Ŋɖiɣni naʋ Ɛsɔ wɛtʋ kɩbandʋ ndʋ tɩɩnaɣnɩ ɛsa yɔ?

Ŋnaɣ Lɩzɩyʋ nesi alɩwaatʋ ndʋ ŋcɔŋnɩ hɛtʋ ndɩ ndɩ, ɛsɔdaa tɩɩnzɩ, yaa lɩm mbʋ pɩlɩɣnɩ kaaŋ yɔɔ nɛ pɩfalɩɣ yɔ pɩ-taa? Wondu kɩlɩzɩtʋ ndʋ tɩcɔ-ɖʋ nɛ tɩta yɔ, tɩwɩlɩɣ Yehowa wɛtʋ kɩbandʋ ndʋ tɩɩnaɣnɩ ɛsa yɔ kaɣlaa. (Rom 1:20) Ye ɖɩkpakɩɣ alɩwaatʋ nɛ ɖɩmaɣzɩɣ mbʋ ɖɩnaɣnɩ ɖɛ-ɛsa yɔ pɩ-yɔɔ yɔ, ɖɩpɩzɩɣ nɛ ɖɩna Ɛsɔ ɖoŋ, ɛ-sɔɔlɩm, ɛ-lɔŋsɩnɖɛ, e-siɣsiɣ wɛtʋ nɛ pɩkpɛndɩnɩ ɛ-kʋjɔʋ ɖɔɖɔ.​—Keɣa 103:24.

Yehowa wondu kɩlɩzɩtʋ ndʋ ŋnaɣ paa evemiye nɖɩ? Paa ŋwɛ tɛtʋ sɔsɔtʋ taa yɔ, ŋpɩzɩɣ ŋna sumasɩ yaa tɩŋ. Ye ŋcɔŋnɩ camɩyɛ Yehowa wondu kɩlɩzɩtʋ yɔ, pɩpɩzɩɣ pɩsɩnɩ-ŋ nɛ ŋpasɩ ña-nɩɣzɛ, ŋka ña-lɩmaɣza mbʋ pɩ-tɔm kɩlɩ cɛyʋʋ yɔ pɩ-yɔɔ, nɛ pɩsɩnɩ-ŋ ɖɔɖɔ nɛ ŋcɛyɩsɩ tisuu mbʋ ŋwɛna se Yehowa wɛnɩ ɖoŋ se ɛpɩzɩɣ nɛ ɛcɔnɩ ñɔ-yɔɔ paa ɛzɩmtaa yɔ. (Mt 6:25-32) Ye ŋwɛnɩ piya yɔ, sɩnɩ-sɩ nɛ sɩna Yehowa wɛtʋ kɩbandʋ ndʋ tɩ-wayɩ fɛyɩ yɔ. Ye ɖɩwɛnɩ ɛsɩmɩyɛ wondu kɩlɩzɩtʋ ndʋ tɩcɔ-ɖʋ nɛ tɩta yɔ tɩ-yɔɔ yɔ, ɖɩkaɣ ñɔtɩnʋʋ ɖa-Lɩzɩyʋ nɛ pɩkpaɖɩ.​—Keɣa 8:4, 5.

CƆNƖ VIDEO WONDU KƖLƖZƖTƲ KAJƲKA WƖLƖƔ ƐSƆ ÐOŊ—ÑALƖMƖYƐ NƐ TƆLƖM, NƐ PƲWAYƖ LƐ ŊCOSI TƆM TƲNƐ TƖ-YƆƆ:

• Ɛbɛ yeki nɛ ɖɩnaɣ tɔlɩm ndɩ ndɩ?

• Wondu natʋyʋ wɛɛ lɛ, ye ŋwɛ ɖoli nɛ ŋcɔŋnɩ-tʋ nɛ pʋwayɩ ŋlɛɣzɩ lone yɔ, tɩ-tɔlɩm lɛɣzɩɣ ɖɔɖɔ; ɛbɛ yeki nɛ pɩlakɩ mbʋ?

• Ɛbɛ yɔɔ ɖɩnaɣ tɔlɩm ndɩ ndɩ ɛsɔdaa?

• Wondu kɩlɩzɩtʋ ndʋ tɩñɔtɩnɩ ña-ɖɩɣa yɔ, tɩ-taa tɔlɩm mbʋ kɛdɩnɩ-ŋ nɛ pɩkpaɖɩ?

• Ɛbɛ yɔɔ pɩwɛɛ se ɖɩkpakɩɣ alɩwaatʋ nɛ ɖɩcɔŋnɩ wondu kɩlɩzɩtʋ?