Weyi ɛkɛ kʋjɔʋ tʋ yɔ, “pakaɣ ɛ-yɔɔ wazʋʋ”

KPAƔNƖ ɖooo caanaʋ taa nɛ pɩkɔɔ pɩtalɩ sɔnɔ, kɩlaŋ tɔm cɛyɩ siŋŋ toovenim Ɛsɔ sɛtʋ taa. Izrayɛɛlɩ piya kpakaɣ kpɩna nɛ sɩlakɩnɩ kɩlaŋ. Pasɩm Krɩstʋ ñɩma paa ɛzɩmtaa ɖɔɖɔ se palakɩ Ɛsɔ “samtʋ kɩlaʋ.” Ɛlɛ kɩlaŋ lɛɛŋ wɛɛ nɛ ɩkɛdɩɣnɩ Ɛsɔ ɖɔɖɔ. (Ebr. 13:15, 16) Kɩɖaŋ weyi ɩkɔŋ yɔ, ɩwɩlɩɣ se kɩlaŋ ɛnɩ ɩhaɣ taa leleŋ nɛ ɩkɔŋnɩ wazasɩ sakɩyɛ.

Hana kɛ caanaʋ taa Ɛsɔ sɛyʋ siɣsiɣ tʋ nɛ ɛɛsɔɔlaa se ɛwɛɛnɩ pɩɣa, ɛlɛ ɛɛkɛ kaalʋlaɣ. Ɛtɩmnɩ Yehowa nɛ eɖuu se ye ɛha-ɩ pɩɣa yɔ, ɛkaɣ-kɛ “cɛlʋʋ [Yehowa] ke-wezuu kɩyakɩŋ kpeekpe.” (1 Sam. 1:10, 11) Pʋwayɩ Hana kɔm nɛ ɛhaɣ hoɣa nɛ ɛlʋlɩ abalɩbɩɣa. Ŋga payaɣ se Samɩyɛɛlɩ. Ɛcɛbɩ-kɛ hɩɖɛ lɛ, ewoni-kɛ kizinziku tɛɛ ɛzɩ eɖuu yɔ. Yehowa wazɩ Hana kɩlaʋ lɩmaɣza kɩbana ana a-yɔɔ. Yehowa wazɩ-ɩ nɛ ɛtasɩ wɛnʋʋ piya kagbanzɩ nɛ Samɩyɛɛlɩ pɩsɩ nayʋ nɛ ɛwɛɛnɩ ɖɔɖɔ waɖɛ se ɛwɛɛ mba Ɛsɔ tɩŋnɩ pɔ-yɔɔ nɛ pama Bibl yɔ pa-taa.—1 Sam. 2:21.

Ɛzɩ Hana nɛ Samɩyɛɛlɩ yɔ, Krɩstʋ mba wɛnɩ waɖɛ sɔnɔ ɖɔɖɔ se pakpaɣ pa-tɩ nɛ paha faaa nɛ pala pa-Lɩzɩyʋ tʋmɩyɛ. Yesu kaayɔɔdaa se kɩlaŋ weyi ɖɩlakɩ nɛ ɖɩsɛɣ Yehowa yɔ, ɖɩkaɣ ɩ-kɩhɛyʋʋ hiɣu tam sakɩyɛ.—Mark. 10:28-30.

Kajalaɣ pɩnzɩ mɩnʋʋ taa lɛ, Krɩstʋ tʋ halɩñɩnʋ weyi payaɣaɣ se Tabiita yɔ, paasɩmɩ-ɩ se ɛkɛnɩ weyi “ɛlakaɣ tʋma kɩbana pɩdɩɩfɛyɩ nɛ ɛhaɣ kʋñɔndɩnaa kʋjɔʋ” yɔ. Pɩɩkɛnɩ kɩlaŋ weyi ɛlakaɣ se ɛsɩnɩ lalaa yɔ. Ɛlɛ pɩlabɩ pʋtɔdɩyɛ se pɩkɛdaa lɛ, ‘pɩwɩɩ-ɩ nɛ ɛsɩ.’ Pɩɩkɔnɩ laŋwɛɛkɩyɛ ɛgbɛyɛ taa koobiya siŋŋ. Ɛlɛ tɔmkpɛlɩkɩyaa kɔm nɛ panɩɩ se Pɩyɛɛrɩ wɛ pe-egeetiye taa lɛ, petendi-i se ɛkɔɔ lɛɛ lɛɛ. Maɣzɩ ɛzɩma pa-taa kaalabɩ leleŋ alɩwaatʋ ndʋ Pɩyɛɛrɩ fezi Tabiita yɔ, pɩ-yɔɔ nɛ ŋna! Pɩɩkɛnɩ kajalaɣ ɖeɖe lɛ, apostoloo nɔɔyʋ fezuu sɩɖʋ yɔ. (Tʋma 9:36-41) Ɛsɔ tɩsɔɔ kɩlaŋ weyi Tabiita lakaɣ yɔ ɩ-yɔɔ. (Ebr. 6:10) Pama Tabiita kʋjɔʋ labʋ tɔm Bibl taa se pɩsɩnɩ-ɖʋ nɛ ɖɩmaɣzɩnɩ-ɩ.

