Wiɖiyi ɛjaɖɛ ɖɩnɛ ɖɩkaɣ tɛm na?

Mbʋ paakaɣ ɖɩzʋʋ yɔ

ƐYAA

Tɔm ndʋ Bibl yɔɔdʋʋ yɔ: Ɛsɔ “[tɩlɩzɩ-tɛtʋ] se tɩwɛɛ ndaakpasɩ, ɛlɛ se pacaɣ tɩ-yɔɔ.”—IZAAYII 45:18.

TƐTƲ

Tɔm ndʋ Bibl yɔɔdʋʋ yɔ: “Kpanɖaʋ nakʋyʋ ɖɛwa nɛ kpanɖaʋ lɛɛkʋ kɔŋ, ɛlɛ tɛtʋ caɣ tam ti-ɖeɖe.”—EKLEZƖYASƖTƖ 1:4.

PƲ-TƆBƲƲ LƐ SUWE? Bibl wɩlɩɣ se paakaɣ ɖɩzʋʋ tɛtʋ wiɖiyi kaaʋ, nɛ ɛyaa kaɣ wɛʋ tɩ-yɔɔ tam. Ye mbʋ, ye pɔtɔm se ɛjaɖɛ tɛŋ, pʋ-tɔbʋʋ lɛ suwe?

MAƔZƖ TƆM TƲNƐ TƖ-YƆƆ: Bibl kpakɩɣ ɛjaɖɛ ɖɩnɛ ɖɩ-tɛm nɛ kɩmaɣzɩɣnɩ mbʋ pɩɩlabɩ Noowa alɩwaatʋ taa yɔ. Alɩwaatʋ ndʋ tɩ-taa lɛ, ‘kañatʋ kaasuni tɛtʋ.’ (Kiɖe Tɛɛ Tɔm 6:13) Ɛlɛ, Noowa ñaakɛ ɛyʋ kɩbanʋ. Pʋyɔɔ Ɛsɔ huuzi Noowa nɛ ɛ-hɔʋ pɔ-yɔɔ. Ɛtɩŋnɩ tɛʋ sɔsɔʋ nakʋyʋ yɔɔ nɛ ɛɖɩzɩ ɛyaa kɩdɛkɛdaa. Bibl yɔɔdʋʋ mbʋ pɩɩlabɩ alɩwaatʋ ndʋ tɩ-taa yɔ pɩ-tɔm lɛ, kɩtɔŋ se: “Paɖɩzɩ ɛjaɖɛ nɖɩ ɖɩɩwɛ alɩwaatʋ ndʋ tɩ-taa yɔ, alɩwaatʋ ndʋ lɩm wadɩ ɖɩ-yɔɔ yɔ.” (2 Pɩyɛɛrɩ 3:6) Mbʋ pɩlaba nɛ alɩwaatʋ ndʋ tɩ-taa ɛjaɖɛ sɩɩ tɩnaɣ. Ɛlɛ, ɛbɛ paaɖɩzɩ alɩwaatʋ ndʋ tɩ-taa? Pataaɖɩzɩ tɛtʋ, ɛlɛ ɛyaa kɩdɛkɛdaa mba paawɛɛ tɛtʋ yɔɔ yɔ, mba paaɖɩzaa. Ye mbʋ, alɩwaatʋ ndʋ Bibl yɔɔdʋʋ ɛjaɖɛ tɛm tɔm yɔ, pɩtɩwɩlɩ se pakaɣ ɖɩzʋʋ tɛtʋ. Ɛlɛ pɩwɩlɩɣ se pakaɣ ɖɩzʋʋ ɛyaa kɩdɛkɛdaa mba pɛwɛ tɛtʋ yɔɔ yɔ nɛ ɖʋtʋ ndʋ payɩ palaba yɔ.

Mbʋ pakaɣ ɖɩzʋʋ yɔ

TƖLASƖ NƐ KAÑATƲ LAKASƖ

Tɔm ndʋ Bibl yɔɔdʋʋ yɔ: “Pɩkazɩ ññɩɩ, kɩdɛkɛdʋʋ mʋkɩ, ŋñɩnɩɣ e-lone, ɖɩfɛyɩ. Ɛlɛ ɖɛfɛɛ tɩnaa hikiɣ tɛtʋ nɛ pɛwɛɛ tamtam ɖɩhɛzɩyɛ taa.”—KEƔA 36:10, 11.

PƲ-TƆBƲƲ LƐ SUWE? Noowa alɩwaatʋ taa Tɛʋ Sɔsɔʋ taahɩzɩ kañatʋ kpaagbaa hɩzʋʋ. Tɛʋ Sɔsɔʋ tɛma lɛ, kañatʋ tɩnaa ɖaɣnɩ yebu nɛ wezuu caɣʋ la ɛyaa kaɖɛ. Ɛlɛ pɩkazɩ pazɩ Ɛsɔ kaɣ yebu nɛ kañatʋ sɩɩ tɩnaɣ. Ɛzɩ Keɣa maɖʋ yɔɔdʋʋ yɔ, “kɩdɛkɛdʋʋ mʋkɩ.” Ɛsɔ kaɣ tɩŋnʋʋ e-Kewiyaɣ yɔɔ nɛ eyele nɛ kañatʋ sɩɩ tɩnaɣ. Ɛsɔ Kewiyaɣ kɛnɩ ɛsɔdaa komina nɛ ŋgʋ cɔŋnɩnɩ ɛyaa mba pañaŋ Ɛsɔ yɔ pɔ-yɔɔ.

