Ðɩwɛɛ niye tɔm susuu taa nɛ pɩkɩlɩ: Ɛzɩma ɖɩpaɣzɩnɩ ɛyaa Bibl kpɛlɩkʋʋ nɛ Ndʋ Bibl Wɩlɩɣ takayaɣ yɔ

Ɛbɛ yɔɔ pɩcɛyaa? Nabʋyʋ taa lɛ, ɛyaa tɩtɩlɩ mbʋ ɖeyi ɖeyi Bibl kpɛlɩkʋʋ kɛnaa yɔ. Papɩzɩɣ nɛ pamaɣzɩ se ɖɩkaɣ pa nɛ lalaa kpeɣluu nɛ ɖɩwɩlɩɣ-wɛ Bibl yaa ɖɩwɛɣ poliŋ taa nɛ ɖɩtɩŋɩɣnɩ nʋmɔʋ nakʋyʋ yɔɔ nɛ ɖɩwɩlɩɣ-wɛ Bibl. Pʋyɔɔ pɩcɛyaa se, ye ɖɩsɔɔlaa se ɖa nɛ nɔɔyʋ ɖɩkpɛlɩkɩ Bibl yɔ, ɖɩwɩlɩ-ɩ mbʋ Bibl kpɛlɩkʋʋ kɛnaa yɔ kpaagbaa. Paa kpaɣ ɖɩɣa nɛ ŋwolo ɖɩɣa ɖiɖiɣni labʋ yɔ, ɖɩpɩzɩɣ nɛ ɖɩkpaɣ cɛcɛsɩ cabɩ yem nɛ ɖɩwɩlɩnɩ-ɩ mbʋ Bibl kpɛlɩkʋʋ kɛnaa nɛ taa leleŋ weyi kpɛlɩkʋʋ mbʋ pɩpɩzɩɣ nɛ pɩkɔnɩ-ɩ yɔ.

Ɛzɩma pɩwɛɛ se ɖɩla?

Ɩsɛɣ ɖama nɛ pɩtɛ lɛ, pɔzɩ ɖɩɣdʋ nɛ ŋna se ɛzɩ ɛmaɣzɩɣ mbʋ cee wayɩ kaɣ kɔnʋʋ yɔ, pɩ-yɔɔ?
Heyi-i se ɛyaa sakɩyɛ wɛnɩ ɖɔɖɔ lɩmaɣza ana ɛzɩ ɛnʋ yɔ, nɛ ŋwɩlɩ-ɩ Ndʋ Bibl Wɩlɩɣ takayaɣ hɔɔlʋʋ naalɛ ŋgʋ yɔɔ tɔm. Lɩzɩ-ɩ pɩ-taa se takayaɣ kanɛ ka-taa tɔm nɩʋ wɛ kɛlɛʋ nɛ keheyiɣ-ɖʋ ɖɔɖɔ tɔm ndʋ Bibl wɩlɩɣ cee wayɩ nɛ ɖa-kɩcɛyɩm lɛɛbʋ yɔɔ yɔ, nɛ ŋpɔzɩ-ɩ se ñʋʋ ŋgʋ kɛdɩnɩ-ɩ nɛ pɩkɩlɩ.
Cɛlɩ-ɩ ɛ-ñɩŋga nɛ ŋwɩlɩ-ɩ hɔɔlʋʋ ŋgʋ kɩ-yɔɔ tɔm ñʋʋ ŋgʋ ɛlɩzaa yɔ, kɩwɛɛ yɔ. Lɩzɩ-ɩ pɩ-taa se tɔm pɔzʋʋ mbʋ pɩwɛ tɔm ñʋʋ ŋgʋ kɩ-ɖɩbazɩyɛ yɔ, pocosi pɩ-yɔɔ, tɔm ñʋʋ ŋgʋ kɩ-taa.
Pɔzɩ ɖɩɣdʋ se ye ɛsɔɔlaa yɔ, ɛpɩzɩɣ nɛ ɛkalɩ tayʋʋ kajalaɣ mbʋ. Pʋwayɩ lɛ, ŋpɔzɩ-ɩ tɔm nɛ ŋsɩnɩ-ɩ nɛ ɛna ɛzɩma pocosi tɔm pɔzʋʋ mbʋ pɩ-yɔɔ yɔ. Ɩkalɩ nɛ ɩtazɩ masɩ nzɩ palabɩnɩ tʋmɩyɛ nɛ pocosini tɔm pɔzʋʋ mbʋ, pɩ-yɔɔ yɔ. Wɩlɩ-ɩ ɛzɩma ŋhɛ tɔm cosuu tɛɛ ña-takayaɣ taa yɔ.
Iwolo tayʋʋ naalɛ mbʋ yɔɔ, ɛlɛ lɛɛlɛɛyɔ lɛ, seɣti ɖɩɣdʋ se ɛlabɩnɩ ɛ-maɣmaɣ ɛ-tɔm pe tʋmɩyɛ nɛ ecosini tɔm.
Samɩ-ɩ ɛ-pana ñaɣʋ yɔɔ nɛ ɩla ɖʋtʋ nɛ ŋpɩsɩ nɛ ɩtɛzɩ ñʋʋ ŋgʋ kpɛlɩkʋʋ.
Ye pɩsaŋ yɔ, wɩlɩ-ɩ video Ɛzɩma ɖɩkpɛlɩkɩɣnɩ ɛyaa Bibl? ɖɛ-tɛ intɛrnɛɛtɩ lone yɔɔ.

Labɩnɩ tʋmɩyɛ lɔŋ tasʋʋ pʋnɛ fenaɣ kanɛ:

Tɩmnɩ Yehowa se ɛsɩnɩ-ŋ nɛ ŋpaɣzɩnɩ ɛyʋ kɩfalʋ nɔɔyʋ Bibl kpɛlɩkʋʋ.—Fil. 2:13.
Ŋlɩ tɔm susuu lɛ, ñaɣ pana nɛ ŋtɩŋnɩ Ndʋ Bibl Wɩlɩɣ takayaɣ yɔɔ nɛ ŋwɩlɩ nɔɔyʋ ɛzɩma ɖɩkpɛlɩkɩɣnɩ ɛyaa Bibl yɔ, yaa ŋñaɣ pana nɛ ŋwɩlɩ nɔɔyʋ video: Ɛzɩma ɖɩkpɛlɩkɩɣnɩ ɛyaa Bibl?