Ɛzɩma Yehowa cosuu ɖa-adɩma yɔɔ?

1-2. Tɔm ndʋ ɖɩpɩzɩɣ nɛ ɖɩpɔzʋʋ ɖa-tɩ pɩlɩɩnɩ adɩma wena ɖɩlakɩ yɔ a-yɔɔ?

WIÐIYI ŋtɛm ña-tɩ pɔzʋʋ se ɛzɩ Yehowa wɛɛ nɛ ecosuu ña-adɩma yɔɔ yaa eecosuu a-yɔɔ? Ye ɛɛɛ yɔ, tɩlɩ se pɩtɩkɛ ñe-ɖeke ŋpɔzʋʋnɩ ña-tɩ tɔm ndʋ. Koobiya sakɩyɛ yɔɔdaa ɖɔɖɔ se mba pɔzʋʋ pa-tɩ tɔm ndʋ, kɔzɩ kɔzɩ alɩwaatʋ ndʋ pakatɩɣ kala yɔ. Alɩwaatʋ ndʋ ɖɩwɛɣ kʋñɔŋ taa yɔ, pɩpɩzɩɣ nɛ pɩwɛɛ ɖa ɖɔɖɔ kaɖɛ se ɖɩna ɛzɩma Yehowa wɛɛ nɛ ecosuu ɖa-adɩma yɔɔ yɔ.

² Iyele nɛ ɖɩtazɩ nɛ ɖɩna mbʋ pʋyɔɔ ɖa-taa pɩzɩɣ nɛ pɩtɛ se Yehowa cosuu ɛ-sɛyaa adɩma yɔɔ yɔ. (1 Yoh. 5:15) Ðɩkaɣ tazʋʋ ɖɔɖɔ tɔm pɔzʋʋ pʋnɛ pɩ-taa: Nabʋyʋ taa, ɛbɛ yɔɔ pɩpɩzɩɣ nɛ pɩwɛɛ ɛzɩ Yehowa eecosuu ɖa-adɩma yɔɔ yɔ? Sɔnɔ, nʋmɔŋ weyi ɩ-yɔɔ Yehowa tɩŋɩɣna nɛ ecosuu ɖa-adɩma yɔɔ?

ƐZƖMA YEHOWA COSUU ÐA-ADƖMA YƆƆ YƆ, PƖPƖZƖƔ PƖWƐƐ NDƖ NƐ ƐZƖMA ÐƖƖMAƔZAA YƆ

3. Ɛbɛ yɔɔ Yehowa sɔɔlaa se ɖɩtɩmnɩ-ɩ?

³ Masɩ heyiɣ-ɖʋ se Yehowa sɔɔlɩ-ɖʋ siŋŋ nɛ ɖɩmʋ ñɩm ɛ-ɛsɩndaa. (Agee 2:7; 1 Yoh. 4:10) Pʋyɔɔ eheyiɣ-ɖʋ se ɖɩtɩmnɩ-ɩ nɛ ɖɩpɔzɩ-ɩ se ɛsɩnɩ-ɖʋ. (1 Pɩy. 5:6, 7) Ɛsɔɔlaa se ɛsɩnɩ-ɖʋ nɛ ɖɩñɔɔnɩ-ɩ kpam nɛ ɛsɔɔlaa ɖɔɖɔ se ɛsɩnɩ-ɖʋ nɛ ɖɩɖɔkɩ ɖa-laŋɩyɛ camɩyɛ kala taa.

4. Ɛzɩma ɖɩlaba nɛ ɖɩna se Yehowa cosuu ɛ-sɛyaa adɩma yɔɔ? (Cɔnɩ ɖɔɖɔ kɩlɛmʋʋ.)

⁴ Ðoŋ ɖoŋ lɛ ɖɩkalɩɣ Bibl taa se Yehowa cosi ɛ-sɛyaa adɩma yɔɔ. Ŋpɩzɩɣ nɛ ŋtɔzɩ kɩɖaʋ nakʋyʋ yɔɔ? Pa-taa nɔɔyʋ lɛ Wiyaʋ Daviid. E-wezuu caɣʋ kpeekpe taa, ɛɛwɛnɩ koyindinaa sakɩyɛ, nɛ ɖoŋ ɖoŋ lɛ, ɛtɩmaɣnɩ Yehowa se ɛsɩnɩ-ɩ. Alɩwaatʋ natʋyʋ, etendi Yehowa nɛ ɛtɔ se: «[Yehowa], welisi maadɩma, kʋ nɩŋgbaaŋ nɛ ŋnɩɩ mɔ-nɔɔ, ŋwɛ siɣsiɣ nɛ ŋcakɩ ñɔ-tɔm yɔɔ: Cosi-m.» (Keɣa 142:1) Daviid tɩmnɩ Yehowa se ɛya ɛ-ñʋʋ lɛ, Yehowa welisini-i. (1 Sam. 19:10, 18-20; 2 Sam. 5:17-25) Pʋyɔɔ Daviid pɩzaa nɛ ɛyɔɔdɩnɩ ɛ-laŋɩyɛ kpayɩ se: «[Yehowa wɛ] mba payaɣ-ɩ yɔ pɔ-cɔlɔ kpam.» Ða ɖɔɖɔ ɖa-taa pɩzɩɣ nɛ pɩtɛmnɩ tɔm ndʋ.—Keɣa 144:18.

