Sɩnɩ yʋlʋmaa nɛ patɩlɩ Yehowa
1. Ɛbɛ Yesu laba nɛ ɛwɩlɩ se ɛnaɣ yʋlʋmaa pʋtɔdɩyɛ?
1 Pɩkazɩ avema pazɩ yem na se Yesu ɛsɩ. Ɛlɩnɩ Yeriikoo tɛtʋ taa nɛ ɛɖɛɣ lɛ, yʋlʋmaa naalɛ tendiɣ-i nɛ pamakɩ kubusi se: “Kɩbaɣlʋ, na ɖa-pʋtɔdɩyɛ!” Paa Yesu ɛɛmaɣzaɣ takɩm sɔsɔm mbʋ pɩɖaŋɩ-ɩ yɔ pɩ-yɔɔ yɔ, Yesu sɩŋaa, ɛyaa yʋlʋmaa mba nɛ ekuli pɛ-ɛza. (Mat. 20:29-34) Ɛzɩma ɖɩpɩzɩɣ nɛ ɖɩna yʋlʋmaa pʋtɔdɩyɛ ɛzɩ Yesu kaalabʋ yɔ?
2. Ɛzɩma ɖɩpɩzɩɣ nɛ ɖisusi tɔm yʋlʋm samaɣ taa?
2 Sɩnɩ-wɛ: Ye ŋkatɩ yʋlʋm nɔɔyʋ samaɣ taa mbʋ yɔ yɔ, heyi-i ña-hɩɖɛ nɛ ŋsɩnɩ-ɩ. Pepeɣziɣ-wɛ ɖoŋ ɖoŋ; ye mbʋ sɔɔndʋ pɩzɩɣ nɛ pɩkpa-ɩ kajalaɣ ɖeɖe. Ɛlɛ ye ŋwɩlɩɣ se ŋkɛ ɛ-taabalʋ nɛ ŋsɔɔlɩ ɛ-tɔm siŋŋ yɔ, piyeki nɛ sɔɔndʋ ɛtaatasɩ-ɩ kpaʋ. Taasɔɔ se yʋlʋmtʋ wɛ ndɩ ndɩ; ye mbʋ, pʋcɔ nɛ ŋsɩnɩ yʋlʋm nɔɔyʋ lɛ, ñɩnɩ nɛ ŋna se yʋlʋmtʋ ndʋ ɛwɛna. Ŋsɩɣnɩ-ɩ pɩtɛ lɛ, ŋpɩzɩɣ nɛ ŋheyi-i se ŋkɛ mba pawɩlɩɣ ɛyaa Bibl taa tɔm ɛjaɖɛ kpeekpe yɔɔ yɔ, pa-taa nɔɔyʋ. Kalɩ-ɩ mayaɣ nakɛyɛ ɛzɩ Keɣa 145:8 yaa Izaayii 35:5, 6. Ye ɛkalɩɣ Braille masɩ yɔ, pɔzɩ-ɩ nɛ ŋna se ɛsɔɔlaa se ŋkɔnɩ-ɩ Braille takayaɣ nakɛyɛ nɛ kasɩnɩ-ɩ nɛ ɛtɩlɩ Bibl nɛ pɩkɩlɩ. Ŋpɩzɩɣ ŋsɩnɩ-ɩ nɛ ɛkpaɣ tɔm kiwelisitu jw.org yɔɔ. Ye ɛ-tɛ ordinatɛɛrɩ ɛwɛnɩ mbʋ piyeki nɛ pɩkalɩɣ tɔm ɖoŋ kɩ-yɔɔ yɔ, ɛpɩzɩɣ nɛ ɛkpaɣ takayɩsɩ nzɩ sɩwɛ jw.org yɔɔ nɛ pɩkpɛndɩnɩ takayɩsɩ nzɩ papɩzɩɣ nɛ pakpaɣ RTF taa yɔ. Cɔnɩ aɖakaɣ “Ŋŋsɩɣnɩ yʋlʋm nɔɔyʋ lɛ . . .”
3. Ɛzɩma ɖɩpɩzɩɣ nɛ ɖɩñɩnɩ yʋlʋmaa ɖo-kooka taa?
