Tɔm susuu kediɣzisi nzɩ sɩwazɩɣ yɔ

1. Kaɖʋwa ŋga tɔm susuu kediɣzisi wɛna?

¹ Evemiye naɖɩyɛ pʋcɔ nɛ Yesu tɔmkpɛlɩkɩyaa 70 ɖɛɛ nɛ posusi tɔm lɛ, pa nɛ Yesu palabɩ kediɣzaɣ nakɛyɛ. (Luka 10:1-11) Yesu sazɩ-wɛ nɛ ɛtɔzɩ-wɛ se paakaɣ wɛʋ pe-yeke; ɛtɔzɩ-wɛ ɖɔɖɔ se Yehowa weyi ɛkɛ “hayɩm tʋ” yɔ, ɛnʋ ɖiyiɣni-wɛ. Ɛha-wɛ lɔŋ tasʋʋ mbʋ pɩsɩɣnɩ-wɛ se pala tʋmɩyɛ yɔ, ɛñɔɔzɩ-wɛ yaa ɛtayɩ-wɛ “naalɛ naalɛ.” Sɔnɔ ɖɔɖɔ, kediɣzisi nzɩ ɖɩlakɩ pʋcɔ nɛ ɖɩɖɛɛ tɔm susuu yɔ, sɩwɛnɩ kaɖʋwa kʋyʋmaɣ ŋga na: sɩsazɩɣ-ɖʋ, sɩsɩɣnɩ-ɖʋ nɛ sɩñɔɔzʋʋ-ɖʋ.

2. Alɩwaatʋ ɛzɩma pɩwɛɛ se tɔm susuu kediɣzisi ɩkpaɣ?

² Tɔm susuu kediɣzisi kpakɩɣ cɛcɛsɩ 10 nɛ piwolo 15, nɛ alɩwaatʋ ndʋ tɩ-taa patayɩɣ koobiya, paha-wɛ kookasɩ nzɩ sɩ-taa pakaɣ susuu tɔm yɔ nɛ patɩmɩ. Lɛɛlɛɛyɔ pɛlɛɣzɩ ɖʋtʋ ndʋ. Kpaɣnɩ avril fenaɣ taa tɔm susuu kediɣzisi kaɣ kpaɣʋ cɛcɛsɩ kagbanzɩ nɛ piwolo lʋbɛ. Ɛlɛ, ye palakɩ tɔm susuu kediɣzisi ɛgbɛyɛ kediɣzaɣ nakɛyɛ wayɩ na yɔ, pɩwɛɣ ɖeu se sɩtaaɖaɣlɩ nɛ pɩtalɩ mbʋ; mbʋ pʋyɔɔ yɔ koobiya mba pakaɣ wɛʋ tɔm susuu kediɣzaɣ taa yɔ, pɛtɛm tɔɔʋ fezuu taa kediɣzaɣ ŋga kɛtɛma yɔ ka-taa.. Ye tɔm susuu kediɣzisi iileɖiɣ yɔ, piyeki nɛ ɖa-tɩŋa ɖileɖi tɔm susuu taa nɛ pɩkɩlɩ. Pɩtasɩ ye tɔm susuyu yaa nʋmɔʋ lɩzɩyʋ nɔɔyʋ ɛtɛm paɣzʋʋ tɔm susuu yɔ, ɛɛkaɣ sɛtʋʋ ɛ-tɔm susuu tʋmɩyɛ nɛ pileɖi.

3. Ɛzɩma pʋmʋnaa se pala tɔm susuu kediɣzisi nɛ pɩwazɩ koobiya nɛ pɩkɩlɩ?

³ Pɩwɛɛ se pɔñɔɔzɩ tɔm susuu kediɣzisi nɛ sɩwazɩ tɔm susuyaa camɩyɛ. Agbaa naayɛ taa lɛ, pɩkɩlɩ ɖeu se tɔm susuu agbaa ɩkatɩ nɖeke nɖeke, a-tɩŋa ataakatɩ ɖoli kʋyʋm. Pɩwɛ kɛlɛʋ tɔm susuyaa se powolo kediɣzisi nzɩ, nɛ powolo ɖɔɖɔ kookasɩ nzɩ sɩ-taa pakaɣ tɔm susuu yɔ kɛlɛʋ. Pɩsɩɣna ɖɔɖɔ se patayɩ koobiya lɛɛ lɛɛ nɛ tɔm susuu agbaa yɔɔ cɔnɩyaa pɩzɩ ɖɔɖɔ pasɩnɩ pa-agbaa taa koobiya camɩyɛ. Pɩwɛɛ se ɛgbɛyɛ taa ɛzʋtʋyaa ɩcɔnɩ pɛ-ɛgbɛyɛ taa wɛtʋ nɛ pakpaɣ lɩmaɣza wena akɩlɩɣ koobiya wazʋʋ yɔ. Pʋcɔ nɛ pɛtɛzɩ kediɣzaɣ nɛ adɩma lɛ, pɩwɛɛ se paa weyi ɛtɩlɩ ɛ nɛ weyi pakaɣ tɔm susuu yɔ nɛ ɖenɖe pakaɣ tʋmɩyɛ nɖɩ labʋ yɔ.