MAƔZƖ TƆM TƲNƐ TƖ-YƆƆ: Ɛzɩ ñʋndɩnaa mba peɖiyiɣ ɛjaɖɛ sɔnɔ yɔ, pa-taa kaɣ labʋ leleŋ nɛ Ɛsɔ Kewiyaɣ na? Bibl yɔɔdʋʋ se pa-taa ɛɛkaɣ labʋ leleŋ. Pakaɣ labʋ kɩmɛlɛndʋ nɛ pakaɖɩnɩ Ɛsɔ Kewiyaɣ. (Keɣa 2:2) Ɛbɛ kaɣ lɩʋ pɩ-taa? Ɛsɔ Kewiyaɣ kaɣ lɛɣzʋʋ ɛyaa kominawaa lone taa nɛ “ka-maɣmaɣ kakaɣ wɛʋ tam.” (Danɩyɛɛlɩ 2:44) Ɛbɛ yɔɔ pɩcɛyaa se paɖɩzɩ kominawaa mba pɛwɛ tɛtʋ yɔɔ sɔnɔ yɔ?

MBƲ PƖPƆZƖ-ÐƲ YƆ—Pɩpɔzaa se ɛyaa kewiyisi ɩsɩɩ tɩnaɣ

Tɔm ndʋ Bibl yɔɔdʋʋ yɔ: “Pɩtɩha ɛyʋ se ɛɖɔŋ nɛ ɛcɔŋnɩ ɛ-naataŋ yɔɔ.”—YEREEMII 10:23.

PƲ-TƆBƲƲ LƐ SUWE? Patɩlɩzɩ ɛyaa se pa-maɣmaɣ peɖiyi pa-tɩ. Ɛyaa tɩpɩzɩ nɛ peɖiyi lalaa nɛ pɔcɔnɩ pa-tɩlasɩ ɖeɖe camɩyɛ.

MAƔZƖ TƆM TƲNƐ TƖ-YƆƆ: Takayaɣ nakɛyɛ (The Britannica Academic) yɔɔdaa se ɛyaa kominawaa tɩpɩzɩ nɛ palʋbɩnɩ “tɩlasɩ ɛzɩ kʋñɔndʋtʋ, ñɔɔsɩ, kʋdɔŋ, kɛgbɛdɩsasɩ, you yaa ñam ñam lakasɩ lɛɛsɩ.” Nɛ katasɩ yɔɔdʋʋ se: “Nabɛyɛ . . . maɣzɩɣ se ɛjaɖɛ yɔɔ komina nakʋyʋ kaɣ pɩzʋʋ nɛ kɩcɔnɩ tɩlasɩ nzɩ si-ɖeɖe nɛ pɩñɔɔzɩ.” Ɛlɛ, paa ɛjaɖɛ yɔɔ kominawaa tɩŋa ɩnɩɣnɩ ɖama yɔ, ɖɩtaasɔɔ se ɛyaa mba peɖiyiɣ ɛjaɖɛ yɔ patɩtalɩ pilim; nɛ paapɩzɩɣ nɛ pɔcɔnɩ tɩlasɩ nzɩ ɖɩyɔɔdɩ sɩ-tɔm nɛ pɩɖɛɛ yɔ si-ɖeɖe nɛ pawabɩ-sɩ. Ɛsɔ Kewiyaɣ ɖeke pɩzɩɣna nɛ kɔcɔnɩ ɛjaɖɛ kpeekpe yɔɔ tɩlasɩ ɖeɖe nɛ sɩsɩɩ tɩnaɣ tam.

Ye mbʋ, Bibl wɩlɩɣ se ye pɔyɔɔdʋʋ ɛjaɖɛ kɩdɛkɛdɩyɛ ɖɩnɛ ɖɩ-tɛm tɔm yɔ, pɩtɩpɔzɩ se sɔɔndʋ ɛkpa ɛyaa kɩbama. Pɩkɛ mbʋ pɩwɛɛ se ɖɩɖaŋ yɔ, mbʋ pʋyɔɔ yɔ ɛjaɖɛ kɩfaɖɛ nɖɩ Ɛsɔ ñɔɔzaa yɔ, ɖɩkaɣ lɛɣzʋʋ ɛjaɖɛ kɩdɛkɛdɩyɛ ɖɩnɛ ɖi-lone taa!

Ɛzɩmtaa pɩtɩŋa mbʋ yɔ pɩkaɣ labʋ? Ñʋʋ ŋgʋ kɩkɔŋ yɔ, kɩkaɣ-ɖʋ wɩlʋʋ tɔm ndʋ Bibl cosuu yɔ.