“Mba pewelisiɣni-ŋ yɔ” pakaɣ pa-ñʋʋ yabʋ

1. Ɛbɛ ɖa-taa paa anɩ sɔɔlaa se ɛ-hɔʋ taa ñɩma ɩla?

PAYAƔ koobu halɩñɩnʋ nɔɔyʋ se Pauline.b Ɛyɔɔdaa se: “Kpaɣnɩ alɩwaatʋ ndʋ mantɩlɩ toovenim yɔ, maasɔɔlaa se ma nɛ mɔ-hɔʋ taa ñɩma tɩŋa ɖɩsʋʋ paradisuu taa. Nɛ kɔzɩ kɔzɩ lɛ, maasɔɔlaa se ma-walʋ Wayne nɛ ɖa-pɩyalʋ pɛkpɛndɩ mɔ-yɔɔ nɛ ɖɩsɛɛ Yehowa.” Ñɔ-hɔʋ taa ñɩma nabɛyɛ wɛɛ nɛ patɩtɩlɩtɩ Yehowa se pɔsɔɔlɩ-ɩ? Ɛzɩ Pauline yɔ, pɩtɩla ña ɖɔɖɔ ŋsɔɔlaa se ñɔ-hɔʋ taa ñɩma ɩkpɛndɩ ñɔ-yɔɔ nɛ ña nɛ wɛ ɩsɛɛ Yehowa.

2. Tɔm pɔzʋʋ mbʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

² Ðɩɩpɩzɩɣ nɛ ɖɩkpa ɖɔ-hɔʋ taa ñɩma nɛ ɖoŋ se petisi tɔm kɩbandʋ yɔɔ, ɛlɛ ɖɩpɩzɩɣ nɛ ɖiseɣti-wɛ nɛ pokuli pa-maɣzɩm nɛ pa-laŋa nɛ panɩɩ Bibl taa tɔm. (2 Tim. 3:14, 15) Ɛbɛ yɔɔ pɩwɛɛ se ɖɩlɩzɩ aseɣɖe ɖɔ-hɔʋ taa ñɩma? Ɛbɛ yɔɔ pɩcɛyaa se ɖɩwɩlɩ se ɖɩnɩɣ pɔ-tɔm taa? Ɛbɛ ɖɩpɩzɩɣ ɖɩla nɛ ɖɩsɩnɩ ɖɔ-hɔʋ taa ñɩma nɛ pɔsɔɔlɩ Yehowa ɛzɩ ɖa ɖɔɖɔ ɖɩsɔɔlʋʋ-ɩ yɔ? Ɛzɩma ɖɛ-ɛgbɛyɛ taa ñɩma tɩŋa pɩzɩɣ nɛ pasɩnɩ-ɖʋ?

ƐBƐ YƆƆ PƖWƐƐ SE ÐƖLƖZƖ ASEƔÐE ÐƆ-HƆƲ TAA ÑƖMA?

3. Ɛzɩ 2 Pɩyɛɛrɩ 3:9 yɔɔdʋʋ yɔ, ɛbɛ yɔɔ pɩwɛɛ se ɖɩlɩzɩ aseɣɖe ɖɔ-hɔʋ taa ñɩma?

³ Piileɖiɣ lɛ, Yehowa kaɣ ɖɩzʋʋ ɛjaɖɛ ɖɩnɛ. Mba pɛwɛnɩ “laŋa kɩbana se pehiɣ wezuu maatɛŋ yɔ,” pe-ɖeke pakaɣnɩ hiɣu wezuu. (Tʋma 13:48) Ðɩkpakɩɣ ɖo-ɖoŋ nɛ ɖa-alɩwaatʋ sakɩyɛ nɛ ɖisusuuni tɔm ɖe-egeetiye taa ñɩma mba patɩkɛ ɖɔ-hɔʋ taa ñɩma yɔ. Ye mbʋ, pɩcɛyaa ɖɔɖɔ se ɖisusi tɔm ɖɔ-hɔʋ taa ñɩma nɛ pɛkpɛndɩ ɖɔ-yɔɔ nɛ ɖɩsɛɛ Yehowa. Ða-Caa kʋsɔɔlʋ Yehowa tɩsɔɔlɩ “se paɖɩzɩ nɔɔyʋ, ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.”—Kalɩ 2 Pɩyɛɛrɩ 3:9.

