Tɩŋnɩ wondu kɩlɩzɩtʋ yɔɔ nɛ ŋwɩlɩ ñe-piya Yehowa yɔɔ tɔm

1. Ɛbɛ lʋlɩyaa sɔɔlaa se pe-piya ɩla?

LƲLƖYAA, ɖɩnawa se ɩsɔɔlaa se ɩsɩnɩ mi-piya nɛ sɩtɩlɩ Yehowa nɛ sɩsɔɔlɩ-ɩ. Ɛlɛ paanaɣ Ɛsɔ. Ɛzɩma ɩpɩzɩɣ nɛ ɩsɩnɩ mi-piya nɛ sɩna Ɛsɔ se ɛkɛ ɛyʋ keekee nɛ sɩñɔtɩnɩ-ɩ?—Yak. 4:8.

2. Ɛzɩma lʋlɩyaa pɩzɩɣ nɛ pasɩnɩ pe-piya nɛ sɩtɩlɩ Yehowa wɛtʋ kɩbandʋ?

² Nʋmɔʋ sɔsɔʋ ŋgʋ kɩ-yɔɔ lʋlɩyaa pɩzɩɣ patɩŋna nɛ pasɩnɩ pe-piya nɛ sɩñɔtɩnɩ Yehowa yɔ ŋgʋ lɛ se pɛkpɛlɩkɩnɩ-sɩ Bibl. (2 Tim. 3:14-17) Paa mbʋ yɔ, Bibl yɔɔdʋʋ nʋmɔʋ lɛɛkʋ ŋgʋ kɩ-yɔɔ piya pɩzɩɣ sɩtɩŋna nɛ sɩkpɛlɩkɩ Yehowa tɔm yɔ pɩ-tɔm. Aduwa takayaɣ taa, caja nɔɔyʋ tɔzʋʋ ɛ-pɩyalʋ se ɛtaasɔɔ Yehowa wɛtʋ kɩbandʋ ndʋ panaɣ-tʋ e-wondu kɩlɩzɩtʋ taa yɔ tɩ-yɔɔ kaaʋ. (Adu. 3:19-21) Ðɩkaɣ naʋ hɔɔlɩŋ weyi ɩ-taa lʋlɩyaa pɩzɩɣ nɛ patɩŋnɩ wondu kɩlɩzɩtʋ yɔɔ nɛ pasɩnɩ pe-piya nɛ sɩtɩlɩ Yehowa wɛtʋ kɩbandʋ yɔ ɩ-taa nɩɩyɩ.

ƐZƖMA ƖPƖZƖƔ NƐ ƖTƖŊNƖ WONDU KƖLƖZƖTƲ YƆƆ NƐ ƖWƖLƖ TƆM MI-PIYA?

3. Pɩwɛɛ se lʋlɩyaa ɩsɩnɩ pe-piya nɛ sɩna we?

³ Bibl yɔɔdʋʋ se Ɛsɔ «wɛtʋ kɩbandʋ ndʋ tɩɩnaɣ nɛ ɛsa yɔ, pɩnaɣ-tʋ kpayɩ kpayɩ kpaɣnɩ alɩwaatʋ ndʋ palɩzɩ ɛjaɖɛ yɔ, mbʋ pʋyɔɔ yɔ panaɣ-tʋ wondu ndʋ ɛlɩzaa yɔ tɩ-taa.» (Roma 1:20) Lʋlɩyaa, pɩtɩla mɩ nɛ mi-piya ɩsɔɔlɩ lɩʋ se ɩmʋ helim. Ɩtɩŋnɩ alɩwaatʋ ndʋ tɩ-yɔɔ nɛ ɩsɩnɩ mi-piya nɛ sɩna nɔɔ kʋɖʋmaɣ ŋga kɛwɛ ‘wondu ndʋ Yehowa lɩzaa yɔ’ nɛ ɛ-wɛtʋ kɩbandʋ pɛ-hɛkʋ taa yɔ. Hɔɔlʋʋ ŋgʋ kɩ-taa lɛ, iyele nɛ ɖɩna mbʋ lʋlɩyaa pɩzɩɣ nɛ pɛkpɛlɩkɩ Yesu kɩɖaʋ taa yɔ.

