Video kɩfalʋʋ ŋgʋ kɩsɩɣna se ɖa nɛ ɛyaa ɖɩpaɣzɩ Bibl kpɛlɩkʋʋ yɔ
Video cikpeluu ŋgʋ payaɣ se Ɛbɛ yɔɔ pɩwɛɛ se ɛyʋ ɛkpɛlɩkɩ Bibl? yɔ, kɩwɛɛ nɛ kitukuuni ɛyaa sakɩyɛ jw.org yɔɔ. Palabɩ video ŋgʋ se piseɣti ɛyaa mba ɖɔ-tɔm kɛdɩnaa yɔ nɛ petisi nɛ pɛkpɛlɩkɩ Bibl falaa. Ye ŋwobi lone nɖɩ ɖɩwɛ pɩ-tɛɛ nɛ payaɣ-ɖɩ se “Ŋpɩzɩɣ nɛ ŋpɔzɩ se pɛkpɛlɩkɩnɩ-ŋ Bibl” yaa ŋlɩzɩ foto QR mayaɣ ŋga palɩzɩ traktɩwaa kɩfama wayɩ yɔ yɔ, ŋnaɣ video ŋgʋ. Nʋmɔŋ weyi ɩ-yɔɔ ɖɩpɩzɩɣ nɛ ɖɩtɩŋna nɛ ɖɩlabɩnɩ video ŋgʋ tʋmɩyɛ yɔ, ɛnɩ yɔ:
Ðɩɩlakɩ pɩsɩ nɛ ŋna-ɩ lɛ, ɖɩpɩzɩɣ nɛ ɖɩpɔzɩ ɖɩɣdʋ se “Manpɩzɩɣ nɛ mawɩlɩ-ŋ video cikpeluu nakʋyʋ ŋgʋ kɩwɩlɩɣ ɛzɩma ŋpɩzɩɣ nɛ ŋtɩlɩ tɔm ndʋ Bibl cosuu tɔm ndʋ ŋpɔzʋʋ ña-tɩ yɔ?” Ye etisaa yɔ, ŋwɩlɩ-ɩ video ñɔ-pɔrtaabɩlɩ yɔɔ yaa ɛ-maɣmaɣ ɛ-tɛ ordinatɛɛrɩ yɔɔ.
Ye ɖɩlakɩ alɩwaatʋ fanʋʋ aseɣɖe tʋmɩyɛ nɛ ɖɩha traktɩ kɩfalʋʋ nakʋyʋ yɔ, ɖɩwɩlɩ ɛyʋ ɛnʋ QR mayaɣ nɛ ɖiheyi-i se ɛkpaɣ ɛ-pɔrtaabɩlɩ nɛ ɛlɩzɩ mayaɣ ŋga foto. Kʋnʋmɩŋ sakɩyɛ taa lɛ, QR mayaɣ wokini video ŋgʋ kɩ-yɔɔ kpaagbaa, ye mbʋ ɖɩpɩzɩɣ nɛ ɖɩcɔnɩ video ŋgʋ ɛ-pɔrtaabɩlɩ yɔɔ kpaagbaa.
Heyi ña-tʋmɩyɛ yaa ño-sukuli taa taabalaa nɛ ñɛ-ɛyɩsɩmaa lalaa video ŋgʋ kɩ-tɔm nɛ ŋwɩlɩ-wɛ kʋ. Yaa tɩŋnɩ intɛrnɛɛtɩ yɔɔ nɛ ŋtiyini-wɛ ‘lien’ ŋgʋ kiwokini video ŋgʋ kɩ-yɔɔ yɔ nɛ ŋheyi-wɛ se pañaɣ pana nɛ pɔcɔnɩ-kʋ.
Ye ɖɩlakɩnɩ wonuu kɩfalʋʋ kʋnɛ tʋmɩyɛ yɔ, pɩsɩɣnɩ-ɖʋ nɛ ɖa nɛ ɛyaa sakɩyɛ ɖɩpaɣzɩ Bibl kpɛlɩkʋʋ nɛ ɖɩsɩɣnɩ ɛyaa “mba Ɛsɔ kaañɔɔzaa se pehiɣ tamtam wezuu yɔ.”—Tʋma Labʋ 13:48.