Cɛlɩ-wɛ yaʋ takayaɣ kpaagbaa
1. Ɛzɩmtaa kigbeɣluu sɔsɔʋ ŋgee tɔm susuu kaɣ paɣzʋʋ?
1 Ye ŋcaɣ tɔɔnaɣ kɩbaŋa nakɛyɛ labʋ se ñɔ-hɔʋ taa mba yaa ña-taabalaa ɩtɔɔ, nɛ tɔɔnaɣ ŋga kɔpɔzʋʋ pana ñaɣʋ nɛ liidiye sakɩyɛ yɔ, ña-taa wɛɣ leleŋ alɩwaatʋ ndʋ ŋpaɣzɩɣ ɛyaa mba yaʋ se pɔkɔɔ nɛ pɔtɔɔ yɔ. Mbʋ ɖɔɖɔ, palabɩ tʋmɩyɛ sakɩyɛ pʋcɔ nɛ pɔñɔɔzɩ fezuu taa kazandʋ ndʋ pakaɣ labʋ ɖe-kigbeɣluu sɔsɔʋ taa yɔ. Pɩkazɩɣ kpɩtaŋ naadozo se pala ɖe-kigbeɣluu sɔsɔʋ ŋgʋ lɛ, Yehowa kaɣ-ɖʋ haʋ waɖɛ se ɖɩyaa ɛyaa lalaa nɛ pɔkɔɔ kigbeɣluu ŋgʋ kɩ-taa. Ɛbɛ kaɣ-ɖʋ sɩnʋʋ nɛ ɖɩtayɩ yaʋ takayɩsɩ nzɩ nɛ taa leleŋ?
2. Ɛbɛ kaɣ-ɖʋ seɣtuu nɛ ɖɩɖʋ nesi kigbeɣluu tɛ ŋgee tɔm susuu?
2 Ye ɖɩmaɣzɩɣ ɛzɩma Yehowa wɩlɩtʋ kɩbandʋ kaɣ ɖa-maɣmaɣ wazʋʋ kigbeɣluu ŋgʋ kɩ-taa yɔ, pɩ-yɔɔ yɔ, pɩkaɣ-ɖʋ seɣtuu nɛ ɖɩɖʋ nesi tɔm susuu mbʋ sakɩyɛ. (Iz. 65:13, 14) Ðɩtaasɔɔ ɖɔɖɔ se ɖɛ-tɛ pɩnaɣ pɩnaɣ ŋgee tɔm susuu lʋlʋʋ pee kɩbana (Cɔnɩ aɖakaɣ “Pɩlʋlʋʋ pee kɩbana.”) Ɛyaa mba ɖɩkaɣ yaʋ yɔ, pa-taa nabɛyɛ kaɣ kɔm kigbeɣluu taa ɛlɛ lalaa ñaakaɣ kɔm. Ɛlɛ mba ɖisusuu-wɛ tɔm yɔ, paa patɩɩlakɩ we yɔ, ɖɩtɩlɩ se pana wena ɖɩkaɣ ñaɣʋ ŋgee tɔm susuu alɩwaatʋ ndʋ tɩ-taa yɔ, pɩɖʋʋ Yehowa hɩɖɛ nɛ pɩwɩlɩɣ ɛ-camɩyɛ lakasɩ.—Keɣa 144:3, 7; Natʋ 22:17.
3. Ɛzɩma pakaɣ tayʋʋ yaʋ takayɩsɩ?
3 Paa ɛzʋtʋyaa ɛgbɛyɛ nɖɩ pɩwɛɛ se ɖɩɖʋ ɛzɩma ɖɩñɩnɩɣ se posusi tɔm ɖi-kooka tɩŋa taa yɔ, pʋmʋnaa se ɖɩmaɣzɩ nɛ ɖɩna se koobiya kaɣ sɩʋ yaʋ takayɩsɩ mba pɛfɛyɩ ɖɩsɩ yɔ pɛ-tɛ yaa paasɩɣ; yaa posusi ɛyaa tɔm samaɣ taa yaa pataasusi. Ye pɩlakɩ yɔ, mazasɩ nɛ kujukasɩ wiye lɛ, papɩzɩɣ pɛkpɛndɩ fenaɣ fenaɣ takayɩsɩ nɛ yaʋ takayaɣ kpaagbaa nɛ paha. Ŋgee tɔm susuu mbʋ pɩtɛŋ lɛ, ɖa-taa kaɣ labʋ leleŋ se ɖɩɖʋ nesi tʋmɩyɛ nɖɩ nɛ kpekpeka; pɩtasɩ lɛ, ɖa-taa wɛɣ leleŋ se ɛyaa mba ɖɩyawa yɔ, pa-taa sakɩyɛ kɔm fezuu taa kazandʋ ndʋ Yehowa ñɔɔzaa nɛ ɛsɩɩ-ɖʋ yɔ, tɩ-taa!