Lɩzɩ se ŋɖʋʋ nesi Ɛsɔ Kewiyaɣ lɛɛlɛɛyɔ!
Kpaɣ se helim sɔsɔm nabʋyʋ ɖiɣni mabʋ nɛ pɩñɔtʋʋnɩ egeetiye nɖɩ ɖɩ-taa ŋwɛɛ yɔ. Nɛ komina lone taa caɣyaa wɛɛ nɛ peheyiɣ ɛyaa se: “ISE! ƖÑƖNƖ ÐƖMƐLƖYƐ LƐƐLƐƐYƆ!” Ɛbɛ ŋkaɣ labʋ? Pɩtʋʋ fɛyɩ se ŋkaɣ ñɩnʋʋ ɖɩmɛlɩyɛ kɩbanɖɛ nɖɩ ɖɩyakɩ ña-ñʋʋ yɔ.
Ðɩpɩzɩɣ ɖɩyɔɔdɩ se “helim sɔsɔm” nabʋyʋ ɖiɣni mabʋ nɛ pɩñɔtʋʋnɩ-ɖʋ. Yesu ya helim mbʋ se “kʋñɔŋ sɔsɔʋ.” (Maatiyee 24:21) Ðɩɩpɩzɩɣ nɛ ɖise nɛ ɖɩmɛlɩ ɖoli se kʋñɔŋ sɔsɔʋ ŋgʋ kɩtaatalɩ-ɖʋ. Ɛlɛ ɖɩpɩzɩɣ ɖɩla nabʋyʋ nɛ pɩya ɖa-ñʋʋ. Ɛbɛ ɖɩpɩzɩɣ ɖɩla?
Yesu Krɩstʋ tɛ Pʋʋ yɔɔ tɔm yɔɔdʋʋ taa, ɛtasɩ-ɖʋ lɔŋ se: “Ye mbʋ, iwolo pɩ-yɔɔ nɛ ɩcalɩnɩ ñɩnʋʋ [Ɛsɔ] Kewiyaɣ nɛ e-siɣsiɣ wɛtʋ.” (Maatiyee 6:33) Ɛzɩma ɖɩpɩzɩɣ nɛ ɖɩla mbʋ?
Ðɩcalɩnɩ ñɩnʋʋ Ɛsɔ Kewiyaɣ. Pʋ-tɔbʋʋ lɛ se Ɛsɔ Kewiyaɣ ɛmʋ ñɩm siŋŋ ɖɛ-ɛsɩndaa nɛ pɩkɩlɩ pɩtɩŋa. (Maatiyee 6:25, 32, 33) Ɛbɛ yɔɔ pɩwɛɛ se kamʋ ñɩm ɖɛ-ɛsɩndaa mbʋ? Mbʋ pʋyɔɔ yɔ, ɛyaa ɩɩpɩzɩɣ nɛ pɔcɔnɩ kʋñɔmɩŋ weyi ɩwɛ tɛtʋ yɔɔ yɔ i-ɖeɖe. Ɛsɔ Kewiyaɣ ɖeke kaɣnɩ pɩzʋʋ nɛ kala tʋmɩyɛ sɔsɔɖɛ nɖɩ.
Ðɩñɩnɩ e-siɣsiɣ wɛtʋ. Pɩwɛɛ se ɖɩñaɣ pana nɛ ɖe-wezuu caɣʋ la nɔɔ kʋɖʋmaɣ nɛ Ɛsɔ paɣtʋ nɛ paɣtʋ kila wena awɛ siɣsiɣ yɔ. Ɛbɛ yɔɔ? Mbʋ pʋyɔɔ yɔ, ye ɖa-maɣmaɣ ɖalɩzɩɣnɩ mbʋ pɩwɛ ɖeu nɛ mbʋ pɩfɛyɩ ɖeu yɔ, pɩkaɣ-ɖʋ kɔnʋʋ asɛyʋʋ sɔsɔʋ. (Aduwa 16:25) Ɛlɛ ye ɖe-wezuu caɣʋ ɛlakɩ nɔɔ kʋɖʋmaɣ nɛ Ɛsɔ paɣtʋ kila yɔ, ɖɔ-tɔm kɛdɩɣnɩ Ɛsɔ nɛ ɖɩnɩɩ leleŋ ɖe-wezuu caɣʋ taa nɛ pɩkɩlɩ.—Izaayii 48:17, 18.
Iwolo pɩ-yɔɔ nɛ ɩcalɩnɩ ñɩnʋʋ Ɛsɔ Kewiyaɣ nɛ e-siɣsiɣ wɛtʋ. Yesu paɣ-ɖʋ se nabɛyɛ pɩzɩɣ pepeɣziɣ pa-tɩ nɛ pamaɣzɩɣ se ye pɛwɛnɩ liidiye sakɩyɛ yɔ, pɩkandɩyɩɣ pɔ-yɔɔ. Nabɛyɛ hɔɔlʋʋ taa lɛ, ɛzɩma pɔcɔŋnɩ po-tomnaɣ yɔɔ kɩcɛyɩm ɖeɖe nɛ pɔ-hɔŋ yɔɔ yɔ pʋyɔɔ lɛ, pɩpɩzɩɣ nɛ pɩɖɔkɩnɩ-wɛ siŋŋ nɛ halɩ paatasɩɣ wɛnʋʋ alɩwaatʋ se pañɩnɩ Ɛsɔ Kewiyaɣ.—Maatiyee 6:19-21, 25-32.