4. Ɛbɛ yɔɔ pɩfɛyɩ ɖeu se ɖɩmaɣzɩ se tɔm susuu kediɣzisi tɔm tɩcɛyɩ nɛ pɩtalɩ ɛgbɛyɛ taa kediɣzisi lɛɛsɩ?

⁴ Ɛgbɛyɛ taa kediɣzisi lɛɛsɩ tɩkɩlɩ-kɛ: Palakɩ tɔm susuu kediɣzisi se pɩsɩnɩ mba pakaɣ wobu se posusi tɔm yɔ, ye mbʋ pɩtɩla pɩtɩkɛ ɛgbɛyɛ taa koobiya tɩŋa kaɣnɩ-sɩ wobu. Ɛlɛ, pɩtɩmʋna se paɖʋ kaakendu sɩ-yɔɔ yaa pakpaɣ-sɩ ɛzɩ sɩ-tɔm tɩcɛyɩ nɛ pɩtalɩ ɛgbɛyɛ taa kediɣzisi lɛɛsɩ yɔ. Ɛzɩ kediɣzisi lɛɛsɩ yɔ, Yehowa ɖʋ tɔm susuu kediɣzisi se sɩsɩnɩ-ɖʋ nɛ ɖiseɣti ɖama sɔɔlɩm nɛ tʋma kɩbana labʋ. (Ebr. 10:24, 25) Pʋyɔɔ pɩwɛɛ se weyi palɩzɩɣ se ɛcɔnɩ kediɣzaɣ yɔɔ yɔ, ɛñɔɔzɩ ɛ-tɩ camɩyɛ nɛ pɩɖʋ Yehowa hɩɖɛ nɛ pɩwazɩ mba powobi kediɣzaɣ ŋga ka-taa yɔ. Ye pɩlakɩ yɔ, pɩwɛɛ se koobiya mba pañɩnɩɣ se palɩɩ tɔm susuu yɔ, pa-tɩŋa powolo kediɣzaɣ ŋga.

Pɩtɩmʋna se paɖʋ kaakendu tɔm susuu kediɣzaɣ yɔɔ yaa pakpaɣ-kɛ ɛzɩ kɔ-tɔm tɩcɛyɩ nɛ pɩtalɩ ɛgbɛyɛ taa kediɣzisi lɛɛsɩ yɔ

5. (a) Ɛbɛ pɩwɛɛ se ɛgbɛyɛ taa Ɛsɔ sɛtʋ yɔɔ cɔnɩyʋ ɛla nɛ tɔm susuu kediɣzisi ɖɔ camɩyɛ? (b) Ɛzɩma pɩwɛɛ se koobu halɩñɩnʋ ɛcɔŋnɩ tɔm susuu kediɣzisi yɔɔ?

⁵ Kediɣzaɣ yɔɔ cɔnɩyʋ ɛñɔɔzɩ ɛ-tɩ: Pʋcɔ nɛ ɛyʋ pɩzɩ nɛ ɛñɔɔzɩ ɛ-tɩ nɛ ɛla tʋmɩyɛ nɖɩ paha-ɩ kediɣzaɣ nakɛyɛ taa yɔ camɩyɛ lɛ, pɩwɛɛ se pɛcɛlɩ-ɩ tʋmɩyɛ nɖɩ lɔŋ pʋcɔ nɛ kediɣzaɣ ŋga katalɩ. Mbʋ pɩwɛɛ tɔm susuu kediɣzaɣ hɔɔlʋʋ taa ɖɔɖɔ. Ye tɔm susuu agbaa ikpeɣliɣ nɖeke nɖeke yɔ, tɔm susuu ɛgbɛyɛ yɔɔ cɔnɩyʋ yaa weyi ɛsɩɣnɩ-ɩ yɔ, ɛcɔŋnɩnɩ kediɣzaɣ ŋga kɔ-yɔɔ. Ɛlɛ, ye ɛgbɛyɛ tɩŋa ɛkpɛndaa se ɖɩlakɩ tɔm susuu kediɣzaɣ yɔ, ɛgbɛyɛ taa Ɛsɔ sɛtʋ yɔɔ cɔnɩyʋ lɩzɩɣnɩ weyi ɛkaɣ cɔnʋʋ kediɣzaɣ ŋga kɔ-yɔɔ yɔ. Pɩwɛɛ se ɛgbɛyɛ taa Ɛsɔ sɛtʋ yɔɔ cɔnɩyʋ ɛtɩlɩ labʋ, alɩwaatʋ ndʋ ɛlɩzɩɣ mba pakaɣ cɔnʋʋ kediɣzaɣ ŋga kɔ-yɔɔ yɔ, ɛtaasɔɔ se ye weyi ɛcɔŋnɩ kediɣzaɣ yɔɔ yɔ, ɛwɛ niye tɔm wɩlʋʋ nɛ ñɔɔzʋʋ taa yɔ, pɩpɩzɩɣ piyele nɛ kediɣzaɣ ŋga kala ɖeu nɛ pɩkɩlɩ. Ye ɛgbɛyɛ taa ɛzʋtʋyʋ, ɛgbɛyɛ taa tʋmlaɖʋ yaa koobu abalʋ weyi pamɩyɩsɩ-ɩ lɩm nɛ ɛmʋna ɖɔɖɔ yɔ, pa-taa nɔɔyʋ ɛɛpɩzɩɣ se ɛkɔɔ nɛ ɛcɔnɩ tɔm susuu kediɣzisi yɔɔ avema naayɛ yɔ, ɛgbɛyɛ taa Ɛsɔ sɛtʋ yɔɔ cɔnɩyʋ pɩzɩɣ nɛ ɛpɔzɩ koobu halɩñɩnʋ nɔɔyʋ se ɛcɔnɩ kediɣzisi nzɩ sɩ-yɔɔ avema ana a-wiye.—Cɔnɩ aɖakaɣ ŋga kɛwɛ hɔɔlʋʋ 6 yɔɔ yɔ.”