5. Caanaʋ taa, ɛzɩ paa ɛzɩmtaa lɛ Yehowa cosaɣ ɛ-sɛyaa adɩma yɔɔ ɛzɩ paamaɣzʋʋ yɔ? Ha kɩɖaʋ nakʋyʋ. (Cɔnɩ ɖɔɖɔ kɩlɛmʋʋ.)

⁵ Ɛzɩma Yehowa cosuu ɖa-adɩma yɔɔ yɔ, pɩpɩzɩɣ pɩwɛɛ ndɩ nɛ ɛzɩma ɖɩɩmaɣzaa yɔ. Mbʋ pɩlabɩ apostoloo Pɔɔlɩ hɔɔlʋʋ taa. Ɛpɔzɩ Yehowa se ɛlɩzɩ ‘sɔɔyɛ naɖɩyɛ e-tomnaɣ taa.’ Pɔɔlɩ tɩmnɩ Yehowa tam nabudozo nɛ eheyi-i kaɖɛ nɖɩ ɖɩ-tɔm. Ɛzɩ Yehowa cosi adɩma ana a-yɔɔ? Ɛɛɛ, ɛlɛ ɛzɩma ecosi a-yɔɔ yɔ pɩwɛ ndɩ nɛ ɛzɩma Pɔɔlɩ kaamaɣzaa yɔ. Yehowa tiyele nɛ kaɖɛ nɖɩ ɖɩsɩɩ tɩnaɣ, ɛlɛ ɛha Pɔɔlɩ ɖoŋ weyi pɩpɔzaɣ-ɩ se pɩsa nɛ ewolo pɩ-yɔɔ nɛ ɛsɛɣ-ɩ siɣsiɣ yɔ.—2 Kɔr. 12:7-10.

6. Nabʋyʋ taa, ɛbɛ yɔɔ pɩpɩzɩɣ nɛ pɩwɛɛ ɛzɩ Yehowa eecosuu ɖa-adɩma yɔɔ yɔ?

⁶ Ða ɖɔɖɔ nabʋyʋ taa, ɛzɩma Yehowa cosuu ɖa-adɩma yɔɔ yɔ pɩpɩzɩɣ pɩwɛɛ ndɩ nɛ ɛzɩma ɖɩɩmaɣzaa yɔ. Ða-taa pɩzɩɣ nɛ pɩtɛ se Yehowa sɩm ɛzɩma ɖeyi ɖeyi pɩwɛɛ se ɛsɩnɩ-ɖʋ yɔ camɩyɛ nɛ pɩkɩlɩ. Halɩ ɛpɩzɩɣ nɛ «ɛla nɛ pɩɖɔɔ sakɩyɛ nɛ pɩkɩlɩ mbʋ payɩ ɖɩpɔzʋʋ yaa ɖɩmaɣzɩɣ yɔ.» (Efɛz. 3:20) Pʋyɔɔ lɛ, alɩwaatʋ ndʋ tɩ-yɔɔ Yehowa cosuu ɖa-adɩma yɔɔ yɔ yaa ɛzɩma ecosuu a-yɔɔ yɔ, pɩpɩzɩɣ nɛ pɩwɛɛ ndɩ nɛ ɛzɩma ɖɩɩmaɣzaa yɔ.

7. Ɛbɛ yɔɔ pɩpɩzɩɣ nɛ pɩpɔzɩ se ɖɩtɩmɩ nɛ ɖɩlɛɣzɩ mbʋ ɖɩɩtɩmaa nɛ ɖɩpɔzɩ yɔ? Ha kɩɖaʋ nakʋyʋ.

