Fenaɣ Fenaɣ takayɩsɩ mʋyaa: Ða nɛ wɛ ɖɩpɩzɩɣ nɛ ɖɩpaɣzɩ Bibl kpɛlɩkʋʋ
1. Ɛbɛ yɔɔ Yehowa ɛgbɛyɛ wɛɛ nɛ ɖiseɣtiɣ tɔm susuyaa ɖooo pɩnaɣ se powokini fenaɣ fenaɣ takayɩsɩ mba pɔsɔɔlɩ sɩ-kalʋʋ yɔ ɖoŋ ɖoŋ?
1 Ɛyaa sakɩyɛ tɩsɔɔlɩ se ɖa nɛ wɛ ɖɩkpɛlɩkɩ Bibl, ɛlɛ pɔsɔɔlɩ ɖa-takayɩsɩ kalʋʋ. Pʋyɔɔ lɛ, Yehowa ɛgbɛyɛ wɛɛ nɛ ɖiseɣtiɣ tɔm susuyaa ɖooo pɩnaɣ se powokini fenaɣ fenaɣ takayɩsɩ mba pɔsɔɔlɩ sɩ-kalʋʋ yɔ ɖoŋ ɖoŋ. Ða-takayɩsɩ kalʋʋ ɖoŋ ɖoŋ sɩnɩ ɛyaa nabɛyɛ nɛ papaɣzɩ Ɛsɔtɔm sɔɔlʋʋ. (1 Pɩy. 2:2) Pʋwayɩ lɛ, mbʋ pakalɩ takayɩsɩ nzɩ sɩ-taa yɔ, pɩ-taa nabʋyʋ pɩzɩɣ nɛ pitukuni-wɛ nɛ petisi se pɛkpɛlɩkɩɣ Bibl.
2. Ɛzɩma ɖɩpɩzɩɣ nɛ ɖɩmɩzɩ lɩm mba pɔsɔɔlɩ fenaɣ fenaɣ takayɩsɩ kalʋʋ yɔ?
2 ‘Mɩzɩ mbʋ ŋɖuwa yɔ lɩm’: Taacɛlɩ ɛyʋ fenaɣ fenaɣ takayɩsɩ yem nɛ ŋkpaɣ nʋmɔʋ nɛ ŋɖɛɛ, ɛlɛ pɩwɛɛ se ŋñaɣ pana nɛ taabalɩyɛ wɛɛ ña nɛ ɩ mɩ-hɛkʋ taa nɛ ña nɛ ɩ ɩpaɣzɩ kɛdaɣ. Pɩkaɣ-ŋ sɩnʋʋ nɛ ŋtɩlɩ-ɩ camɩyɛ, ŋtɩlɩ mbʋ pɩkɛdɩɣnɩ-ɩ yɔ nɛ ŋtɩlɩ ɖɔɖɔ mbʋ pɩ-yɔɔ etisiɣ yɔ; mbʋ yekina nɛ ŋpɩzɩ nɛ ŋyɔɔdɩnɩ-ɩ nɛ lɛɣtʋ. (Aduwa 16:23) Ŋŋwoki se ŋlakɩ paa pɩsɩ nɛ ŋna-ɩ ŋgʋ lɛ, ñaɣ pana nɛ ŋñɔɔzɩ ña-tɩ camɩyɛ. Ye pɩlakɩ yɔ, ŋpɩzɩɣ nɛ ŋñɩɣ niye takayɩsɩ nzɩ ŋŋcɛlɩ-ɩ yɔ, sɩ-taa tɔm natʋyʋ yɔɔ nɛ ŋkalɩ Bibl mayaɣ ŋga kalabɩ nɔɔ kʋyʋmaɣ nɛ tɔm ndʋ yɔ; pɩsɩɣnɩ-ŋ nɛ ŋmɩzɩ lɩm toovenim tɔm ndʋ ŋɖu ɛ-laŋɩyɛ taa yɔ. (1 Kɔr. 3:6) Ma takayaɣ nakɛyɛ taa kɩyakʋ ŋgʋ ŋlabɩ pɩsɩ nɛ ŋna-ɩ yɔ, takayɩsɩ nzɩ ŋcɛlaa yɔ, tɔm ndʋ ɩyɔɔdaa yɔ nɛ Bibl masɩ nzɩ sɩ-yɔɔ ɩlabɩ faawɩyɛ yɔ.