4. Ɛzɩma Yesu tɩŋnɩ wondu kɩlɩzɩtʋ yɔɔ nɛ ɛwɩlɩ ɛ-tɔmkpɛlɩkɩyaa tɔm? (Luka 12:24, 27-30)

⁴ Na ɛzɩma Yesu tɩŋnɩ wondu kɩlɩzɩtʋ yɔɔ nɛ ɛwɩlɩ tɔm yɔ. Kɩyakʋ nakʋyʋ, eheyi ɛ-tɔmkpɛlɩkɩyaa se pɔcɔnɩ kaŋgala nɛ hayɩm taa hɛtʋ. (Kalɩ Luka 12:24, 27-30.) Yesu pɩzaɣ se ɛlabɩnɩ tʋmɩyɛ kpɩnɛ naɖɩyɛ yaa ñɩyʋʋ nakʋyʋ, ɛlɛ ɛlɩzaa se ɛlakɩnɩ tʋmɩyɛ sumaɣ nɛ hɛɖʋʋ ŋgʋ ɛ-tɔmkpɛlɩkɩyaa kaasɩm camɩyɛ yɔ. Pɩtɩla ɛ-tɔmkpɛlɩkɩyaa naɣaɣ kaŋgala kʋyʋʋ ɛsɔdaa nɛ hɛtʋ lɩɣ hayɩm taa. Maɣzɩ nɛ ŋna ɛzɩma Yesu wɩlaɣ nesi wondu ndʋ alɩwaatʋ ndʋ ɛyɔɔdaɣ yɔ. Nɛ ɛlabɩnɩ kɩɖaŋ ɛnɩ tʋmɩyɛ nɛ pɩtɛ lɛ ɛbɛ ɛlaba? Ɛwɩlɩ ɛ-tɔmkpɛlɩkɩyaa lɔŋ kɩbaŋ nɩɩyɩ pɩlɩɩnɩ pa-Caa weyi ɛwɛ ɛsɔdaa yɔ ɛ-kʋjɔʋ labʋ nɛ ɛ-camɩyɛ lakasɩ yɔɔ; lɔŋ ɛnɩ lɛ se Yehowa kaɣ calʋʋ ɛ-sɛyaa mba pɛwɛ siɣsiɣ yɔ nɛ esuu-wɛ wondu ɛzɩ ɛlakʋʋ kaŋgala nɛ hayɩm taa hɛtʋ yɔ.

5. Ɛzɩma lʋlɩyaa pɩzɩɣ nɛ palabɩnɩ tʋmɩyɛ wondu kɩlɩzɩtʋ nɛ pawɩlɩ pe-piya Yehowa wɛtʋ kɩbandʋ tɔm?

⁵ Lʋlɩyaa, alɩwaatʋ ndʋ ɩwɩlɩɣ mi-piya tɔm yɔ ɛzɩma ɩpɩzɩɣ nɛ ɩmaɣzɩnɩ Yesu? Ŋpɩzɩɣ nɛ ŋkɛdɩ ña-pɩɣa wonuu kɩlɩzʋʋ ŋgʋ ŋkɩlɩ sɔɔlʋʋ yɔ kɩ-tɔm, pɩpɩzɩɣ nɛ pɩkɛ kpɩnɛ nɖɩ ŋkɩlɩ sɔɔlʋʋ yɔ yaa tɩʋ ŋgʋ ŋkɩlɩ sɔɔlʋʋ yɔ. Alɩwaatʋ ndʋ ŋlakɩ mbʋ yɔ, lɩzɩ-kɛ mbʋ kɩɖaʋ ŋgʋ kɩwɩlɩɣ Yehowa yɔɔ yɔ pɩ-taa. Pʋwayɩ lɛ ŋpɩzɩɣ nɛ ŋpɔzɩ ña-pɩɣa se keheyi-ŋ kpɩnɛ yaa tɩʋ ŋgʋ kakɩlɩ sɔɔlʋʋ yɔ kɩ-tɔm. Ye ŋtɩŋɩɣnɩ wonuu kɩlɩzʋʋ ŋgʋ kakɩlɩ sɔɔlʋʋ yɔ kɩ-yɔɔ nɛ ŋheyiɣ-kɛ Yehowa wɛtʋ kɩbandʋ tɔm yɔ, pɩtɩla kakaɣ kam ñʋʋ nɛ kewelisini-ŋ.

6. Ɛbɛ ɖɩpɩzɩɣ nɛ ɖɩkpɛlɩkɩ Christopher ɖoo kɩɖaʋ taa?

