, 14.

TAZƖ NƐ PILIMI

4. Yesu sɔɔlɩ ɛ-Caa

Yesu kɩɖaʋ sɩɣnɩ-ɖʋ se ɖɩtɩlɩ ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ Ɛsɔ yɔ. Ɩkalɩ Luka 6:12, nɛ Yohanɛɛsɩ 15:10 nɛ 17:26. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm tʋnɛ tɩ-taa:

• Ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ Yehowa?

6. Yesu kɛ kʋjɔʋ laɖʋ

Paa Yesu ɛtaawɛɛnɩ tomnaɣ yɔɔ wondu sakɩyɛ yɔ, ɛlakaɣ lalaa kʋjɔŋ nɛ eseɣtiɣ-ɖʋ se ɖa ɖɔɖɔ ɖɩlakɩ mbʋ. Ɩkalɩ Tʋma Labʋ 20:35, nɛ pʋwayɩ lɛ ɩtazɩ tɔm tʋnɛ tɩ-taa:

• Yesu wɩlaa se ɛbɛ pɩzɩɣ nɛ pɩha-ɖʋ taa leleŋ?

Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.

VIDEO: «Taa leleŋ wɛ haʋ taa nɛ pɩkɩlɩ mʋʋ taa»—Hɔɔlʋʋ nakʋyʋ (4:00)

• Paa ɖɩfɛyɩnɩ tomnaɣ yɔɔ wondu sakɩyɛ yɔ, nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩlakɩ lalaa kʋjɔŋ?

Ŋŋsɩm-tʋ?

Bibl wɩlɩɣ-ɖʋ se ɖɩtɩmnɩ Yehowa Yesu hɩɖɛ taa. (Kalɩ Yohanɛɛsɩ 16:23, 24) Alɩwaatʋ ndʋ ɖɩtɩmɩɣ mbʋ yɔ, ɖɩwɩlɩɣ se ɖitisiɣ se Yesu yɔɔ ɖɩpɩzɩɣ nɛ ɖɩtɩŋna nɛ ɖɩkɛ Yehowa taabalaa.

TOBI LƐ

Yesu sɔɔlɩ Yehowa nɛ ɛyaa. Yesu maɣzɩnɩ ɛ-Caa ɖeyi ɖeyi; pʋ-yɔɔ lɛ, ye ŋkpɛlɩkaa nɛ ŋtɩlɩ Yesu camɩyɛ yɔ, pɩsɩɣnɩ-ŋ nɛ ŋtɩlɩ ɖɔɖɔ Yehowa camɩyɛ.

Tɔm taa tazʋʋ

• Ɛzɩ Yesu yɔ, ɛzɩma ɖa ɖɔɖɔ ɖɩpɩzɩɣ nɛ ɖɩwɩlɩ se ɖɩsɔɔlɩ Yehowa?

• Ɛzɩ Yesu yɔ, ɛzɩma ɖa ɖɔɖɔ ɖɩpɩzɩɣ nɛ ɖɩwɩlɩ se ɖɩsɔɔlɩ ɛyaa?

• Wɛtʋ ndʋ Yesu wɛna yɔ tɩ-taa lɛ, ndʋ ŋsɔɔlaa nɛ pɩkpaɖɩ?

WONDU LƐƐTƲ

Kalɩ nɛ ŋna wɛtʋ ndʋ Yesu kaawɛna nɛ ɖɩpɩzɩɣ nɛ ɖɩñaɣ pana nɛ ɖɩwɛɛnɩ-tʋ yɔ.

«Maɣzɩnɩ Yesu . . .» (Yesu kɛnɩ nʋmɔʋ toovenim nɛ wezuu, hɔɔlʋʋ 317)

Kalɩ nɛ ŋna mbʋ pʋyɔɔ pɩcɛyaa se ɖɩla adɩma pɩtɩŋnɩ Yesu yɔɔ yɔ.

«Pourquoi prier au nom de Jésus?» (La Tour de Garde, 1^er février, 2008)

Ɛzɩ Bibl yɔɔdɩ tɔm natʋyʋ pɩlɩɩnɩ Yesu tomnaɣ yɔɔ wɛtʋ yɔɔ?

«À quoi ressemblait Jésus?» (Intɛrnɛɛtɩ yɔɔ tɔm ñʋʋ)

Wɛtʋ ndʋ Yesu kaawɛnɩ halaa yɔɔ yɔ, ɛbɛ tɩkpɛlɩkɩɣ-ɖʋ?

«Respect et dignité : deux exigences de Dieu» (La Tour de Garde, 1^er septembre, 2012)