Yehowa kaɣ cosuu ma-adɩma yɔɔ?

1-2. Ɛbɛ pɩzɩɣ piyele nɛ ɖɩmaɣzɩ se Yehowa eecosuu ɖa-adɩma yɔɔ?

«YEHOWA yɔɔ lɛ, nɩɩ leleŋ sɔsɔŋ, nɛ ɛkaɣ-ŋ haʋ mbʋ ña-laŋɩyɛ sɔɔlaa yɔ.» (Keɣ. 37:4) Pɩkɛnɩ tamaɣ kɩbaŋa siŋŋ. Ɛlɛ ɛzɩ pɩpɔzʋʋ se ɖɩɖaŋ se Yehowa ɛha-ɖʋ mbʋ payɩ ɖɩpɔzʋʋ-ɩ yɔ kpaagbaa? Ɛbɛ yɔɔ pɩcɛyaa se ɖɩpɔzɩ ɖa-tɩ tɔm ndʋ? Iyele nɛ ɖɩmaɣzɩ kɩɖaŋ ɩnɛ ɩ-yɔɔ: Koobu halɩñɩnʋ nɔɔyʋ kɛ ɛɖanɛ. Ɛtɩmaa se paha-ɩ waɖɛ nɛ ewolo Kewiyaɣ tɔm susuyaa sukuli. Pɩnzɩ sakɩyɛ ɖɛwa, ɛlɛ patɩyaa-ɩ se ewolo sukuli ŋgʋ. Koobu abalɩñɩnʋ nɔɔyʋ pɔzɩ Yehowa se eyele nɛ ɛ-kʋdɔŋ cɛ nɛ ɛpɩzɩ nɛ ɛla ɛgbɛyɛ taa tʋma nɛ pɩkɩlɩ. Ɛlɛ ɛ-kʋdɔŋ tɩcɛ. Lʋlɩyaa Krɩstʋ ñɩma nabɛyɛ tɩmaa se Ɛsɔ ɛsɩnɩ pa-pɩɣa nɛ kɛwɛɛ toovenim taa. Ɛlɛ pa-pɩɣa ŋga kakpaɣ lɩmaɣzɩyɛ se keyeki Yehowa sɛʋ.

² Pɩtɩla ña ɖɔɖɔ ŋpɔzɩ Yehowa nabʋyʋ, ɛlɛ ɛtɩha-ŋ pʋ. Pɩtɩla piyeba nɛ ŋkɔ tɔm ñʋʋ se Yehowa cosuu lalaa adɩma yɔɔ, ɛlɛ eecosuu ña-ñɩna yɔɔ. Yaa pɩtɩla ŋmaɣzɩɣ se kɩwɛɛkɩm nabʋyʋ ŋlaba nɛ eecosuu ña-adɩma yɔɔ. Payaɣ koobu halɩñɩnʋ nɔɔyʋ se Janice,b mbʋ pɩlakaɣ-ɩ. Ɛ nɛ ɛ-walʋ paasɔɔlɩ siŋŋ se pala tʋmɩyɛ Betɛɛlɩ, nɛ patɩmnɩ Yehowa pɩ-yɔɔ. Ɛyɔɔdaa se:«Man-taa kaatɛma se pɩkazɩ pazɩ lɛ, pakaɣ-ɖʋ yaʋ Betɛɛlɩ.» Ɛlɛ pɩnzɩ sakɩyɛ ɖɛwa, patɩyaa-wɛ se powolo Betɛɛlɩ. Janice yɔɔdaa se: «Pɩɩha-m laŋwɛɛkɩyɛ nɛ ma-ñʋʋ taa sidi. Mɔnpɔzaɣ man-tɩ se ɛzɩ ɛbɛ malaba? Mayʋsɩnɩ Yehowa? Maatɩmɩ tam sakɩyɛ waɖɛ nɖɩ ɖɩ-yɔɔ. Ɛbɛ yɔɔ Yehowa ticosi ma-adɩma yɔɔ?»