Apostoloo Pɔɔlɩ ɖɔɖɔ ha-ɖʋ kɩɖaʋ kɩbaŋʋ kʋjɔʋ labʋ nʋmɔʋ taa, mbʋ pʋyɔɔ ɛkɛ ɛyʋ weyi ɛhaɣaɣ ɛ-alɩwaatʋ faaa nɛ ɛlakɩ fezuu taa tʋma nɛ ekeŋni ɛyaa ɖɔɖɔ yɔ. Ɛmaɣaɣ takayaɣ Kɔrɛntɩ koobiya lɛ, ɛyɔɔdaa se: “Ma yɔ mankaɣ cɛlʋʋ mbʋ mɛwɛna yɔ nɛ mɛncɛlɩɣ pɩkpɛndɩnɩ men-keem, mi-ciyamnaa yɔɔ.” (2 Kɔr. 12:15) Pɔɔlɩ kaanawa se ye ɖɩkpakɩɣ ɖa-tɩ nɛ ɖɩlaɣ kɩlaʋ lalaa yɔɔ yɔ, pɩhaɣ ɖa-maɣmaɣ taa leleŋ, nɛ kɔzɩ kɔzɩ lɛ, piyeki nɛ ɖɔ-tɔm kɛdɩnɩ Yehowa nɛ ɛwazɩ-ɖʋ.—Tʋma 20:24, 35.

Pɩtʋʋ fɛyɩ se, Yehowa taa lakɩ leleŋ alɩwaatʋ ndʋ ɖɩkpakɩɣ ɖa-alɩwaatʋ nɛ ɖo-ɖoŋ nɛ ɖɩɖʋʋnɩ nesi Kewiyaɣ tʋma se aɖɛɛnɩ ɛsɩndaa yaa ɖɩsɩɣnɩ ɖo-koobiya mba ɖa nɛ wɛ ɖɩka tisuu yɔ. Ɛlɛ ɛzɩ nʋmɔŋ nɩɩyɩ tasɩ wɛʋ, weyi ɩ-yɔɔ ɖɩpɩzɩɣ ɖɩtɩŋna nɛ ɖɩɖʋ nesi tɔm susuu tʋmɩyɛ yɔ? Ɛɛɛ! Pɩtasɩnɩ tʋma wena ɖɩlakɩnɩ sɔɔlɩm lɛ, ɖɩpɩzɩɣ ɖɔɖɔ ɖɩha ɖa-ñɩm nɛ sɔɔlɩm faaa nɛ ɖɩɖʋnɩ hɩɖɛ Yehowa. Palakɩnɩ sɔɔlɩm haɖɛ nɖɩ ɖɩlakɩ yɔ tʋmɩyɛ se ɛjaɖɛ kpeekpe yɔɔ tɔm susuu tʋmɩyɛ ɛɖɛɛnɩ ɛsɩndaa. Pɩ-tɔbʋʋ se haɖɛ nɖɩ pakpakɩɣ nɛ paɖʋʋnɩ nesi Ɛsɔtɔm tiyiyaa nɛ ŋgee alɩwaatʋ tɩŋa Ɛsɔ sɛtʋ tʋmlaɖaa lalaa. Pɩtasɩ lɛ, sɔɔlɩm haɖɛ sɩɣnɩna nɛ palɩzɩɣ takayɩsɩ, pɔcɔŋnɩ tɔm ɖɛzʋʋ tʋmɩyɛ yɔɔ, palakɩ videowaa, pasɩɣnɩ mba asɛyɩŋ talʋʋ yɔ nɛ pamaɣnɩ Kewiyaɣ Kpaamɩŋ kɩfaŋ. Ða-taa tɛma se toovenim lɛ, weyi ɛkɛ kʋjɔʋ tʋ yɔ, “pakaɣ ɛ-yɔɔ wazʋʋ.” Nɛ pɩkɩlɩ lɛ, alɩwaatʋ ndʋ ɖɩhaɣ ɖa-ñɩm Yehowa yɔ, ɖɩɖʋʋ-ɩ hɩɖɛ.—Adu. 3:9; 22:9.