4. Ɛzɩma pɩpɩzɩɣ nɛ picoɖi-ɖʋ alɩwaatʋ ndʋ ɖɩlɩzɩɣ aseɣɖe ɖɔ-hɔʋ taa ñɩma yɔ?

⁴ Pɩcɛyaa se ɖɩtɩlɩ se nʋmɔʋ ŋgʋ kɩ-yɔɔ ɖɩtɩŋɩɣna nɛ ɖisusuu ñʋʋ yabɩtʋ tɔm yɔ, kɩpɩzɩɣ nɛ kɩkɛ kɩbaŋʋ yaa kɩdɛkɛdʋʋ. Paa ɖɩlɩzɩɣ wɛtʋ kɩbandʋ nɛ ɖɩwɩlɩɣ alɩwaatʋ ndʋ ɖɩlɩzɩɣ aseɣɖe mba patɩkɛ ɖɔ-hɔʋ taa ñɩma yɔ, pɩtɩla ɖɩɩwɩlɩɣ wɛtʋ ndʋ ɖɔ-hɔʋ taa ñɩma alɩwaatʋ ndʋ ɖɩyɔɔdʋʋnɩ-wɛ yɔ.

5. Alɩwaatʋ ndʋ ɖisusuu ɖɔ-hɔʋ taa ñɩma toovenim tɔm yɔ, tɔm ndʋ yɔɔ pɩwɛɛ se ɖɩtaasɔɔ?

⁵ Pɩtɩla, ɖa-taa sakɩyɛ tɔzʋʋ nʋmɔʋ ŋgʋ kɩ-yɔɔ pɛtɛm tɩŋnʋʋ se palɩzɩ aseɣɖe pɔ-hɔʋ taa ñɩma yɔ kɩ-yɔɔ lɛ, peɖiɣziɣna se kɩtɩmʋna ɖeyi ɖeyi. Apostoloo Pɔɔlɩ tasɩ Krɩstʋ ñɩma lɔŋ se: “Iyele nɛ mɩ-yɔɔdaɣ wɛɛ leleŋ paa ɛzɩmtaa, nɛ ɖɔm wɛɛ ka-taa, se pɩsa nɛ ɩtɩlɩ ɛzɩma pɩwɛɛ se icosi paa ɛyʋ weyi lɛ yɔ.” (Kol. 4:5, 6) Pɩwɛɣ ɖeu se ɖɩtɔzɩ lɔŋ tasʋʋ mbʋ pɩ-yɔɔ alɩwaatʋ ndʋ ɖɩyɔɔdʋʋnɩ ɖɔ-hɔʋ taa ñɩma yɔ. Pɩtɩkɛ mbʋ yɔ, ɖɔ-yɔɔdaɣ ɛɛhɔŋ-wɛ se pewelisini-ɖʋ ɛlɛ kaɖʋʋ-wɛ ɖɩwɩzɩyɛ kɩɖʋʋ.

ƐBƐ ÐƖPƖZƖƔ ÐƖLA NƐ ÐƖSƖNƖ ÐƆ-HƆƲ TAA ÑƖMA?

6-7. Ha kɩɖaʋ ŋgʋ kɩwɩlɩɣ mbʋ pʋyɔɔ pɩcɛyaa se ɖɩwɩlɩ se ɖɩnɩɣ ɖɛ-tɛŋga ŋga katɩkɛ Yehowa Aseɣɖe Tʋ yɔ kɔ-tɔm taa yɔ.

⁶ Wɩlɩ se ŋnɩɣ pɔ-tɔm taa. Pauline weyi ɛ-tɔm ɖɩyɔɔdaa nɛ pɩɖɛɛ yɔ, ɛtasɩ yɔɔdʋʋ se: “Kajalaɣ taa lɛ, Ɛsɔ nɛ Bibl ɖeke pɔ-yɔɔ mañɩnaɣ se ma nɛ ma-walʋ ɖɩla kɛdaɣ. Wiɖiyi ɖɩtɩyɔɔdɩ mbʋ pɩɖɔŋ paa evemiye nɖɩ yɔ pɩ-tɔm kpa.” Ɛlɛ, Pauline walʋ Wayne taatɩlɩ tɔm sakɩyɛ Bibl yɔɔ nɛ ɛtaanɩɣ ndʋ Pauline yɔɔdaɣ yɔ tɩ-taa. Ɛmaɣzaɣ se ndʋ payɩ Pauline yɔɔdaɣ yɔ, tɩkɛnɩ ɛ-Ɛsɔ sɛtʋ ɛgbɛyɛ yɔɔ tɔm ɖeke. Ɛɛwɛɛ nɛ ɛnɩɣzɩɣ se Pauline wɛɛ nɛ ɛsʋʋ Ɛsɔ sɛtʋ ɛgbɛyɛ kɩdɛkɛdɩyɛ naɖɩyɛ taa. Ɛnɩɣzaɣ ɖɔɖɔ se ɛgbɛyɛ nɖɩ ɖɩ-taa ñɩma wɛɛ nɛ pepeɣziɣ Pauline kipeɣzu.

