Taasu yem, ɛlɛ sɩnɩ koobu weyi ña nɛ ɩ ɩlɩ tɔm susuu yɔ
1. Ye ɖa nɛ koobu nɔɔyʋ ɖɩlɩ tɔm susuu yɔ, ɛzɩma ɖɩpɩzɩɣ nɛ ɖɩmaɣzɩnɩ Pɔɔlɩ wɛtʋ?
1 Apostoloo Pɔɔlɩ kpakaɣ alɩwaatʋ ndʋ ɛ nɛ lalaa pɛwɛɣ yɔ ɛzɩ alɩwaatʋ ndʋ tɩhaɣ-ɩ waɖɛ se ɛ nɛ wɛ pakpazɩ ɖama ɖoŋ yɔ. (Rom. 1:12) Ye ña nɛ koobu nɔɔyʋ ɩlɩ tɔm susuu yɔ, ŋñakɩ pana se ŋkpaɣ alɩwaatʋ ndʋ nɛ ŋkpazɩ-ɩ ɖoŋ na? Ɛzɩ mbʋ ŋŋsum yem lɛ, pɩɩkɩlɩɣ ɖeu se ŋkɛdɩɣ ña-taabalʋ mbʋ pɩsɩnɩ-ŋ nɛ ŋpɩsɩ tɔm susuyu kɩbanʋ yɔ yaa we?
2. Ɛbɛ ɖɩpɩzɩɣ ɖɩla nɛ ɖɩsɩnɩ ɖa nɛ koobu weyi ɖɩlɩ tɔm susuu yɔ nɛ sɔɔndʋ ɛtaakpa-ɩ? Ɛbɛ yɔɔ pɩcɛyaa se ɖɩsɩnɩ-ɩ mbʋ?
2 Sɩnɩ lalaa nɛ sɔɔndʋ ɛtaakpa-wɛ: Koobiya nabɛyɛ woki se posusuu tɔm lɛ, sɔɔndʋ kpaɣ-wɛ nɛ papɩzɩɣ nɛ pana sɔɔndʋ ndʋ pɛ-ɛzɩdaa yaa pɔ-yɔɔdaɣ taa. Ye ɖɩsaŋ-wɛ yɔ, ɖɩpɩzɩɣ ɖiyele nɛ sɔɔndʋ ɛtaatasɩ-wɛ kpaʋ. Ɛlɛ, ɛbɛ nɛ ɛbɛ ɖɩpɩzɩɣ ɖɩla nɛ ɖɩsɩnɩ lalaa nɛ sɔɔndʋ ɛtaakpa-wɛ? Egeetiye yɔɔ cɔnɩyʋ nɔɔyʋ yɔɔdaa se ɛ nɛ nɔɔyʋ palɩɣ lɛ, eheyiɣ-i ɛzɩma sɔɔndʋ kpaɣ-ɩ yɔ nɛ ɛzɩma ɛtɩmɩɣ se Ɛsɔ ɛsɩnɩ-ɩ nɛ ɛwa sɔɔndʋ ndʋ yɔ, pɩ-tɔm. Koobu nɔɔyʋ ñɔyɔɔdaa se mbʋ pɩsɩɣnɩ-ɩ se ɛwa sɔɔndʋ yɔ, mbʋ yɔ: “Manpaɣzɩɣnɩ amʋʋya. Nabʋyʋ taa lɛ, pɩmʋnaa se ɖɩtɩmɩ pʋcɔ nɛ ɖɩpɩzɩ nɛ ɖɩmʋʋyɩ mbʋ.” Nabʋyʋ ñasɩnɩ-ŋ nɛ sɔɔndʋ ɛɛtasɩɣ-ŋ kpaʋ tɔm susuu taa? Kɛdɩ pɩ-tɔm koobu weyi ña nɛ ɩlɩɣ se isusi tɔm yɔ.
