Ðɩwɛɛ niye tɔm susuu taa nɛ pɩkɩlɩ: Wɩlɩ ɖɩɣdʋ se ŋsɔɔlɩ-ɩ
Ɛbɛ yɔɔ pɩcɛyaa? Yesu naɣaɣ ɛyaa lɛ, ɛwɩlaɣ se ɛsɔɔlɩ pa-taa paa anɩ. Ðɩkpaɣ kɩɖaʋ kʋnɛ: Kɩyakʋ nakʋyʋ Yesu na kʋdɔndʋ nɔɔyʋ, ɛkɛ tandam nɛ kaayɔɔdaɣ, nɛ ewobi se ɛwaɣ ɛ-kʋdɔŋ lɛ, ɛlɩzɩ-ɩ kɩjaʋ nɛ eposi-i nɛ samaɣ, mbʋ pʋyɔɔ yɔ, pɩtala ɛnawa se ɛwa-ɩ samaɣ hɛkʋ taa yɔ, pɩcɛyɩɣ-ɩ. (Mak. 7:31-35) Ɛwɩlaa se ɛsɔɔlɩ ɛ-tɔmkpɛlɩkɩyaa, mbʋ pʋyɔɔ yɔ, ɛnawa se pɛwɛnɩ ɛjandʋ nɛ pʋyɔɔ lɛ, etaaheyiɣ-wɛ tɔm ndʋ pataapɩzɩɣ se panɩɩ tɩ-taa yɔ. (Yoh. 16:12) Halɩ ɛwɛʋ ɛsɔdaa yɔ, eɖiɣni wɩlʋʋ se ɛsɔɔlɩ ɖa-taa paa anɩ. (2 Tim. 4:17) Pɩpɔzʋʋ se ɖa mba ɖɩkɛ Krɩstʋ wayɩ tɩŋɩyaa yɔ, ɖɩñaɣ pana nɛ ɖɩnɩɣzɩnɩ-ɩ. (1 Pɩy. 2:21; 1 Yoh. 3:16, 18) Pɩtasɩ lɛ, ye ɖɩwɩlɩɣ ɖɩɣdʋ se ɖɩsɔɔlɩ-ɩ nɛ ɖɩmaɣzɩɣ wɛtʋ ndʋ tɩ-taa ɛwɛɛ nɛ ɛ-kɩcɛyɩm pɔ-yɔɔ yɔ, ɖɩwɛɣ niye tɔm susuu taa nɛ pɩkɩlɩ. Ewelisiɣni-ɖʋ nɛ pɩkɩlɩ ye ɛnawa se pɩtɩkɛ tɔm natʋyʋ yem ɖɩkɔmɩ-ɩ heyuu yaa takayaɣ nakɛyɛ yem ɖɩkɔmɩ-ɩ haʋ, ɛlɛ ɖɩsɔɔlɩ ɛ-maɣmaɣ na.
Labɩnɩ tʋmɩyɛ lɔŋ tasʋʋ pʋnɛ fenaɣ kanɛ:
Ɩpɩzɩɣ ɩkpaɣ hɔʋ taa Bibl kpɛlɩkʋʋ alɩwaatʋ natʋyʋ nɛ ɩla la ŋwɩlɩwaa nabɛyɛ yaa fenaɣ kanɛ ka-taa iisusuu tɔm lɛ, ɩñaɣ pana nɛ ɩlɛɣzɩ mɩ-tɔm nɛ tɩla nɔɔ kʋɖʋmaɣ nɛ ndʋ ɖɩɣdʋ yɔɔdaa yɔ.
Ɛɛcɔŋnɩ tɔm susuu kediɣzisi nasɩyɩ yɔɔ lɛ, pɩpɔzʋʋ se tɔm susuu kediɣzaɣ yɔɔ cɔnɩyʋ, ɛyɔɔdɩ yaa eyele nɛ pala la ŋwɩlɩ nɛ koobiya tɩlɩ ɛzɩma papɩzɩɣ nɛ pawɩlɩ se pɔsɔɔlɩ ɖɩɣdʋ yɔ.