Ɛlɛ Yesu ha-ɖʋ lidaʋ se mba paɖʋʋ nesi Ɛsɔ Kewiyaɣ yɔ, pakaɣ wɛnʋʋ mbʋ pɩtɛɖɩɣ-wɛ yɔ lɛɛlɛɛyɔ nɛ pɛtɛ pehiɣ tamtam wazasɩ cee wayɩ.—Maatiyee 6:33.
Toovenim taa lɛ, kajalaɣ pɩnzɩ mɩnʋʋ taa Yesu tɔmkpɛlɩkɩyaa kaacalɩnɩ ñɩnʋʋ Ɛsɔ Kewiyaɣ nɛ e-siɣsiɣ wɛtʋ; ɛlɛ wɩzasɩ nɛ kʋñɔmɩŋ pataatɛ alɩwaatʋ ndʋ tɩ-taa. Paa mbʋ yɔ, Ɛsɔ kaakandɩyɩ pɔ-yɔɔ. Ɛzɩma tɩyɛ?
Pe-wezuu caɣʋ kaalabɩ nɔɔ kʋɖʋmaɣ nɛ Ɛsɔ paɣtʋ kila, nɛ mbʋ kandɩyɩnɩ pɔ-yɔɔ nɛ kala wena atalɩ ɛyaa mba pataañaŋ Ɛsɔ yɔ atɩtalɩ-wɛ. Paawɛnɩ tisuu siŋŋ Ɛsɔ Kewiyaɣ yɔɔ, nɛ mbʋ sɩnɩnɩ-wɛ nɛ palʋbɩnɩ kala sɔsɔna wena pakataɣ yɔ. Nɛ Ɛsɔ ha-wɛ “ɖoŋ weyi ɩcɛzɩ ɛyʋ ɖoŋ yɔ” se papɩzɩ nɛ pɔɖɔkɩ pa-tɩ kala ana a-taa.—2 Kɔrɛntɩ mba 4:7-9.
ƐSƆ KEWIYAƔ ŊKAƔ ÑƖNƲƲ KAJALAƔ ÐEÐE NA?
Lɔŋ weyi Yesu tasaa se ɖɩcalɩnɩ ñɩnʋʋ Ɛsɔ Kewiyaɣ yɔ, kajalaɣ pɩnzɩ mɩnʋʋ taa Krɩstʋ ñɩma labɩnɩ-ɩ tʋmɩyɛ. Posusi laŋhɛzɩyɛ tɔm ɛjaɖɛ hɔɔlɩŋ weyi ɩ-taa paawɛɛ yɔ. (Koloosi mba 1:23) Nabɛyɛ wɛɛ nɛ palakɩ tʋmɩyɛ nɖɩ sɔnɔ?
Ɛɛɛ! Yehowa Aseɣɖe Tɩnaa ɖiɣzinaa se alɩwaatʋ ndʋ tɩkazaa se paɖɩzɩ ɛjaɖɛ ɖɩnɛ yɔ tɩtɩɖɔɔ. Nɛ pʋyɔɔ lɛ, peɖiɣni labʋ po-ɖoŋ ɖeɖe se pɔɖɔ Yesu paɣtʋ tʋnɛ tɩ-yɔɔ: “Kewiyaɣ tɔm kɩbandʋ tʋnɛ, pakaɣ-tʋ susuu tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe, nɛ ɖɩnɛ ɛlɛ ɛjaɖɛ tɛm kaɣ kɔm.”—Maatiyee 24:14.
Ɛsɔ Kewiyaɣ ŋkaɣ ñɩnʋʋ kajalaɣ ɖeɖe na? Ðiseɣtiɣ-ŋ se ŋmaɣzɩnɩ kajalaɣ pɩnzɩ mɩnʋʋ taa ɛyaa mba paawɛ Beeree, Masedonii egeetiye taa yɔ. Alɩwaatʋ ndʋ apostoloo Pɔɔlɩ heyi-wɛ Ɛsɔ Kewiyaɣ yɔɔ tɔm kɩbandʋ yɔ, petisaa nɛ pamʋ-tʋ nɛ “laŋɩyɛ pilim.” Pʋwayɩ lɛ, “patazɩ Masɩ taa camɩyɛ” se pana se tɔm ndʋ peheyi-wɛ yɔ, tɩlabɩ nɔɔ kʋɖʋmaɣ nɛ Masɩ na. Piyeba nɛ papaɣzɩ ɖɔm tɔm ndʋ pɛkpɛlɩkaɣ yɔ tɩ-yɔɔ.—Tʋma Labʋ 17:11, 12.
Ña ɖɔɖɔ ŋpɩzɩɣ nɛ ŋmaɣzɩnɩ-wɛ. Ye ŋcalɩɣnɩ ñɩnʋʋ Ɛsɔ Kewiyaɣ nɛ e-siɣsiɣ wɛtʋ yɔ, piyeki nɛ ŋhiɣ ɖɩjɔzɩyɛ nɛ Ɛsɔ kandɩyɩ ñɔ-yɔɔ lɛɛlɛɛyɔ; nɛ cee wayɩ lɛ, ŋhiɣ laŋhɛzɩyɛ nɛ pɛɛyɛ.