3. Ɛbɛ tɔm ɖɩpɩzɩɣ nɛ ɖiheyi koobu weyi ɖa nɛ ɩ ɖɩlɩ tɔm susuu yɔ nɛ pɩsɩnɩ-ɩ nɛ ɛwɛɛ niye tɔm susuu taa nɛ pɩkɩlɩ?
3 Kɛdɩ lalaa ɛzɩma ŋsusuu tɔm yɔ: Wiɖiyi ŋyɔɔdɩ tɔm natʋyʋ yaa ŋpɔzɩ tɔm natʋyʋ nɛ pitukuni mbʋ pɩlabɩ mi-kooka taa yɔ, nɛ pɩsɩnɩ-ŋ nɛ ña nɛ ɛyaa ɩpaɣzɩ faawɩyɛ labʋ camɩyɛ nɛ pɩkɩlɩ? Yaa wiɖiyi ŋsɔzɩ tɔm natʋyʋ pazɩ tɔm ndʋ pamawa se ɖɩlakɩnɩ faawɩyɛ yɔ, tɩ-yɔɔ, nɛ pɩla ɖeu nɛ pɩkɩlɩ? Pʋbʋ heyi-tʋ koobu weyi ña nɛ ɩlɩ tɔm susuu yɔ. (Aduwa 27:17) Alɩwaatʋ ndʋ iiwoki pɩsɩ nɛ ŋna-ɩ nakʋyʋ labʋ lɛ, ŋpɩzɩɣ nɛ ŋheyi ña-taabalʋ mbʋ ŋɖʋwa se ŋkaɣ labʋ nɛ ɛzɩma ŋsɔɔlaa se ŋlabɩ-pʋ yɔ. Ye ɩkpɛlɩkɩnɩ nɔɔyʋ Bibl nɛ pɩtɛ yɔ, ŋpɩzɩɣ nɛ ŋheyi-i mbʋ pʋyɔɔ ŋñɩɣ hɔɔlʋʋ nakʋyʋ yɔɔ yaa mayaɣ nakɛyɛ yɔɔ niye yaa mbʋ pʋyɔɔ ŋlabɩnɩ tʋmɩyɛ tɔm wɩlʋʋ lɛɣtʋ natʋyʋ se pɩsɩnɩ Bibl kpɛlɩkɩyʋ ɛnʋ yɔ.
4. Ɛbɛ yɔɔ pɩmʋnaa se ɖɩñaɣ pana nɛ ɖɩsɩnɩ koobiya mba ɖa nɛ wɛ ɖɩlɩɣ tɔm susuu yɔ?
4 Kajalaɣ pɩnzɩ mɩnʋʋ taa tɔm susuyaa taañɩnɩɣ se pasɩnɩ mba patɩkɛ koobiya yɔ, pe-yeke na. Paasɩma ɖɔɖɔ se pɩcɛyaa se peseɣti ɖama nɛ pakpazɩ ɖama ɖoŋ. (Tʋma Labʋ 11:23; 15:32) Apostoloo Pɔɔlɩ kaafalɩsɩ evebu weyi payaɣ-ɩ se Timootee nɛ pɩtɛ lɛ, eseɣti-i se ɛkɛdɩɣ lalaa mbʋ ɛkpɛlɩkaa yɔ, pɩ-tɔm. (2 Tim. 2:2) Ye ɖɩñakɩ pana nɛ ɖɩsɩɣnɩ ɖa nɛ koobiya mba ɖɩlɩɣ nɛ ɖisusuu tɔm yɔ, ɖiyeki nɛ pɛwɛɛ niye tɔm susuu taa nɛ pɩkɩlɩ nɛ pa-taa leleŋ paɣlɩ; piyeki ɖɔɖɔ nɛ ɖɔ-tɔm kɛdɩnɩ ɖa-Caa weyi ɛwɛ ɛsɔdaa yɔ.—Ebree 13:15, 16.