ƐZƖMA ÐƖPƖZƖƔ NƐ ÐƖPAƔZƖ KƐDAƔ YƆ
TƆM KƖKPƐLƖKƖTƲ 2
Yɔɔdɩ ɛzɩ ŋtɩɩyɔɔdʋʋ yɔ
Paɣtʋ kiɖe: «Tɔm ndʋ pɔyɔɔdɩ alɩwaatʋ kɩbandʋ yɔɔ yɔ, tɩwɛ ɖeu mbʋ suwe!»—Adu. 15:23.
Mbʋ Filiipu laba yɔ
1. Cɔnɩ VIDEO, yaa kalɩ Tʋma Labʋ 8:30, 31. Pʋwayɩ lɛ ŋmaɣzɩ tɔm tʋnɛ tɩ-yɔɔ:
Ɛzɩma Filiipu kpaɣnaa nɛ ɛpaɣzɩ kɛdaɣ?
Nʋmɔʋ ŋgʋ kɩ-yɔɔ ɛtɩŋnaa nɛ ɛwɩlɩ abalʋ ɛnʋ tɔm kɩfatʋ natʋyʋ yɔ, ɛbɛ yɔɔ kɩkɛ nʋmɔʋ kɩbaŋʋ?
Ɛbɛ ɖɩkpɛlɩkɩɣ Filiipu kɩɖaʋ taa?
2. Kɛdaɣ ŋga ɖa nɛ ɛyaa ɖɩlakɩ yɔ, ye ɖiyeba nɛ kɛwɛɛ nɛ kowoki pɩ-yɔɔ yem nɛ ɖɩɩñakɩ pana se ɖɩlɛɣzɩ kɛdaɣ lɛɛka yɔ, pɩpɩzɩɣ piyele nɛ ɛyaa sɔɔlɩ se pewelisi tɔm ndʋ ɖɩyɔɔdʋʋ yɔ nɛ pɔyɔɔdɩ ndʋ pamaɣzɩɣ ɖɔɖɔ yɔ.
Maɣzɩnɩ Filiipu
3. Cɔnɩ camɩyɛ. Ɛyʋ nɔɔyʋ ɛsɩndaa wɛtʋ nɛ ɛzɩma eciɣdiɣ e-tomnaɣ pilinzi yɔ, pɩpɩzɩɣ piyele nɛ ɖɩtɩlɩ tɔm sakɩyɛ ɛ-yɔɔ. Ɛ-wɛtʋ wɩlɩɣ se ɛsɔɔlaa se ña nɛ ɩ ɩla kɛdaɣ na? Ŋpɩzɩɣ nɛ ŋpɔzɩ tɔm natʋyʋ kɛlɛʋ ɛzɩ, «Ŋnawa se . . . ?» nɛ ŋyɔɔdɩ Bibl taa tɔm natʋyʋ. Ye nɔɔyʋ ɛtɩsɔɔlɩ se ña nɛ ɩ ɩla kɛdaɣ yɔ, taakpa-ɩ nɛ ɖoŋ.
4. Wɛɛ suuɖu. Taamaɣzɩ se pɩpɔzʋʋ se ŋyɔɔdɩ Bibl taa tɔm kpaagbaa. Ðaŋ alɩwaatʋ kɩbandʋ; nɛ tɩtalɩɣ lɛ, ŋpɩzɩɣ nɛ ŋyɔɔdɩ-tʋ kɛlɛʋ yem. Nabʋyʋ taa, pɩpɩzɩɣ nɛ pɩpɔzɩ se ŋɖaŋ nɛ ŋyɔɔdɩ-tʋ kɛdaɣ ŋga ña nɛ ɩ ɩlakɩ pʋwayɩ yɔ ka-taa.
5. Tisi nɛ ŋlɛɣzɩ kɛdaɣ. Ɛyʋ nɔɔyʋ pɩzɩɣ nɛ ɛpaɣzɩ yɔɔdʋʋ tɔm ndʋ ŋtaamaɣzɩ tɩ-yɔɔ yɔ. Pʋyɔɔ lɛ, tisi faaa nɛ ña nɛ ɩ ɩla kɛdaɣ tɔm ndʋ tɩkɛdɩɣnɩ-ɩ yɔ tɩ-yɔɔ, paa pɩpɔzʋʋ se ŋlɛɣzɩ tɔm ndʋ ŋŋɖʋwa se ŋyɔɔdʋʋ yɔ.