3. Tam ɛzɩma pɩpɔzaa se ɖɩpɩsɩ nɛ ɖɩna mba pɔsɔɔlɩ fenaɣ fenaɣ takayɩsɩ mʋʋ yɔ?
3 Tam ɛzɩma pɩpɔzaa se ɖɩpɩsɩ? Paa fenaɣ ŋga lɛ, ŋpɩzɩɣ nɛ ŋpɩsɩ tam kʋyʋm nɛ ŋcɛlɩ fenaɣ fenaɣ takayɩsɩ kɩfasɩ mba pɔsɔɔlɩ sɩ-kalʋʋ yɔ. Ɛlɛ ye ña-alɩwaatʋ ɛhaɣ-ŋ nʋmɔʋ nɛ ŋmaɣzɩɣ se Ɛsɔtɔm kɛdɩnɩ ɛyʋ ɛnʋ yɔ, ŋpɩzɩɣ nɛ ŋwolo ɛ-cɔlɔ ɖoŋ ɖoŋ nɛ pɩkɩlɩ. Ye ŋcɛlɩ ɛyʋ nɔɔyʋ fenaɣ fenaɣ takayɩsɩ nɛ pɩla kpɩtaʋ yaa kpɩtaŋ naalɛ mbʋ yɔ kɔyɔ, ŋpɩzɩɣ nɛ ŋpɩsɩ nɛ ŋheyi-i se: “Mɔnkɔm se mawɩlɩ-ŋ tɔm kɩbandʋ natʋyʋ takayɩsɩ nzɩ mɛncɛlɩɣ ɖeɖe wayɩ yɔ, sɩ-taa.” Ye ŋlakɩ mbʋ yɔ, piseɣtiɣ-i nɛ ɛsɔɔlɩ se ɛkalɩɣ takayaɣ taa ñʋʋ ŋgʋ ŋwɩlɩ-ɩ yɔ. Ye ɛtɛm ñʋʋ ŋgʋ kalʋʋ yɔ, ŋpɩzɩɣ nɛ ŋpɔzɩ-ɩ ndʋ ɛmaɣzɩɣ kɩ-yɔɔ yɔ, nɛ ña nɛ ɩ ɩla kɩ-yɔɔ kɛdaɣ pazɩ. Ye ɛyʋ ɛnʋ ɛsɔɔlɩ ɖa-takayɩsɩ kalʋʋ yɔ, ŋpɩzɩɣ nɛ ŋpɩsɩ nɛ ŋwɩlɩ-ɩ traktɩ, hatʋ cabɩ takayaɣ yaa takayaɣ sɔsɔɔ ŋga pɔtɔm se ɖɩha fenaɣ ŋga ka-taa yɔ.
4. Nabʋyʋ taa lɛ, ɛbɛ ɖɩpɩzɩɣ ɖɩla nɛ ɖɩtɩlɩ se mba pɔsɔɔlɩ fenaɣ fenaɣ takayɩsɩ mʋʋ yɔ, papɩzɩɣ nɛ petisi nɛ pɛkpɛlɩkɩ Bibl?
4 Taayele se ɖɩɣdʋ ɛpɔzɩnɩ-ŋ se ŋwolo nɛ ña nɛ ɩ ɩkpɛlɩkɩ Bibl. Ña-maɣmaɣ pʋpɔzaa se ŋheyi-i tʋ. Paa ŋŋtɛm yɔɔdʋʋ nɛ pʋdʋ ɛnʋ ekizi yɔ, ŋpɩzɩɣ nɛ ŋwɩlɩ-ɩ Feŋuu Tilimiye ñʋʋ ŋgʋ kɩtɔŋ se “Pocosi Bibl taa tɔm yɔɔ” yɔ nɛ ŋna se etisiɣ nɛ ña nɛ ɩ ɩla kɛdaɣ na. Halɩ pɩtɩla ña nɛ ɩ ɩpɩzɩɣ nɛ ɩsɩŋ nɔnɔɔ taa maɣmaɣ nɛ ɩpaɣzɩ Bibl kpɛlɩkʋʋ. Ɛlɛ paa etitisi se ña nɛ ɩ ɩpaɣzɩ kpɛlɩkʋʋ yɔ, pɩfɛyɩ se ŋyebi-i fenaɣ fenaɣ takayɩsɩ wonuu; pɩɩsɩnɩ-ɩ nɛ etisi wiɖiyi nɛ ɛkpɛlɩkɩ Bibl.