Nʋmɔŋ weyi ɩ-yɔɔ nabɛyɛ tɩŋɩɣna nɛ paɖʋʋ nesi ɛjaɖɛ kpeekpe yɔɔ tɔm susuu tʋmɩyɛ yɔ

Ɛzɩ pɩɩwɛʋ apostoloo Pɔɔlɩ alɩwaatʋ taa yɔ, sɔnɔ ɖa-taa sakɩyɛ sɩɣ liidiye naɖɩyɛ “kɩjaʋ” nɛ paɖʋʋ-ɖɩ Kewiyaɣ Kpaaŋ taa “ɛjaɖɛ kpeekpe yɔɔ tɔm susuu tʋmɩyɛ” aɖakaɣ taa. (1 Kɔr. 16:2) Paa fenaɣ ŋga lɛ, agbaa tiyiɣni liidiye nɖɩ ɛgbɛyɛ pilinzi nzɩ sɩcɔŋnɩ a-ajɛɛ yɔɔ yɔ. Ŋpɩzɩɣ ɖɔɖɔ nɛ ŋtiyini ña-haɖɛ Yehowa Aseɣɖe Tɩnaa ɛgbɛyɛ nɖɩ ɖɩcɔŋnɩ tɔm susuu yɔɔ mɩ-ɛjaɖɛ taa yɔ. Ye ŋñɩnɩɣ se ŋtɩlɩ Yehowa Aseɣɖe Tɩnaa ɛgbɛyɛ nɖɩ ɖɩ-hɩɖɛ yɔ, ɖitendi-ŋ pɔzɩ-ɖɩ ɛgbɛyɛ piliŋa. Ŋpɩzɩɣ nɛ ŋna ɛgbɛyɛ piliŋa tɛ adɖɛɛsɩ www.jw.org yɔɔ. Nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋla haɖɛ yɔ, ɩ-taa nɩɩyɩ yɔ:

KƲJƆƲ LABƲ

Ŋpɩzɩɣ nɛ ŋtɩŋnɩ nʋmɔŋ ndɩ ndɩ yɔɔ ɛzɩ Virement bancaire électronique, cartes bancaires yaa carte de crédit yɔɔ nɛ ŋla kʋjɔʋ. Ɛgbɛyɛ pilinzi nasɩyɩ labɩ ɖʋtʋ se papɩzɩɣ nɛ patɩŋnɩ jw.org yɔɔ yaa intɛrnɛɛtɩ lone naɖɩyɛ yɔɔ nɛ pala kʋjɔʋ.
Ŋpɩzɩɣ nɛ ŋha liidiye, lɩtʋ nɛ ñɩm wondu lɛɛtʋ. Ye ŋha wondu ndʋ lɛ, ma takayaɣ ŋga kawɩlɩɣ se kʋjɔʋ ŋlaba ɛgbɛyɛ yɔ nɛ ŋkpɛndɩ nɛ ŋtiyina.

HAÐƐ NÐƖ ŊPƖZƖƔ ŊÐAƔNƖ MƲƲ YƆ

Ŋpɩzɩɣ nɛ ŋha liidiye, ɛlɛ ŋla ɖʋtʋ se pʋwayɩ pɩcɛyaa yɔ, papɩsɩnɩ-ŋ ɖɩ.
Ye mbʋ yɔ, ma takayaɣ ŋga kawɩlɩɣ se pɩkɛ haɖɛ nɖɩ ŋpɩzɩɣ nɛ ŋɖaɣnɩ pɔzʋʋ se papɩsɩnɩ-ŋ yɔ nɛ ŋtiyina.

