Masɩ cikpesi nzɩ sɩlɛɣzɩ ɛyaa wezuu caɣʋ yɔ

1^er juin 1912 tɛ Feŋuu Tilimiye yɔɔdaa se: “Paa pɩɩla ɛzɩma yɔ, ɛyaa mba pakalɩɣ ɖa-takayɩsɩ yɔ pa-taa sakɩyɛ sɩm ɛyaa nabɛyɛ se pɛkɛ yʋlʋmaa. Papɩzɩɣ nɛ pamʋ takayɩsɩ falaa nɛ pakalɩ . . . Takayaɣ kanɛ, palɩzɩ-kɛ yʋlʋmaa kʋnʋŋ taa se yʋlʋmaa ɩpɩzɩ nɛ pakalɩ.” Feŋuu Tilimiye nɖɩ ɖɩtasɩ yɔɔdʋʋ se: “Ɛyaa mba pɛkɛ yʋlʋmaa yɔ, pa-taa sakɩyɛ taa labɩ leleŋ siŋŋ alɩwaatʋ ndʋ pakalaa nɛ panɩɩ se lɛɣzɩtʋ kɩbandʋ kaɣ kɔm ɛjaɖɛ yɔɔ yɔ.”

Alɩwaatʋ ndʋ pama tɔm tʋnɛ yɔ, Aŋglɛɛ kʋnʋŋ taatɩɩlɩzɩtɩ yʋlʋmaa masɩ nzɩ pɩwɛɛ se palabɩnɩ tʋmɩyɛ ɛjaɖɛ kpeekpe yɔɔ yɔ. Paa mbʋ yɔ, Yehowa Aseɣɖe Tɩnaa ñaatɛm paɣzʋʋ labɩnʋʋ tʋmɩyɛ yʋlʋmaa masɩ nɛ pɩsɩɣnɩ yʋlʋmaa se patɩlɩ Bibl taa toovenim tɔm pa-kʋnʋŋ taa. Nɛ ɖiɖiɣni labʋ mbʋ halɩ nɛ sɔnɔ! Lɛɛlɛɛyɔ, ɖɩlɩzɩɣ takayɩsɩ yʋlʋmaa kʋnʋmɩŋ weyi ɩ-taa yɔ, ɩcɛzɩ 50. Ɛzɩma ɖɩlakɩ nɛ ɖɩlɩzɩɣ-sɩ?

Matʋ nɛ ɛzɩma ɖɩlakɩ se papɩzɩ pakalɩ-tʋ nɛ nesi yɔ

Mbʋ ɖɩcalɩɣ labʋ yɔ lɛ se ɖɩlɛɣzɩɣ tɔm nɛ ɖɩma-tʋ nɛ yʋlʋmaa masɩ. Michael Millen lakɩ tʋmɩyɛ Patɛrsɔɔnɩ, Niyuu Yɔrɩkɩ Betɛɛlɩ tʋmɩyɛ nɖɩ ɖɩcɔŋnɩ ɛzɩma pɩɖɔŋ nɛ pamaɣ tɔm yɔ ɖɩ-taa. Ɛyɔɔdaa se: “Ðooo lɛ, ordinatɛɛrɩ yɔɔ wonuu (logiciel) ŋgʋ ɖɩlakaɣnɩ tʋmɩyɛ nɛ ɖɩlɛɣzɩɣ matʋ yʋlʋmaa kʋnʋŋ taa yɔ, pɩtaakɛ Yehowa Aseɣɖe Tɩnaa lɩzɩnɩ-kʋ, nɛ ɖɩtaapɩzɩɣ ɖɔɖɔ se ɖɩtɩŋnɩ kɩ-yɔɔ nɛ ɖɩlɛɣzɩ matʋ yʋlʋmaa kʋnʋŋ weyi payɩ ɖɩsɔɔlaa ɩ-tɩŋa ɩ-taa. Lɛɛlɛɛyɔ lɛ, ɖɩlakɩnɩ tʋmɩyɛ ordinatɛɛrɩ yɔɔ wonuu ŋgʋ ɖɛ-ɛgbɛyɛ maɣmaɣ lɩzaa nɛ pɩsɩɣnɩ tɔm ɖɛzʋʋ tʋmɩyɛ nɛ payaɣ-kʋ se Watchtower Translation System yɔ. Ðɩtɩŋɩɣnɩ wonuu ŋgʋ kɩ-yɔɔ nɛ ɖɩɖɛzɩɣ tɔm yʋlʋmaa kʋnʋmɩŋ sakɩyɛ taa. Mamaɣzɩɣ se nabɛyɛ fɛyɩnɩ wonuu kʋnɛ kɩ-ɖɔndɩ ɖoli nɛ pɩtasɩnɩ ɖɛ-ɛgbɛyɛ.”