6. Ɛbɛ yɔɔ pɩcɛyaa se tɔm susuu kediɣzaɣ yɔɔ cɔnɩyʋ, ɛñɔɔzɩ ɛ-tɩ camɩyɛ?

⁶ Ye paha-ɖʋ tʋmɩyɛ naɖɩyɛ Ɛsɔ sɛtʋ tɛ teokrasɩ sukuli taa yaa Ɛsɔ sɛtʋ kediɣzaɣ taa yɔ, ɖiileɣyiɣni-ɖɩ ɛlɛ, ɖɩñɔɔzʋʋ-ɖɩ camɩyɛ. Pɩtɩkɛ ɖɩwɛɣ nʋmɔʋ taa se ɖiwoki kediɣzaɣ taa lɛ, ɖɩpaɣzɩɣ maɣzʋʋ ɖa-tʋmɩyɛ yɔɔ se ɖɩna ndʋ ɖɩkaɣ yɔɔdʋʋ kediɣzaɣ taa yɔ. Ða-taa sakɩyɛ ɩɩkaɣ labʋ mbʋ. Lɩmaɣza kʋyʋma ana pɩwɛɛ se ɖɩwɛna alɩwaatʋ ndʋ pahaɣ-ɖʋ waɖɛ se ɖɩcɔnɩ tɔm susuu kediɣzaɣ nakɛyɛ yɔɔ yɔ. Lɛɛlɛɛyɔ tɔm susuu kediɣzisi tɩtasɩ ɖaɣlʋʋ, ye mbʋ pɩwɛɛ se ɛyʋ ɛñɔɔzɩ ɛ-tɩ camɩyɛ kpem nɛ pɩwazɩ koobiya nɛ sɩtɛ alɩwaatʋ yɔɔ. Tɩ-ñɔɔzʋʋ tɔbʋʋ ɖɔɖɔ lɛ se pamʋ kooka ŋga ka-taa pakaɣ susuu tɔm yɔ, pʋcɔ nɛ kediɣzaɣ talɩ.

7. Tɔm ndʋ taa weyi ɛcɔŋnɩ tɔm susuu kediɣzaɣ yɔɔ yɔ, ɛpɩzɩɣ nɛ ɛtazɩ?

⁷ Ɛbɛ tɔm pɩwɛɛ se pɔyɔɔdɩ? Kookasɩ fɛyɩnɩ wɛtʋ kʋyʋmtʋ, ye mbʋ ‘yom siɣsiɣ tʋ’ tɩma takayaɣ nakɛyɛ se ŋga patɩŋɩɣ paa ɛzɩmtaa. (Mat 24:45) Aɖakaɣ ŋga payaɣ se “Tɔm susuu kediɣzisi taa lɛ, ŋpɩzɩɣ nɛ ŋlabɩnɩ wondu tʋnɛ tʋmɩyɛ” yɔ, kɔyɔɔdʋʋ mbʋ pɩ-taa ɖɩpɩzɩɣ nɛ ɖɩtazɩ yɔ. Ðoŋ ɖoŋ lɛ, kɛdaɣ pakaɣ labʋ kediɣzaɣ ŋga ka-taa. Wiɖiyi wiɖiyi lɛ, papɩzɩɣ nɛ pala la ŋwɩlɩ kɩbaŋʋ nakʋyʋ yaa pawɩlɩ jw.org yɔɔ video kɩbaŋʋ ŋgʋ kɩwazɩɣ tɔm susuu taa yɔ. Koobu weyi ɛcɔŋnɩ kediɣzaɣ yɔɔ yɔ, ɛɛñɔɔzʋʋ ɛ-tɩ lɛ, pɩwɛɛ se ɛmaɣzɩ mbʋ pɩsazɩɣ, pɩsɩna nɛ pɩñɔɔzɩ koobiya mba palɩ tɔm susuu puwiye yɔ.

