Ɛzɩ Yehowa nɛ Yesu yɔ, ŋkaɣ wɛʋ kpekpeka Krɩstʋ sɩm yɔɔ tɔzʋʋ alɩwaatʋ taa?
1. Ɛbɛ Yehowa Aseɣɖe Tɩnaa ñakɩ pana kpem se pala Krɩstʋ sɩm yɔɔ tɔzʋʋ alɩwaatʋ taa?
1 Yehowa lakɩ ɛ-tamaɣ nɛ kpekpeka. Izaayii 9:6 yɔɔdaɣ Ɛsɔ Kewiyaɣ wazasɩ nasɩyɩ tɔm lɛ, ɛtɔm se “Yoyaa kpeekpe Kɩbaɣlʋ abalɩtʋ [kpekpeka] kaɣ labʋ mbʋ.” Mbʋ ɖɔɖɔ alɩwaatʋ ndʋ Yesu kaawɛ tɛtʋ yɔɔ nɛ ɛlakɩ Ɛsɔ tʋma lɛ, ɛwɩlaa se ɛwɛ kpekpeka toovenim Ɛsɔ sɛtʋ yɔɔ. (Yoh. 2:13-17; 4:34) Paa pɩnaɣ ŋga lɛ, Krɩstʋ sɩm yɔɔ tɔzʋʋ alɩwaatʋ taa ɛjaɖɛ kpeekpe yɔɔ koobiya sakɩyɛ ñakɩ pana kpem se pawalɩsɩ pɔ-tɔm susuu tʋmɩyɛ. Nɛ ña yɔ?
2. Kpaɣnɩ 7 mars lɛ, ɛbɛ kpekpeka kaɣ-ɖʋ tuzuu nɛ ɖɩla?
2 Krɩstʋ sɩm yɔɔ ŋgee tɔm susuu: Sɛmɩɩyɔ Krɩstʋ sɩm yɔɔ tɔzʋʋ ŋgee tɔm susuu kaɣ paɣzʋʋ maɣzaɣ 7 mars wiye. Ñɔɔzɩ ña-tɩ lɛɛlɛɛyɔ, nɛ ŋpɩzɩ nɛ ŋɖʋ nesi tʋmɩyɛ nɖɩ nɛ kpekpeka. Agbaa kaañakɩ pana se asusi tɔm a-kookasɩ tɩŋa taa lɛ, pɩkaɣ-yɛ haʋ taa leleŋ siŋŋ. Ñaɣ pana siŋŋ nɛ ŋha yaʋ takayɩsɩ ñe-Bibl kpɛlɩkɩyaa, ñɛ-tɛ pɩsɩ nɛ ŋna-ɩ waa, ñɔ-hɔʋ taa mba, ño-sukuli taa yaa ña-tʋmɩyɛ taa taabalaa; yaa tɩŋnɩ jw.org yɔɔ nɛ ŋyaa-wɛ.
3. Ɛbɛ ɖɩpɩzɩɣ ɖɩla nɛ ɖɩwalɩsɩ ɖɔ-tɔm susuu tʋmɩyɛ mars nɛ avril pa-taa?
3 Nʋmɔʋ Lɩzʋʋ Sɩnɩyʋ: Kpekpeka kaɣ-ɖʋ seɣtuu ɖɔɖɔ nɛ ɖɩwalɩsɩ ɖɔ-tɔm susuu tʋmɩyɛ. Pɩtʋʋ fɛyɩ, koobiya sakɩyɛ kaɣ pɩzʋʋ nɛ pala nʋmɔʋ lɩzʋʋ sɩnɩyʋ tʋmɩyɛ mars nɛ avril pa-taa, mbʋ pʋyɔɔ yɔ pakaɣ wɛnʋʋ waɖɛ se palɩzɩ se posusuu tɔm ñɩɣtʋ 30. Ɩɩlakɩ mɩ-hɔʋ taa Bibl kpɛlɩkʋʋ yaa tɩ-yɔɔ kpɛlɩkʋʋ lɛ, ɩyɔɔdɩ nɛ ɩna ɛzɩma paa hɔʋ taa ɛyʋ weyi lɛ ɛpɩzɩɣ nɛ ɛsɔzɩ ɛ-tɔm susuu tʋmɩyɛ yɔɔ yɔ. (Adu. 15:22) Taa leleŋ weyi ŋwɛɣnɩ tʋmɩyɛ nɖɩ ɖɩ-yɔɔ yɔ, ɛkaɣ tuzuu lalaa nɛ pala tʋmɩyɛ nɖɩ nɛ kpekpeka. Ye ŋñɔɔzɩ ña-ɖʋtʋ se pɩha-ŋ nʋmɔʋ nɛ ŋsɔzɩ ñɔ-tɔm susuu tʋmɩyɛ yɔ, pʋbʋ lɛ ŋwɩlɩɣ se ŋwɛ kpekpeka ɛzɩ Yesu yɔ.—Mark. 6:31-34.
4. Ye ɖɩwɛ kpekpeka ɛzɩ Yehowa nɛ Yesu yɔ, pee wena pɩkaɣ lʋlʋʋ?
4 Ye Krɩstʋ sɩm yɔɔ tɔzʋʋ alɩwaatʋ taa ɖɩwɩlaa se ɖɩwɛ kpekpeka ɛzɩ Yehowa nɛ Yesu yɔ, ɖihikiɣ wazasɩ sakɩyɛ. Ðɩkaɣ lɩzʋʋ aseɣɖe nɛ ɛyaa sakɩyɛ nɩɩ. Ðɩkaɣ hiɣu taa leleŋ weyi mba pɛsɛɣ Yehowa nɛ pahaɣ lalaa yɔ, pehikiɣ yɔ. (Tʋma 20:35) Kɔzɩ kɔzɩ lɛ, ɖɔ-tɔm kaɣ kɛdɩnʋʋ Yehowa, ɖɛ-Ɛsɔ weyi ɛwɛ kpekpeka yɔ; nɛ tɩkɛdɩnɩ ɖɔɖɔ Yesu.