⁷ Alɩwaatʋ ndʋ ɖɩtɩlɩɣ Yehowa sɔɔlɩm kpayɩ kpayɩ nɛ pɩkɩlɩ yɔ, pɩpɩzɩɣ nɛ pɩpɔzɩ se ɖɩlɛɣzɩ mbʋ ɖɩɩtɩmaa nɛ ɖɩpɔzɩ-ɩ yɔ. Iyele nɛ ɖɩna koobu Martin Poetzinger kɩɖaʋ. Ɛɖɔkɩ nesi nɛ pitileɖi lɛ, pakpa-ɩ nɛ paɖʋ-ɩ salaka Naazii mba salaka nakɛyɛ taa. Kiɖe tɛɛ lɛ, ɛpɔzɩ Yehowa se eyele nɛ palɩzɩ-ɩ salaka ŋga ka-taa nɛ pɩsa nɛ ɛpɩzɩ ɛcɔnɩ ɛ-halʋ yɔɔ nɛ ewolo pɩ-yɔɔ nɛ esusi tɔm. Ɛlɛ kpɩtaŋ naalɛ wayɩ, ɛtɩna yʋsaɣ nakɛyɛ nɛ kawɩlɩɣ se Yehowa wɛɛ nɛ ɛlakɩ nabʋyʋ se pɩsa nɛ peyebi-i. Pʋyɔɔ lɛ, ɛpaɣzɩ tɩmʋʋ se: «Yehowa, mentendi-ŋ wɩlɩ-m mbʋ ŋsɔɔlaa se mala yɔ.» Pʋwayɩ lɛ, ɛpaɣzɩ maɣzʋʋ mbʋ pɩwɛɛ nɛ pɩtalɩɣ koobiya lalaa mba paawɛ salaka taa peeɖe yɔ pɩ-yɔɔ. Pa-taa sakɩyɛ kaawɛɛ nɛ panɩɣzɩɣ pa-halaa nɛ pe-piya yɔɔ siŋŋ. Pʋwayɩ lɛ, koobu Poetzinger tɩmɩ se: «Yehowa, mɛnsɛɣ-ŋ se ŋlabaɣ lɛ tʋmɩyɛ kɩfaɖɛ nɖɩ ŋɖʋ-m yɔ ɖɩ-yɔɔ. Sɩnɩ-m nɛ mankpazɩ mon-koobiya ɖoŋ.» Pɩnzɩ nakʋ nzɩ sɩtɩŋ pʋwayɩ yɔ sɩ-taa, koobu Poetzinger kpakaɣ ɛ-alɩwaatʋ nɛ ɛkpazɩɣ ɖoŋ e-koobiya salakanaa mba pa-taa.

8. Alɩwaatʋ ndʋ ɖɩtɩmɩɣ yɔ, tɔm kɩcɛyɩtʋ ndʋ pɩpɔzʋʋ se tɩwɛɛ ɖa-lɩmaɣza taa?

⁸ Pɩwɛɛ se ɖɩtɔzɩ se Yehowa wɛnɩ kaɖʋwa nakɛyɛ, nɛ ɛkaɣ yebu nɛ kala alɩwaatʋ ndʋ ɛɖʋwa yɔ tɩ-yɔɔ. Kaɖʋwa ŋga kɔ-hɔɔlʋʋ nakʋyʋ lɛ se ɛkaɣ ɖɩzʋʋ mbʋ payɩ piyeki nɛ ɖɩnɩɣ siziŋ siŋŋ sɔnɔ yɔ caɣ caɣ. Pɩ-taa nabʋyʋ lɛ asɛyɩŋ, kʋdɔŋ nɛ sɩm. Yehowa kaɣ tɩŋnʋʋ e-Kewiyaɣ yɔɔ nɛ eyele nɛ ɛ-kaɖʋwa la. (Dan. 2:44; Natʋ 21:3, 4) Ɛlɛ, pʋcɔ nɛ pɩtalɩ alɩwaatʋ ndʋ lɛ, Yehowa wɛɛ nɛ ɛhaɣ Sataŋ waɖɛ se eɖiyi ɛjaɖɛ.b (Yoh. 12:31; Natʋ 12:9) Ye Yehowa ɛcɔŋnɩ kʋñɔmɩŋ weyi payɩ ɛyaa katɩɣ yɔ i-ɖeɖe lɛɛlɛɛyɔ yɔ pɩpɩzɩɣ nɛ pɩwɛɛ ɛzɩ Sataŋ wɛɛ nɛ eɖiyiɣ ɛjaɖɛ camɩyɛ yɔ. Ɛlɛ paa pɩpɔzʋʋ se ɖɩɖaŋ Yehowa nɛ eyele nɛ ɛ-tamasɩ la yɔ, pɩɩwɩlɩɣ se eyebi-ɖʋ yem nɛ ɛɛsɩɣnɩ-ɖʋ. Iyele nɛ ɖɩna mbʋ Yehowa lakɩ nɛ ɛsɩɣnɩ-ɖʋ yɔ pɩ-taa nabʋyʋ.