3. Tɔm ndʋ taa ɖɩkaɣ tazʋʋ tɔm ñʋʋ kʋnɛ kɩ-taa?

³ Pɩtɩla nabʋyʋ taa, ɖɩpɔzʋʋ ɖa-tɩ se ɛzɩ Yehowa welisiɣ ɖa-adɩma na. Halɩ caanaʋ taa ɛyaa siɣsiɣ tɩnaa nabɛyɛ ɖɔɖɔ pɔzaɣ pa-tɩ tɔm ndʋ. (Yɔɔb 30:20; Keɣ. 22:2; Hab. 1:2) Ɛbɛ pɩzɩɣ nɛ pɩsɩnɩ-ŋ nɛ ña-taa tɛ se Yehowa kaɣ cosuu ña-adɩma yɔɔ? (Keɣ. 65:2) Pɩsa nɛ ɖicosi tɔm ndʋ tɩ-yɔɔ lɛ, kajalaɣ lɛ ɖɩkaɣ cosuu tɔm pɔzʋʋ mbʋ pɩkɔŋ yɔ pɩ-yɔɔ: (1) Ɛbɛ ɖɩpɩzɩɣ nɛ ɖɩɖaŋ se Yehowa ɛla? (2) Ɛbɛ Yehowa sɔɔlaa se ɖɩla? (3) Ɛbɛ yɔɔ pɩpɩzɩɣ nɛ pɩpɔzɩ se ɖɩlɛɣzɩ mbʋ ɖɩpɔzʋʋ ɖa-adɩma taa yɔ?

ƐBƐ ÐƖPƖZƖƔ NƐ ÐƖÐAŊ SE YEHOWA ƐLA?

4. Ɛzɩ Yereemii 29:12 yɔɔdʋʋ yɔ, tamaɣ ŋga Yehowa labɩ-ɖʋ?

⁴ Yehowa labɩ tamaɣ se ewelisiɣ ɖa-adɩma. (Kalɩ Yereemii 29:12.) Ðɛ-Ɛsɔ sɔɔlɩ ɛ-sɛyaa siɣsiɣ tɩnaa; pʋyɔɔ lɛ, ɛkaɣ welisuu pa-adɩma paa ɛzɩmtaa. (Keɣ. 10:17; 37:28) Paa mbʋ yɔ, pɩɩwɩlɩɣ se ɛkaɣ-ɖʋ haʋ mbʋ payɩ ɖɩpɔzʋʋ-ɩ yɔ. Pɩtɩla pɩkaɣ pɔzʋʋ se ɖɩɖaŋ nɛ pɩkɔɔ pɩtalɩ ɛjaɖɛ kɩfaɖɛ taa pʋcɔ nɛ ɛlabɩ-ɖʋ mbʋ ɖɩpɔzʋʋ-ɩ yɔ pɩ-taa nabʋyʋ.

5. Ɛbɛ yɔɔ Yehowa maɣzɩɣ alɩwaatʋ ndʋ ewelisiɣ ɖa-adɩma yɔ? Lɩzɩ pɩ-taa.

⁵ Alɩwaatʋ ndʋ Yehowa welisiɣ ɖa-adɩma yɔ, ɛmaɣzɩɣ ɛ-kaɖʋwa yɔɔ. (Iza. 55:​8, 9) Ɛ-kaɖʋwa ŋga, kɔ-hɔɔlʋʋ nakʋyʋ lɛ se ɛyaa mba pañaŋɩ-ɩ nɛ taa leleŋ yɔ, posu tɛtʋ yɔɔ nɛ peyele nɛ eɖiyi-wɛ. Ɛlɛ Sataŋ yɔɔdʋʋ se ye ɛyaa iɖiyiɣ pa-tɩ yɔ, pɩkaɣ-wɛ ɖenuu nɛ pɩkɩlɩ. (Kiɖe 3:​1-5) Pɩsa nɛ Yehowa wɩlɩ se Eleeu kɛ cɛtɩyʋ lɛ, ɛha ɛyaa nʋmɔʋ se peɖiyi pa-tɩ. Ɛlɛ ɛyaa kewiyitu tɔɔʋ kɔnɩ kʋñɔmɩŋ sakɩyɛ. (Ekl. 8:9) Ðɩnɩɣ pɩ-taa se Yehowa ɛɛkaɣ yebu nɛ kʋñɔmɩŋ ɛnɩ ɩ-tɩŋa ɩsɩɩ tɩnaɣ lɛɛlɛɛyɔ. Ye eyeba nɛ ɩ-tɩŋa ɩsɩɩ tɩnaɣ yɔ, nabɛyɛ pɩzɩɣ nɛ pamaɣzɩ se ɛyaa kewiyitu tɔɔʋ wɛ ɖeu nɛ papɩzɩɣ nɛ peɖiyi pa-tɩ nɛ piɖeni-wɛ.

6. Ɛbɛ yɔɔ pɩwɛɛ se ɖa-taa ɛtɛ se Yehowa lakɩ mbʋ pɩwɩlɩɣ se ɛsɔɔlɩ-ɖʋ nɛ mbʋ pɩwɛ siɣsiɣ yɔ paa ɛzɩmtaa?