⁶ Ɛzɩ pɩpɔzʋʋ se lʋlɩyaa ɩkpaɣ alɩwaatʋ sakɩyɛ nɛ pañɩnɩ kpɩnɛ naɖɩyɛ yaa tɩʋ nakʋyʋ yɔɔ tɔm nɛ pʋcɔ nɛ pɛkɛdɩ pe-piya mbʋ wondu kɩlɩzɩtʋ ndʋ tɩwɩlɩɣ Yehowa yɔɔ yɔ pɩ-tɔm na? Pɩtɩcɛyɩ. Yesu tɩkpaɣ alɩwaatʋ sakɩyɛ nɛ ɛlɩzɩ ɛzɩma kaŋgala tɔkɩ tɔɔnaɣ yɔ nɛ ɛzɩma hayɩm taa hɛtʋ paɣlɩɣ yɔ pɩ-taa. Paa pɩkɛdɩɣnɩ ña-pɩɣa se katɩlɩ Yehowa wondu kɩlɩzɩtʋ yɔɔ tɔm tete yɔ, nabʋyʋ taa tɔm natʋyʋ pazɩ yɔɔdʋʋ yaa tɔm pɔzʋʋ nabʋyʋ pɩzɩɣ nɛ pɩsɩnɩ-kɛ nɛ kanɩɩ lɩmaɣzɩyɛ nɖɩ ɖɩ-taa ŋcaɣ se ŋlɩzɩ-kɛ yɔ ɖɩ-taa. Payaɣ koobu abalɩñɩnʋ nɔɔyʋ se Christopher. Na ɛ-pɩjatʋ taa tɔm ndʋ tɩ-yɔɔ ɛtɔzʋʋ yɔ. Ɛyɔɔdaa se: «Mon-ɖoo yɔɔdaɣ tɔm natʋyʋ kɛlɛʋ yem se pɩsɩnɩ-ɖʋ nɛ ɖɩwɛɛnɩ ɛsɩmɩyɛ wondu kɩlɩzɩtʋ ndʋ tɩcɔ-ɖʋ nɛ tɩta yɔ tɩ-yɔɔ. Kɩɖaŋ nɩɩyɩ yɔ: Alɩwaatʋ ndʋ ɖɩwɛɣ pʋŋ nɩɩyɩ cɔlɔ yɔ, ɛyɔɔdaɣ se: ‘Na ɛzɩma pʋŋ ɛnɩ yɔ ɩkʋyaa nɛ ɩwɛɛ cɔnʋʋ yɔ! Yehowa tɔm tɩcaɣ piti yaa we?’ Yaa alɩwaatʋ ndʋ ɖɩwɛɣ teŋgu cɔlɔ yɔ ɛyɔɔdaɣ se: ‘Na ɛzɩma lɩm hola wɛ ɖoŋ yɔ! Ɛsɔ fɛyɩ ɖoŋ siŋŋ na?’» Christopher yɔɔdaa se: «Tɔm ndʋ tɩɩwɛ kɛlɛʋ, tiseɣtaɣ-ɖʋ nɛ tɩɩwɛnɩ ɖoŋ ɖɔ-yɔɔ.»

7. Ɛzɩma ŋpɩzɩɣ nɛ ŋfalɩsɩ ñe-piya nɛ sɩmaɣzɩɣ wondu kɩlɩzɩtʋ yɔɔ?

⁷ Alɩwaatʋ ndʋ ñe-piya wɛɣ nɛ sɩpaɣlɩɣ yɔ, ŋpɩzɩɣ nɛ ŋfalɩsɩ-sɩ nɛ sɩmaɣzɩɣ wondu kɩlɩzɩtʋ yɔɔ nɛ sɩkpɛlɩkɩɣ Yehowa tɔm. Ŋpɩzɩɣ nɛ ŋyɔɔdɩ Ɛsɔ wondu kɩlɩzɩtʋ taa wonuu nakʋyʋ tɔm nɛ ŋpɔzɩ-sɩ se: «Ɛbɛ wonuu kʋnɛ kɩkpɛlɩkɩɣ-mɩ Yehowa yɔɔ?» Tɔm ndʋ sɩyɔɔdʋʋ yɔ tɩpɩzɩɣ nɛ tɩɖɩɣzɩ-ŋ.—Mat. 21:16.

ƐZƖMTAA ƖPƖZƖƔ NƐ ƖTƖŊNƖ WONDU KƖLƖZƖTƲ YƆƆ NƐ ƖWƖLƖ MI-PIYA TƆM?

8. Wala wena Izrayɛɛlɩ taa lʋlɩyaa kaawɛna alɩwaatʋ ndʋ ‘pɔɖɔŋ’ nʋmɔʋ taa yɔ?

⁸ Paaseɣti Izrayɛɛlɩ lʋlɩyaa se pawɩlɩ pe-piya Ɛsɔ paɣtʋ alɩwaatʋ ndʋ ‘pɔɖɔŋ’ nʋmɔʋ taa yɔ. (Wp. 11:19) Nʋmɔŋ ndɩ ndɩ kaawɛɛ nɛ iwokini Izrayɛɛlɩ kɔfɩnaa taa. Ɛyaa pɩzaɣ se pana kpɩna ndɩ ndɩ, sumasɩ ndɩ ndɩ nɛ hɛtʋ ndɩ ndɩ nʋmɔŋ ɛnɩ ɩ-taa. Alɩwaatʋ ndʋ Izrayɛɛlɩ taa hɔŋ kaaɖɔŋ nʋmɔŋ yɔ, lʋlɩyaa kaawɛnɩ waɖɛ se peheyi pe-piya wondu ndʋ Yehowa lɩzaa yɔ tɩ-tɔm. Mɩ lʋlɩyaa, ɩwɛnɩ wala ana ɖɔɖɔ se ɩtɩŋnɩ wondu kɩlɩzɩtʋ yɔɔ nɛ ɩwɩlɩ mi-piya tɔm. Iyele nɛ ɖɩna ɛzɩma lʋlɩyaa nabɛyɛ labɩ mbʋ yɔ.