Pɩtasɩnɩ se ɖɩɖɛzɩɣ takayaɣ nakɛyɛ taa tɔm yʋlʋmaa kʋnʋŋ taa lɛ, ɖɩkɛdɩɣ ɖɔɖɔ kɩlɛmɩŋ weyi ɩwɛ ka-taa yɔ, ɩ-yɔɔ tɔm yʋlʋmaa kʋnʋŋ taa. Kɩɖaʋ nakʋyʋ yɔ: Kɩlɛmʋʋ ŋgʋ kɩwɛ Nɩɩ wezuu leleŋ tam! takayaɣ huyuu yɔɔ yɔ, ɖɩkɛdɩ kɩ-yɔɔ tɔm ɛzʋnɔ: “Abalʋ nɔɔyʋ wɛɛ nɛ ɛɖɔŋ nʋmɔʋ nakʋyʋ taa, nɛ ɖɩnaɣ kɩ-kpɛnzɩ yɔɔ tɩŋ nɛ tɩŋ hɛtʋ kɩbandʋ, kajalanzɩ nɛ pʋŋ.” Jamshed kɛ yʋlʋm nɛ ɛkɛ ɛgbɛyɛ taa tʋmlaɖʋ nɛ nʋmɔʋ lɩzɩyʋ. Ɛyɔɔdaa se: “Kɩlɛmɩŋ yɔɔ tɔm ndʋ, tɩmʋ ñɩm siŋŋ mɛ-ɛsɩndaa.”

Ðɩlɛɣzɩɣ tɔm natʋyʋ nɛ ɖɩma-tʋ nɛ yʋlʋmaa masɩ nɛ pɩtɛ lɛ, ɖitiyini ɛgbɛyɛ pilinzi nzɩ sɩlakɩ yʋlʋmaa takayɩsɩ yɔ. Pɩtalɩɣ peeɖe lɛ, ɛgbɛyɛ pilinzi nzɩ sɩlabɩnɩ tʋmɩyɛ takayɩsɩ nzɩ sɩɩwɛɛkɩɣ lɔŋ nɛ sɩɩcɩyɩɣ lɛɛ lɛɛ paa palabɩnɩ-sɩ tʋmɩyɛ tam sakɩyɛ yɔ nɛ sɩma tɔm ndʋ, se pɩsa nɛ yʋlʋmaa pɩzɩ nɛ pakalɩ-tʋ nɛ nesi. Nɛ pʋwayɩ lɛ, pɛkpɛndɩ takayɩsɩ nzɩ nɛ pɩpɩsɩ takayaɣ kʋɖʋmaɣ, nɛ patɩŋnɩ nʋmɔŋ weyi ɩ-yɔɔ patɩɩtɩŋɩɣna nɛ petiyiɣni agbaa takayɩsɩ yɔ ɩ-yɔɔ nɛ petiyini-sɩ. Yaa papɩzɩɣ patɩŋnɩ waɖɛ nɖɩ yʋlʋmaa wɛna nɛ petiyiɣni-wɛ wondu falaa yɔ ɖɩ-yɔɔ nɛ petiyini-sɩ ye pɩsaŋ se pala mbʋ yɔ. Ye pɩpɔzʋʋ yɔ, ɛgbɛyɛ pilinzi pɩzɩɣ nɛ sɩla ɖʋtʋ nɛ sitiyini takayɩsɩ nzɩ lɛɛ lɛɛ koobiya mba pɛkɛ yʋlʋmaa yaa paanaɣ camɩyɛ yɔ se pɩsa nɛ pɛwɛɛnɩ mbʋ pɩpɔzʋʋ yɔ nɛ pala kediɣzisi.

