Maɣzɩnɩ pe-tisuu
1. Kpaɣnɩ 19 octobre kpɩtaʋ lɛ, takayaɣ ŋga taa ɖɩkaɣ tazʋʋ ɛgbɛyɛ taa Bibl kpɛlɩkʋʋ kediɣzaɣ taa?
1 Kpaɣnɩ 19 octobre kpɩtaʋ taa lɛ, pakaɣ paɣzʋʋ takayaɣ ŋga payaɣ se Maɣzɩnɩ pe-tisuu yɔ, ka-taa tazʋʋ ɛgbɛyɛ taa Bibl kpɛlɩkʋʋ kediɣzaɣ taa. Takayaɣ ŋga kɔyɔɔdʋʋ abalaa nɛ halaa 14 nɛ tisuu mbʋ paawɛna yɔ, pɩ-tɔm. Pama takayaɣ ŋga maʋ mbʋ yɔ, pɩsɩɣnɩ-ɖʋ se ɖɩna ɛyaa mba ɛzɩ pɛwɛ wezuu yɔ, kasɩɣnɩ-ɖʋ ɖɔɖɔ se ɖɩtɩlɩ tɩlasɩ nzɩ paakatɩ Yehowa sɛtʋ taa yɔ. Takayaɣ ŋga kawɩlɩɣ ɖɔɖɔ lɔŋ weyi ɛyaa mba, pɔ-tɔm pɩzɩɣ nɛ pɩkpɛlɩkɩ-ɖʋ sɔnɔ yɔ.—Ebr. 6:12.
2. Yɔɔdɩ Maɣzɩnɩ pe-tisuu takayaɣ tɛ wɛtʋ natʋyʋ tɔm.
2 Kɛ-wɛtʋ: Anjaʋwaa ndɩ ndɩ wɛ takayaɣ ŋga ka-taa nɛ pawɩlɩɣ-ɖʋ alɩwaatʋ nɛ lona wena a-taa Bibl taa ɛyaa mba paacaɣ wezuu yɔ. Pɩtasɩ lɛ, paa ñʋʋ ŋgʋ kɩ-taa lɛ, aɖakaɣ nakɛyɛ wɛɛ nɛ payaɣ-kɛ se: “Maɣzɩ tɔm tʋnɛ tɩ-yɔɔ . . . ;” kasɩɣnɩ-ɖʋ se ɖɩmaɣzɩ tɔm ndʋ ɖɩkpɛlɩkaa yɔ, tɩ-yɔɔ nɛ ɖɩna ɛzɩma ɖɩpɩzɩɣ nɛ ɖɩɖɔ lɔŋ weyi ɖɩkpɛlɩkaa yɔ, ɩ-yɔɔ yɔ. Tɔlɩm ndɩ ndɩ tɛ anjaʋwaa sakɩyɛ wɛ takayaɣ ŋga ka-taa nɛ pasɩɣnɩ-ɖʋ se ɖɩmaɣzɩ ka-taa kɛdɛsɩ yɔɔ camɩyɛ.
3. Ɛbɛ ɖɩpɩzɩɣ ɖɩla nɛ takayaɣ kanɛ kɛ-kpɛlɩkʋʋ wazɩ-ɖʋ?
3 Ɛzɩma kapɩzɩɣ nɛ kawazɩ-ŋ? Takayaɣ ŋga Nɔɔɖɛyaa Ɛgbɛyɛ mawa nɛ kɛwɛɛ kajalaɣ hatʋ yɔɔ yɔ, keseɣtiɣ-ɖʋ nɛ kɔtɔŋ se: “Maɣzɩ tɔm ndʋ ŋkalɩɣ yɔ, tɩ-yɔɔ camɩyɛ, ɖʋ ña-tɩ mbʋ piɖiɣni labʋ yɔ, pɩ-taa. Ñaɣ pana nɛ ŋɖʋ ña-tɩ Bibl taa ɛyaa mba po-lone taa. Maɣzɩ nɛ ŋna se ye ŋŋwɛ po-lone taa yɔ, ŋŋlabɩ ɛzɩ palabʋ yɔ?” Toovenim, ye pɔtɔm se ɖɩmaɣzɩ mbʋ pɩlakɩ yɔ, pɩ-yɔɔ yɔ, pɩtɩwɩlɩ se ɖuluki tɔm kadadayaɣ, ɛlɛ peseɣti-ɖʋ se ɖɩmaɣzɩ nɛ ɖɩna ndʋ Bibl kɛdaɣ ŋga kɔyɔɔdʋʋ yɔ nɛ ɖɩnɩɩ mbʋ pɩtalɩ Bibl taa ɛyaa mba yɔ, pɩ-taa. Pʋcɔ nɛ ɖɩla mbʋ lɛ, pʋpɔzʋʋ se ɖɩka ɖa-lɩmaɣza tɔm ndʋ tɩ-yɔɔ. (Neh. 8:8) Ye kpɛlɩkʋʋ nabʋyʋ ɛpaɣzɩɣ ñʋʋ nakʋyʋ hɛkʋ taa yɔ, kpɛlɩkʋʋ yɔɔ cɔnɩyʋ ɛkpaɣ kɛlɛmwaa 30 piwolo 60 nɛ ecuuzini mbʋ paatɛm kpɛlɩkʋʋ kpɩtaʋ ŋgʋ kɩɖɛwa yɔ, kɩ-taa. Ye kpɛlɩkʋʋ ɛɛtɛzɩɣnɩ “Maɣzɩ tɔm tʋnɛ tɩ-yɔɔ . . .” tɛ aɖakaɣ yɔ, pɩwɛɣ ɖeu se kpɛlɩkʋʋ yɔɔ cɔnɩyʋ ɛpɔzɩ tɔm kʋyʋmtʋ yaa tɔm naalɛ nɛ ecuuzi tɔm ndʋ pɛkpɛlɩkaa yɔ, tɩ-taa.
4. Ɛbɛ yɔɔ pʋpɔzaa se ɖɩkpɛlɩkɩ Maɣzɩnɩ pe-tisuu takayaɣ?
4 Ɛjaɖɛ nɖɩ ɖɩ-taa ɖɩwɛɛ yɔ, ɖɩtɩŋɩɣnɩ nʋmɔŋ ndɩ ndɩ yɔɔ nɛ ɖɩñɩnɩɣ paa ɖooye se ɖɩla nɛ ɖe-tisuu hɛɛ pazɩ pazɩ. Takayaɣ kanɛ nɛ Feŋuu Tilimiye taa ñʋŋ weyi ɩ-taa palɩzɩnɩ ka-taa tɔm yɔ, pɛkɛnɩ Yehowa kʋjɔʋ ŋgʋ kɩsɩɣnɩ-ɖʋ se ɖɩkpazɩ ɖe-tisuu ɖoŋ yɔ. (Yak. 1:17) Paakpɛlɩkɩɣ takayaɣ kanɛ lɛ, ɖɩñaɣ pana nɛ ɖiwolo ɛgbɛyɛ taa Bibl kpɛlɩkʋʋ kediɣzisi tɩŋa nɛ ɖicosi tɔm; mbʋ yekina nɛ pɩwazɩ-ɖʋ pɩdɩɩfɛyɩ.