KƲJƆŊ LABƲ NƲMƆŊ LƐƐŊ

Pɩtasɩnɩ liidiye nɛ ñɩm wondu haʋ lɛ, ɖɩpɩzɩɣ ɖɔɖɔ nɛ ɖɩtɩŋnɩ nʋmɔŋ lɛɛŋ yɔɔ nɛ ɖɩla sɔɔlɩm haɖɛ nɛ pɩsɩnɩ Kewiyaɣ tʋmɩyɛ ɛjaɖɛ kpeekpe yɔɔ. Pɔyɔɔdɩ nʋmɔŋ ɛnɩ ɩ-taa nɩɩyɩ tɔm pɩ-tɛɛ cɩnɛ. Paa nʋmɔʋ ŋgʋ kɩ-yɔɔ ŋsɔɔlaa se ŋtɩŋna yɔ, ɖitendiɣ-ŋ se ŋpɔzɩ ɛgbɛyɛ piliŋa ŋga kɔcɔŋnɩ mɩ-ɛjaɖɛ yɔɔ yɔ nɛ ŋna se papɩzɩɣ nɛ patɩŋnɩ kɩ-yɔɔ mɩ-ɛjaɖɛ taa yaa we. Paa ɛjaɖɛ nɖɩ lɛ, ɖɩ nɛ ɖɩ-paɣtʋ, pʋyɔɔ pɩcɛyaa se ŋpɔzɩ lɔŋ tasʋʋ weyi ɛsɩm lambuu mʋʋ paɣtʋ yaa ɛjaɖɛ paɣtʋ camɩyɛ yɔ nɛ ŋna ɛzɩma ŋla ña-haɖɛ yɔ.

Assurance liidiye nɛ hɛzʋʋ mʋʋ liidiye: Ŋpɩzɩɣ nɛ ŋla ɖʋtʋ se pɛcɛlɩ ñɛ-tɛ Assurance liidiye yaa hɛzʋʋ mʋʋ liidiye Yehowa Aseɣɖe Tɩnaa ɛgbɛyɛ nɛ palabɩnɩ-ɖɩ tʋmɩyɛ.

Liidiye nɖɩ ŋsɩ bankɩ taa yɔ: Ŋpɩzɩɣ nɛ ŋsɩɩ liidiye naɖɩyɛ bankɩ taa nɛ ŋla ɖʋtʋ se Yehowa Aseɣɖe Tɩnaa ɛgbɛyɛ pɩzɩɣ nɛ ɖɩmʋ liidiye nɖɩ ña-sɩm wayɩ, ye bankɩ paɣtʋ ɩhaɣ nʋmɔʋ yɔ.

Liidiye nɖɩ ŋkpaɣ nɛ ŋɖʋ tʋmɩyɛ naɖɩyɛ labʋ taa, yaa liidiye nɖɩ ŋkɩndɩ tʋmɩyɛ ɖɩlaɖɛ naɖɩyɛ yɔ: Ŋpɩzɩɣ nɛ ŋma takayaɣ se liidiye nɖɩ ŋkpaɣ nɛ ŋɖʋ tʋmɩyɛ naɖɩyɛ labʋ taa, yaa liidiye nɖɩ ŋkɩndɩ tʋmɩyɛ ɖɩlaɖɛ naɖɩyɛ yɔ, ŋkpaɣ-ɖɩ nɛ ŋla kʋjɔʋ Yehowa Aseɣɖe Tɩnaa se ña-sɩm wayɩ lɛ pɛcɛlɩ-wɛ ɖɩ.

Ña-ɖɩsɩ, ña-tʋmɩyɛ ɖamɩŋ nɛ ñɛ-tɛtʋ: Ŋpɩzɩɣ ŋha ña-ñɩm mbʋ Yehowa Aseɣɖe Tɩnaa ɛgbɛyɛ. Ye pɩkɛ ɖɩsɩ yɔ, papɩzɩɣ nɛ peyebini-ŋ sɩ-taa nakɛyɛ nɛ pɩsɩɩnɩ ña-sɩm wiye.

