Traktɩwaa kɩfama!
1. Tɔm susuu wondu ndʋ palaba nɛ tɩwɛɛnɩ wɛtʋ kɩfatʋ?
1 Palɩzɩ traktɩwaa kɩfama kagbanzɩ “Ɛsɔtɔm kɛ toovenim tɔm” ageeta kigbeɣluu taa pɩnaɣ 2013 taa. Pɩtasɩ lɛ, palɩzɩ ɖɔɖɔ Kewiyaɣ tɔm No. 38, kɩ-ñʋʋ yɔ: “Wiɖiyi sɩɖaa feŋ nɛ patasɩ wezuu caɣʋ na?” Traktɩwaa loɖo waa mba palabɩ-wɛ labʋ mbʋ yɔ, pɩwɛ ɖeu pɩdɩɩfɛyɩ. Ɛbɛ yɔɔ palabɩ-wɛ mbʋ? Ðɩɩhaɣ-wɛ kpaɣ ɖɩɣa nɛ ŋwolo ɖɩɣa lɛ, ɛzɩma ɖɩpɩzɩɣ ɖiyele nɛ traktɩwaa mba pɛ-wɛtʋ kɩfatʋ ndʋ tɩwazɩ-ɖʋ?
2. Ɛbɛ yɔɔ palabɩ traktɩwaa nɛ pɛwɛɛnɩ wɛtʋ kɩfatʋ?
2 Ɛbɛ yɔɔ palabɩ-wɛ nɛ wɛtʋ kɩfatʋ ndʋ?: Pʋcɔ nɛ ɖɩlɩzɩ aseɣɖe kpaɣ ɖɩɣa nɛ ŋwolo ɖɩɣa nɛ pɩɖɔ camɩyɛ lɛ, ɖoŋ ɖoŋ lɛ pɩwɛɛ se ɖɩla wondu naanza tʋnɛ: (1) Ŋpɔzʋʋ tɔm ɖɩɣdʋ nɛ eheyi-ŋ ɛ-lɩmaɣza nɛ faawɩyɛ paɣzɩ. (2) Ŋkalɩ-ɩ Bibl taa mayaɣ nakɛyɛ. (3) Ŋha ɖɩɣdʋ takayaɣ nakɛyɛ se ɛkalɩ. (4) Ŋpɔzɩ tɔm se cee wayɩ ŋpɩsɩɣ lɛ, ŋcosi tɩ-yɔɔ, nɛ ɩla ɖʋtʋ se ŋpɩsɩɣ cee wayɩ nɛ ŋna-ɩ. Traktɩwaa wɛtʋ ndʋ tɩsɩɣnɩ-ɖʋ se ɖɩla wondu ndʋ tɩ-naanza kɛlɛʋ.
3. Ɛzɩma ɖɩpɩzɩɣ nɛ ɖɩha traktɩwaa kɩfama panɛ tɔm susuu taa?
3 Ɛzɩma pɩwɛɛ se ɖɩlabɩnɩ-wɛ tʋmɩyɛ?: (1) Ŋsɛɣ ɖɩɣdʋ nɛ pɩtɛ lɛ, ŋwɩlɩ-ɩ tɔm pɔzʋʋ mbʋ pɩwɛ kajalaɣ hɔɔlʋʋ yɔɔ yɔ, nɛ ŋpɔzɩ nɛ ecosi ndʋ ɛmaɣzɩɣ yɔ. (2) Kuli Traktɩ nɛ ɩtazɩ hɔɔlʋʋ ŋgʋ kɩtɔŋ se “Ndʋ Bibl yɔɔdʋʋ yɔ” kɩ-taa. Ye pɩlakɩ yɔ, kalɩ Bibl mayaɣ ŋga kɛwɛ peeɖe yɔ Bibl taa maɣmaɣ. Ye ɖɩɣdʋ ɛwɛnɩ alɩwaatʋ yɔ, ɩtazɩ hɔɔlʋʋ ŋgʋ kɩtɔŋ se “Ɛzɩma tɔm tʋnɛ tɩpɩzɩɣ nɛ tɩwazɩ-ŋ?” yɔ kɩ-taa. (3) Ha-ɩ traktɩ nɛ ŋseɣti-i se ɛkalɩ-kʋ, ɛkɔŋ nɛ ehiɣ alɩwaatʋ pazɩ lɛ. (4) Pʋcɔ nɛ ŋɖɛɛ lɛ, wɩlɩ-ɩ tɔm pɔzʋʋ mbʋ pɩwɛ hɔɔlʋʋ ŋgʋ kɩtɔŋ se “maɣzɩɣ tɔm tʋnɛ tɩ-yɔɔ” yɔ, kɩ-tɛɛ nɛ ɩla ɖʋtʋ nɛ ŋpɩsɩ pʋwayɩ nɛ ŋkpaɣ Bibl nɛ ŋcosi tɩ-yɔɔ.