⁷ Pauline yɔɔdaa se ɛnʋ kpakaɣ alɩwaatʋ sakɩyɛ ɖanasɩ yɔɔ nɛ kpɩtaʋ ɖɩdɛnɖɛ kɩyakɩŋ taa nɛ ɛ nɛ e-koobiya palakɩ kediɣzisi, posusuu tɔm nɛ palakɩ ɖɔɖɔ aleɣya. Pauline tasɩ yɔɔdʋʋ se: “Nabʋyʋ taa Wayne kɔŋ ɖɩɣa lɛ, nɔɔyʋ fɛyɩ, nɛ pɩlakɩ-ɩ ɛzɩ e-ɖeke ɛwɛna yɔ.” Pɩtʋʋ fɛyɩ se Wayne kaasɔɔlɩ kpem se ɛ nɛ ɛ-halʋ nɛ ɛ-pɩyalʋ pacakɩ ɖoŋ ɖoŋ. Ɛtaatɩlɩ ɛyaa mba pɔ-cɔlɔ Pauline nɛ pa-pɩyalʋ powokaɣ yɔ, nɛ pɩlakaɣ-ɩ ɛzɩ taabalaa kɩfama mba Pauline hiɣ lɛɛlɛɛyɔ yɔ, pamʋ ñɩm ɛ-ɛsɩndaa nɛ pɩkpaɖɩ-ɩ. Pɩcɛyɩ Wayne siŋŋ nɛ ɛñɩnaɣ se ɛ nɛ Pauline pɛcɛ pe-nesi ɖɔkʋʋ. Ye ñaawɛnɩ Pauline lone taa, ɛbɛ ŋŋlaba nɛ ŋwɩlɩ se ŋnɩɣ Wayne tɔm taa?

8. Ɛzɩ 1 Pɩyɛɛrɩ 3:1, 2 yɔɔdʋʋ yɔ, ɛbɛ wɛɣnɩ ɖoŋ ɖɔ-hɔʋ taa ñɩma yɔɔ nɛ pɩkpaɖɩ?

⁸ Ha kɩɖaʋ kɩbaŋʋ. Ðoŋ ɖoŋ lɛ, mbʋ ɖɩlakɩ yɔ pɩwɛnɩ ɖoŋ ɖɔ-hɔʋ taa ñɩma yɔɔ nɛ pɩkpaɖɩ ndʋ ɖɩyɔɔdʋʋ yɔ. (Kalɩ 1 Pɩyɛɛrɩ 3:1, 2.) Pauline kɔm nɛ ɛyʋsɩ se tɔm ndʋ tɩkɛ toovenim. Ɛyɔɔdaa se: “Manawa se Wayne sɔɔlɩ-ɖʋ nɛ toovenim taa lɛ, ɛtaañɩnɩɣ se ɖɩcɛ ɖe-nesi ɖɔkʋʋ. Ɛ-lakasɩ yeba nɛ menɖiɣzina se pɩwɛɛ se manpaɣzɩ labʋ mbʋ Yehowa ñɩnɩɣ se mala yɔ. Pɩkɩlɩɣ ɖeu se meyele yɔɔdʋʋ sakɩyɛ. Pɩwɛɛ se mantɩŋnɩ ma-lakasɩ yɔɔ nɛ maha kɩɖaʋ kɩbaŋʋ.” Pauline yebi ñɩɣʋ Wayne yɔɔ se ɛ nɛ ɩ palakɩ kɛdaɣ Bibl yɔɔ. Piyeba nɛ ɛ nɛ ɩ papaɣzɩ labʋ kɛdaɣ pɩlɩɩnɩ mbʋ pɩɖɔŋ paa evemiye nɖɩ ɖɩ-taa yɔ pɩ-yɔɔ. Wayne kɔm nɛ ɛna se Pauline wɛɛ nɛ ɛñɩnɩɣ laŋhɛzɩyɛ lɛɛlɛɛyɔ nɛ pɩkpaɖɩ nɛ pa-pɩyalʋ ɖɔɖɔ wɛnɩ ñamtʋ nɛ pɩkpaɖɩ. (Adu. 31:18, 27, 28) Alɩwaatʋ ndʋ Wayne nawa se Bibl yeba nɛ ɛ-hɔʋ wɛɛnɩ wɛtʋ kɩbandʋ lɛ, ɛnʋ ɖɔɖɔ ekuli ɛ-laŋɩyɛ nɛ ɛ-maɣzɩm nɛ ɛpaɣzɩ welisuu Ɛsɔtɔm.—1 Kɔr. 7:12-14, 16.