⁶ Paa adɩma naayɛ ɩnɩɣzɩnɩ ɖama yɔ, Yehowa pɩzɩɣ ɛlɩzɩ se eecosuu a-yɔɔ kɩmaŋ. Alɩwaatʋ ndʋ pɩwɩɣaɣ Wiyaʋ Ezekiyaasɩ siŋŋ yɔ, etendi Yehowa se ɛsɩnɩ-ɩ nɛ ɛ-yɔɔ cɛ. Yehowa welisini-i nɛ eyele nɛ ɛ-yɔɔ cɛ. (2 Awi. 20:​1-6) Ɛlɛ alɩwaatʋ ndʋ apostoloo Pɔɔlɩ tendi Yehowa se ɛlɩzɩ «sɔɔyɛ naɖɩyɛ [e-tomnaɣ] taa» yɔ, Yehowa tɩlɩzɩ-ɖɩ; pɩtɩla sɔɔyɛ nɖɩ ɖɩɩkɛnɩ kʋdɔŋ nakʋyʋ. (2 Kɔr. 12:​7-9) Iyele nɛ ɖɩna ɖɔɖɔ apostoloo Yakubu nɛ apostoloo Pɩyɛɛrɩ pa-kɩɖaŋ. Wiyaʋ Eroodi kaasɔɔlaa se ɛkʋ pa-naalɛ. Ɛgbɛyɛ taa mba kaatɩmɩ Pɩyɛɛrɩ yɔɔ, nɛ pɩtɩla paatɩmɩ ɖɔɖɔ Yakubu yɔɔ. Paa mbʋ yɔ, pakʋ Yakubu ɛlɛ Ɛsɔ tiyiyu nɔɔyʋ ya Pɩyɛɛrɩ ñʋʋ. (Tʋma 12:​1-11) Pɩtɩla ɖɩpɔzʋʋ ɖa-tɩ se: «Ɛbɛ yɔɔ Yehowa yabɩ Pɩyɛɛrɩ ñʋʋ, ɛlɛ ɛtɩya Yakubu ñʋʋ?» Bibl ticosi tɔm ndʋ tɩ-yɔɔ.c Tɔm ndʋ ɖa-taa pɩzɩɣ nɛ pɩtɛmna yɔ lɛ se Yehowa «ɛɛlakɩ mbʋ pɩfɛyɩ siɣsiɣ [yɔ] kpa.» (Wp. 32:4) Nɛ ɖɩnawa se Pɩyɛɛrɩ nɛ Yakubu pa-naalɛ pɔ-tɔm kaakɛdɩnɩ Yehowa. (Natʋ 21:14) Nabʋyʋ taa, Yehowa eecosuu ɖa-adɩma yɔɔ ɛzɩ ɖɩɩmaɣzʋʋ yɔ. Ɛlɛ ɖɩtaɣ liu se Yehowa cosuu ɖa-adɩma yɔɔ nɛ sɔɔlɩm paa ɛzɩmtaa nɛ eemuluu-ɖʋ kpa, pʋyɔɔ lɛ ɖɩɩhɔŋnɩ-ɩ tɔm ɛzɩma ɛlɩzɩɣ se ecosuu ɖa-adɩma yɔɔ yɔ pɩ-yɔɔ.—Yɔɔb 33:13.

7. Ɛbɛ pɩtɩpɔzɩ se ɖɩla, nɛ ɛbɛ yɔɔ?

⁷ Ðɩñakɩ pana se ɖɩtaakpaɣ ɖɛ-wɛtʋ nɛ ɖɩmaɣzɩnɩ lalaa ñɩndʋ. Pɩtɩla ɖɩtɩmnɩ Yehowa se ɛtɩŋnɩ nʋmɔʋ nakʋyʋ yɔɔ ɖeyi ɖeyi nɛ ɛsɩnɩ-ɖʋ, ɛlɛ ɛtɩlabɩ-ɖʋ mbʋ ɖɩpɔzɩ-ɩ yɔ. Pʋwayɩ ɖɩnɩɩ se nɔɔyʋ labɩ adɩma ana ɖeyi ɖeyi, nɛ Yehowa cosi a-yɔɔ. Payaɣ koobu halɩñɩnʋ nɔɔyʋ se Anna, mbʋ pɩlabɩ ɛ-hɔɔlʋʋ taa. Ɛ-walʋ Matthew kaawɛnɩ kansɛɛrɩ kʋdɔŋ nɛ ɛtɩmnɩ Yehowa se eyele nɛ ɛ-walʋ yɔɔ cɛ. Alɩwaatʋ kʋɖʋmtʋ ndʋ tɩ-taa lɛ, koobiya halɩñɩma akpadɩyaa nabɛyɛ 2 kaawɛɛ nɛ palʋkɩnɩ ɖɔɖɔ kansɛɛrɩ kʋdɔŋ. Anna tɩmɩ Matthew nɛ koobiya halɩñɩma mba pɔ-yɔɔ siŋŋ. Koobiya halɩñɩma mba pɔ-yɔɔ cɛ, ɛlɛ Matthew ñasɩ. Kajalaɣ taa lɛ, Anna pɔzaɣ ɛ-tɩ se ɛzɩ Yehowa sɩnɩnɩ koobiya halɩñɩma mba nɛ pɔ-yɔɔ cɛ na. Ye ɛnʋ sɩnɩnɩ-wɛ yɔ, ɛbɛ yɔɔ eticosi adɩma wena ɛlaba se ɛ-walʋ yɔɔ ɛcɛ yɔ a-yɔɔ? Toovenim taa lɛ, ɖɩɩpɩzɩɣ nɛ ɖɩtɩlɩ mbʋ pɩlaba nɛ koobiya halɩñɩma mba pa-naalɛ pɔ-yɔɔ cɛ yɔ. Ndʋ ɖɩsɩma yɔ ndʋ yɔ: Yehowa kaɣ yebu nɛ ɖa-kʋñɔmɩŋ tɩŋa sɩɩ tɩnaɣ tam, nɛ ɛɖaŋ kpam se alɩwaatʋ ɛtalɩ nɛ efezi ɛ-taabalaa mba pasɩba yɔ.—Yɔɔb 14:15.

