Ŋgee yaʋ takayɩsɩ tayʋʋ
1. Alɩwaatʋ ndʋ ɖɩkaɣ paɣzʋʋ 2014 ageeta kigbeɣluu tɛ yaʋ takayɩsɩ tayʋʋ?
1 Ye ŋcaɣ se ŋla tɔɔnaɣ kɩbaŋa nakɛyɛ nɛ ña nɛ ñɔ-hɔʋ taa ñɩma yaa ña-taabalaa ɩtɔɔ nɛ ka-labʋ pɔzʋʋ tʋmɩyɛ nɛ liidiye sakɩyɛ yɔ, paa pɩɩla ɛzɩma yɔ, ña-taa lakɩ leleŋ alɩwaatʋ ndʋ ŋyaɣ ɛyaa mba se pɔkɔɔ ka-ɖɩdɔɔyɛ yɔ. Mbʋ ɖɔɖɔ pakpaɣ alɩwaatʋ sakɩyɛ nɛ pala tʋma ndɩ ndɩ nɛ pɔñɔɔzɩnɩ fezuu taa kazandʋ ndʋ ɖɩkaɣ tɔɔʋ ageeta kigbeɣliŋ nɛ ajɛɛ kigbeɣliŋ weyi pakaɣ labʋ pɩnaɣ 2014 taa yɔ. Kpɩtaŋ naadozo nɛ pʋcɔ nɛ ɖa-ageeta kigbeɣluu talɩ lɛ, ɖɩkaɣ wɛnʋʋ waɖɛ se ɖɩtayɩ yaʋ takayɩsɩ nɛ ɖɩyaa ɛyaa se pɔkɔɔ kigbeɣluu ŋgʋ kɩ-taa. Ɛbɛ kaɣ-ɖʋ sɩnʋʋ nɛ ɖɩla tʋmɩyɛ nɖɩ nɛ kpekpeka nɛ ɖɩpɩzɩ nɛ ɖɩyaa ɛyaa sakɩyɛ?
2. Ɛbɛ kaɣ-ɖʋ seɣtuu nɛ ɖɩpɩzɩ nɛ ɖɩɖʋ nesi nɛ ɖo-ɖoŋ tɩŋa yaʋ takayɩsɩ tayʋʋ tʋmɩyɛ?
2 Yehowa tɩŋɩɣnɩ ageeta kigbeɣliŋ yɔɔ nɛ ɛlakɩ-ɖʋ fezuu taa kazandʋ ndʋ yɔ, ye ɖɩmaɣzɩɣ ɛzɩma tɩwazɩɣ ɖa-maɣmaɣ yɔ, pɩ-yɔɔ yɔ, pɩkaɣ-ɖʋ seɣtuu nɛ ɖɩɖʋ nesi nɛ ɖo-ɖoŋ tɩŋa yaʋ takayɩsɩ tayʋʋ tʋmɩyɛ ɖɩnɛ. (Iza. 65:13, 14) Pɩwɛɛ se ɖɩtɔzɩ ɖɔɖɔ se paa pɩnaɣ ŋga lɛ, yaʋ takayɩsɩ tayʋʋ tʋmɩyɛ ɖɩnɛ ɖɩlʋlʋʋ pee kɩbana pɩdɩɩfɛyɩ. Ɛyaa mba ɖɩyaɣ yɔ, ɖa nɛ pa-taa nabɛyɛ ɖɩkaɣnɩ-kʋ wobu. Paa ɛyaa ɛzɩma iwobi kigbeɣluu ŋgʋ yɔ, ɖɩtaasɔɔ se ye ɖɩlabɩ tʋmɩyɛ nɖɩ nɛ kpekpeka yɔ, pɩsaŋ Yehowa nɛ pɩwɩlɩ ɖɔɖɔ ɛ-camɩyɛ lakasɩ.—Keɣa 144:3, 7; Natʋ 22:17.
3. Ɛzɩma ɖɩkaɣ tayʋʋ yaʋ takayɩsɩ?
3 Ɛgbɛyɛ taa ɛzʋtʋyaa pɩwɛɛ se paɖʋ ɖʋtʋ ndʋ tɩ-yɔɔ pɛ-ɛgbɛyɛ taa ñɩma kaɣ tɩŋnʋʋ nɛ patayɩ yaʋ takayɩsɩ pe-egeetiye kpeekpe taa yɔ. Mba pɩwɛɛ ɖɔɖɔ se pala lɩmaɣza nɛ pana se pɩwɛ ɖeu se pasɩɩ yaʋ takayɩsɩ ɖɩsɩ nzɩ sɩ-taa nɔɔyʋ fɛyɩ yɔ, yaa paha-sɩ alɩwaatʋ ndʋ palakɩ samaɣ taa tɔm susuu tʋmɩyɛ yɔ. Ye pɩsaŋ yɔ, mazasɩ nɛ kujukasɩ lɛ, papɩzɩɣ nɛ pɛkpɛndɩ yaʋ takayɩsɩ nɛ fenaɣ fenaɣ takayɩsɩ nɛ paha. Ye fenaɣ tɛ kajalaɣ mazaɣ ɛtʋʋzɩnɩ yaʋ takayɩsɩ tayʋʋ alɩwaatʋ yɔ, pɩwɛɣ ɖeu se ɖɛ-ɛzɩyɛ ɛsɛɛnɩ yaʋ takayɩsɩ tayʋʋ nɛ pɩkɩlɩ se ɖɩpaɣzɩɣnɩ ɛyaa Bibl kpɛlɩkʋʋ. Yaʋ takayɩsɩ nzɩ sɩ-tʋmɩyɛ tɛŋ lɛ, ɖa-taa kaɣ labʋ leleŋ siŋŋ se ɖɩkpaɣ ɖo-ɖoŋ tɩŋa nɛ ɖɩɖʋnɩ-ɖɩ nesi nɛ ɖɩyaa ɛyaa se pɔkɔɔ fezuu taa kazandʋ ndʋ Yehowa laba yɔ, tɩ-taa.