ƐZƖMA YEHOWA COSUU ÐA-ADƖMA YƆƆ SƆNƆ YƆ

9. Alɩwaatʋ ndʋ pɩpɔzʋʋ se ɖɩkpaɣ lɩmaɣza yɔ, ɛzɩma Yehowa pɩzɩɣ nɛ ɛsɩnɩ-ɖʋ? Ha kɩɖaʋ nakʋyʋ.

⁹ Ɛhaɣ-ɖʋ lɔŋsɩnɖɛ. Yehowa labɩ-ɖʋ tamaɣ se ɛhaɣ-ɖʋ lɔŋsɩnɖɛ nɖɩ pɩpɔzʋʋ-ɖʋ yɔ nɛ ɖɩkpaɣ lɩmaɣza kɩbana. Kɔzɩ kɔzɩ lɛ, pɩpɔzʋʋ-ɖʋ lɔŋsɩnɖɛ nɖɩ ɖɩlɩnɩ Ɛsɔ cɔlɔ yɔ alɩwaatʋ ndʋ ɖɩkpakɩɣ lɩmaɣza wena akaɣ wɛnʋʋ ɖoŋ ɖe-wezuu caɣʋ yɔɔ yɔ. A-taa naɖɩyɛ lɛ ɛzɩma ɖɩlɩzɩɣ se ɖɩcakɩ ɛɖandʋ yaa ɖɩɖɔkʋʋ nesi yɔ. (Yak. 1:5) Iyele nɛ ɖɩna koobu halɩñɩnʋ nɔɔyʋ kɩɖaʋ, payaɣ-ɩ se Maria nɛ ɛkɛ ɛɖanɛ.c Ɛɛwɛɛ nɛ ɛlakɩ paa ɖooye nʋmɔʋ lɩzʋʋ tʋmɩyɛ nɛ ɛhikaɣ taa leleŋ tʋmɩyɛ nɖɩ ɖɩ-taa pʋcɔ nɛ ɛkatɩ koobu abalɩñɩnʋ nɔɔyʋ. Ɛyɔɔdaa se:«Ða-taabalɩyɛ wɛɛ nɛ ɖɩcɛyɩsɩɣ lɛ, ɖɩwɛɛ nɛ ɖɩsɔɔlʋʋ ɖama nɛ pɩkɩlɩɣ. Maanawa se pɩpɔzʋʋ se mankpaɣ lɩmaɣzɩyɛ. Mantɩmɩ tɔm ndʋ tɩ-yɔɔ siŋŋ alɩwaatʋ sakɩyɛ. Pɩpɔzaɣ-m Yehowa lɔŋ tasʋʋ, ɛlɛ maanawa ɖɔɖɔ se Yehowa ɛɛkaɣ kpaɣʋ lɩmaɣzɩyɛ mo-lone taa.» Koobu halɩñɩnʋ ɛnʋ eɖiɣzinaa se ɛtɩmnɩ Yehowa nɛ ɛpɔzɩ-ɩ lɔŋsɩnɖɛ lɛ, ɛlɛ cosi ɛ-adɩma ana a-yɔɔ. Ɛzɩma tɩyɛ? Ɛñɩnɩ ɖɛ-ɛgbɛyɛ takayɩsɩ taa lɛ, ɛlɩɩ tɔm ñʋŋ nɩɩyɩ yɔɔ nɛ tɔm ñʋŋ ɛnɩ ɩsɩnɩ-ɩ nɛ ehiɣ tɔm ndʋ ɛpɔzaɣ ɛ-tɩ yɔ tɩ-yɔɔ cosuu. E-ɖoo sɛɣaɣ Yehowa siɣsiɣ nɛ ɛlɛ tasɩ-ɩ lɔŋ kɩbaŋ weyi yɔ, ɛkpaɣ-ɩ nɛ ɛlabɩnɩ tʋmɩyɛ ɖɔɖɔ. Lɔŋ tasʋʋ mbʋ, pɩsɩnɩ Maria nɛ ɛtazɩ mbʋ piseɣtaɣ-ɩ nɛ ɛsɔɔlʋʋ koobu abalɩñɩnʋ ɛnʋ yɔ pɩ-taa. Piyeba nɛ ɛpɩzɩ nɛ ɛkpaɣ lɩmaɣzɩyɛ kɩbanɖɛ.