9. Ɛbɛ ŋpɩzɩɣ nɛ ŋkpɛlɩkɩ Punitha nɛ Katya pɔ-cɔlɔ?

⁹ Payaɣ ɖoyo nɔɔyʋ se Punitha, ɛwɛ Ɛndɩ tɛtʋ sɔsɔtʋ natʋyʋ taa. Ɛyɔɔdaa se: «Alɩwaatʋ ndʋ ɖiwoki se ɖɩna ɖɔ-hɔʋ taa ñɩma kɔfɩ taa yɔ, pɩkɛnɩ-ɖʋ waɖɛ se ɖɩsɩnɩ ɖe-piya nɛ sɩkpɛlɩkɩ tɔm natʋyʋ Yehowa wondu kɩlɩzɩtʋ yɔɔ. Mamaɣzɩɣ se men-piya nɩɣ wondu kɩlɩzɩtʋ taa camɩyɛ alɩwaatʋ ndʋ ɖiposuuni habɛɛ wena a-yɔɔ ɛyaa ɖɔ pɩdɩɩfɛyɩ yɔ nɛ alɩwaatʋ ndʋ ɖiposuuni tɛtʋ sɔsɔtʋ yɔ.» Lʋlɩyaa, pɩtɩla mi-piya ɩɩkaɣ sɔʋ alɩwaatʋ ndʋ mɩ nɛ sɩ ɩkpaɣaa nɛ ɩcaɣ lone kɩbanɖɛ naɖɩyɛ taa yɔ tɩ-yɔɔ. Payaɣ koobu halɩñɩnʋ nɔɔyʋ se Katya, ɛwɛ Mɔlɩdaavii ɛjaɖɛ taa. Ɛyɔɔdaa se: «Man-pɩjatʋ taa alɩwaatʋ ndʋ tɩ-yɔɔ mankɩlɩɣ tɔzʋʋ yɔ ndʋ lɛ alɩwaatʋ ndʋ ma nɛ ma-lʋlɩyaa ɖiwokaɣ kɔfɩ taa yɔ. Mɛwɛnɩ ɛsɩmɩyɛ pɔ-yɔɔ mbʋ pʋyɔɔ yɔ pawɩlɩ-m ɖooo man-pɩjatʋ taa ɛzɩma pɩwɛɛ se mankpaɣ alɩwaatʋ nɛ mɔncɔnɩ mbʋ Yehowa laba yɔ nɛ ɛzɩma manpɩzɩɣ nɛ mana-ɩ e-wondu kɩlɩzɩtʋ taa yɔ.»

10. Ɛbɛ lʋlɩyaa pɩzɩɣ nɛ pala ye pɩwɛ-wɛ kaɖɛ se pɔɖɔ nʋmɔʋ nɛ powolo kɔfɩ taa yɔ? (Kalɩ aɖakaɣ «Mbʋ pɩsɩɣnɩ lʋlɩyaa yɔ.»)