Pɩpɔzʋʋ alɩwaatʋ nɛ liidiye sakɩyɛ pʋcɔ nɛ ɖɩpɩzɩ ɖɩla pɩtɩŋa payɩ mbʋ yɔ. Toovenim lɛ, ɖɛ-tɛ menziini ŋgʋ palakɩnɩ takayɩsɩ nɛ kɩwɛ Wallkill, Niyuu Yɔrɩkɩ tɛtʋ taa yɔ, alɩwaatʋ ndʋ kɩkpakɩɣ nɛ kɩlɩzɩɣnɩ Biblwaa 50 000 yɔ, ndʋ ɖeyi ɖeyi kɩkpakɩɣ nɛ kalɩzɩnɩ Biblwaa 2 ɖeke yʋlʋmaa kʋnʋŋ taa. Aŋglɛɛ Biblwaa mba pɛwɛ yʋlʋmaa kʋnʋŋ taa yɔ, pa-taa paa ŋgʋ taa lɛ, hɔɔlɩŋ ndɩ ndɩ 25 wɛna. Nɛ wondu ndʋ pɩpɔzʋʋ se pakpaɣ nɛ palabɩnɩ hɔɔlɩŋ ɛnɩ yɔ, ti-liidiye cɛzɩ nɖɩ pakpakɩɣ nɛ palakɩnɩ Bibl kʋɖʋmʋʋ yɔ tam 123. Hɔɔlɩŋ ndɩ ndɩ 25 ɛnɩ ɩ-yɔɔ huyiŋ ɖeke kpakɩɣ liidiye dɔlaarɩwaa 150 (yaa 83 800FCFA) mbʋ yɔ!

Mba paɖʋʋ nesi nɛ palɩzɩɣ takayɩsɩ yʋlʋmaa kʋnʋŋ taa yɔ, lɩmaɣza wena pɛwɛnɩ pa-tʋmɩyɛ yɔɔ? Nadia lakɩ tʋmɩyɛ Afrika Hadɛ Kiŋ ɛgbɛyɛ piliŋa taa. Ɛyɔɔdaa se: “Ðo-koobiya halaa nɛ abalaa mba pɛkɛ yʋlʋmaa yaa paanaɣ camɩyɛ yɔ, wezuu caɣʋ fɛyɩ-wɛ kɛlɛʋ, pʋyɔɔ lɛ, mamaɣzɩɣ se pɩkɛ wazaɣ sɔsɔɔ se mala nabʋyʋ mbʋ pɩsɩɣnɩ-wɛ yɔ. Pɩtʋʋ fɛyɩ se Yehowa sɔɔlɩ-wɛ siŋŋ.”