10. Ɛzɩ Filiipi mba 4:13 yɔɔdʋʋ yɔ, ɛbɛ Yehowa kaɣ labʋ se ɛsɩnɩ ɛ-sɛyaa? Ha kɩɖaʋ nakʋyʋ. (Cɔnɩ ɖɔɖɔ kɩlɛmʋʋ.)

¹⁰ Ɛhaɣ-ɖʋ ɖoŋ se ɖɩɖɔkɩ ɖa-laŋɩyɛ. Yehowa kaɣ-ɖʋ haʋ ɖoŋ weyi pɩpɔzʋʋ-ɖʋ yɔ se pɩsa nɛ ɖɩɖɔkɩ ɖa-laŋɩyɛ kala taa ɛzɩ ɛɛlabʋ apostoloo Pɔɔlɩ hɔɔlʋʋ taa yɔ. (Kalɩ Filiipi mba 4:13.) Iyele nɛ ɖɩna ɛzɩma Yehowa sɩnɩ koobu abalɩñɩnʋ Benjamin nɛ ɛɖɔkɩ ɛ-laŋɩyɛ kaɖɛ wɛtʋ natʋyʋ taa yɔ. Alɩwaatʋ ndʋ Benjamin kaakɛ evebu yɔ, Afrika kʋyʋʋ ɖʋʋ lona ndɩ ndɩ taa ɛ nɛ ɛ-hɔʋ taa mba pakɩlɩ caɣʋ. Benjamin yɔɔdaa se: «Mantɩmaɣnɩ Yehowa kaahɛzaɣ nɛ mɔnpɔzʋʋ-ɩ se ɛha-m ɖoŋ nɛ mala mbʋ pɩwɛ ɖeu ɛ-ɛsɩndaa yɔ. Yehowa cosi ma-adɩma yɔɔ nɛ ɛha-m maɣzɩm taa laŋhɛzɩyɛ nɛ abalɩtʋ nɛ mowolo pɩ-yɔɔ nɛ monsusuu tɔm, nɛ ɛha-m ɖɔɖɔ ɛgbɛyɛ takayɩsɩ se pɩsa nɛ mowolo pɩ-yɔɔ nɛ mɛwɛɛ ɖoŋ fezuu taa.» Ɛtasɩ yɔɔdʋʋ se: «Mankalaɣ mbʋ pɩtalɩ koobiya lalaa yɔ pɩ-tɔm nɛ manaɣ ɛzɩma Yehowa sɩnɩ-wɛ nɛ pɔɖɔkɩ pa-laŋɩyɛ yɔ lɛ, pɩsɩnɩ-m nɛ mɛntɛ man-taa nɛ pɩkɩlɩ se mowoki pɩ-yɔɔ nɛ mɛwɛɛ siɣsiɣ.»

11-12. Ɛzɩma Yehowa pɩzɩɣ nɛ ɛtɩŋnɩ ɖo-koobiya Krɩstʋ mba yɔɔ nɛ ecosi ɖa-adɩma yɔɔ? (Cɔnɩ ɖɔɖɔ kɩlɛmʋʋ.)

¹¹ Ɛtɩŋɩɣnɩ ɖo-koobiya Krɩstʋ mba yɔɔ nɛ ecosuu ɖa-adɩma yɔɔ. Ðoo wena aɖɛwa nɛ kife nɛ Yesu laa e-wezuu yɔ a-taa, ɛtɩmɩ siŋŋ. Etendi Yehowa se ɛtaaha nʋmɔʋ nɛ ɛyaa lalaa maɣzɩ se ɛtʋ Ɛsɔ nɛ pʋyɔɔ pakʋ-ɩ. Yehowa tɩla mbʋ Yesu pɔzɩ-ɩ yɔ, ɛlɛ ɛsɩnɩ-ɩ. Etiyi e-koobiya Ɛsɔ tiyiyaa taa kʋɖʋm se ewolo nɛ ɛkpazɩ-ɩ ɖoŋ. (Luka 22:42, 43) Yehowa pɩzɩɣ nɛ ɛsɩnɩ ɖa ɖɔɖɔ. Ɛpɩzɩɣ eyele nɛ ɖo-koobu Krɩstʋ tʋ nɔɔyʋ yaa-ɖʋ pɔrtaabɩlɩ yɔɔ yaa ɛkɔɔ ɖɛ-tɛ nɛ ɛkpazɩ-ɖʋ ɖoŋ. Ða-tɩŋa ɖɩpɩzɩɣ nɛ ɖɩñɩnɩ nɛ ɖɩna wala wena a-yɔɔ ɖɩpɩzɩɣ ɖɩtɩŋna nɛ ɖiheyi ɖo-koobiya Krɩstʋ mba «tɔm kɩbandʋ» yɔ.—Adu. 12:25.