¹⁰ Ye ŋŋpɩzɩɣ se ŋɖɔ nʋmɔʋ nɛ ŋwolo kɔfɩ taa yɔ, ɛbɛ ŋpɩzɩɣ nɛ ŋla? Amol ɖɔɖɔ wɛ Ɛndɩ ɛjaɖɛ taa, ɛyɔɔdaa se: «Ðenɖe mɛwɛɛ yɔ, ma-lʋlɩyaa lakɩ tʋmɩyɛ ñɩɣtʋ sakɩyɛ nɛ pɩpɔzʋʋ liidiye sakɩyɛ pʋcɔ nɛ ɖɩɖɔ nʋmɔʋ nɛ ɖiwolo kɔfɩ taa. Paa mbʋ yɔ, ɖɩpɩzɩɣ nɛ ɖiwolo kaɖaɣ cikpelaɣ nakɛyɛ taa yaa ɖɩkpa ɖɩɣa ñʋʋ taa nɛ ɖɩcɔnɩ wondu kɩlɩzɩtʋ nɛ ɖɩyɔɔdɩ Yehowa wɛtʋ kɩbandʋ tɔm.» Ye ŋkpakɩɣ alɩwaatʋ nɛ ŋcɔŋnɩ camɩyɛ yɔ, pɩtɩla ŋkaɣ naʋ wondu kɩlɩzɩtʋ sakɩyɛ ña-ɖɩɣa cɔlɔ nɛ ŋwɩlɩ ñe-piya. (Keɣa 103:24) Pɩtɩla ŋkaɣ naʋ sumasɩ, tɛtɛ wondu cikpetu ndʋ tɩwɛnɩ keŋ yɔ, nɛ wondu lɛɛtʋ. Karina wɛ Caama ɛjaɖɛ taa, ɛyɔɔdaa se: «Mon-ɖoo sɔɔlɩ hɛtʋ; pʋyɔɔ lɛ, alɩwaatʋ ndʋ maakɛ pɩɣa yɔ ma nɛ ɩ ɖɩɩɖɔŋ lɛ, ɛwɩlɩɣ-m hɛtʋ kɩbandʋ.» Lʋlɩyaa, ɛgbɛyɛ lɩzɩ videowaa sakɩyɛ nɛ takayɩsɩ nzɩ sɩyɔɔdʋʋ wondu kɩlɩzɩtʋ tɔm yɔ; ɩpɩzɩɣ nɛ ɩtɩŋnɩ wondu ndʋ tɩ-yɔɔ nɛ ɩwɩlɩ mi-piya tɔm. Paa le ŋtɩɩwɛɛ yɔ, ŋpɩzɩɣ nɛ ŋsɩnɩ ñe-piya nɛ sɩkpaɣ alɩwaatʋ nɛ sɩcɔnɩ wondu ndʋ Ɛsɔ lɩzaa yɔ. Lɛɛlɛɛyɔ iyele nɛ ɖɩna Yehowa wɛtʋ kɩbandʋ ndʋ tɩ-tɔm ŋpɩzɩɣ nɛ ŋwɩlɩ ñe-piya yɔ tɩ-taa natʋyʋ.

YEHOWA «WƐTƲ KƖBANDƲ NDƲ TƖƖNAƔ NƐ ƐSA YƆ PƖNAƔ-TƲ KPAYƖ KPAYƖ»

11. Ɛzɩma lʋlɩyaa pɩzɩɣ nɛ pasɩnɩ pe-piya nɛ sɩna Yehowa sɔɔlɩm?

¹¹ Pɩsa nɛ ŋsɩnɩ ñe-piya nɛ sɩna Yehowa sɔɔlɩm lɛ, ŋpɩzɩɣ nɛ ŋwɩlɩ-sɩ ɛzɩma kpɩna sakɩyɛ cɔŋnɩ a-piya yɔɔ nɛ sɔɔlɩm yɔ. (Mat. 23:37) Ŋpɩzɩɣ ɖɔɖɔ nɛ ŋheyi-sɩ wondu kɩlɩzɩtʋ ndɩ ndɩ ndʋ tɩhaɣ-ɖʋ taa leleŋ siŋŋ yɔ tɩ-tɔm. Karina weyi ɖɩyɔɔdɩ ɛ-tɔm nɛ pɩɖɛɛ yɔ ɛyɔɔdaa se: «Alɩwaatʋ ndʋ ma nɛ mon-ɖoo ɖɩlɩɣaɣ nɛ ɖɩɖɔŋ yɔ, eseɣtaɣ-m se mankpaɣ alɩwaatʋ nɛ mɔncɔnɩ ɛzɩma paa hɛɖʋʋ ŋgʋ lɛ kɩwɛ ŋgee yɔ nɛ mañaɣ pana nɛ mana ɛzɩma hɛtʋ ndʋ tɩ-kajʋka wɩlɩɣ se Yehowa kɛ sɔɔlɩm tɛ Ɛsɔ yɔ. Pɩnzɩ sakɩyɛ ɖɛwa ɛlɛ menɖiɣni kpaɣʋ alɩwaatʋ nɛ mɔncɔŋnɩ hɛtʋ camɩyɛ nɛ manaɣ ɛzɩma tɩ-tɔlɩm wɛ ndɩ ndɩ nɛ ɛzɩma paa ŋgʋ lɛ kɩwɛ ŋgee yɔ. Hɛtʋ ndʋ, tɩwɛɛ nɛ tɩtɔzʋʋ-m se Yehowa sɔɔlɩ-ɖʋ siŋŋ.»

12. Ɛzɩma lʋlɩyaa pɩzɩɣ nɛ pasɩnɩ pe-piya nɛ sɩna Ɛsɔ lɔŋsɩnɖɛ? (Keɣa 138:14) (Cɔnɩ ɖɔɖɔ kɩlɛmʋʋ.)

