Ɛzɩma ɖɩpɩzɩɣ nɛ ɖɩlabɩnɩ tʋmɩyɛ tɔm ndʋ pakpakɩɣ tatasɩ yɔɔ yɔ?
1. Pɩtasɩnɩ ɖa-takayɩsɩ lɛ, ɛbɛ ɖɔɖɔ wɛ jw.org yɔɔ nɛ pɩpɩzɩɣ se pɩsɩnɩ-ɖʋ?
1 Ɛyaa sakɩyɛ sɔɔlɩ kalʋʋ leleŋ nɛ toovenim tɔm ndʋ tɩwɛ jw.org yɔɔ yɔ. (Ekl. 12:10) Ɛlɛ ɩlakɩnɩ tʋmɩyɛ tɔm ndʋ pakpakɩɣ tatasɩ yɔɔ yɔ? Pɩsɩɣnɩ-mɩ nɛ iwelisi tɔm sakɩyɛ ndʋ tɩwɛ ɖɛ-tɛ intɛrnɛɛtɩ lone yɔɔ yɔ. Ɛzɩma tɔm ndʋ pakpakɩɣ tatasɩ yɔɔ yɔ tɩpɩzɩɣ nɛ tɩwazɩ-ɖʋ?
2. Ɛzɩma tɔm ndʋ pakpakɩɣ tatasɩ yɔɔ yɔ tɩpɩzɩɣ nɛ tɩwazɩ-ɖʋ alɩwaatʋ ndʋ ɖɩlakɩ tɩ-yɔɔ kpɛlɩkʋʋ yaa hɔʋ taa Bibl kpɛlɩkʋʋ yɔ?
2 Pɩwazɩɣ tɩ-yɔɔ kpɛlɩkʋʋ yaa hɔʋ taa Bibl kpɛlɩkʋʋ: Ye ɖiwelisiɣ Bibl taa tɔm, fenaɣ fenaɣ takayɩsɩ nɛ takayɩsɩ lɛɛsɩ nzɩ pakpakɩɣ tatasɩ yɔɔ yɔ alɩwaatʋ ndʋ ɖɩɖɛɣ nʋmɔʋ yaa ɖɩlakɩ ɖe-evemiye taa tʋma yɔ, pɩsɩɣnɩ-ɖʋ nɛ ɖɩlabɩnɩ ɖa-alɩwaatʋ tʋmɩyɛ camɩyɛ. (Efɛz. 5:15, 16) Alɩwaatʋ ndʋ ɖɩlakɩ hɔʋ taa Bibl kpɛlɩkʋʋ yɔ, ɖɩpɩzɩɣ nɛ ɖɩɖɔkɩ ɖa-takayɩsɩ nɛ ɖɩtɩŋ weyi ɛkalɩɣ tɔm tataɣ yɔɔ yɔ. Alɩwaatʋ ndʋ ɖɩlakɩ ɖa-tɩ yɔɔ kpɛlɩkʋʋ nɛ ɖiwelisiɣ tɔm ndʋ pakpakɩɣ tatasɩ yɔɔ yɔ, pɩsɩɣnɩ-ɖʋ nɛ ɖɩkpasɩ kalʋʋ taa yaa kʋnʋŋ nakʋyʋ kpɛlɩkʋʋ taa.
3. Tɔm ndʋ pakpakɩɣ tatasɩ yɔɔ yɔ, mba tɩpɩzɩɣ nɛ tɩwazɩ ɖo-kooka taa?
3 Pɩwazɩɣ-ɖʋ tɔm susuu taa: Pɩkɛdɩɣnɩ ɖo-kooka taa ɛyaa mba pɛfɛyɩnɩ alɩwaatʋ sakɩyɛ se pakalɩ ɖa-takayɩsɩ yɔ se pewelisi tɔm ndʋ pakpakɩɣ tatasɩ yɔɔ yɔ. Yaa ɖɩpɩzɩɣ nɛ ɖɩkatɩ ɛyaa mba paayɔɔdʋʋ ɖa-kʋnʋŋ yɔ nɛ pʋtɔma yɔ, ye pewelisi Kewiyaɣ tɔm pa-maɣmaɣ ‘pɔ-yɔɔdaɣ’ taa yɔ, pitukuuni-wɛ. (Tʋma 2:6-8) Ɛjaɖɛ hɔɔlɩŋ nɩɩyɩ taa lɛ, tɔm welisuu cɛyɩ siŋŋ. Hɔɔlɩŋ ɛnɩ ɩ-taa, paa kpaɖʋʋ ŋgʋ lɛ, kɩ-taa ɛyaa heyiɣni mba patɩŋɩɣ-wɛ yɔ pɔ-sɔnzɩ tɔm nɛ pɩwɛɛ se pañaɣ pana nɛ pewelisi camɩyɛ nɛ papɩzɩ nɛ pɔɖɔkɩ tɔm ndʋ. Mbʋ pɩwɛ Afrika taa ɖɔɖɔ.
4. Pɩsa nɛ ɖɩsɩnɩ ɛyaa ɖo-kooka taa lɛ, ɛbɛ ɖɩpɩzɩɣ nɛ ɖɩla?
4 Pʋtɔma, pɩkɛdɩɣnɩ mi-kooka taa ɛyaa se ɩma tɔm ndʋ pakpakɩɣ tatasɩ yɔɔ yɔ pazɩ pa-kʋnʋmɩŋ taa nɛ pewelisi. Yaa ɩpɩzɩɣ nɛ itiyini ɛyʋ nɔɔyʋ tɔm ndʋ pakpakɩɣ tatasɩ yɔɔ yɔ intɛrnɛɛtɩ yɔɔ nɛ pɩwazɩ-ɩ. Yaa alɩwaatʋ ndʋ ɩcɛlɩɣ takayaɣ nakɛyɛ ɖɩɣdʋ yɔ, ɩpɩzɩɣ ɖɔɖɔ nɛ ɩkpaɣ kɔ-tɔm tataɣ yɔɔ nɛ ɩcɛlɩ-ɩ. Ye ɖɩkpaɣ takayaɣ, hatʋ cabɩ takayaɣ, fenaɣ fenaɣ takayɩsɩ yaa traktɩ tataɣ yɔɔ nɛ ɖɩcɛlɩ nɔɔyʋ yɔ, pɩwɛɛ se ɖɩɩlakɩ tɔm susuu akɔnta lɛ, ɖɩma se ɖɩcɛlɩ takayaɣ. Tatasɩ yɔɔ tɔm wazɩɣ-ɖʋ alɩwaatʋ ndʋ ɖɩlakɩ ɖa-tɩ yɔɔ kpɛlɩkʋʋ nɛ ɖiɖuu toovenim ɖomaɣ yɔ.—1 Kɔr. 3:6.