¹² Iyele nɛ ɖɩna koobu halɩñɩnʋ nɔɔyʋ kɩɖaʋ, payaɣ-ɩ se Miriam. Ɛ-walʋ sɩba nɛ pɩla kpɩtaŋ pazɩ lɛ, e-ɖeke pɩɩkazɩ ɖɩɣa taa, nɛ pɩlakaɣ-ɩ ɛzɩ lidaʋ nakʋyʋ fɛyɩ yɔ nɛ piiyeba nɛ ɛwɛɛ nɩɣzɛ taa. Ɛɛwɛ wiu yɔɔ nɛ ɛɛsɔɔlaa se ɛyɔɔdɩnɩ nɔɔyʋ. Ɛyɔɔdaa se: «Mantaawɛɛnɩ ɖoŋ se mayaa nɔɔyʋ, pʋyɔɔ lɛ mantɩmnɩ Yehowa. Maawɛɛ nɛ mewiɣ nɛ mantɩmɩɣ lɛ, nɔɔyʋ ya-m pɔrtaabɩlɩ yɔɔ. Ɛzʋtʋyʋ nɔɔyʋ yanɩ-m, ɛkɛ taabalʋ kɩbanʋ.» Ɛzʋtʋyʋ ɛnʋ nɛ ɛ-halʋ pɛhɛzɩ Miriam laŋɩyɛ. Miriam taa kaatɛma se Yehowa seɣtini koobu ɛnʋ nɛ ɛyaa-ɩ.

13. Kɩɖaʋ ŋgʋ wɩlɩɣ se Yehowa pɩzɩɣ nɛ ɛtɩŋnɩ mba paasɛɣ-ɩ yɔ pɔ-yɔɔ nɛ ecosi ɖa-adɩma yɔɔ?

¹³ Ɛpɩzɩɣ nɛ ɛtɩŋnɩ mba paasɛɣ-ɩ yɔ pɔ-yɔɔ nɛ ecosi ɖa-adɩma yɔɔ. (Adu. 21:1) Nabʋyʋ taa, Yehowa seɣtiɣ mba paasɛɣ-ɩ yɔ se pasɩnɩ ɛ-sɛyaa nɛ ɛtɩŋɩɣnɩ pɩ-yɔɔ nɛ ecosuu pa-adɩma yɔɔ. Kɩɖaʋ nakʋyʋ yɔ: Eeyeba nɛ Wiyaʋ Artaazɛɛrɩzɛɛsɩ ha Nehemiya nʋmɔʋ se ɛpɩsɩ Yeruzalɛm nɛ pɩsa nɛ ɛɖʋ nesi nɛ paɖaɣnɩ maʋ tɛtʋ ndʋ. (Neh. 2:3-6) Sɔnɔ ɖɔɖɔ, alɩwaatʋ ndʋ pɩpɔzʋʋ se pasɩnɩ-ɖʋ yɔ, Yehowa pɩzɩɣ nɛ eseɣti mba paasɛɣ-ɩ yɔ se pasɩnɩ-ɖʋ.

14. Ɛbɛ kɛdɩnɩ-ŋ Soo Hing kɩɖaʋ taa? (Cɔnɩ ɖɔɖɔ kɩlɛmʋʋ.)