Takayaɣ ŋga kawɩlɩɣ mbʋ ɛyʋ sɔɔlaa se pala ɛ-sɩm wayɩ yɔ: Ŋpɩzɩɣ ŋma takayaɣ nakɛyɛ nɛ ŋsɩɩ komina cɔlɔ nɛ kawɩlɩɣ se ŋha ña-ñɩm yaa liidiye naɖɩyɛ Yehowa Aseɣɖe Tɩnaa ɛgbɛyɛ se ɖɩlabɩnɩ tʋmɩyɛ ña-sɩm wayɩ. Pɩpɩzɩɣ piyele nɛ lambuu liidiye nɖɩ ŋhɛyɩɣ komina yɔ ɖɩpasɩ.

Ɛzɩ kʋjɔŋ labʋ nʋmɔŋ weyi ɖɩyɔɔdɩ ɩ-tɔm yɔ ɩwɩlʋʋ yɔ, pɩpɔzʋʋ se weyi ɛcaɣ haɖɛ yaa kʋjɔʋ nakʋyʋ labʋ yɔ ɛla ɖʋtʋ camɩyɛ. Pɩsa nɛ pasɩnɩ mba pañɩnɩɣ se pala haɖɛ nɛ paɖʋ nesi ɛjaɖɛ kpeekpe yɔɔ tɔm susuu tʋmɩyɛ nɖɩ Yehowa Aseɣɖe Tɩnaa lakɩ yɔ lɛ, palabɩ hatʋ cabɩ takayaɣ nakɛyɛ aŋglɛɛ kʋnʋŋ taa (Charitable Planning to Benefit Kingdom Service Worldwide) nɛ Ɛsɩpaañɩ kʋnʋŋ taa ɖɔɖɔ. Kɔyɔɔdʋʋ nʋmɔŋ weyi ɩ-yɔɔ ŋpɩzɩɣ nɛ ŋtɩŋna nɛ ŋla haɖɛ yɔ ɩ-tɔm. Ŋpɩzɩɣ nɛ ŋla haɖɛ nɖɩ papɩzɩɣ nɛ palabɩnɩ-ɖɩ tʋmɩyɛ sɔnɔ sɔnɔ yaa ña-sɩm wayɩ yɔ. Ɛlɛ nʋmɔŋ weyi ɩ-tɔm pɔyɔɔdɩ takayaɣ ŋga ka-taa yɔ, pɩtɩla yɔ, pɩtɩŋna lambuu paɣtʋ nɛ paɣtʋ lɛɛtʋ ndʋ tɩwɛ ñɛ-ɛjaɖɛ taa yɔ tɩ-yɔɔ lɛ, pɩtɩkɛ nʋmɔŋ ɛnɩ ɩ-tɩŋa ŋpɩzɩɣ nɛ ŋlabɩnɩ tʋmɩyɛ. Sakɩyɛ labɩnɩ nʋmɔŋ ɛnɩ tʋmɩyɛ nɛ pasɩnɩ ɖɛ-ɛgbɛyɛ tʋma wena palakɩ ɛjaɖɛ kpeekpe yɔɔ yɔ, nɛ pɩsɩnɩ-wɛ ɖɔɖɔ nɛ lambuu ŋgʋ pamʋʋ-wɛ pa-ajɛɛ taa yɔ kɩpasɩ. Ye hatʋ cabɩ takayaɣ ŋga kɛwɛ ɛjaɖɛ nɖɩ ɖɩ-taa ŋwɛɛ kɔyɔ, ŋpɩzɩɣ nɛ ŋpɔzɩ-kɛ ñɛ-ɛgbɛyɛ taa ɛzʋtʋyʋ takayaɣ taa mayʋ cɔlɔ.

Lɔŋ tasʋʋ lɛɛbʋ wɛ ɖɛ-tɛ intɛrnɛɛtɩ lone yɔɔ nɛ pɩ-tɛɛ kiŋ lien ŋgʋ payaɣ se “La haɖɛ nɛ pɩsɩnɩ ɛjaɖɛ kpeekpe yɔɔ tɔm susuu tʋmɩyɛ” yɔ, kɩ-hɔɔlʋʋ yɔɔ. Ŋpɩzɩɣ nɛ ŋpɔzɩ lɔŋ tasʋʋ ɖɔɖɔ Yehowa Aseɣɖe Tɩnaa ɛgbɛyɛ piliŋa ŋga kɔcɔŋnɩ mɩ-ɛjaɖɛ taa Kewiyaɣ tʋma yɔɔ yɔ.