¹² Sɩnɩ ñe-piya nɛ sɩna Ɛsɔ lɔŋsɩnɖɛ. Yehowa sɩm lɔŋ siŋŋ nɛ pɩkɩlɩ-ɖʋ. (Roma 11:33) Ŋpɩzɩɣ nɛ ŋkɛdɩ ñe-piya ɛzɩma lɩm kpaɣ ɛsɔdaa nɛ pɩpɩsɩɣ mɩndʋ nɛ pʋwayɩ ɛzɩma mɩndʋ kɛyɩɣ lɩm mbʋ kɛlɛʋ yem nɛ piwokini lone naɖɩyɛ taa yɔ pɩ-tɔm. (Yɔɔb 38:36, 37) Ŋpɩzɩɣ ɖɔɖɔ nɛ ŋheyi-sɩ ɛzɩma palabɩ ɛyʋ tomnaɣ nɛ kɛwɛɛ piti yɔ pɩ-tɔm. (Kalɩ Keɣa 138:14.) Payaɣ caja nɔɔyʋ se Vladimir, na ɛzɩma ɛlabɩ mbʋ yɔ. Ɛyɔɔdaa se: «Kɩyakʋ nakʋyʋ ɖa-pɩyalʋ saɣaɣ cɛɛcɛ nɛ ɛtɔlɩ nɛ pɩkʋ-ɩ. Pɩlabɩ kɩyakɩŋ pazɩ pʋwayɩ lɛ, heŋ ɛnɩ ɩwaa. Ma nɛ ma-halʋ ɖɩlɩzɩ-ɩ pɩ-taa se Yehowa labɩ ɖo-tomnaɣ se kapɩzɩ nɛ kawaa ka-tɩ. Ðɩlɩzɩ-ɩ pɩ-taa se mbʋ payɩ ɛyʋ lɩzaa yɔ pɩ-taa nabʋyʋ fɛyɩ mbʋ. Kɩɖaʋ nakʋyʋ yɔ: Ye lɔɔɖɩyɛ naɖɩyɛ ɛtɔlaa yɔ, ɖɩɩpɩzɩɣ nɛ ɖɩñɔɔzɩ ɖɩ-tɩ. Kɩɖaʋ kʋnɛ kɩsɩnɩ ɖa-pɩyalʋ nɛ ɛnɩɩ pɩ-taa se Yehowa wɛnɩ lɔŋsɩnɖɛ.»

13. Ɛzɩma lʋlɩyaa pɩzɩɣ nɛ pasɩnɩ pe-piya nɛ sɩna Ɛsɔ ɖoŋ? (Izaayii 40:26)

¹³ Yehowa seɣtiɣ-ɖʋ se ɖɩkpazɩ ɖɛ-ɛsa ɛsɔdaa nɛ ɖɩna ɛzɩma ɛtɩŋnɩ e-ɖoŋ yɔɔ nɛ ɛsɩɩ tɩɩnzɩ tɩŋa si-lona taa yɔ. (Kalɩ Izaayii 40:26.) Ŋpɩzɩɣ nɛ ŋseɣti ñe-piya se sɩkpazɩ sɩ-ɛsa nɛ sɩcɔnɩ ɛsɔdaa nɛ sɩmaɣzɩ mbʋ sɩnaɣ yɔ pɩ-yɔɔ. Payaɣ koobu halɩñɩnʋ nɔɔyʋ se Tingting, ɛwɛ Tayɩwaanɩ ɛjaɖɛ taa. Ɛtɔzʋʋ mbʋ pɩlabɩ alɩwaatʋ ndʋ ɛɛkɛ pɩɣa yɔ pɩ-yɔɔ. Ɛyɔɔdaa se: «Kɩyakʋ nakʋyʋ mon-ɖoo kpaɣ-m nɛ ɖiwolo ɖoli, nɛ ɖɩpɩzaa nɛ ɖɩna tɩɩnzɩ sakɩyɛ ɛsɔdaa mbʋ pʋyɔɔ yɔ pɩtaakɛ tɛtʋ sɔsɔtʋ taa ɖenɖe miŋ wɛɛ yɔ. Alɩwaatʋ ndʋ tɩ-taa lɛ, sɔɔndʋ kpaɣaɣ-m se maakaɣ pɩzʋʋ nɛ mɔnɖɔkɩ men-siɣsiɣ wɛtʋ mbʋ pʋyɔɔ yɔ mon-sukuli taa taabalaa yekaɣ nɛ pɩlakɩ-m kaɖɛ se maña Yehowa. Mon-ɖoo seɣti-m se mamaɣzɩ nɛ mana ɖoŋ weyi ɩ-yɔɔ Yehowa tɩŋnaa nɛ ɛlɩzɩ tɩɩnzɩ nzɩ sɩ-tɩŋa payɩ yɔ, nɛ mɔntɔzɩ se pɩtʋʋ fɛyɩ se ɛpɩzɩɣ nɛ ɛtɩŋnɩ ɖoŋ ɛnɩ ɛ-yɔɔ nɛ ɛsɩnɩ-m nɛ mankaɖɩnɩ paa takɩm mbʋ. Mankpaɣ alɩwaatʋ nɛ mɔncɔnɩ wondu kɩlɩzɩtʋ puwiye nɛ pɩtɛ lɛ, piseɣti-m se mɛnkpɛlɩkɩ nɛ mantɩlɩ Yehowa camɩyɛ nɛ pɩkɩlɩ, nɛ piyeba ɖɔɖɔ nɛ mɛntɛ man-taa nɛ pɩkɩlɩ se mɛnsɛɣ-ɩ.»