Kpɛlɩkɩ yʋlʋmaa kʋnʋŋ kalʋʋ

Ɛlɛ ye yʋlʋm nɔɔyʋ ɛɛpɩzɩɣ yʋlʋmaa kʋnʋŋ kalʋʋ, ɛbɛ ɛpɩzɩɣ nɛ ɛla? Pɩlakɩ pɩnzɩ nasɩyɩ yɔ, ɖɩlɩzɩ takayaɣ nakɛyɛ nɛ payaɣ-kɛ se Kpɛlɩkɩ yʋlʋmaa kʋnʋŋ kalʋʋ, nɛ ka-taa lɛ, pama yʋlʋmaa masɩ nɛ pama ɖɔɖɔ tɔm maɣmaɣ. Palɩzɩ-kɛ se ɛyaa mba pɛ-ɛsa naɣ yɔ nɛ yʋlʋmaa pɛkpɛndɩ nɛ palabɩnɩ-kɛ tʋmɩyɛ. Hatʋ cabɩ takayaɣ ŋga ka-taa lɛ, paɖʋ wondu ndʋ yʋlʋmaa pɩzɩɣ palabɩnɩ tʋmɩyɛ nɛ pama yʋlʋmaa kʋnʋŋ yɔ. Weyi ɛkpɛlɩkɩɣ yʋlʋmaa kʋnʋŋ yɔ, ɛlakɩnɩ wondu ndʋ tʋmɩyɛ nɛ ɛ-maɣmaɣ ɛmaɣ paa yʋlʋmaa mayaɣ ŋga. Weyi ɛhayɩsɩɣ ɛ-tɩ yʋlʋmaa kʋnʋŋ maʋ taa yɔ, pɩsɩɣnɩ-ɩ se ɛɖɔkɩ paa mayaɣ ŋga lɛ ɛ-ñʋʋ taa, nɛ ye ɛtakɩ kɔ-yɔɔ pʋwayɩ nɛ e-nesi lɛ, eɖiɣzini-kɛ.

“Manpaɣzaa lɛ, ‘pɩfɛyɩ yebu’”

Ɛzɩma takayɩsɩ sɩnɛ sɩwazɩ koobiya yʋlʋmaa yaa koobiya mba paanaɣ camɩyɛ yɔ? Ernst wɛ Haiti ɛjaɖɛ taa, nɛ ewoki kediɣzisi, ɛlɛ ɛfɛyɩnɩ yʋlʋmaa kʋnʋŋ takayaɣ nakɛyɛ. Pʋyɔɔ lɛ, pahaɣ-ɩ tʋmɩyɛ naɖɩyɛ teokrasɩ sukuli taa lɛ, pɩwɛɛ se ɛɖɔkɩ ndʋ ɛkaɣ yɔɔdʋʋ yɔ tɩ-tɩŋa payɩ ɛ-ñʋʋ taa, nɛ tɔm cosuu hɔɔlʋʋ taa ɖɔɖɔ lɛ, pɩwɛɛ se ɛɖɔkɩ ndʋ ɛkaɣ cosuu yɔ ɛ-ñʋʋ taa paakalɩɣ tayʋʋ lɛ. Ɛyɔɔdaa se: “Ɛlɛ lɛɛlɛɛyɔ lɛ, manpɩzɩɣ mankpazɩ nesi nɛ moncosi tɔm alɩwaatʋ ndʋ mɔnsɔɔlaa yɔ. Toovenim taa lɛ, nɔɔ kʋɖʋmaɣ wɛ ma nɛ koobiya ɖɛ-hɛkʋ taa kpem. Fezuu taa tɔɔnaɣ kʋɖʋmaɣ ɖɩmʋʋ!”

Jan kɛ ɛgbɛyɛ taa ɛzʋtʋyʋ weyi ɛɛnaɣ camɩyɛ yɔ, nɛ ɛwɛ Otirisi ɛjaɖɛ taa; ɛcɔŋɩ Feŋuu Tilimiye nɛ ɛgbɛyɛ Bibl kpɛlɩkʋʋ yɔɔ nɛ ɛyɔɔdaa se: “Ða-takayɩsɩ taa tɔm taa tʋ camɩyɛ kpayɩ kpayɩ nɛ pɩkpaɖɩ yʋlʋmaa takayɩsɩ nzɩ mɛntɛm kalʋʋ nɛ pɩɖɛɛ yɔ. Kɩɖaʋ nakʋyʋ yɔ: Pɩwɛ kɛlɛʋ se ŋna takayaɣ hɔɔlʋʋ ŋgʋ kɩ-yɔɔ ŋwɛɛ yɔ, pɩ-tɛɛ tɔm nɛ paa kɩlɛmʋʋ ŋgʋ lɛ kɩ-yɔɔ tɔm.”

