Ye ɖɩɖʋʋ nesi Yehowa nɩŋgbaŋʋʋ hɔm ɖʋtʋ yɔ ɖɩwɩlɩɣ se ɖɩwɛnɩ sɔɔlɩm

Palabɩ ɖʋtʋ se palɩzɩ ɛyaa ɛgbɛyɛ taa. Patɩŋɩɣnɩ ɖʋtʋ ndʋ tɩ-yɔɔ nɛ pakandɩyɩɣ ɛgbɛyɛ yɔɔ, nɛ pɔhɔŋ ɖɔɖɔ kɩwɛɛkɩm laɖʋ weyi ekizaa se eekpiɖi yɔ ɛ-nɩŋgbaŋʋʋ. (1Kɔ 5:6, 11) Ðʋtʋ ndʋ, tɩlɩnɩ Yehowa cɔlɔ nɛ ye ɖɩɖʋʋ-tʋ nesi yɔ, ɖɩwɩlɩɣ se ɖɩwɛnɩ sɔɔlɩm. Paa mbʋ yɔ, ye palɩzɩ nɔɔyʋ ɛgbɛyɛ taa yɔ, pɩkɔŋnɩ wɩzasɩ ɛyaa tɩŋa, pɩkpɛndɩnɩ Tɔm hʋʋ kɔɔmiite nɛ weyi palɩzɩ-ɩ yɔ ɛ-hɔʋ taa mba. Ye mbʋ, ɛbɛ yɔɔ pɔtɔŋ se ye ɖɩɖʋʋ nesi ɖʋtʋ ndʋ yɔ, ɖɩwɩlɩɣ se ɖɩwɛnɩ sɔɔlɩm?

Kɔzɩ kɔzɩ lɛ, ɖɩwɩlɩɣ se ɖɩsɔɔlɩ Yehowa hɩɖɛ nɛ paɣtʋ ndʋ ɛɖʋ kele kele wɛtʋ hɔɔlʋʋ taa yɔ. (1Pɩ 1:14-16) Ðɩwɩlɩɣ ɖɔɖɔ se ɖɩsɔɔlɩ weyi palɩzɩ-ɩ ɛgbɛyɛ taa yɔ. Paa ɛ-nɩŋgbaŋʋʋ hɔm mbʋ pɩkɔŋnɩ wɩzasɩ yɔ, pɩkaɣ lʋlʋʋ “siɣsiɣ wɛtʋ tɛ laŋhɛzɩyɛ piye.” (Ebr 12:5, 6, 11) Ye ɖɩɖʋʋ taabalɩyɛ nɛ weyi palɩzɩ-ɩ ɛgbɛyɛ taa yaa weyi ɛ-maɣmaɣ ɛlɩzɩ ɛ-tɩ ɛgbɛyɛ taa yɔ, ɖɩkaɖɩɣnɩ Yehowa paɣtʋ. Ðɩtaasɔɔ se Yehowa “nɩŋgbaŋʋʋ hɔm” mʋnɩ ɖeyi ɖeyi. (Yer 30:11) Ðɩtaɣ liu se weyi palɩzɩ-ɩ ɛgbɛyɛ taa yɔ ɛkaɣ pɩsʋʋ wiɖiyi. Ɛlɛ pɩwɛɛ se ɖɩɖʋ nesi ɖʋtʋ ndʋ Yehowa laba se palɩzɩ ɛyaa ɛgbɛyɛ taa yɔ nɛ ɖiwolo pɩ-yɔɔ nɛ ɖɩcɛyɩsɩɣ ɖa nɛ ɩ ɖa-taabalɩyɛ.—Iza 1:16-18; 55:7.

CƆNƖ VIDEO ÐƆKƖ ÑE-SIƔSIƔ WƐTƲ KPAM NƐ PƲWAYƖ LƐ, ŊCOSI TƆM TƲNƐ TƖ-YƆƆ:

• 

  Wɩzasɩ nzɩ lʋlɩyaa Krɩstʋ ñɩma nabɛyɛ nɩwa alɩwaatʋ ndʋ pa-pɩɣa posi ka-tɩ nɛ Yehowa yɔ?

• 

  Ɛzɩma ɛgbɛyɛ pɩzɩɣ nɛ ɖɩsɩnɩ hɔʋ taa ñɩma mba pɛwɛ siɣsiɣ yɔ?

• 

  Bibl taa kɛdaɣ ŋga wɩlɩɣ se pɩcɛyaa se ɖɩsɔɔlɩ Yehowa nɛ pɩkpaɖɩ ɖɔ-hɔʋ taa ñɩma?

• 

  Ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ Yehowa nɛ pɩkpaɖɩ ɖɔ-hɔʋ taa ñɩma?