Ŋwɛɛ nɛ ŋñɔɔzʋʋ ña-tɩ se ŋɖaŋ Krɩstʋ sɩm yɔɔ tɔzʋʋ kɩyakʋ na?

Kɛdɛzaɣ paska kazandʋ ndʋ Yesu caɣ tɔɔʋ yɔ, tɩwɛ ŋgee. Mbʋ pʋyɔɔ yɔ ɛ-sɩm ñɔtaa, ɛlabɩ ɖʋtʋ se ɛ nɛ ɛ-tɛ apostoloowaa pɔtɔkɩ paska tɔɔnaɣ lɛ ɛɖʋʋ sɔnzɩ kɩfasɩ nasɩyɩ, nzɩ lɛ Kɩbaɣlʋ Ðanaɣ Tɔɔnaɣ. Pʋyɔɔ etiyi Pɩyɛɛrɩ nɛ Yohanɛɛsɩ se powolo pɔñɔɔzɩ kuduyuu ŋgʋ kɩ-taa pakaɣ tɔɔnaɣ ŋga tɔɔʋ yɔ. (Luka 22:7-13; cɔnɩ takayaɣ huyuu yɔɔ kɩlɛmʋʋ.) Pɩtɔzʋʋ-ɖʋ se pɩwɛɛ se ɖɩñɔɔzɩ ɖa-tɩ nɛ ɖɩla Yesu sɩm yɔɔ tɔzʋʋ sɔnzɩ 27 mars wiye. Agbaa labɩ ɖʋtʋ ndɩ ndɩ pɩlɩɩnɩ tɔm yɔɔdɩyʋ, kpɔnɔ nɛ vɛɛ nɛ tɔm lɛɛtʋ yɔɔ. Paa mbʋ yɔ ɛbɛ pɩwɛɛ se ɖa-taa paa anɩ ɛla nɛ ɛñɔɔzɩ ɛ-tɩ nɛ ɛɖaŋ kɩyakʋ ŋgʋ?

Ñɔɔzɩ ña-laŋɩyɛ. Kalɩ nɛ ŋmaɣzɩ Bibl hɔɔlɩŋ weyi pahawa se ɖɩkalɩ alɩwaatʋ ndʋ tɩ-taa yɔ, ɩ-yɔɔ. Ŋpɩzɩɣ nɛ ŋna ɖʋtʋ ndʋ, Ðɩtazɩ Masɩ taa paa evemiye nɖɩ takayaɣ taa. Tɔm kɩsɔzɩtʋ sakɩyɛ nɛ mbʋ mbʋ Yesu labɩ kɛdɛzaɣ avema ana a-taa yɔ, pɩwɛ Appendice B12 taa, Traduction du monde nouveau taa (Kalɩ ɖɔɖɔ avril 2020 tɛ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ.) Hɔŋ pɩzɩɣ nɛ ɩla ɖʋtʋ nɛ ɩñɩnɩ tɔm lɛɛtʋ ndʋ titukuuni Yesu kɩlaʋ wazasɩ yɔ Index des publications des Témoins de Jéhovah yaa Guide de recherche taa alɩwaatʋ ndʋ ɩɩlakɩ hɔʋ taa Ɛsɔ sɛtʋ yɔ.

Yaa lalaa se pɔkɔɔ Krɩstʋ sɩm yɔɔ tɔzʋʋ sɔnzɩ ɖɩlaɖɛ. La ño-ɖoŋ ɖeɖe nɛ ŋyaa ɛyaa se pɔkɔɔ Krɩstʋ sɩm yɔɔ tɔzʋʋ sɔnzɩ ɖɩlaɖɛ. Maɣzɩ mba ŋpɩzɩɣ nɛ ŋyaa yɔ pɔ-yɔɔ: Ɛzɩ ñɛ-tɛ pɩsɩ ŋna-ɩ waa, Bibl kpɛlɩkɩyaa kɩbɩma, taabalaa nɛ hɔʋ taa mba mbʋ yɔ. Pɩpɔzʋʋ se ɛgbɛyɛ taa ɛzʋtʋyaa ɩyaa mba pɛhɛ fezuu taa yɔ. Taasɔɔ se ye nɔɔyʋ ɛfɛyɩ ño-kooka taa yɔ, ŋpɩzɩɣ ŋwolo jw.org yɔɔ nɛ ŋsʋʋ hɔɔlʋʋ ƐYAA MBA ÐƖKƐNAA? taa, nɛ ŋñɩɣ “Tɔzʋʋ” yɔɔ nɛ pɩsa nɛ ŋna alɩwaatʋ nɛ lone nɖɩ ɖɩ-taa palakɩ Yesu sɩm yɔɔ tɔzʋʋ sɔnzɩ nzɩ, ɖenɖe ɛyʋ ɛnʋ ɛwɛɛ yɔ.

Ɛbɛ ɖɔɖɔ pɩwɛɛ se ɖa-taa paa anɩ ɛla nɛ ɛñɔɔzɩ ɛ-tɩ?