¹⁴ Payaɣ koobu halɩñɩnʋ nɔɔyʋ se Soo Hing. Eɖiɣzinaa se Yehowa tɩŋnɩ ɛ-tɛ ɖɔkɔtɔ yɔɔ nɛ ɛsɩnɩ-ɩ. Maɣzɩm taa kʋdɔmɩŋ ndɩ ndɩ cɛyɩɣ ɛ-pɩyalʋ. Alɩwaatʋ ndʋ kɛgbɛdɩsaɣ sɔsɔɔ nakɛyɛ talɩ ɛ-pɩyalʋ yɔ, ɛ nɛ ɛ-walʋ peyebi labʋ tomnaɣ yɔɔ tʋma wena palakaɣ yɔ se pɔcɔnɩ ɛ-yɔɔ. Piiyeba nɛ pasʋʋ liidiye kʋñɔŋ taa. Soo Hing yɔɔdaa se pɩlakaɣ ɛnʋ ɛzɩ ɛnʋ ɛɛpɩzɩɣ nɛ ɛtasɩ ɛ-laŋɩyɛ ɖɔkʋʋ yɔ. Ɛtɩmnɩ Yehowa nɛ eheyi-i ɛ-laŋɩyɛ taa tɔm nɛ ɛpɔzɩ-ɩ se ɛsɩnɩ-ɩ. Ðɔkɔtɔ kpaɣ lɩmaɣzɩyɛ se ɛñɩnɩɣ nʋmɔʋ ŋgʋ kɩ-yɔɔ ɛpɩzɩɣ ɛtɩŋna nɛ ɛsɩnɩ Soo Hing nɛ ɛ-hɔʋ yɔ. Pɩtɛmnaa se komina sɩnɩ-wɛ, nɛ pehiɣ ɖɔɖɔ ɖɩɣa ŋga kɛfɛyɩ liidiye yɔ nɛ pala haya. Pʋwayɩ Soo Hing yɔɔdaa se: «Ðɩna Yehowa nesi wɛtʋ ndʋ tɩ-taa. Toovenim taa lɛ, ɛkɛ ‘adɩma welisiyu.’»—Keɣa 65:19.

PƖSA NƐ ÐƖNA ƐZƖMA YEHOWA COSUU ÐA-ADƖMA YƆƆ YƆ NƐ ÐƖNƖƖ LELEŊ PƖ-YƆƆ LƐ PƖPƆZƲƲ-ÐƲ TISUU

15. Ɛbɛ sɩnɩ koobu halɩñɩnʋ nɔɔyʋ nɛ eɖiɣzina se Yehowa wɛɛ nɛ ecosuu ɛ-adɩma yɔɔ?

¹⁵ Ðoŋ ɖoŋ lɛ, Yehowa ɛɛtɩŋɩɣnɩ nʋmɔŋ weyi ɩwɛ piti yɔ ɩ-yɔɔ nɛ ecosuu ɖa-adɩma yɔɔ. Ɛlɛ, ɛzɩma ecosuu a-yɔɔ yɔ, pɩkɛ mbʋ ɖeyi ɖeyi pɩpɔzʋʋ-ɖʋ se pɩsa nɛ ɖiwolo pɩ-yɔɔ nɛ ɖɩwɛɛ siɣsiɣ ɛ-ɛsɩndaa yɔ. Pʋyɔɔ lɛ, tɩlɩ cɔnʋʋ nɛ ŋnaɣ ɛzɩma Yehowa cosuu ña-adɩma yɔɔ yɔ. Payaɣ koobu halɩñɩnʋ nɔɔyʋ se Yoko. Pɩlakaɣ-ɩ ɛzɩ Yehowa eecosuu ɛ-adɩma yɔɔ yɔ, ɛlɛ pʋwayɩ lɛ ɛpaɣzɩ maʋ mbʋ mbʋ ɛpɔzɩ Yehowa yɔ takayaɣ nakɛyɛ taa. Alɩwaatʋ natʋyʋ wayɩ lɛ, ɛɖaɣnɩ cɔnʋʋ takayaɣ ŋga ka-taa nɛ eɖiɣzina se Yehowa cosi ɛ-adɩma hɔɔlʋʋ sɔsɔʋ yɔɔ nɛ halɩ ecosi adɩma wena ɛɛlaba nɛ ɛsɔɔ a-yɔɔ yɔ a-taa naayɛ yɔɔ. Pɩpɔzʋʋ se ɖoŋ ɖoŋ lɛ, ɖɩkpakɩɣ alɩwaatʋ nɛ ɖɩmaɣzɩɣ nɛ ɖɩnaɣ ɛzɩma Yehowa wɛɛ nɛ ecosuu ɖa-adɩma yɔɔ yɔ.—Keɣa 65:19, 20.