Payaɣ koobu halɩñɩnʋ nɔɔyʋ se Seon-ok, ɛkɛ nʋmɔʋ lɩzɩyʋ nɛ ɛwɛ Kooree Hadɛ Kiŋ ɛjaɖɛ taa; ɛkɛ yʋlʋm nɛ ndam. Ðooo lɛ, pʋcɔ nɛ ɛnɩɩ natʋyʋ kediɣzaɣ taa lɛ, pɩpɔzʋʋ se nɔɔyʋ ɛɖɔkɩ e-nesi nɛ ɛyɔɔdɩnɩ-ɩ ndamaa kʋnʋŋ, ɛlɛ lɛɛlɛɛyɔ ɛ-maɣmaɣ ɛpɩzɩɣ nɛ ɛkalɩɣ Bibl yʋlʋmaa kʋnʋŋ taa. Ɛyɔɔdaa se: “Yʋlʋmaa kʋnʋŋ takayɩsɩ lɛɛsɩ kalʋʋ wɛ kaɖɛ mbʋ pʋyɔɔ yɔ pɩɩnaɣ masɩ cikpesi ndɩ ndɩ nzɩ pɩpɔzʋʋ yɔ sɩtɩŋa, canzɩ tɩtʋʋzɩ yaa nabʋyʋ lɛ takayaɣ hayʋʋ kɩlɩ fɛlɛ fɛlɛ. Ɛlɛ Yehowa Aseɣɖe Tɩnaa lɛ, palakɩnɩ tʋmɩyɛ takayɩsɩ hatʋ ndʋ tɩwɛ kpɩzɩŋ nɛ pɩkpaɖɩ yɔ, pɩnaɣ masɩ cikpesi tɩŋa camɩyɛ, nɛ kalʋʋ wɛ-m kɛlɛʋ nɛ pɩkpaɖɩ.” Ɛtasɩ yɔɔdʋʋ se: “Ðooo lɛ, ye nɔɔyʋ ɛtɩsɩnɩ-m yɔ, maapɩzɩɣ nɛ mɛnkpɛlɩkɩ ɛgbɛyɛ takayaɣ nakɛyɛ. Lɛɛlɛɛyɔ lɛ, ma-maɣmaɣ mɛnkpɛlɩkɩɣ. Pɩhaɣ-m taa leleŋ kpem se manpɩzɩɣ nɛ mɔñɔɔzʋʋ kpɩtaʋ taa kediɣzisi tɩŋa nɛ moncosuu tɔm sɩ-taa. Mankalɩɣ ɖa-takayɩsɩ nzɩ payɩ sɩwɛ yʋlʋmaa kʋnʋŋ taa yɔ. Manpɩzɩɣ nɛ mɔntɔ se ‘maapɩzɩɣ nɛ meyele sɩ-kalʋʋ.’”

Ɛzɩ ɖa-takayɩsɩ lɛɛsɩ taa yɔ, ɖɩnaɣ tɔm tʋnɛ ɖa-takayɩsɩ nzɩ sɩwɛ yʋlʋmaa kʋnʋmɩŋ taa yɔ: “Paapɛdɩɣ takayaɣ kanɛ. Palɩzɩ-kɛ se kɛkɛ wondu ndʋ palakɩnɩ Bibl wɩlʋʋ tʋmɩyɛ ɛjaɖɛ kpeekpe yɔɔ yɔ tɩ-taa nakʋyʋ. Patɩŋɩɣnɩ sɔɔlɩm haɖɛ yɔɔ na nɛ palakɩ tʋmɩyɛ nɖɩ.” Ɩlabaɣ lɛ, ɛzɩma ɩtɩŋɩɣnɩ nʋmɔŋ weyi ɩ-tɔm pɔyɔɔdɩ donate.jw.org taa yɔ ɩ-yɔɔ nɛ ɩlakɩ haɖɛ yɔ pɩ-yɔɔ. Haɖɛ nɖɩ ɩlakɩ yɔ, ɖɩsɩɣna se ɛyaa kpeekpe ihiɣ fezuu taa tɔɔnaɣ, pɩkpɛndɩnɩ yʋlʋmaa nɛ mba paanaɣ camɩyɛ yɔ.