Koobu weyi ɛcɔŋnɩ kediɣzaɣ yɔɔ yɔ, ɛɛñɔɔzʋʋ ɛ-tɩ lɛ, pɩwɛɛ se ɛmaɣzɩ mbʋ pɩsazɩɣ nɛ pɩsɩna koobiya mba palɩ tɔm susuu puwiye yɔ

8. Ɛbɛ tɔm pɩkɩlɩɣ ɖeu se pɔyɔɔdɩ tɔm susuu kediɣzisi taa mazasɩ nɛ kujukasɩ pe-wiye?

⁸ Tɔm susuyaa sakɩyɛ haɣ Feŋuu Tilimiye nɛ Réveillez-vous! mazasɩ wiye. Mba palɩɣ mazasɩ wiye tɔm susuu yɔ, pa-taa sakɩyɛ ɩɩlɩɣ kpɩtaʋ hɛkʋ taa, ye mbʋ pɩpɩzɩɣ nɛ pɩlabɩ-wɛ kaɖɛ se pɔtɔzɩ la ŋwɩlɩwaa mba paalabɩ hɔʋ taa Bibl kpɛlɩkʋʋ alɩwaatʋ taa yɔ, pɔ-yɔɔ. Pʋyɔɔ pɩwɛɣ ɖeu se kediɣzaɣ yɔɔ cɔnɩyʋ ɛɖaɣnɩ tazʋʋ tɔm ndʋ pama Kewiyaɣ Ɛsɔ Sɛtʋ Tʋmɩyɛ takayaɣ taa se tɩsɩnɩ-ɖʋ nɛ ɖɩpaɣzɩɣ kɛdaɣ yɔ, tɩ-taa. Ɛpɩzɩɣ ɖɔɖɔ nɛ ɛyɔɔdɩ ɛzɩma ɩpɩzɩɣ nɛ ɩkpaɣ mbʋ pɩlabɩ mi-kooka taa, mbʋ pɩlabɩ ɛjaɖɛ yɔɔ yaa kazandʋ natʋyʋ tɔm nɛ ɩlabɩnɩ tʋmɩyɛ ɛɛwɩlɩɣ ɛzɩma papɩzɩɣ nɛ paha fenaɣ fenaɣ takayaɣ nakɛyɛ lɛ. Yaa ɛyɔɔdɩ tɔm ndʋ koobu nɔɔyʋ pɩzɩɣ nɛ eheyi ɖɩɣdʋ nɔɔyʋ nɛ ɛlɛ tisi se papɩsɩ nɛ pana-ɩ yɔ. Ye mba pɔkɔm tɔm susuu kediɣzaɣ yɔ, pa-taa nabɛyɛ ɩtɛm paɣzʋʋ haʋ fenaɣ fenaɣ takayɩsɩ nzɩ pɔyɔɔdʋʋ sɩ-tɔm yɔ yɔ, kediɣzaɣ yɔɔ cɔnɩyʋ pɩzɩɣ nɛ ɛpɔzɩ-wɛ se pɔyɔɔdɩ ɛzɩma palakɩ nɛ pahaɣ takayɩsɩ nzɩ yɔ yaa pee kɩbana wena paha takayɩsɩ nzɩ nɛ pɩlʋlɩ yɔ, pɩ-tɔm. Mba pakaɣ cɔnʋʋ kediɣzisi yɔɔ kujukasɩ wiye yɔ, papɩzɩɣ nɛ pala mbʋ ɖɔɖɔ. Paa fenaɣ alɩwaatʋ ndʋ taa papɩzɩɣ nɛ paha takayɩsɩ nzɩ ɖa nɛ ɛyaa ɖɩkpɛlɩkɩɣ yɔ ɛzɩ Laŋhɛzɩyɛ Tɔm, Welisini Ɛsɔ nɛ Ndʋ Bibl Wɩlɩɣ mbʋ yɔ; ye mbʋ, kediɣzaɣ yɔɔ cɔnɩyʋ pɩzɩɣ nɛ ɛyɔɔdɩ ɛzɩma papɩzɩɣ nɛ paha takayɩsɩ nzɩ yɔ, pɩ-tɔm pazɩ.