9. Ɛbɛ yɔɔ pɩwɛɛ se ɖiwolo pɩ-yɔɔ nɛ ɖɩsɩɣnɩ ɖɔ-hɔʋ taa ñɩma?

⁹ Wolo pɩ-yɔɔ nɛ ŋsɩɣnɩ ñɔ-hɔʋ taa ñɩma. Yehowa haɣ-ɖʋ kɩɖaʋ kɩbaŋʋ hɔɔlʋʋ ŋgʋ kɩ-taa. “Paa kɩyakʋ ŋgʋ” ɛhaɣ ɛyaa waɖɛ se petisi tɔm kɩbandʋ yɔɔ nɛ pehiɣ wezuu. (Yer. 7:25) Nɛ apostoloo Pɔɔlɩ heyi Timootee se ewolo pɩ-yɔɔ nɛ ɛsɩɣnɩ lalaa. Ɛbɛ yɔɔ? Mbʋ pʋyɔɔ yɔ, alɩwaatʋ ndʋ ɛlakɩ mbʋ yɔ, ɛyakɩ ɛ-maɣmaɣ ɛ-ñʋʋ nɛ mba pewelisiɣni-i yɔ pa-ñɩŋgʋ. (1 Tim. 4:16) Ðɩsɔɔlɩ ɖɔ-hɔʋ taa ñɩma nɛ pʋyɔɔ lɛ, ɖɩsɔɔlaa se patɩlɩ toovenim tɔm ndʋ tɩwɛ Bibl taa yɔ. Pauline yɔɔdaɣ nɛ ɛ-lakasɩ kɔm nɛ pɩwɛɛnɩ ɖoŋ kɩbaŋ ɛ-hɔʋ yɔɔ. Lɛɛlɛɛyɔ, ɛ-taa wɛ leleŋ se ɛ-walʋ kpɛndɩ ɛ-yɔɔ nɛ pa-tɩŋa pɛsɛɣ Yehowa. Pa-naalɛ pɛkɛ nʋmɔʋ lɩzɩyaa nɛ Wayne kɛ ɖɔɖɔ ɛgbɛyɛ taa ɛzʋtʋyʋ.

10. Ɛbɛ yɔɔ pɩcɛyaa se ɖɩwɛɛ suuɖu?