16. Adɩma hɔɔlʋʋ taa lɛ, ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ tisuu? (Ebree mba 11:6)

¹⁶ Pɩtasɩna se ye ɖɩtɩmɩɣnɩ Yehowa yɔ ɖɩwɩlɩɣ se ɖɩwɛnɩ tisuu lɛ, ɖɩwɩlɩɣ ɖɔɖɔ se ɖɩwɛnɩ tisuu ye ɖa-taa ɛlakɩ leleŋ nɛ ɛzɩma ecosuu a-yɔɔ paa ɛzɩma ɛtɩɩkpaɣnaa nɛ ecosi a-yɔɔ yɔ. (Kalɩ Ebree mba 11:6.) Iyele nɛ ɖɩna Mike nɛ ɛ-halʋ Chrissy pa-kɩɖaʋ. Paaɖʋ pa-tɩ kaɖʋwa se palakɩ tʋmɩyɛ Betɛɛlɩ. Mike yɔɔdaa se: «Ðɩñɩɣ nesi takayaɣ taa pɩnzɩ sakɩyɛ nɛ ɖɩtɩmnɩ Yehowa tam sakɩyɛ kaɖʋwa ŋga kɔ-yɔɔ, ɛlɛ wiɖiyi patɩyaa-ɖʋ.» Tam lɛ, Mike nɛ Chrissy pa-taa kaatɛma se Yehowa sɩm ɛzɩma pɩwɛɛ se ɛlabɩnɩ-wɛ tʋmɩyɛ ɛ-sɛtʋ taa yɔ camɩyɛ nɛ pɩkɩlɩ. Paawobi pɩ-yɔɔ nɛ palakɩ mbʋ payɩ papɩzɩɣ yɔ ɛ-sɛtʋ taa, palakaɣ paa ɖooye nʋmɔʋ lɩzʋʋ tʋmɩyɛ ɖenɖe pɩpɔzaɣ tɔm susuyaa nɛ pɩkɩlɩ yɔ nɛ paɖʋwaɣ nesi teokrasɩ kuduyuŋ maʋ tʋma. Sɔnɔ pɛwɛ egeetiye yɔɔ cɔnʋʋ tʋmɩyɛ taa. Mike tasɩ yɔɔdʋʋ se: «Pɩtɩkɛ paa ɛzɩmtaa Yehowa cosaɣ ɖa-adɩma yɔɔ ɛzɩ ɖɩɩmaɣzʋʋ yɔ, ɛlɛ ecosaɣ a-yɔɔ nɛ halɩ ɛzɩma ecosaɣ a-yɔɔ yɔ pɩɩwɛ ɖeu nɛ pɩkɩlɩ ɛzɩma ɖɩmaɣzaɣ yɔ.»

17-18. Ɛzɩ Keɣa 85:6, 7 yɔɔdʋʋ yɔ, ɛbɛ ɖa-taa pɩzɩɣ nɛ pɩtɛmna?

¹⁷ Kalɩ Keɣa 85:6, 7. Keɣa maɖʋ Daviid taa kaatɛma se Yehowa welisi ɛ-adɩma nɛ ecosi a-yɔɔ. Ña ɖɔɖɔ ña-taa pɩzɩɣ nɛ pɩtɛ mbʋ. Kɩɖaŋ weyi ɩ-taa ɖɩtazɩ tɔm ñʋʋ kʋnɛ kɩ-taa yɔ, iyeki se ɖa-taa ɛtɛ se Yehowa pɩzɩɣ nɛ ɛha-ɖʋ lɔŋsɩnɖɛ nɛ ɖoŋ weyi pɩpɔzʋʋ-ɖʋ yɔ nɛ ɖɩɖɔkɩ ɖa-laŋɩyɛ. Ɛpɩzɩɣ nɛ ɛtɩŋnɩ ɖo-koobiya Krɩstʋ mba yaa halɩ mba patɩpaɣzɩtɩ-ɩ sɛʋ lɛɛlɛɛyɔ yɔ pɔ-yɔɔ nɛ ɛsɩnɩ-ɖʋ hɔɔlʋʋ nakʋyʋ taa.

¹⁸ Pɩtɩla, pɩtɩkɛ paa ɛzɩmtaa Yehowa cosuu ɖa-adɩma yɔɔ ɛzɩ ɖɩɩmaɣzʋʋ yɔ, paa mbʋ yɔ ɖɩnawa se ɛkaɣ cosuu a-yɔɔ. Ɛkaɣ-ɖʋ haʋ mbʋ pɩpɔzʋʋ-ɖʋ yɔ alɩwaatʋ ndʋ ɖeyi ɖeyi pɩpɔzʋʋ-ɖʋ pʋ yɔ tɩ-yɔɔ. Pʋyɔɔ lɛ, wolo pɩ-yɔɔ nɛ ŋtɩmɩɣnɩ tisuu, nɛ ña-ta ɛtɛ se Yehowa kaɣ cɔnʋʋ ñɔ-yɔɔ lɛɛlɛɛyɔ, nɛ ɛjaɖɛ kɩfaɖɛ taa lɛ ɛkaɣ haɣzʋʋ «mbʋ pifeziɣ yɔ, pi-liu ɖeɖe.»—Keɣa 144:16.