9. Ye ɛgbɛyɛ naɖɩyɛ ɛwɛnɩ ŋgee tɔm susuu ɖʋtʋ natʋyʋ, ɛbɛ tɔm papɩzɩɣ nɛ pɔyɔɔdɩ?

⁹ Ye ɛgbɛyɛ ɛwɛnɩ ŋgee tɔm susuu ɖʋtʋ natʋyʋ mazasɩ nɛ kujukasɩ pe-wiye yɔ, kediɣzaɣ yɔɔ cɔnɩyʋ pɩzɩɣ nɛ ɛwɩlɩ ɛzɩma papɩzɩɣ nɛ paha fenaɣ fenaɣ takayɩsɩ nɛ yaʋ takayaɣ yaa traktɩ kpaagbaa yɔ, yaa ɛpɩzɩɣ nɛ ɛwɩlɩ mbʋ pɩwɛɛ se ɖɩla ye nɔɔyʋ ɛwɩlaa se ɖɔ-tɔm kɛdɩnɩ-ɩ yɔ. Kediɣzaɣ yɔɔ cɔnɩyʋ pɩzɩɣ nɛ ɛkɛdɩ mbʋ pɩlaba nɛ pɩwɩlɩɣ se ŋgee tɔm susuu mbʋ pɩwɛ wazaɣ siŋŋ yɔ.

10, 11. Ɛbɛ yɔɔ pɔtɔŋ se pʋcɔ tɔm susuu kediɣzaɣ ɖɔ camɩyɛ lɛ, pɩwɛɛ se tɔm susuyaa ɩñɔɔzɩ pa-tɩ camɩyɛ?

¹⁰ Tɔm susuyaa ɩñɔɔzɩ pa-tɩ: Koobiya mba powoki tɔm susuu kediɣzisi yɔ, papɩzɩɣ pasɩna nɛ tɔm susuu kediɣzaɣ ɖɔ camɩyɛ. Ye pakpaɣ pɛ-tɛ hɔʋ taa Bibl kpɛlɩkʋʋ nɛ pɔñɔɔzɩnɩ pa-tɩ yɔ, papɩzɩɣ nɛ pɛwɛnɩ lɔŋ nɩɩyɩ nɛ patasɩ koobiya lalaa. Ye pɔtɔm se ɛyʋ ɛñɔɔzɩ ɛ-tɩ camɩyɛ yɔ, pʋ-tɔbʋʋ ɖɔɖɔ lɛ se ɛmʋ fenaɣ fenaɣ takayɩsɩ nɛ takayɩsɩ lɛɛsɩ pʋcɔ nɛ ewolo tɔm susuu kediɣzaɣ, piyeki nɛ kediɣzaɣ tɛŋ lɛ, koobiya ɖɛɛ kooka ŋga taa pakaɣ tɔm susuu yɔ kpaagbaa.

¹¹ Pɩcɛyaa ɖɔɖɔ se ɖɩñaɣ pana nɛ ɖɩtalɩ tɔm susuu kediɣzaɣ taa cɛcɛsɩ pazɩ pʋcɔ nɛ kapaɣzɩ. Toovenim, ɖɩñakɩ pana se ɖiwolo kediɣzisi tɩŋa alɩwaatʋ yɔɔ. Ɛlɛ ye ɖɩcaɣ wayɩ tɔm susuu kediɣzaɣ nakɛyɛ taa yɔ, pɩpɩzɩɣ nɛ pɩwɛɛkɩ tɔm pɩdɩɩfɛyɩ. Ɛzɩma tɩyɛ? Pʋcɔ kediɣzaɣ yɔɔ cɔnɩyʋ tayɩɣ ɛyaa lɛ, ɛmaɣzɩ tɔm sakɩyɛ yɔɔ. Ye tɔm susuyaa mba pɔkɔm yɔ patɩɖɔɔ yɔ, ɛpɩzɩɣ nɛ ɛpɔzɩ-wɛ se powolo kooka ŋga paasusi tɔm ka-taa nɛ pɩkazɩ pazɩ yɔ. Ye kediɣzaɣ yɔɔ cɔnɩyʋ ɛnawa se nabɛyɛ ɖɔm kɩɖɔm nɛ pɔkɔɔ tɔm susuu kediɣzaɣ nɛ pɩla se kooka ŋga taa pakaɣ tɔm susuu yɔ, kɛwɛ poliŋ pazɩ yɔ, ɛpɩzɩɣ nɛ ɛtayɩ tɔm susuyaa mba nɛ mba pɛwɛnɩ lɔɔɖa yaa kpokponaa yɔ. Ye ɛnawa se ɖenɖe pakaɣ tɔm susuu yɔ ɛyaa kʋyaa tɔyɩ peeɖe yɔ, ɛpɩzɩɣ nɛ ɛɖʋ se koobiya abalɩñɩma isusi tɔm koobiya halɩñɩma kooka cɔlɔ. Ɛpɩzɩɣ ɛɖʋ se koobiya mba pɛkɛ taɖɩyɛ tɩnaa yɔ posusi tɔm habɛɛ wena a-yɔɔ pɩfɛyɩ colom colom yɔ yaa ɖɩsɩ nzɩ sɩ-taa ɛsɔdaa kuduyuŋ tɩɖɔɔ yɔ. Papɩzɩɣ nɛ patayɩ tɔm susuyaa kɩfama nɛ tɔm susuyaa kɩbɩma. Ɛlɛ ye nɔɔyʋ ɛkɔm wayɩ yɔ, pɩwɛɛ se pɛlɛɣzɩ yaa paɖaɣnɩ tayʋʋ nɛ wayɩ caɣyaa ñehiɣ taabalaa ɖɔɖɔ. Toovenim, nabʋyʋ taa lɛ pɩpɩzɩɣ nɛ pɩla se kɩcɛyɩm nabʋyʋ yebina se ɖɩcaɣ wayɩ. Ɛlɛ, ye ɖɩcakɩ wayɩ ɖoŋ ɖoŋ yɔ, pɩwɛɛ se ɖɩpɔzɩ ɖa-tɩ nɛ ɖɩna se ɖɩɩɖʋʋ kaakendu tɔm susuu kediɣzisi yɔɔ lɛ mbʋ yɔ? Yaa ɛzɩ ɖɩsɩm ɛzɩma pɩwɛɛ se ɖɩñɔɔzɩ ɖa-tɩ camɩyɛ pʋcɔ nɛ kediɣzaɣ talɩ yɔ?