14. Ɛzɩma lʋlɩyaa pɩzɩɣ nɛ patɩŋnɩ wondu kɩlɩzɩtʋ yɔɔ nɛ pasɩnɩ pe-piya nɛ sɩna se Yehowa kɛ Ɛsɔ koboyaɣ tʋ?

¹⁴ Yehowa wondu kɩlɩzɩtʋ wɩlɩɣ se ɛkɛ Ɛsɔ koboyaɣ tʋ nɛ ɛsɔɔlaa se ɖa ɖɔɖɔ ɖɩkɛ koboyaɣ tɩnaa. Lɛɣtʋ ñɩnɩyaa ɖiɣzinaa se kpɩna hɔɔlʋʋ sɔsɔʋ leɣyiɣ, pɩkpɛndɩnɩ sumasɩ nɛ kpakpasɩ. (Yɔɔb 40:20) Wiɖiyi ñe-piya tɛm hoŋuu alɩwaatʋ ndʋ sɩna kpɩnɛ naɖɩyɛ wɛɛ nɛ ɖileɣyiɣ yɔ? Pɩtɩla sɩtɛm naʋ agu nɔɔyʋ wɛɛ nɛ eleɣyiɣni nabʋyʋ yaa hasɩ cikpesi wɛɛ nɛ sileɣyiɣ. Alɩwaatʋ ndʋ ñe-piya tasɩɣ naʋ kpɩnɛ naɖɩyɛ lakasɩ nasɩyɩ nɛ sihoŋ yɔ, ŋpɩzɩɣ nɛ ŋtɔzɩ-sɩ se ɖɩsɛɣ Ɛsɔ koboyaɣ tʋ.—1 Tim. 1:11.

ÑA NƐ ÑƆ-HƆƲ ƖKPƐNDƖ NƐ ƖCƆNƖ YEHOWA WONDU KƖLƖZƖTƲ

15. Ɛbɛ pɩzɩɣ nɛ pɩsɩnɩ lʋlɩyaa nɛ patɩlɩ ndʋ pe-piya maɣzɩɣ yɔ? (Aduwa 20:5) (Cɔnɩ ɖɔɖɔ kɩlɛmʋʋ.)

¹⁵ Nabʋyʋ taa, pɩpɩzɩɣ nɛ pɩwɛɛ lʋlɩyaa kaɖɛ se pasɩnɩ pe-piya nɛ siheyi-wɛ kala wena sɩkatɩɣ yɔ a-tɔm. Ye ŋwɛ wɛtʋ ndʋ tɩ-taa yɔ, pɩtɩla pɩkaɣ pɔzʋʋ se ŋñaɣ pana nɛ ŋtɩlɩ ñe-piya lɩmaɣza. (Kalɩ Aduwa 20:5.) Lʋlɩyaa nabɛyɛ ɖiɣzinaa se pɩwɛ-wɛ kɛlɛʋ se pala mbʋ alɩwaatʋ ndʋ pa nɛ pe-piya pakpakɩɣ alɩwaatʋ nɛ pɔcɔŋnɩ wondu kɩlɩzɩtʋ yɔ. Ɛbɛ yɔɔ? Lɩmaɣzɩyɛ naɖɩyɛ lɛ se mbʋ pɩkɛzɩɣ piya nɛ lʋlɩyaa lɩmaɣza yɔ pɩtɩkɩlɩ ɖɔʋ. Payaɣ caja nɔɔyʋ se Masahiko, ɛwɛ Tayɩwaanɩ ɛjaɖɛ taa. Ɛyɔɔdɩ lɩmaɣzɩyɛ lɛɛɖɛ tɔm. Ɛtɔm se: «Alɩwaatʋ ndʋ ɖa nɛ ɖe-piya ɖɩlɩɣ nɛ ɖɩkpaɣ pʋŋ taa, yaa ɖɩɖɔŋ teŋgu nɔɔ yɔ, ɖoŋ ɖoŋ lɛ, pɩwɛ-sɩ kɛlɛʋ se sɩyɔɔdɩ sɩ-taa tɔm. Piyeki nɛ pɩwɛɣ-ɖʋ kɛlɛʋ se ɖa nɛ sɩ ɖɩla kɛdaɣ nɛ ɖɩtɩlɩ ndʋ sɩmaɣzɩɣ yɔ.» Katya weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdaa se «Malɩɣnɩ sukuli lɛ mon-ɖoo kɛyɩɣ-m nɛ ɖiwoki kaɖaɣ kɩbaŋa nakɛyɛ taa. Pɩwɛ-m kɛlɛʋ se meheyi mon-ɖoo mbʋ pɩlabɩ sukuli taa yɔ yaa mbʋ pɩkpaɣ-m sɔɔndʋ yɔ laŋhɛzɩyɛ lone nɖɩ ɖɩ-taa.»