¹⁰ Wɛɛ suuɖu. Alɩwaatʋ ndʋ ɖɩlɩzɩɣ se ɖɩñaŋ Ɛsɔ yɔ, ɖɩlɛɣzɩɣ ɖe-wezuu caɣʋ nɛ tisuu mbʋ ɖɩɩwɛna yɔ. Pɩpɩzɩɣ nɛ pɩwɛɛ kaɖɛ ɖɔ-hɔʋ taa ñɩma se petisi lɛɣzɩtʋ ndʋ tɩ-yɔɔ. Ðoŋ ɖoŋ lɛ, mbʋ pacalɩɣ yʋsʋʋ yɔ, mbʋ lɛ se ɖa nɛ wɛ ɖɩɩtasɩɣ kpɛndʋʋ nɛ ɖɩlakɩ coocinaa kazandʋ nɛ ɖɩɩtasɩɣ ɖʋʋ ɖɔ-nɔɔ politiki tɔm taa. Kajalaɣ taa lɛ, ɖɔ-hɔʋ taa ñɩma nabɛyɛ pɩzɩɣ nɛ pɔkɔ-ɖʋ nɛ pana. (Mat. 10:35, 36) Ɛlɛ, pɩtɩpɔzɩ se ɖɩmaɣzɩ se paakaɣ lɛɣzʋʋ kpa. Ye ɖiyebi-wɛ sɩnʋʋ se panɩɩ mbʋ pʋyɔɔ ɖitisiɣ yɔ pɩ-taa yɔ, pɩwɩlɩɣ se ɖɩhʋnɩ-wɛ tɔm nɛ ɖɩkɔ tɔm ñʋʋ se patɩmʋna se pehiɣ wezuu maatɛŋ. Pɩtɩkɛ ɖa Yehowa ɖʋ tɔm hʋʋ tʋmɩyɛ, ɛlɛ Yesu ɛɖʋ-ɖɩ. (Yoh. 5:22) Ye ɖɩwɛ suuɖu yɔ, pɩtɩla ɖɔ-hɔʋ taa ñɩma kaɣ-ɖʋ welisinuu wiɖiyi. —Kalɩ aɖakaɣ “Tɩŋnɩ ɖɛ-tɛ intɛrnɛɛtɩ lone yɔɔ nɛ ŋwɩlɩ ɛyaa bibl taa tɔm.”

11-13. Mbʋ Alice laba nɛ ɛsɩnɩ ɛ-lʋlɩyaa nɛ panɩɩ ɛ-tɔm taa yɔ, ɛbɛ pɩkpɛlɩkɩɣ-ŋ?

¹¹ La kɩbandʋ, ɛlɛ taayele nɛ ñɔ-hɔʋ taa ñɩma lɛɣzɩ ña-lɩmaɣza. (Adu. 15:2) Iyele nɛ ɖɩna Alice kɩɖaʋ. Ɛkpɛlɩkɩ Yehowa tɔm alɩwaatʋ ndʋ ɛtaawɛɛ ɛ-lʋlɩyaa cɔlɔ yɔ. Ɛ-lʋlɩyaa taatisiɣ Ɛsɔ yɔɔ nɛ paɖʋwaɣ pɔ-nɔsɩ politiki tɔm taa ɖɔɖɔ. Ɛkɔm nɛ eɖiɣzina se pɩwɛɛ se eheyi-wɛ tɔm kɩbandʋ ndʋ ɛwɛɛ nɛ ɛkpɛlɩkɩɣ yɔ lɔŋ. Alice yɔɔdaa se: “Ye ŋyeba nɛ alɩwaatʋ sakɩyɛ ɖɛɛ pʋcɔ nɛ ŋheyi-wɛ lɛɣzɩtʋ kɩfatʋ ndʋ ŋlabɩ ñe-tisuu nɛ ña-lakasɩ yɔɔ yɔ tɩ-tɔm yɔ, pɩɖʋʋ-wɛ ɖɩwɩzɩyɛ nɛ pɩkɩlɩ.” Ɛñaɣ pana nɛ ɛñɩnɩ tɔm ndʋ ɛmaɣzɩɣ se tɩkɛdɩɣnɩ ɛ-lʋlɩyaa nɛ pɩkpaɖɩ yɔ, ɛzɩ sɔɔlɩm tɔm mbʋ yɔ. Pʋwayɩ lɛ, ɛma-wɛ takayɩsɩ nɛ sɩ-taa lɛ, ɛyɔɔdɩ ndʋ Bibl wɩlɩɣ tɔm ndʋ tɩ-yɔɔ yɔ, nɛ ɛpɔzɩ-wɛ se peheyi-i pa-lɩmaɣza. (1 Kɔr. 13:1-13) Ɛsɛ ɛ-lʋlɩyaa ɛzɩma pɔcɔŋnɩ ɛ-yɔɔ yɔ nɛ etiyini-wɛ ɖɔɖɔ kʋjɔŋ. Alɩwaatʋ ndʋ payɩ ewokaɣ nɛ ɛnaɣ ɛ-lʋlɩyaa yɔ, ɛñakaɣ pana se ɛsɩnɩ e-ɖoo ɖɩɣa taa tʋma labʋ. Alɩwaatʋ ndʋ eheyi ɛ-lʋlɩyaa tisuu kɩfam mbʋ ɛwɛna yɔ pɩ-tɔm yɔ, kajalaɣ taa lɛ, pɩtaalabɩ-wɛ leleŋ.