12. Ye ŋcaɣ se ŋla ɖʋtʋ nɛ ña nɛ nɔɔyʋ ɩlɩɩ yɔ, ɛbɛ yɔɔ pɩwɛɛ se ŋmaɣzɩ?

¹² Koobiya mba powobi tɔm susuu kediɣzaɣ taa yɔ; pʋcɔ nɛ kediɣzaɣ paɣzɩ lɛ, pa nɛ lalaa papɩzɩɣ pala ɖʋtʋ se palɩɣ. Ye patɩla mbʋ yɔ, pakaɣ-wɛ haʋ weyi pa nɛ ɩ pakaɣ lɩʋ yɔ. Paa mɩ nɛ lalaa ɩlakɩ ɖʋtʋ se ɩlɩɩ nɛ isusi tɔm yɔ, ɩtaasɔɔ se “ikuli mɩ-laŋa” pʋ-tɔbʋʋ lɛ se mɩ nɛ koobiya ndɩ ndɩ isusuu tɔm; mɩ nɛ koobiya kʋyʋmaa ɩtaalɩɣnɩ tam. (2 Kɔr. 6:11-13) Ŋpɩzɩɣ nɛ ña nɛ tɔm susuyu nɔɔyʋ ɩlɩɣ wiɖiyi wiɖiyi nɛ ŋsɩnɩ-ɩ nɛ ɛwɛɛ niye tɔm susuu taa? (1 Kɔr. 10:24; 1 Tim. 4:13, 15) Welisi camɩyɛ lɔŋ weyi patasɩɣ-ŋ yɔ, pɩkpɛndɩnɩ alɩwaatʋ ndʋ ŋcaɣ paɣzʋʋ tɔm susuu yɔ. Kediɣzaɣ tɛŋ lɛ, ɩtaalɛɣzɩ ɛzɩma patayɩ koobiya yɔ, ɩɖɛɛ kooka ŋga ka-taa isusuu tɔm yɔ kpaagbaa.

13. Ye mba pɩwɛɛ se paɖʋ nesi tɔm susuu kediɣzaɣ yɔ palabɩ pa-tʋmɩyɛ camɩyɛ yɔ, ɛzɩma sɩkaɣ-ɖʋ wazʋʋ?

¹³ Tɔm kpɛlɩkɩyaa 70 mba Yesu kaañɔɔzaa yɔ pɛtɛm tɔm susuu lɛ, papɩsɩ “pɔkɔɔ nɛ amɛya pɩŋŋ.” (Luka 10:17) Pɩtʋʋ fɛyɩ, kediɣzaɣ ŋga pa nɛ Yesu paalaba pʋcɔ nɛ palɩɩ tɔm susuu yɔ, ŋga sɩnɩnɩ-wɛ nɛ pala tʋmɩyɛ camɩyɛ. Tɔm susuu kediɣzisi pɩzɩɣ nɛ sɩwazɩ ɛyaa mbʋ sɔnɔ ɖɔɖɔ. Ye mba pɩwɛɛ se paɖʋ nesi tɔm susuu kediɣzaɣ yɔ palabɩ pa-tʋmɩyɛ camɩyɛ yɔ, kakaɣ sazʋʋ, kasɩna nɛ kɔñɔɔzɩ-ɖʋ nɛ ɖɩla ɖa-tʋmɩyɛ nɖɩ paɖʋ-ɖʋ se ɖisusi tɔm “ɛjaɖɛ kpeekpe taa se ɛyaa ɩnɩɩ” yɔ camɩyɛ.—Mat 24:14