16. Ɛzɩma hɔŋ taa ñɩma pɩzɩɣ nɛ patɩŋnɩ Yehowa wondu kɩlɩzɩtʋ yɔɔ nɛ pamʋ helim nɛ peleɣyi?

¹⁶ Alɩwaatʋ ndʋ hɔʋ taa ñɩma kpɛndɩɣ nɛ pɔcɔŋnɩ Yehowa wondu kɩlɩzɩtʋ yɔ, papɩzɩɣ nɛ pala aleɣya nɛ pɩkaɣ-wɛ sɩnʋʋ nɛ pɔsɔɔlɩ ɖama nɛ pɩkɩlɩ. Bibl yɔɔdʋʋ se «wɩyɛ wɛɛ se pohoŋ» nɛ «wɩyɛ wɛɛ se pɛmɛyɩ.» (Ekl. 3:1, 4) Yehowa lɩzɩ lona wena awɛ kajʋka yɔ tɛtʋ yɔɔ nɛ ɖɩpɩzɩɣ nɛ ɖɩla mbʋ ɖɩsɔɔlaa yɔ peeɖe. Hɔŋ sakɩyɛ sɔɔlɩ wobu lona wena palɩzaa se awɛ ŋgee yɔ a-taa, kɔfɩnaa taa, pʋŋ taa yaa teŋgu nɔɔ. Piya nasɩyɩ sɔɔlɩ seu nɛ sɩsɔɔlɩ leɣyuu kaɖaɣ taa, nasɩyɩ sɔɔlɩ kpɩna cɔnʋʋ yaa sɩsɔɔlɩ lɩm yaʋ pɔɔ taa, lɩŋgamʋʋ taa yaa teŋgu taa. Ðɩwɛnɩ wala sakɩyɛ se ɖɩnɩɩ leleŋ alɩwaatʋ ndʋ ɖɩlɩɣ nɛ ɖɩnaɣ mbʋ Yehowa lɩzaa yɔ.

17. Ɛbɛ yɔɔ pɩwɛɛ se lʋlɩyaa ɩsɩnɩ pe-piya nɛ sɩnɩɩ leleŋ Ɛsɔ wondu kɩlɩzɩtʋ yɔɔ?

¹⁷ Ɛjaɖɛ kɩfaɖɛ taa, Yehowa wondu kɩlɩzɩtʋ kaɣ haʋ taa leleŋ lʋlɩyaa nɛ piya nɛ wiɖiyi patihiɣ taa leleŋ ɛnɩ nɛ pana. Alɩwaatʋ ndʋ tɩ-taa, ɖɩɩkaɣ seu sɔɔndʋ kpɩna nɛ aakaɣ-ɖʋ seu sɔɔndʋ ɖɔɖɔ. (Iza. 11:6-9) Ðɩkaɣ wɛnʋʋ alɩwaatʋ tam se ɖɩnɩɩ leleŋ Yehowa wondu kɩlɩzɩtʋ yɔɔ. (Keɣa 21:27) Ɛlɛ lʋlɩyaa, ɩtaaɖaŋ se alɩwaatʋ ndʋ tɩtalɩ pʋcɔ nɛ ɩsɩnɩ mi-piya nɛ sɩpaɣzɩ leleŋ nɩʋ wondu kɩlɩzɩtʋ yɔɔ. Alɩwaatʋ ndʋ ɩtɩŋɩɣnɩ wondu kɩlɩzɩtʋ yɔɔ nɛ ɩwɩlɩɣ mi-piya Yehowa tɔm yɔ, pɩtɩla sɩkaɣ wɛnʋʋ lɩmaɣza wena Wiyaʋ Daviid kaawɛna yɔ. Ɛyɔɔdaa se: «[Oo Yehowa] nabʋyʋ tɩtalɩ ña-tʋma.»—Keɣa 85:8.