8. (a) Ɛzɩ Izaayii 43:2 yɔɔdʋʋ yɔ, ɛzɩma tɩyɛ Yehowa sɩɣnɩ-ɖʋ? (b) Alɩwaatʋ ndʋ ɖɩkatɩɣ kala yɔ ɛzɩma adɩma pɩzɩɣ nɛ asɩ-ɖʋ? (Cɔnɩ video Adɩma sɩɣnɩ-ɖʋ se ɖɩɖɔkɩ ɖa-tɩ kaɖɛ alɩwaatʋ taa.)

⁸ Yehowa kaɣ-ɖʋ sɩnʋʋ paa ɛzɩmtaa. Yehowa kɛ ɖa-Caa sɔɔlɩm tʋ, nɛ pʋyɔɔ lɛ ɛtɩsɔɔlɩ se ɛna-ɖʋ kʋñɔŋ taa. (Iza. 63:9) Ɛlɛ pɩtɩkɛ paa ɛzɩmtaa ɛɖɩkɩ nʋmɔʋ kala wena awɛ ɛzɩ pɔsɩ yaa miŋ nzʋlʋmɩyɛ yɔ se ataatalɩ-ɖʋ. (Kalɩ Izaayii 43:2.) Paa mbʋ yɔ, ɛlabɩ tamaɣ se ɛsɩɣnɩ-ɖʋ nɛ ‘ɖɩtɛzɩ’ kala ana. Nɛ paa kaɖɛ nɖɩ ɖɩkatɩɣ lɛɛlɛɛyɔ yɔ, ɛkaɣ-ɖʋ sɩnʋʋ nɛ ɖiwolo pɩ-yɔɔ nɛ ɖɩsɛɛ-ɩ paa ɛzɩmtaa. Yehowa haɣ-ɖʋ ɖɔɖɔ e-fezuu kiɖeɖeu se kɩsɩnɩ-ɖʋ nɛ ɖɩɖɔkɩ ɖa-laŋa. (Luka 11:13; Filp. 4:13) Mbʋ pɩlɩɣ pɩ-taa yɔ mbʋ yɔ: ɖa-taa pɩzɩɣ nɛ pɩtɛ se ɛkaɣ-ɖʋ haʋ mbʋ ɖeyi ɖeyi pɩpɔzʋʋ-ɖʋ yɔ paa ɛzɩmtaa se pɩsa nɛ ɖɩɖɔkɩ ɖa-laŋɩyɛ nɛ ɖiwolo pɩ-yɔɔ nɛ ɖɩwɛɛ siɣsiɣ ɛ-ɛsɩndaa.d

ƐBƐ YEHOWA SƆƆLAA SE ÐƖLA?

9. Ɛzɩ Yakubu 1:​6, 7 yɔɔdʋʋ yɔ, ɛbɛ yɔɔ pɩcɛyaa se ɖa-taa ɛtɛ se Yehowa kaɣ-ɖʋ sɩnʋʋ?