Ye koobu halɩñɩnʋ nɔɔyʋ ɛcɔŋnɩnɩ tɔm susuu kediɣzaɣ yɔɔ yɔ

Pʋmʋnaa se koobu halɩñɩnʋ ɛnʋ ɛcaɣ nɛ ete kɛdɛɛka pʋcɔ nɛ ɛcɔnɩ tɔm susuu kediɣzaɣ yɔɔ. Mbʋ pɩ-tɔm koobu abalɩñɩnʋ pɩzɩɣ nɛ ɛyɔɔdɩ tɔm susuu kediɣzaɣ taa yɔ, pɩ-tɔm ɖɔɖɔ koobu halɩñɩnʋ pɩzɩɣ nɛ ɛyɔɔdɩ. Pɩfɛyɩ se ɛlakɩ ɛzɩ ɛwɩlɩɣ koobiya tɔm na, ɛlɛ eyele nɛ pala faawɩyɛ na. Ye ɛpɔzɩ koobu halɩñɩnʋ lɛlʋ se ɛtɩmɩ yɔ, pɩwɛɛ se koobu ɛnʋ ɖɔɖɔ ete kɛdɛɛka. Ye koobu abalɩñɩnʋ nɔɔyʋ ɛkɔm pʋwayɩ yɔ, pɩwɛɛ koobu halɩñɩnʋ eheyi-i se ɛkɔɔ nɛ ɛtɛzɩ kediɣzaɣ ŋga. Pɩwɛɛ se ɛgbɛyɛ taa Ɛsɔ sɛtʋ yɔɔ cɔnɩyʋ ɛmaɣzɩ wɛtʋ ndɩ ndɩ ndʋ tɩɩlakɩ ɖoŋ ɖoŋ yɔ tɩ-yɔɔ nɛ eheyi koobiya mbʋ pɩwɛɛ se pala yɔ, pɩsɩɣnɩ-wɛ nɛ pɩtaalabɩ-wɛ kiitaɣ ye wɛtʋ ndʋ tɩkɔma yɔ. Kpaɣ se koobu evebɩɣa wobi tɔm susuu kediɣzaɣ taa, ɛlɛ koobu halɩñɩnʋ nɔɔyʋ palɩzaa se ɛcɔnɩ kediɣzaɣ yɔɔ; mbʋ pʋyɔɔ yɔ ɛzʋtʋyaa maɣzɩɣ se evebɩɣa ŋga katɩtalɩta se kɔcɔnɩ kediɣzaɣ yɔɔ. Pɩlabɩ mbʋ yɔ, ɛgbɛyɛ taa Ɛsɔ sɛtʋ yɔɔ cɔnɩyʋ pɩzɩɣ nɛ eheyi koobu halɩñɩnʋ se ɛcɔnɩ kediɣzaɣ yɔɔ; ɛlɛ kediɣzaɣ tɛŋ lɛ, ɛpɔzɩ evebɩɣa ŋga se katɩmɩ ye ɛzʋtʋyaa ɩmaɣzɩ se kapɩzɩɣ nɛ katɩmɩ yɔ. Pɩpɩzɩɣ nɛ pɩla ɖɔɖɔ se koobu abalɩñɩnʋ nɔɔyʋ wɛ tɔm susuu kediɣzaɣ taa peeɖe, ɛlɛ pɔhɔm ɛ-nɩŋgbaaŋ nɛ nabʋyʋ yɔɔ lɛ ɛzʋtʋyaa ɖʋ-ɩ paɣtʋ se pɩtɩmʋna se ɛcɔnɩ kediɣzaɣ nakɛyɛ yɔɔ yaa ɛtɩmɩ ɛgbɛyɛ hɩɖɛ taa. Paa pɩfɛyɩ se ɛzʋtʋyaa iheyi mbʋ pɩ-yɔɔ pɔhɔm koobu ɛnʋ ɛ-nɩŋgbaaŋ yɔ, pɩwɛɛ se peheyi koobiya halɩñɩma mba se paa koobu abalɩñɩnʋ ɛnʋ ɛwɛ kediɣzaɣ taa yɔ pʋmʋnaa se pɔcɔnɩ kediɣzaɣ yɔɔ nɛ patɩmɩ ɖɔɖɔ. Pʋmʋnaa se ɛzʋtʋyaa iheyi koobu abalɩñɩnʋ ɛnʋ avema wena paɖʋwa se koobiya halɩñɩma ɩcɔnɩ tɔm susuu kediɣzisi yɔɔ yɔ.

