Ðɩwɛɛ niye tɔm susuu taa nɛ pɩkɩlɩ: Ðɩha Ndʋ Bibl Wɩlɩɣ takayaɣ

Ɛbɛ yɔɔ pɩcɛyaa? Ða-takayɩsɩ tɩŋa taa lɛ, Ndʋ Bibl Wɩlɩɣ takayaɣ kɛnɩ wonuu ŋgʋ ɖɩkpɛlɩkɩɣnɩ ɛyaa Bibl nɛ pɩkɩlɩ yɔ. Ɛlɛ pʋcɔ nɛ ɖɩkpɛlɩkɩnɩ ɛyaa takayaɣ ŋga lɛ, pɩwɛɛ se ɖɩha-wɛ kɛ. Ye mbʋ pɩwɛɛ se ɖa-tɩŋa ɖɩñaɣ pana nɛ ɖɩwɛɛ niye nɛ ɖɩpɩzɩ nɛ ɖɩha Ndʋ Bibl Wɩlɩɣ takayaɣ ɖɔ-tɔm susuu taa. (Adu. 22:29) Ðɩpɩzɩɣ ɖɩtɩŋnɩ nʋmɔŋ ndɩ ndɩ yɔɔ nɛ ɖɩha-kɛ, ɛlɛ pɩwɛɛ se paa tɔm susuyu weyi lɛ, ɛtɩŋnɩ nʋmɔʋ ŋgʋ kɩwɛ-ɩ ɖeu nɛ pɩkɩlɩ yɔ, kɩ-yɔɔ.

Ɛzɩma pɩwɛɛ se ɖɩla?

Pɔzɩ ɖɩɣdʋ tɔm kɩbandʋ ndʋ tɩ-yɔɔ ŋpɩzɩɣ nɛ ŋtɩŋna nɛ ŋwoni-i takayaɣ ñʋʋ nakʋyʋ taa yɔ. Halɩ ŋpɩzɩɣ nɛ ŋlɩzɩ tɔm pɔzʋʋ mbʋ pɩwɛ paa ñʋʋ ŋgʋ lɛ, kɩ-ɖɩbazɩyɛ yɔ. Ðɩɣdʋ cosuu nɛ pɩtɛ lɛ, ŋkalɩ Bibl mayaɣ ŋga kamʋnaa yɔ nɛ pʋwayɩ lɛ, ŋwɩlɩ-ɩ tayʋʋ mbʋ picosuu tɔm ndʋ tɩ-yɔɔ yɔ nɛ ña nɛ ɩ ɩtazɩ pɩ-taa pazɩ.
Ŋpɩzɩɣ ɖɔɖɔ nɛ ŋkalɩ ɖɩɣdʋ takayaɣ taa kɔɔnɔɔ tɔm nɛ ye tɔm ndʋ titukuni-i yɔ, wɩlɩ-ɩ takayaɣ taa ɖenɖe pocosi Bibl taa tɔm pɔzʋʋ yɔɔ yɔ. Ðɩkpaɣ kɩɖaʋ nakʋyʋ: Ŋpɩzɩɣ nɛ ŋyɔɔdɩ kɩdɛkɛdɩm lakasɩ nasɩyɩ nzɩ sɩlaba nɛ ɛyaa yɔɔdʋʋ sɩ-tɔm yɔ nɛ ŋheyi-i se lakasɩ nzɩ siyeba nɛ ɛyaa pɔzʋʋ pa-tɩ tɔm ndʋ tɩwɛ hɔɔlʋʋ 3 taa yɔ. Ŋpɩzɩɣ ɖɔɖɔ ŋtɔ se ŋwɛɛ nɛ ŋwoki ño-kooka taa mba cɔlɔ se ŋheyi-wɛ cee wayɩ tɔm kɩbandʋ natʋyʋ. Pʋwayɩ lɛ, ŋwɩlɩ-ɩ kɩlɛmɩŋ weyi ɩwɛ hɔɔlɩŋ 4-5 yɔɔ yɔ nɛ ŋpɔzɩ-ɩ se: “Lidaʋ tɔm ndʋ ŋsɔɔlaa se tɩla?” Ŋpɩzɩɣ ɖɔɖɔ nɛ ŋtɔ se ŋwɛɛ nɛ ŋwoki ɛyaa cɔlɔ se ŋsɩnɩ-wɛ nɛ pocosi tɔm kɩcɛyɩtʋ ndʋ pɔpɔzʋʋ pa-tɩ pe-wezuu caɣʋ taa yɔ. Pʋwayɩ lɛ, ŋwɩlɩ ɖɩɣdʋ tɔm pɔzʋʋ mbʋ pɩwɛ hɔɔlʋʋ 6 tɛ kɛdɛzaɣ hɔɔlʋʋ yɔɔ yɔ nɛ ŋpɔzɩ-ɩ se ɛlɩzɩ tɔm pɔzʋʋ mbʋ pɩkɩlɩ-ɩ kɛdɩnʋʋ yɔ.
Ŋpɩzɩɣ ɖɔɖɔ nɛ ŋheyi ɖɩɣdʋ kpaagbaa se ŋsɔɔlaa se ña nɛ ɩ ɩkpɛlɩkɩ Bibl. Ŋpɩzɩɣ nɛ ŋtɔ se: “Ðɩwɛɛ nɛ ɖɩwɩlɩɣ ɛyaa takayaɣ kanɛ; ŋga ɖɩkpɛlɩkɩɣnɩ Bibl. Ŋtɛm-kɛ naʋ wiɖiyi yaa we? [Ha-ɩ alɩwaatʋ nɛ ecosi.] Ye ŋwɛnɩ alɩwaatʋ pazɩ yɔ, manpɩzɩɣ nɛ mawɩlɩ-ŋ ɛzɩma ŋpɩzɩɣ nɛ ŋlabɩnɩ tʋmɩyɛ ña-maɣmaɣ ñe-Bibl nɛ ŋkpɛlɩkɩ takayaɣ kanɛ yɔ.”

Labɩnɩ tʋmɩyɛ lɔŋ tasʋʋ pʋnɛ fenaɣ kanɛ:

Ɩla la ŋwɩlɩwaa mɩ-hɔʋ taa Bibl kpɛlɩkʋʋ alɩwaatʋ taa.
Ye ŋwɛ tɔm susuu taa yɔ, heyi tɔm susuyu weyi ña nɛ ɩ ɩlɩwa yɔ ndʋ ŋkaɣ yɔɔdʋʋ yɔ. (Adu. 27:17) Ye ŋnawa se ñɔ-tɔm eetukuuni ɛyaa camɩyɛ yɔ, ŋpɩzɩɣ nɛ ŋlɛɣzɩ-tʋ.