⁹ Yehowa sɔɔlaa se ɖɩtaa-ɩ liu. (Ebr. 11:6) Nabʋyʋ taa pɩpɩzɩɣ nɛ pɩlabɩ-ɖʋ ɛzɩ kala wena ɖɩkatɩɣ yɔ acɛzɩ-ɖʋ yɔ. Halɩ pɩtɩla ɖɩpaɣzɩɣ pɩtʋʋ nɛ ɖɩpɔzʋʋ ɖa-tɩ se ɛzɩ Yehowa kaɣ-ɖʋ sɩnʋʋ na. Ɛlɛ Bibl sɩɣnɩ-ɖʋ se ɖa-taa ɛtɛ se Ɛsɔ ɖoŋ taa lɛ, ɖɩpɩzɩɣ nɛ ‘ɖɩmaa koloŋa nɛ ka-wayɩ.’ (Keɣ. 18:29) Ye mbʋ, mbʋ ɛzɩ ɖiiyeba nɛ abʋta ana awɛɛ nɛ akpaɣ ɖoŋ lɛ, pɩpɔzʋʋ se ɖɩtɩmnɩ tisuu siŋŋ nɛ ɖɩtaa liu se Yehowa kaɣ cosuu ɖa-adɩma yɔɔ.—Kalɩ Yakubu 1:​6, 7.

10. Ha kɩɖaʋ ŋgʋ kɩwɩlɩɣ ɛzɩma ɖɩpɩzɩɣ nɛ ɖɩla mbʋ pɩlakɩ nɔɔ kʋɖʋmaɣ nɛ ɖa-adɩma yɔ.

¹⁰ Yehowa sɔɔlaa se ɖɩla mbʋ pɩlakɩ nɔɔ kʋɖʋmaɣ nɛ ɖa-adɩma yɔ. Kɩɖaʋ nakʋyʋ yɔ: Koobu abalɩñɩnʋ nɔɔyʋ pɩzɩɣ nɛ ɛtɩmnɩ Yehowa se ɛsɩnɩ-ɩ nɛ ɛ-tʋmɩyɛ ñʋʋdʋ ha-ɩ nʋmɔʋ nɛ ɛpɩzɩ ewolo kigbeɣluu sɔsɔʋ nakʋyʋ. Ɛzɩma Yehowa pɩzɩɣ nɛ ecosi adɩma ana a-yɔɔ? Ɛpɩzɩɣ nɛ ɛha koobu ɛnʋ abalɩtʋ ndʋ pɩpɔzʋʋ-ɩ yɔ se ewolo nɛ ɛpɔzɩ nʋmɔʋ ɛ-tʋmɩyɛ ñʋʋdʋ. Ɛlɛ pɩkaɣ pɔzʋʋ se koobu ɛnʋ ewolo ɛ-tʋmɩyɛ ñʋʋdʋ cɔlɔ nɛ ɛpɔzɩ nʋmɔʋ. Pɩtɩla pɩpɔzʋʋ se ewolo tam sakɩyɛ. Halɩ ɛpɩzɩɣ nɛ eheyi-i se ɛlakɩ tʋmɩyɛ kɩyakɩŋ nɩɩyɩ pi-lone taa. Nɛ ye pɩcɛyaa yɔ, ɛpɩzɩɣ nɛ eheyi-i se ɛlɩzɩ e-liidiye taa kɩyakɩŋ weyi ɛsʋlʋmɩ nʋmɔʋ yɔ i-liidiye.

11. Ɛbɛ yɔɔ pɩcɛyaa se ɖɩtɩmɩɣ ɖa-kɩcɛyɩm yɔɔ kaahɛzaɣ?

¹¹ Yehowa sɔɔlaa se ɖɩtɩmɩɣ ɖa-kɩcɛyɩm yɔɔ kaahɛzaɣ. (1 Tes. 5:17) Tɔm ndʋ Yesu yɔɔdaa yɔ tɩwɩlɩɣ se adɩma wena ɖɩlakɩ yɔ a-taa naayɛ wɛɛ lɛ, Ɛsɔ eecosuu a-yɔɔ kpaagbaa. (Luka 11:9) Ye mbʋ, taalɔ lidaʋ. Tɩmɩ siŋŋ, lakɩ mbʋ kaahɛzaɣ. (Luka 18:​1-7) Alɩwaatʋ ndʋ ɖɩwɛɣ nɛ ɖɩtɩmɩɣ tɔm natʋyʋ yɔɔ tam yɔ, ɖɩwɩlɩɣ Yehowa se mbʋ ɖɩwɛɛ nɛ ɖɩpɔzʋʋ yɔ pɩ-tɔm cɛyɩ ɖɛ-ɛsɩndaa siŋŋ. Ðɩwɩlɩɣ ɖɔɖɔ se ɖɩwɛnɩ tisuu se ɛpɩzɩɣ nɛ ɛsɩnɩ-ɖʋ.

ƐBƐ YƆƆ PƖPƖZƖƔ NƐ PƖPƆZƖ SE ÐƖLƐƔZƖ MBƲ ÐƖPƆZƲƲ ÐA-ADƖMA TAA YƆ?