4. Ɛzɩma ɖɩpɩzɩɣ nɛ ɖɩlabɩnɩ traktɩwaa kɩfama panɛ tʋmɩyɛ pɩsɩ nɛ ŋna-ɩ waa labʋ taa?
4 Pɩsɩ nɛ ŋna-ɩ labʋ ñɛwɛɛ kɛlɛʋ ɖɔɖɔ. Tɩŋnɩ masɩ yɔɔ nɛ ŋcosi tɔm pɔzʋʋ mbʋ ŋŋwɩlɩ-ɩ kɛdɛzaɣ ɖeɖe evemiye nɖɩ ŋŋcalɩ wobu yɔ, pɩ-yɔɔ. Pʋcɔ nɛ ŋɖɛɛ lɛ, wɩlɩ ɖɩɣdʋ Laŋhɛzɩyɛ Tɔm hatʋ cabɩ takayaɣ kɩlɛmʋʋ nɛ ŋwɩlɩ-ɩ ɖɔɖɔ takayaɣ nɛ tɔm kɩkpɛlɩkɩtʋ ndʋ pɔyɔɔdɩ peeɖe se pɛkpɛlɩkɩ nɛ patɩlɩ nɛ pɩkɩlɩ yɔ, nɛ ŋha-ɩ ɖɔɖɔ hatʋ cabɩ takayaɣ ŋga. Ye etisaa se ŋpɩsɩ cee wayɩ yɔ, ŋpɩsɩ nɛ ɩpaɣzɩ takayaɣ ŋga kpɛlɩkʋʋ. Ŋhiɣ Bibl kpɛlɩkɩyʋ lɛ mbʋ yɔ! Yaa ɛzɩ ŋŋha-ɩ hatʋ cabɩ takayaɣ lɛ, ŋpɩzɩɣ nɛ ŋcɛlɩ-ɩ traktɩ lɛɛkʋ nɛ ña nɛ ɖɩɣdʋ ɩla ɖʋtʋ nɛ ŋpɩsɩ nɛ ɩla kɩ-yɔɔ faawɩyɛ.
5. Wazaɣ ŋga traktɩwaa wɛnɩ tɔm susuu taa?
5 Papaɣzʋʋ traktɩwaa tʋmɩyɛ labɩnʋʋ ɖɔ-tɔm susuu taa yɔ, pɩcɛzɩɣ pɩnzɩ 130 mbʋ yɔ. Pa-paɣlɩka nɛ pɛ-wɛtʋ pɛlɛɣzaa, ɛlɛ pɛkɛ wonuu kɩbaŋʋ ŋgʋ kɩsɩɣnɩ-ɖʋ tɔm susuu taa siŋŋ yɔ. Tɛtɛ ɖɩɩñaɣ pana nɛ traktɩwaa wɛtʋ kɩfatʋ tʋnɛ tɩsɩnɩ-ɖʋ nɛ ɖiyele Bibl wɩlɩtʋ yɛlɩ ɛjaɖɛ kpeekpe yɔɔ.—Aduwa 15:7a.