Tɔm susuu kediɣzisi taa lɛ, ŋpɩzɩɣ nɛ ŋlabɩnɩ wondu tʋnɛ tʋmɩyɛ:

Tɔm ndʋ pamawa se tɩsɩnɩ-ɖʋ nɛ ɖɩpaɣzɩ kɛdaɣ nɛ tɩwɛɛ Kewiyaɣ Ɛsɔ Sɛtʋ Tʋmɩyɛ takayaɣ taa yɔ.
jw.org yɔɔ video kɩbaŋʋ ŋgʋ kɩpɩzɩɣ nɛ kɩwazɩ tɔm susuu taa yɔ.
Tɔm susuu hɔɔlʋʋ kɩbaŋʋ nakʋyʋ, ɛzɩ kɔɔnɔɔ tɔm, tɔm ndʋ pɩwɛɛ se ɛyʋ ɛyɔɔdɩ nɛ pɩsɩnɩ-ɩ nɛ ɛla pɩsɩ nɛ ŋna-ɩ yɔ, haɖɛ faaa ɖʋtʋ tɔm ye nɔɔyʋ etisaa nɛ ɛmʋ takayaɣ nakɛyɛ yɔ.
Bibl mayaɣ ŋga kakpazɩɣ ɖoŋ tɔm susuu hɔɔlʋʋ taa yɔ.
Tɔm ndʋ tɩlabɩ tɔm susuu taa mi-kooka taa yaa ndʋ tɩlaba nɛ pama-tʋ ɖa-takayɩsɩ taa yɔ.
Kewiyaɣ Ɛsɔ Sɛtʋ Tʋmɩyɛ ñʋʋ nakʋyʋ taa tɔm.
Ɛsɔ sɛtʋ kediɣzaɣ hɔɔlʋʋ nakʋyʋ taa tɔm, ndʋ pɔyɔɔdaa pitileɖita yɔ.
Tɔm susuu tɔm ndʋ pɔyɔɔdɩ Feŋuu Tilimiye naɖɩyɛ taa yɔ.
Tɔm susuu tɔm ndʋ tɩwɛ ɖa-takayɩsɩ nasɩyɩ taa yɔ ɛzɩ École du ministère nɛ “Viens, suis-moi” takayɩsɩ mbʋ yɔ.
jw.org yɔɔ hɔɔlʋʋ ŋgʋ kɩpɩzɩɣ nɛ kɩwazɩ tɔm susuu taa yɔ.
Traduction du monde nouveau kɩfalʋʋ hɔɔlʋʋ ŋgʋ papɩzɩɣ nɛ palabɩnɩ tʋmɩyɛ tɔm susuu taa yɔ.
Ɛzɩma ɖɩpɩzɩɣ nɛ ɖa nɛ ɛyaa nabɛyɛ ɖɩpaɣzɩ kɛdaɣ ɖo-kooka taa yɔ ɛzɩ: mba paatisiɣ se Ɛsɔ wɛɛ yɔ, mba petisiɣ evolution yɔɔ yɔ, Hindu waa yaa Boudhiste waa.
Ɛzɩma ɖɩpɩzɩɣ nɛ ɖicosi alɩwaatʋ ndʋ nɔɔyʋ yɔɔdʋʋ tɔm natʋyʋ se ɛsɩɩ ɖa-faawɩyɛ tɩnaɣ yɔ.
Ɛzɩma ɖɩpɩzɩɣ nɛ ɖɩsɩna weyi ɖa nɛ ɖɩlɩwa yɔ nɛ ɛwɛɛ niye kpaɣ ɖɩɣa nɛ ŋwolo ɖɩɣa tɔm susuu taa yɔ.
Ɛzɩma ɖɩpɩzɩɣ nɛ ɖɩla alɩwaatʋ ndʋ ɖɩkatɩɣ weyi ɛɛyɔɔdʋʋ ɖa-kʋnʋŋ yɔ.
Ɛzɩma ɖɩpɩzɩɣ nɛ ɖɩlɩzɩ aseɣɖe tɔm susuu wɛtʋ natʋyʋ taa yɔ; ɛzɩ tʋmɩyɛ taa tɔm susuu, kaŋgalaafu yɔɔ tɔm susuu, samaɣ taa tɔm susuu, pɩsɩ nɛ ŋna-ɩ waa labʋ nɛ Bibl kpɛlɩkʋʋ.
Tɔm ndʋ tɩ-yɔɔ pɩwɛɛ se ɖɩtɔzɩ ɛzɩ camɩyɛ lakasɩ, tɔm taa nɩʋ, lɩmaɣza kɩbana wɛnʋʋ hɔɔlʋʋ taa mbʋ yɔ.