12. (a) Tɔm ndʋ ɖɩpɩzɩɣ nɛ ɖɩpɔzɩ ɖa-tɩ mbʋ ɖɩpɔzʋʋ ɖa-adɩma taa yɔ pɩ-yɔɔ, nɛ ɛbɛ yɔɔ? (b) Ɛbɛ ɖɩpɩzɩɣ ɖɩla nɛ pɩwɩlɩ se ɖɩñaŋ Yehowa alɩwaatʋ ndʋ ɖɩtɩmɩɣnɩ-ɩ yɔ? (Kalɩ aɖakaɣ «Ma-adɩma wɩlɩɣ se mañaŋ Yehowa?»)

¹² Ye Yehowa ɛtɩlabɩ-ɖʋ mbʋ ɖɩpɔzɩ-ɩ ɖa-adɩma taa yɔ, ɖɩpɩzɩɣ nɛ ɖɩpɔzɩ ɖa-tɩ tɔm tʋnɛ tɩ-naadozo. Kajalaɣ lɛ, «Mɛwɛɛ nɛ mantɩmɩɣ mbʋ pɩmʋnaa yɔ pɩ-yɔɔ?» Ðoŋ ɖoŋ lɛ, ɖɩmaɣzɩɣ se ɖɩsɩm mbʋ pɩwazɩɣ-ɖʋ nɛ pɩkɩlɩ yɔ. Ɛlɛ mbʋ ɖɩpɔzʋʋ yɔ pɩtɩla pɩɩkaɣ-ɖʋ wazʋʋ ɖeyi ɖeyi. Ye ɖɩwɛɛ nɛ ɖɩtɩmɩɣnɩ Yehowa se ɛtɩŋnɩ nʋmɔʋ nakʋyʋ yɔɔ nɛ ɛcɔnɩ kaɖɛ naɖɩyɛ ɖeɖe yɔ, pɩtɩla nʋmɔʋ kɩbaŋʋ nakʋyʋ wɛɛ nɛ ɛpɩzɩɣ nɛ ɛtɩŋnɩ kɩ-yɔɔ nɛ ɛcɔnɩ kaɖɛ nɖɩ ɖi-ɖeɖe nɛ pɩkɩlɩ. Nɛ pɩtɩla, ɖɩpɔzʋʋ Yehowa se ɛlabɩ-ɖʋ nabʋyʋ, ɛlɛ pɩɩlakɩ nɔɔ kʋɖʋmaɣ nɛ ɛ-sɔɔlɩm. (1 Yoh. 5:14) Iyele nɛ ɖɩna lʋlɩyaa mba pɔ-tɔm ɖɩyɔɔdaa nɛ pɩɖɛɛ yɔ pa-kɩɖaʋ. Pɔpɔzɩ Yehowa se ɛsɩnɩ pa-pɩɣa nɛ kɛwɛɛ toovenim taa. Pɩpɩzɩɣ nɛ pɩlabɩ-ɖʋ ɛzɩ adɩma ana amʋnaa yɔ. Ɛlɛ Yehowa ɛɛñɩkɩɣ ɖa-taa nɔɔyʋ yɔɔ se ɛsɛɛ-ɩ. Ɛsɔɔlaa se ɖa-tɩŋa, pɩkpɛndɩnɩ ɖe-piya, ɖa-maɣmaɣ ɖɩlɩzɩna se ɖɩsɛɣ-ɩ. (Wp. 10:​12, 13; 30:​19, 20) Ye mbʋ, pɩɩwɛɛ se lʋlɩyaa mba pɔpɔzɩ Yehowa se ɛsɩnɩ-wɛ nɛ potukuni pa-pɩɣa laŋɩyɛ nɛ pɩsɩnɩ-kɛ nɛ kɔsɔɔlɩ Yehowa nɛ kapɩsɩ ɛ-taabalʋ.—Adu. 22:6; Efɛz. 6:4.

13. Ɛzɩ pɔyɔɔdʋʋ Ebree mba 4:16 taa yɔ, alɩwaatʋ ndʋ Yehowa kaɣ-ɖʋ sɩnʋʋ? Lɩzɩ pɩ-taa.

