Wɛɛ lɛɣtʋ alɩwaatʋ ndʋ ŋkpɛlɩkɩɣ nɔɔyʋ Bibl yɔ

Taakɩlɩ yɔɔdʋʋ: Taamaɣzɩ se pɩwɛɛ se ŋlɩzɩ tɔm tɩŋa taa. Yesu pɔzaɣ ɛyaa tɔm se pɩsɩnɩ-wɛ nɛ pamaɣzɩ pa-ñʋʋ taa nɛ pa-maɣmaɣ pɔkɔ tɔm ñʋʋ. (Mt 17:24-27) Tɔm pɔzʋʋ yeki nɛ Bibl kpɛlɩkʋʋ la leleŋ nɛ pɩsɩnɩ-ɖʋ nɛ ɖɩna se Bibl kpɛlɩkɩyʋ nɩ tɔm ndʋ ɖɩkpɛlɩkaa yɔ tɩ-taa nɛ etisiɣ tɩ-yɔɔ yaa we. (be-F 253 § 3-4) Alɩwaatʋ ndʋ ŋpɔzʋʋ tɔm yɔ, pɩwɛɛ se ŋwɛɛ suuɖu. Pɩhaɣ Bibl kpɛlɩkɩyʋ alɩwaatʋ nɛ ɛpɩzɩ nɛ ecosi. Ɛlɛ paa pɩlaba se eticosi camɩyɛ yɔ, pɩtɩmʋna se ña-maɣmaɣ ŋcosi. Ðaɣnɩ tɔm lɛɛtʋ pɔzʋʋ nɛ pɩsɩnɩ-ɩ nɛ ecosi camɩyɛ. (be-F 238 § 1-2) Ye tɔm kɩfatʋ natʋyʋ iɖiɣni kpɛlɩkʋʋ yɔ, taakpidisi.​—be-F 230 § 4.

Taala nɛ tɔm taa nɩʋ wɛɛ kaɖɛ: Taakɛdɩ-ɩ ndʋ payɩ ŋsɩm tɔm ndʋ iɖiɣni kpɛlɩkʋʋ yɔ tɩ-yɔɔ yɔ. (Yoh 16:12) Pɩwɛɛ se ñɛ-ɛzɩyɛ ɛsɛɛnɩ lɩmaɣzɩyɛ sɔsɔɖɛ nɖɩ ɖɩwɛ tayʋʋ taa yɔ ɖi-ɖeke. (be-F 226 § 4-5) Tɔm lɛɛtʋ kɔnʋʋ pɩzɩɣ pɩla nɛ Bibl kpɛlɩkɩyʋ ɛɛnɩɣ lɩmaɣza sɔsɔna taa camɩyɛ. (be-F 235 § 3) Ye Bibl kpɛlɩkɩyʋ ɛnɩ lɩmaɣzɩyɛ sɔsɔɖɛ nɖɩ ɖɩwɛ tayʋʋ taa yɔ, ɖɩ-taa camɩyɛ yɔ, iwolo tayʋʋ lɛɛbʋ yɔɔ.

Taakpidisi se takayaɣ ɛtɛ lɔŋ: Ða-kaɖʋwa lɛ se ɖitukuni ɛyaa laŋa; pɩtɩkɛ se ɖɩkpɛlɩkɩnɩ-wɛ takayɩsɩ yem. (Luka 24:32) Bibl masɩ nzɩ sɩ-tɔm kɩlɩ cɛyʋʋ hɔɔlʋʋ ŋgʋ iɖiɣni kpɛlɩkʋʋ yɔ kɩ-taa yɔ, labɩnɩ-sɩ tʋmɩyɛ camɩyɛ nɛ ŋyele Ɛsɔtɔm nɛ tɩla tɩ-tʋmɩyɛ. (2Kɔr 10:4; Ebr 4:12; be-F 144 § 1-3) Labɩnɩ tʋmɩyɛ kɩɖaŋ weyi ɩwɛ kɛlɛʋ yɔ. (be-F 245 § 2-4) Maɣzɩ kpɛlɩkɩyʋ wɛtʋ nɛ e-tisuu yɔɔ nɛ ŋyele nɛ kpɛlɩkʋʋ la nɔɔ kʋɖʋmaɣ nɛ ɛ-kɩcɛyɩm. Ŋpɩzɩɣ nɛ ŋpɔzɩ-ɩ se: “Tɔm ndʋ ɖɩkpɛlɩkɩ cɩnɛ yɔ, suwe ŋmaɣzɩɣ tɩ-yɔɔ?” “Ɛbɛ tɔm tʋnɛ tɩkpɛlɩkɩɣ-ɖʋ Yehowa yɔɔ?” “Ye ŋkpaɣ lɔŋ tasʋʋ pʋnɛ nɛ ɛlabɩnɩ tʋmɩyɛ, ŋmaɣzɩɣ se ɛzɩma pɩwazɩɣ-ŋ?”​—be-F 238 § 3-5; 259 § 1.