¹² Alɩwaatʋ ndʋ Alice kaawɛ ɛ-lʋlɩyaa cɔlɔ yɔ, ewobi pɩ-yɔɔ nɛ ɛkalɩɣ Bibl paa ɖooye. Alice yɔɔdaa se: “Pɩsɩnɩ mon-ɖoo nɛ ɛna ɛzɩma Bibl tɔm cɛyɩ mɛ-ɛsɩndaa siŋŋ yɔ.” Alɩwaatʋ ndʋ tɩ-taa ɖɔɖɔ Alice caa kpaɣ lɩmaɣza se ɛkpɛlɩkɩɣ Bibl taa tɔm nɛ pɩsɩnɩ-ɩ nɛ ɛna mbʋ pʋyɔɔ ɛ-pɛlɛ lɛɣzɩ mbʋ yɔ. Ɛñɩnaɣ ɖɔɖɔ se ɛna natʋyʋ Bibl taa nɛ ɛtɩŋnɩ tɩ-yɔɔ nɛ ɛkʋ ɛ-pɛlɛ tɔm. Alice yɔɔdaa se: “Maha-ɩ Bibl nɛ kɩ-taa lɛ, mama-ɩ ɖɔɖɔ tɔm natʋyʋ.” Ɛbɛ lɩ pɩ-taa? Alice caa tɩna pɔbɔtʋ tɔm natʋyʋ Bibl taa, ɛlɛ tɔm ndʋ ɛkalaa yɔ, titukuni-i siŋŋ.

¹³ Pɩwɛɛ se ɖɩla kɩbandʋ, ɛlɛ ɖitaayele nɛ nɔɔyʋ lɛɣzɩ ɖa-lɩmaɣza, paa ɖɩkatɩɣ kala yɔ. (1 Kɔr. 4:12b) Ðɩkpaɣ ɛzɩ Alice mbʋ yɔ, e-ɖoo kaɖaɣnɩ-ɩ nɛ pɩɩwɛɛ se ɛɖɔkɩ ɛ-tɩ. Alice yɔɔdaa se: “Pamɩyɩsɩ-m lɩm nɛ pɩtɛ lɛ, Daada paɣzɩ-m yaʋ se ‘pɛlɛ kɩdɛkɛdʋ.’” Ɛzɩma Alice laba? Ɛyɔɔdaa se: “Mantiyele mɛ-Ɛsɔ sɛtʋ tɔm yɔɔdʋʋ, ɛlɛ meheyi-i nɛ ñamtʋ se mɛlɛɣzɩ ma-maɣzɩm nɛ manpɩsɩ Yehowa Aseɣɖe Tʋ, nɛ maakaɣ lɩmaɣza ana lɛɣzʋʋ. Mañaɣ pana nɛ mon-ɖoo tɩlɩ se mɔnsɔɔlɩ-ɩ siŋŋ. Ða-naalɛ ɖitisi ɛsɩtɛɣlɩm nɛ pʋwayɩ lɛ, mantɩzɩ-ɩ tɔɔnaɣ kɩbaŋa nakɛyɛ. Kpaɣnɩ alɩwaatʋ ndʋ, mon-ɖoo paɣzɩ ɖiɣzinuu se Bibl wɛɛ nɛ kɩñɔɔzʋʋ me-wezuu caɣʋ.”