¹³ Tɔm pɔzʋʋ 2 ñɩmbʋ lɛ se: «Yehowa ɛsɩndaa lɛ, alɩwaatʋ tʋnɛ pɩwɛɛ se ecosi ma-adɩma yɔɔ?» Pɩpɩzɩɣ nɛ pɩlabɩ-ɖʋ ɛzɩ pɩpɔzʋʋ se Yehowa ecosi ɖa-adɩma yɔɔ kpaagbaa yɔ. Ɛlɛ toovenim taa lɛ, Yehowa sɩm alɩwaatʋ ndʋ tɩ-yɔɔ pɩwɛɛ se ɛsɩnɩ-ɖʋ yɔ. (Kalɩ Ebree mba 4:16.) Alɩwaatʋ ndʋ ɖɩtɩmɩɣnɩ Yehowa nɛ ɛɛlakɩ-ɖʋ mbʋ ɖɩpɔzɩ-ɩ yɔ kpaagbaa yɔ, pɩtɩla ɖɩmaɣzɩɣ se ɛɛkaɣ-ɖʋ cosuu. Ɛlɛ pɩtɩla eticositi-ɖʋ na. Maɣzɩ koobu abalɩñɩnʋ weyi ɛɛtɩmaa se Yehowa ɛsɩnɩ-ɩ nɛ ɛ-yɔɔ cɛ yɔ ɛ-yɔɔ nɛ ŋna. Ye Yehowa ɛɛtɩŋnɩ piti nʋmɔʋ nakʋyʋ yɔɔ nɛ eyele nɛ koobu ɛnʋ ɛ-yɔɔ cɛ yɔ, Sataŋ pɩzaɣ se ɛyɔɔdɩ se koobu ɛnʋ ewobi pɩ-yɔɔ nɛ ɛsɛɣ Yehowa, mbʋ pʋyɔɔ yɔ Yehowa sɩnɩ-ɩ nɛ ɛ-kʋdɔŋ cɛ. (Yɔɔb 1:​9-11; 2:4) Pɩtasɩ lɛ, Yehowa tɛm ɖʋʋ alɩwaatʋ ndʋ tɩ-yɔɔ ɛkaɣ waʋ kʋdɔmɩŋ kpeekpe yɔ. (Iza. 33:24; Natʋ 21:​3, 4) Nɛ pʋcɔ nɛ pɩtalɩ mbʋ, ɖɩɩpɩzɩɣ nɛ ɖɩɖaŋ se pɩwɛɛ se ɛtɩŋnɩ piti nʋmɔʋ nakʋyʋ yɔɔ nɛ ɛwaa ɖa-kʋdɔmɩŋ. Ye mbʋ, koobu ɛnʋ pɩɩwɛɛ se ɛpɔzɩ Yehowa se ɛha-ɩ ɖoŋ nɛ maɣzɩm taa laŋhɛzɩyɛ nɛ ɛpɩzɩ nɛ ɛɖɔkɩ ɛ-laŋɩyɛ ɛ-kʋdɔŋ taa nɛ ewolo pɩ-yɔɔ nɛ ɛsɛɣ-ɩ siɣsiɣ.—Keɣ. 29:11.

14. Ɛbɛ Janice kɩɖaʋ kpɛlɩkɩɣ-ŋ?

¹⁴ Tɔzɩ Janice kɩɖaʋ yɔɔ. Ɛɛtɩmaa se Yehowa ɛsɩnɩ ɛ nɛ ɛ-walʋ nɛ paha-wɛ waɖɛ nɛ pala tʋmɩyɛ Betɛɛlɩ. Pɩnzɩ 5 ɖɛwa pʋcɔ nɛ ɛna ɛzɩma Yehowa cosi ɛ-adɩma yɔɔ yɔ. Ɛyɔɔdaa se: «Yehowa kpaɣ alɩwaatʋ ndʋ nɛ ɛwɩlɩ-m tɔm sakɩyɛ nɛ ɛsɩnɩ-m nɛ manpɩsɩ Krɩstʋ tʋ kɩbanʋ nɛ pɩkɩlɩ. Pɩɩpɔzaa se mantaa-ɩ liu nɛ pɩkɩlɩ. Pɩɩpɔzaa se mantɩlɩ ɛzɩma pɛkpɛlɩkɩɣ Bibl camɩyɛ yɔ nɛ pɩkɩlɩ. Nɛ pɩɩpɔzaa se mehiɣ taa leleŋ siŋŋ, taa leleŋ weyi ɛɛlɩɣnɩ wɛtʋ ndʋ tɩ-taa ɛyʋ wɛɛ yɔ tɩ-cɔlɔ yɔ.» Pʋwayɩ paha Janice nɛ ɛ-walʋ waɖɛ se pala egeetiye yɔɔ cɔnʋʋ tʋmɩyɛ. Janice maɣzɩ alɩwaatʋ ndʋ tɩɖɛwa yɔ tɩ-yɔɔ lɛ, ɛyɔɔdɩ se: «Yehowa cosi ma-adɩma yɔɔ, ɛlɛ ɛtɩtɩŋnɩ nʋmɔʋ ŋgʋ mamaɣzaɣ yɔ kɩ-yɔɔ. Pɩɩkpaɣ alɩwaatʋ sakɩyɛ pʋcɔ nɛ mana se ɛzɩma Yehowa cosi ma-adɩma yɔɔ yɔ pɩɩkɛnɩ kʋjɔʋ kɩbaŋʋ siŋŋ, ɛlɛ man-taa wɛ leleŋ se mana ɛ-sɔɔlɩm nɛ ɛ-camɩyɛ lakasɩ.»

