Kɩdɛkɛdɩm mbʋ you kɔŋna yɔ
Yoŋ kɔŋnɩ kala sɔsɔna ɛyaa mba itukuuna yɔ pɔ-yɔɔ siŋŋ. Sɔɔjanaa nɛ ɛyaa lalaa mba you tukuuna yɔ, pasɩm kaɖɛ nɖɩ you kɔŋna yɔ camɩyɛ.
SƆƆJANAA
«Paa ɛzɩmtaa lɛ, ŋnaɣ ɛzɩma pakʋʋ ɛyaa yaa ɛzɩma ɛyaa mʋʋ heŋ siŋŋ yɔ. Ñe-wezuu wɛ kaɖɛ taa paa ɛzɩmtaa.»—Gary, Krandɩ-Pretaañɩ.
«Malɩfa pɛ kaamʋ men-siɣye wayɩ nɛ mɛ-ɛsɩndaa, nɛ mana pakʋ ɛyaa sakɩyɛ, pɩkpɛndɩnɩ piya nɛ akpadɩyaa. You yeba nɛ maatasɩɣ nɩʋ ɛyaa siziŋ nɛ paa mana sɩɖʋ yɔ, piiheyiɣ-m natʋyʋ.»—Wilmar, Kolombii.
«Ye pɔtɔ nɔɔyʋ malɩfa ñɛ-ɛsɩndaa yɔ, paa ɛzɩmtaa pɩwɛɣ ña-lɩmaɣza taa mbʋ. Ŋwɛɣ nɛ ŋnaɣ ɛyʋ ɛnʋ nɛ ŋnɩɣ ɛ-taŋ paa ɛzɩmtaa ña-lɩmaɣza taa, ɛwɛɛ nɛ ɛnɩɣ siziŋ. Ŋŋsɔʋ ɛyʋ ɛnʋ ɛ-yɔɔ kpa.»—Zafirah, Etaazuunii.
ƐYAA LALAA MBA YOU TUKUUNA YƆ
«Pɩlakaɣ-m ɛzɩ maapɩzɩɣ kpa nɛ mantasɩ nɩʋ leleŋ yɔ. Sɔɔndʋ kpaɣaɣ-m se pɩtaakɛdɩnɩ nɛ pakʋ-m, ɛlɛ kɔzɩ kɔzɩ lɛ sɔɔndʋ kpaɣaɣ-m se pɩtaakɛdɩ nɛ pakʋ mɔ-hɔʋ taa mba nɛ man-taabalaa.»—Oleksandra, Ukrɛɛnɩ.
«Sɔɔndʋ kpaɣaɣ-ɖʋ kpem mbʋ pʋyɔɔ yɔ pɩɩwɛɛ se ɖɩpɩlɩ nɛ ɖɩɖaŋ kpaɣnɩ ɖoo taa ñɩɣtʋ 2 yɔɔ nɛ pɩkɔɔ pɩtalɩ ɖoo taa ñɩɣtʋ 11 yɔɔ. Nɛ ɖɩɩnawa se malɩfa pɩyɛ naɖɩyɛ pɩzɩɣ nɛ ɖɩmʋ ɖa-taa nɔɔyʋ kɛlɛʋ yem paa ɛzɩmtaa.»—Daler, Tajikisɩtaŋ.
«Pakʋ ma-lʋlɩyaa you taa. Piyeba nɛ manpɩsɩ Soliɣa nɛ nɔɔyʋ taawɛɛ se ɛhɛzɩ ma-laŋɩyɛ nɛ ɛcɔnɩ mɔ-yɔɔ.»—Marie, Ruwandaa.
Ɛyaa mba ɖɩyɔɔdɩ pɔ-tɔm nɛ pɩɖɛɛ yɔ, paa you kaayeba nɛ panɩɩ siziŋ yɔ, pʋwayɩ pehiɣ laŋɩyɛ hɛzʋʋ. Pɩtasɩ lɛ, pa-taa tɛma se pɩkazɩ pazɩ lɛ, yoŋ tɩŋa kaɣ sɩʋ tɩnaa. Feŋuu Tilimiye takayaɣ kanɛ, kakaɣ tɩŋnʋʋ Bibl yɔɔ nɛ kalɩzɩ-ɖʋ ɛzɩma pɩkaɣ labʋ mbʋ yɔ pɩ-taa.