14. Lɩmaɣza wena ɖɩkpaɣaa se ɖɩsɛɣ Yehowa yɔ, ɛbɛ yɔɔ pɩtɩpɔzɩ kpa se ɖiyele nɛ ɖɔ-hɔʋ taa ñɩma lɛɣzɩ-yɛ?

¹⁴ Pɩpɩzɩɣ nɛ pɩkpaɣ alɩwaatʋ sakɩyɛ pʋcɔ nɛ ɖɔ-hɔʋ taa ñɩma nɩɩ pɩ-taa camɩyɛ se Yehowa sɛtʋ tɔm cɛyɩ ɖɛ-ɛsɩndaa siŋŋ. Ðɩkpaɣ kɩɖaʋ kʋnɛ. Alɩwaatʋ ndʋ Alice kpaɣ lɩmaɣza se ɛlakɩ nʋmɔʋ lɩzʋʋ tʋmɩyɛ nɛ ekizi se ɛɛlakɩ tʋmɩyɛ nɖɩ ɛ-lʋlɩyaa ñɩnaɣ se ɛla yɔ lɛ, pɩɖaɣnɩ e-ɖoo ɖʋʋ ɖɩwɩzɩyɛ. Ɛlɛ Alice tɩlɛɣzɩ lɩmaɣza. Alice yɔɔdaa se: “Ye ŋha ñɔ-hɔʋ taa ñɩma nʋmɔʋ se pɛlɛɣzɩ ña-lɩmaɣza hɔɔlʋʋ nakʋyʋ taa yɔ, pɩtʋʋ fɛyɩ se pakaɣ ñaɣʋ pana se pɛlɛɣzɩ ña-lɩmaɣza hɔɔlɩŋ lɛɛŋ taa ɖɔɖɔ. Ɛlɛ ye ŋlakɩ kɩbandʋ nɛ ŋñɔʋnɩ lɩmaɣza wena ŋkpaɣaa yɔ, ñɔ-hɔʋ taa ñɩma nabɛyɛ pɩzɩɣ nɛ pewelisini-ŋ.” Mbʋ pɩlabɩ Alice hɔɔlʋʋ taa. Lɛɛlɛɛyɔ ɛ-caa nɛ e-ɖoo pɛkɛ nʋmɔʋ lɩzɩyaa nɛ ɛ-caa kɛ ɖɔɖɔ ɛgbɛyɛ taa ɛzʋtʋyʋ.

ƐZƖMA ÐƐ-ƐGBƐYƐ TAA ÑƖMA TƖŊA PƖZƖƔ NƐ PASƖNƖ-ÐƲ?

15. Ɛzɩ Maatiyee 5:14-16 nɛ 1 Pɩyɛɛrɩ 2:12 yɔɔdʋʋ yɔ, “tʋma kɩbana” wena lalaa lakɩ yɔ, ɛzɩma apɩzɩɣ nɛ asɩnɩ ɖɔ-hɔʋ taa ñɩma?

¹⁵ Yehowa tɩŋɩɣnɩ “tʋma kɩbana” wena ɛ-sɛyaa lakɩ yɔ a-yɔɔ nɛ ɛhɔŋ ɛyaa se pɛsɛɛ-ɩ. (Kalɩ Maatiyee 5:14-16; 1 Pɩyɛɛrɩ 2:12.) Ye ñɛ-tɛŋga ɛtɩkɛ Yehowa Aseɣɖe Tʋ yɔ, ka nɛ ñɛ-ɛgbɛyɛ taa koobiya pɛtɛm katʋʋ se patɩlɩ ɖama? Pauline weyi ɛ-tɔm ɖɩyɔɔdaa nɛ pɩɖɛɛ yɔ, ɛya koobiya ɛ-ɖɩɣa se pɩsa nɛ ɛ-walʋ Wayne tɩlɩ-wɛ. Wayne tɔzʋʋ ɛzɩma koobu abalɩñɩnʋ nɔɔyʋ sɩnɩ-ɩ nɛ ɛtɩlɩ ɛyaa mba ɖeyi ɖeyi Yehowa Aseɣɖe Tɩnaa kɛnaa yɔ pɩ-yɔɔ. Wayne yɔɔdaa se: “Ɛpɔzɩ nʋmɔʋ tʋmɩyɛ taa nɛ ɛkpaɣ evemiye pilim se ma nɛ ɩ ɖɩcɔnɩ pombo aleɣya naayɛ teelee yɔɔ. Pɩsɩnɩ-m nɛ mana se koobu ɛnʋ, pɩtɩkɛ ɛ-Ɛsɔ sɛtʋ ɖeke tɔm cɛyɩnɩ ɛ-ɛsɩndaa.”

16. Ɛbɛ yɔɔ pɩwɛɛ se ɖɩyaa ɖɔ-hɔʋ taa ñɩma se pɔkɔɔ kediɣzisi?

