Ðɩwɛɛ niye tɔm susuu taa nɛ pɩkɩlɩ: Ðisusi tɔm mba paayɔɔdʋʋ ɖa-kʋnʋŋ yɔ

Ɛbɛ yɔɔ pɩcɛyaa? Yehowa sɔɔlaa se piɖeni “paa ɛjaɖɛ nɖɩ” lɛ ɖɩ-taa ɛyaa fezuu taa. (Tʋma 10:34, 35) Mbʋ labɩna nɛ Yesu yɔɔdɩ se posusi laŋhɛzɩyɛ tɔm “ɛjaɖɛ kpeekpe taa” nɛ ‘ɛyaa kpeekpe nɩɩ.’ (Mat. 24:14) Zekariya ñaayɔɔdaa se “ajɛɛ yɔɔdasɩ kpeekpe taa ɛyaa” kaɣ tisuu tɔm ndʋ tɩ-yɔɔ. (Zek. 8:23) Apostoloo Yohanɛɛsɩ ñɔyɔɔdɩ ɛ-natʋ tɔm taa se ɛyaa mba pakaɣ hiɣu ñʋʋ yabʋ nazɩm sɔsɔm taa yɔ, palɩnɩ “ajɛɛ kpeekpe nɛ waŋ kpeekpe nɛ ɛyaa kpeekpe taa, nɛ yɔɔdasɩ kpeekpe taa.” (Natʋ 7:9, 13, 14) Pɩtɩŋnɩ tɔm ndʋ ɖɩtɛm yɔɔdʋʋ yɔ, tɩ-yɔɔ lɛ, ye ɖɩkatɩ nɔɔyʋ ɖo-kooka taa nɛ ɛɛyɔɔdʋʋ ɖa-kʋnʋŋ yɔ, pɩwɛɛ se ɖɩcɛyɩ ɖa-tɩ nɛ ɖisusi-i tɔm.