15. Nabʋyʋ taa, ɛbɛ yɔɔ pɩpɩzɩɣ nɛ pɩpɔzɩ se ɖɩtaapɔzɩ nabʋyʋ ɖeyi ɖeyi ɖa-adɩma taa? (Cɔnɩ ɖɔɖɔ kɩlɛmɩŋ.)

¹⁵ Tɔm pɔzʋʋ 3 ñɩmbʋ yɔ: «Ɛzɩ manpɩzɩɣ nɛ mantasɩ tɩmʋʋ nabʋyʋ yɔɔ?» Pɩwɛ ɖeu se ɖɩtɩmɩ nɛ ɖɩpɔzɩ nabʋyʋ ɖeyi ɖeyi. Ɛlɛ nabʋyʋ taa, pɩpɩzɩɣ nɛ pɩkɩlɩ ɖeu se ɖɩtaakɩlɩ pɔzʋʋ nabʋyʋ ɖeyi ɖeyi ɖa-adɩma taa. Ðɩnɛ ɛlɛ ɖɩpɩzɩɣ nɛ ɖɩtɩlɩ mbʋ Yehowa sɔɔlaa se ɖɩla yɔ. Iyele nɛ ɖɩkpaɣ koobu halɩñɩnʋ weyi ɛɛtɩmnɩ Yehowa se ɛsɩnɩ-ɩ nɛ ewolo Kewiyaɣ tɔm susuyaa sukuli yɔ ɛ-kɩɖaʋ. Ɛñɩnaɣ se ewolo sukuli ŋgʋ nɛ pɩsɩnɩ-ɩ nɛ ewolo ɛɖʋ nesi ɖenɖe pɩpɔzʋʋ tɔm susuyaa nɛ pɩkɩlɩ yɔ. Ye mbʋ, alɩwaatʋ ndʋ ɛɛwɛɛ nɛ ɛtɩmɩɣ se payaa-ɩ nɛ ewolo sukuli ŋgʋ yɔ, ɛpɩzaɣ ɖɔɖɔ se ɛpɔzɩ Yehowa se ɛsɩnɩ-ɩ nɛ ɛna nʋmɔŋ lɛɛŋ weyi ɩ-yɔɔ ɛpɩzɩɣ ɛtɩŋna nɛ ɛwalɩsɩ ɛ-Ɛsɔ sɛtʋ tʋmɩyɛ yɔ. (Tʋma 16:​9, 10) Pʋwayɩ, pɩsa nɛ ɛla mbʋ pɩlakɩ nɔɔ kʋɖʋmaɣ nɛ ɛ-adɩma yɔ lɛ, ɛpɩzɩɣ nɛ ɛpɔzɩ e-egeetiye yɔɔ cɔnɩyʋ nɛ ɛna se ɛgbɛyɛ naɖɩyɛ wɛ pɩ-cɔlɔ nɛ pɩpɔzʋʋ-ɖɩ nʋmɔʋ lɩzɩyaa nɛ pɩkɩlɩ yaa we. Yaa ɛpɩzɩɣ nɛ ɛma ɛgbɛyɛ piliŋa nɛ ɛna se le pɩpɔzʋʋ Kewiyaɣ tɔm susuyaa nɛ pɩkɩlɩ.e

16. Ɛbɛ pɩwɛɛ se ɖa-taa ɛtɛmna?

¹⁶ Ɛzɩ ɖɩkpɛlɩkʋʋ yɔ, ɖa-taa pɩzɩɣ nɛ pɩtɛ se Yehowa kaɣ cosuu ɖa-adɩma yɔɔ nɛ sɔɔlɩm nɛ ɛzɩma ecosuu yɔ pɩwɛɣ siɣsiɣ. (Keɣ. 4:3; Iza. 30:18) Nabʋyʋ taa Yehowa eecosuu-ɖʋ ɛzɩ ɖɩmaɣzʋʋ yɔ. Ɛlɛ paa ɛzɩmtaa lɛ, ɛkaɣ welisuu ɖa-adɩma. Ɛsɔɔlɩ-ɖʋ pɩdɩɩfɛyɩ. Nɛ ɛɛkaɣ-ɖʋ yebu kpa. (Keɣ. 9:10) Ye mbʋ wolo pɩ-yɔɔ nɛ ‘ŋtaɣ-ɩ liu alɩwaatʋ kpeekpe’ nɛ ŋkuli ña-laŋɩyɛ nɛ ŋheyi-i ña-taa tɔm.—Keɣ. 62:8.