¹⁶ Nʋmɔŋ kɩbaŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ ɖɔ-hɔʋ taa ñɩma yɔ, ɩ-taa nakʋyʋ lɛ se ɖɩyaa-wɛ se pɔkɔɔ ɖɛ-ɛgbɛyɛ taa kediɣzisi taa. (1 Kɔr. 14:24, 25) Kediɣzaɣ ŋga Wayne calɩ wobu yɔ ŋga lɛ Yesu sɩm yɔɔ tɔzʋʋ sɔnzɩ. Ewobi kediɣzaɣ ŋga mbʋ pʋyɔɔ yɔ, katɩtʋʋzɩnɩ tʋmɩyɛ alɩwaatʋ nɛ katɩɖaɣlɩ ɖɔɖɔ. Ɛyɔɔdaa se: “Mantɩnɩɩ samaɣ taa tɔm ndʋ pɔyɔɔdɩ puwiye yɔ tɩ-taa ɖeyi ɖeyi, ɛlɛ ɛyaa mba mankataa yɔ pɔ-yɔɔ mɔntɔzʋʋ. Pɔñɔtɩnɩ-m nɛ palabɩ-m talɩ ɖeu nɛ paha-m nesi nɛ sɔɔlɩm. Manpɩzɩɣ mɔntɔ se pɛkɛ ɛyaa kɩbama.” Halʋ nɔɔyʋ nɛ ɛ-walʋ palakaɣ camɩyɛ lakasɩ kɔzɩ kɔzɩ Pauline nɛ ɛ-pɩyalʋ nɛ pasɩɣnɩ-wɛ kediɣzisi nɛ tɔm susuu taa. Pʋyɔɔ alɩwaatʋ ndʋ Wayne kpaɣ lɩmaɣza se ɛkpɛlɩkɩɣ tisuu kɩfam mbʋ Pauline wɛna yɔ pɩ-yɔɔ tɔm lɛ, ɛpɔzɩ abalʋ ɛnʋ se ɛkpɛlɩkɩnɩ-ɩ Bibl.

17. (a) Ye ɖɔ-hɔʋ taa ñɩma iitisiɣ se pɔkɔɔ toovenim taa, ɛbɛ yɔɔ pɩtɩpɔzɩ se ɖɩmaɣzɩ se ɖɔ-cɔlɔ pɩlɩnaa? (b) Ɛbɛ yɔɔ pɩtɩpɔzɩ kpa se ɖɩmaɣzɩ se ɖɔ-hɔʋ taa ñɩma ɛɛkaɣ lɛɣzʋʋ?

¹⁷ Ðɩtaɣ liu se ɖɔ-hɔʋ taa ñɩma tɩŋa kaɣ kpɛndʋʋ ɖɔ-yɔɔ nɛ ɖɩsɛɛ Yehowa. Paa mbʋ yɔ, ɖɩpɩzɩɣ nɛ ɖɩñaɣ pana siŋŋ se ɖɩsɩnɩ ɖɔ-hɔʋ taa ñɩma nɛ papɩsɩ Ɛsɔ sɛyaa, ɛlɛ pɩtɩla paatisiɣ nɛ pɔkɔɔ toovenim taa. Ye mbʋ pɩwɛ ñɔ-hɔɔlʋʋ taa yɔ, pa-lɩmaɣza ana ataayele nɛ ŋmaɣzɩ se ñɔ-cɔlɔ pɩlɩnaa. Toovenim taa lɛ, ɖɩɩkpaɣ nɔɔyʋ nɛ ɖoŋ se ɛwɛɛnɩ tisuu mbʋ ɖɩwɛna yɔ. Ɛlɛ, ye ñɔ-hɔʋ taa ñɩma ɩnawa se ŋwɛ koboyaɣ taa mbʋ pʋyɔɔ yɔ, ŋwɛɛ nɛ ŋsɛɣ Yehowa yɔ, pɩpɩzɩɣ nɛ pɩwɛɛnɩ ɖoŋ pɔ-yɔɔ siŋŋ. Tɩmɩ pɔ-yɔɔ. Yɔɔdɩnɩ-wɛ nɛ nɔɔ kɩbaŋa. Wolo pɩ-yɔɔ nɛ ŋsɩɣnɩ-wɛ. (Tʋma 20:20) Ña-taa ɛtɛ se Yehowa kaɣ wazʋʋ ña-pana ñaɣʋ yɔɔ. Nɛ ye ñɔ-hɔʋ taa ñɩma etisaa nɛ pewelisini-ŋ yɔ, pakaɣ pa-ñʋʋ yabʋ.