3 Ñɩnɩ yʋlʋmaa: Ðɩɩlɩzɩɣ aseɣɖe kpaɣ ɖɩɣa nɛ ŋwolo ɖɩɣa lɛ, ɖɩɩkatɩɣ yʋlʋmaa ɖoŋ ɖoŋ mbʋ pʋyɔɔ yɔ sɔɔndʋ kpaɣ pa-taa sakɩyɛ se pɔyɔɔdɩnɩ agɔma. Ye mbʋ, pʋpɔzɩ pana ñaɣʋ siŋŋ pʋcɔ nɛ ɖɩkatɩ yʋlʋmaa nɛ ɖɩlɩzɩ-wɛ aseɣɖe. (Mat 10:11) Ŋwɛnɩ taabalʋ nɔɔyʋ sukuli taa yaa tʋmɩyɛ taa nɛ ɛkɛ yʋlʋm na? Ñaɣ pana nɛ ŋyɔɔdɩnɩ-ɩ. Ye yʋlʋmaa sukuli nakʋyʋ ɛwɛ ño-kooka taa yɔ, woni takayɩsɩ nɛ ŋha nɛ pasɩɩ-sɩ takayɩsɩ ɖɩzɩyɛ. Ŋsɩm nɔɔyʋ nɛ ɛ-hɔʋ taa tʋ nɔɔyʋ yʋlʋmaa? Agbaa naayɛ wɛ ño-kooka taa nɛ asɩɣnɩ yʋlʋmaa na? Yaa yʋlʋmaa ɖɩsɩ nasɩyɩ wɛ ño-kooka taa? Heyi ɛyʋ ɛnʋ yaa ɛyaa mʋyʋ yaa sukuli ñʋʋdʋ se Yehowa Aseɣɖe Tɩnaa sɔɔlaa kpem se pasɩnɩ yʋlʋmaa nɛ ŋheyi-wɛ se ye pɔsɔɔlaa yɔ, ŋkɔŋnɩ-wɛ Braille takayɩsɩ nasɩyɩ yaa tɔm kiwelisitu natʋyʋ. Wɩlɩ-ɩ Bibl taa lidaʋ tɔm ndʋ tɩtɔŋ se pɩkazɩ pazɩ lɛ, yʋlʋmaa naɣ yɔ. Pɩtɩla pɩwɛɣ ɖeu se ŋwɩlɩ-ɩ video ŋgʋ kɩtɔŋ se “Sans elle, je serai comme perdu” ŋgʋ kɩyɔɔdʋʋ yʋlʋm nɔɔyʋ tɔm yɔ, yʋlʋm ɛnʋ ɛɛwɛnɩ Bibl Braille taa nɛ pɩwazɩ-ɩ pɩdɩɩfɛyɩ. Ye ŋyɔɔdʋʋ mbʋ pɩ-yɔɔ ŋwoba yɔ, pɩhaɣ-ŋ nʋmɔʋ nɛ ŋkatɩ yʋlʋmaa.
4. Janet kɩɖaʋ kpɛlɩkɩɣ-ɖʋ lɔŋ weyi?
4 Payaɣ koobu halɩñɩnʋ yʋlʋm nɔɔyʋ se Janet, ewobi yʋlʋmaa ɖɩɣa nakɛyɛ taa. Ɛ nɛ halʋ nɔɔyʋ papaɣzɩ faawɩyɛ labʋ. Janet heyi-i se: “Yesu kuli yʋlʋmaa nabɛyɛ ɛza se ɛwɩlɩ mbʋ ɛkaɣ labʋ yʋlʋmaa tɩŋa cee wayɩ yɔ.” Pa-naalɛ pakalɩ Natʋ 21:3, 4 nɛ Janet lɩzɩ-ɩ ɛzɩma Ɛsɔ Kewiyaɣ kaɣ labʋ se tɔm ndʋ tɩkɔɔ pɩ-taa yɔ, pɩ-taa. Halʋ su ɖiɣ ɖiɣ nɛ pʋwayɩ lɛ ɛyɔɔdɩ se: “Wiɖiyi mantɩnɩɩ tɔm ndʋ nɛ yʋlʋm nɔɔyʋ nɔɔ taa. Ɛyaa mba panaɣ yɔ, pamaɣzɩɣ se mba payʋlʋmaa yɔ, nabʋyʋ pa-maɣmaɣ yaa pɔ-cɔzɔnaa laba nɛ piyoo-wɛ.” Janet tiyini-i lien ŋgʋ kiwokini-i Ndʋ Bibl Wɩlɩɣ taa yɔ. Lɛɛlɛɛyɔ lɛ pɛwɛɛ nɛ pɛkpɛlɩkɩɣ Bibl tam nabʋlɛ kpɩtaʋ taa.
5. Paa ɖɩɩpɩzɩɣ se ɖikuli yʋlʋmaa ɛza ɛzɩ Yesu kaalabʋ yɔ, wazasɩ nzɩ sɔɔlɩm mbʋ ɖɩwɩlɩ yʋlʋmaa yɔ pɩpɩzɩɣ nɛ pɩkɔna?
5 Toovenim ɖɩɩpɩzɩɣ nɛ ɖikuli yʋlʋmaa ɛza ɛzɩ Yesu kaalabʋ yɔ, ɛlɛ ɖɩpɩzɩɣ nɛ ɖɩsɩnɩ mba ɛjaɖɛ ɖɩnɛ ɖi-wiyaʋ huuzi pɛ-ɛza nɛ pa-lɩmaɣza yɔɔ yɔ, pɩkpɛndɩnɩ yʋlʋmaa maɣmaɣ se panɩɩ toovenim mbʋ pɩwɛ Ɛsɔtɔm taa yɔ, tɩ-taa camɩyɛ. (2 Kɔr. 4:4) Yesu kuli Yeriikoo cɔlɔ yʋlʋmaa naalɛ ɛza mbʋ pʋyɔɔ yɔ pɔ-tɔm ‘kaalabɩ-ɩ pʋtɔdɩyɛ.’ (Mat. 20:34) Ye ɖɩwɩlɩɣ se ɖɩsɔɔlɩ yʋlʋmaa yɔ, ɖɩpɩzɩɣ nɛ ɖɩsɩnɩ pa-taa nabɛyɛ nɛ patɩlɩ Yehowa weyi ɛkaɣ kuluu yʋlʋmaa ɛza tam yɔ.