Ðɩwɛɛ niye tɔm susuu taa nɛ pɩkɩlɩ: Fanɩ nabʋyʋ nɛ kɛdaɣ paɣzɩ nɛ ŋlɩzɩ aseɣɖe

Ɛbɛ yɔɔ pɩcɛyaa?: Ðiisusuu tɔm kpaɣ ɖɩɣa nɛ ŋwolo ɖɩɣa lɛ, ɖɩɩnaɣ ɛyaa nabɛyɛ pa-ɖɩsɩ. Ɛlɛ pʋwayɩ lɛ, ɖɩpɩzɩɣ nɛ ɖɩkatɩ-wɛ lɔɔɖa taa, ɖɔkɔtɔ tɛ, alɩwaatʋ ndʋ ɖɩɩhɛzɩɣ sukuli taa yaa tʋmɩyɛ taa lɛ, yaa lona lɛɛna taa. Yehowa sɔɔlaa se paa weyi lɛ ɛnɩɩ Kewiyaɣ laŋhɛzɩyɛ. (1 Tim. 2:3, 4) Ðoŋ ɖoŋ lɛ, pʋcɔ nɛ ɖɩlɩzɩ aseɣɖe lɛ, pɩwɛɛ se ɖɩfanɩ nabʋyʋ nɛ ɖiyele nɛ faawɩyɛ paɣzɩ.

Ɛzɩma pɩwɛɛ se ɖɩla?:

Tɩlɩ ɛyʋ weyi ŋcaɣ yɔɔdʋʋnʋʋ yɔ. Ɛyʋ ɛnʋ ɛsɔɔlaa se ɛla faawɩyɛ yaa we? Wɛtʋ ndʋ tɩ-taa ɩwɛɛ yɔ, tɩhaɣ nʋmɔʋ se ɩla faawɩyɛ camɩyɛ na? Tɔm susuyaa nabɛyɛ cɔŋnɩ ɛyʋ ɛzɩdaa lɛ, pamʋʋyɩ. Ye ɛyʋ ɛnʋ ɛmʋʋyaa ɖɔɖɔ yɔ, pʋbʋ lɛ pañakɩ pana nɛ pa nɛ ɩ papaɣzɩ kɛdaɣ labʋ.
Ye sɔɔndʋ ɛkpaɣ-ŋ yɔ, tɩmnɩ Ɛsɔ ña-laŋɩyɛ taa pazɩ.—Neh. 2:4; Tʋma 4:29.
Pɩsa nɛ ŋpaɣzɩ lɛ, yɔɔdɩ tɔm pazɩ yem, pɩwɛɣ ɖeu se ŋsɛɛ ɛyʋ ɛnʋ. Yesu taapaɣzɩ Samaarɩɩ halʋ kewiyaɣ tɔm susuu kpaagbaa. (Yoh. 4:7) Nabʋyʋ taa lɛ, pɩsa nɛ ɖɩpaɣzɩ kɛdaɣ lɛ, ɖɩpɩzɩɣ nɛ ɖɩsa ɛyʋ ɛnʋ nɛ ɖɩyɔɔdɩ se: “Ñe-piya su wondu camɩyɛ!” Yaa ɖɩpɩzɩɣ nɛ ɖɩpɔzɩ tɔm. Ðɩpɩzɩɣ nɛ ɖɩpɔzɩ-ɩ se: “Tɔm ndʋ pɔyɔɔdɩ ɖeɖe ɖoo taa journal taa yɔ, ŋnɩ-tʋ yaa we?”
Kɛdaɣ paɣzɩɣ lɛ, ñɩnɩ nɛ ŋna se ɛzɩmtaa ŋpɩzɩɣ nɛ ŋsʋzɩ laŋhɛzɩyɛ tɔm ka-taa; ɛlɛ taakpidisi. Yele nɛ kɛdaɣ maɣmaɣ ɖɔ nɛ katalɩ peeɖe. Pɩtɩla pɩwɛɣ ɖeu se ŋyɔɔdɩ tɔm natʋyʋ nɛ tituzi-wɛ nɛ pɔpɔzɩ-ŋ tɔm. Ye ɩwɛɛ nɛ ɩyɔɔdʋʋ hɔʋ tɔm yɔ, ŋpɩzɩɣ nɛ ŋyɔɔdɩ se: “Mansɩm lɔŋ tasʋʋ nabʋyʋ pɩpɩzɩɣ nɛ pɩsɩnɩ-ŋ nɛ ŋsɩɣzɩ ñe-piya lɔŋ camɩyɛ.” Ye journal taa tɔm natʋyʋ yɔɔ ɩwɛɛ nɛ ɩlakɩ faawɩyɛ yɔ, ŋpɩzɩɣ nɛ ŋyɔɔdɩ se: “Ðeɖe wayɩ mankalɩ tɔm kɩbandʋ natʋyʋ, tɩwɩlɩɣ se pɩkaɣ lɛɣzʋʋ.” Ye kɛdaɣ ɛsɩ tɩnaɣ nɛ ŋtɩpɩzɩ nɛ ŋlɩzɩ aseɣɖe yɔ, pitaatibi-ŋ yɔɔɔ.
Ðɔkɩ traktɩwaa yaa takayɩsɩ lɛɛsɩ nzɩ ŋmaɣzɩɣ se ŋpɩzɩɣ nɛ ŋha ɛyʋ weyi ɛwɩlaa se ɖɔ-tɔm kɛdɩnɩ-ɩ yɔ.

Labɩnɩ tʋmɩyɛ lɔŋ tasʋʋ pʋnɛ fenaɣ kanɛ:

Paa kpɩtaʋ ŋgʋ lɛ, ñaɣ pana nɛ paa pɩkɩlaa yɔ, ŋfanɩ nabʋyʋ nɛ ña nɛ ɛyʋ kʋyʋm ɩpaɣzɩ faawɩyɛ nɛ ŋlɩzɩ-ɩ aseɣɖe.